Nsaki 1 - BII BILA

Yilɔɔlan

¹ Ya Nsaki, vana baala Hala-o a vana baala Maalii Yeesu Krista-o co sɛbɔɔ ho sɛvaa ni, le poloma tɔ́ a mamiɔmma co ma sɛŋianndan vanaa-mangalaa-isɔɔa tɛɛn-ndan, i yil niaa!

Laalanndo a kɔlkaloo

² Puapilɛa nia, la cɔ̀ tɔɔndannda niaa co keiyo nin-ndan kpow maa dɛnɛ kɔlkɛndɛ bɛndu,

³ mì la sínà maa tɔɔndan niaa kɔlɔɔ solio, ndu koam biuvɔnndo ni.

⁴ Kɛ fɔ mì biuvɔnndo siow baala ndɔɔ peelu kpow, haliko mi la peelun, mì la tiwnun, o kon ɲɛ-ɲɛ ve niaa lepɛŋ te.

⁵ Te vana pum nɔ kɔlkalu niaa tɛɛn te, mɛɛ o ɲuna Hala yɔngù vannda kpow ɲɔɔn a kɛndɛi-yo, o co a isɔw le, o kon mò yɔngun ndu.

⁶ Kɛ o ɲuna ndu a laalanndo, o va a kiisan te, kani vana kiisan pɛ, ndu co macoaa maa tindile mɛmma ihɛlten, le hoeiye co hiiloo a biiŋoo len.

⁷ Vana vaa lende yiyan te maa o co ɲɛ sɔla Mɛlɛka o ba.

⁸ Kani vana kɔlta tiɔndo co kon ni, vana co yili o kelala ndɔlan kpow nin too.

Bala fondolan a bolofaa

⁹ Puapilɛ tuisin taw-vo bɛnda mò dɔwnun ɲaale le heelu Hala heelunin ndu-o,

¹⁰ mì vana bolofaa ndu kuundian le tuisi Hala co ndu-o, kani o hiawnin mɛɛ fúla billo la hiaw nuaa yɛ.

¹¹ Kani paalen le fula pɛ, hangul tuw-tuwvo nin, billo simbulun. Fúlan la deli, naŋɔɔ ndɔɔ tambu. Lende koni vana bolofaa bɛɛ hiawnin a dɛnnda ndɔlan ni.

Biuvɔnndo o tɔɔndanndo nin

¹² Dɛnɛ kɛndɔɔ co le vana bìwnùn o tɔɔndanndo nin-ndo, kani o cii pɛ tɔɔndanndo sɔla, o sɔla mɔsil lemasa cindaa, o Mɛlɛka yiilu vanaa kaola ndu-a kpemaa-o.

¹³ Te tɔɔndanndo komal pɛ vanndo, o dimi le dɔ́ɔ́ aa: «Hala co ya tɔɔndanndo nuaa ni». Kani vana tɔɔndan Hala le dɛnɛ vɔɔndo tosaa le, Hala pila bɛɛ tɔɔndan vana le.

¹⁴ Kɛ letùú yeemɛi co vana-vana biyɔɔ, mì i va naa dɛɛniaa-o tɔɔndanndan la co naa komallo ni.

¹⁵ Te yeemɛi cua pɛ folio, i velu hakio. Te hakio kendu pɛ, o kom piɔ́mndo.

¹⁶ Puapilɛa nia ya kaola-a, niaa pila palan te.

¹⁷ Ɲɛm-kéan kɛndɔn kpow a ɲɛm-kéan peelunndon kpede, coocoo n co fulaa ni, Pau Hala o ba. Vana cɔw ɲɛ-tengaa kpow-vo. Nduyɛ, o màngàlannin te, hali ɲɛ-pɔmbɔ.

¹⁸ O velu naa a sɔɛi toɲɛi mɛɛ hɛnan ndɔɔ co yɛ, haliko mi n va vanaa tasea o ɲɛm o cɔw-von tɛɛn.

Le sɔɛi tueyɔɔ a biyɔɔ

¹⁹ Puapilɛa nia hɛnan ya-a, la sinà pɛɛngu maa vanaciee oo vanaciee bɛnda mò keleŋa tueyɔɔ, kɛ o keleŋa isɔɔ le, o yala kɔl tuulu le.

²⁰ Kani kɔltuw vanacieo tosa dɛnɛ sandaa Hala-o le.

²¹ Lelan, la màl dɛnnda nɔɔlɛilan a dɛnnda kɔlvesɛila bɛndulan kpow o fɛ́ɛ́-fɛ́ɛ́o nin, mì la bii sɔɛi tɔlnun niaa o lakɔl-le a sɔɛi nɔ̀la mì i baŋa yoomula niaalan-nde.

²² La va vanaa biyaa isɔɔa, la vá vanaa yaŋnannda daama le. Te la yaŋnun pɛ daama, mɛɛ niaa pila co huinɔnndo ni.

²³ Kani te vanndo va pɛ sɔɛi yaŋnɔnndo daama, kɛ mò ve ndi biyɔɔ le, ndu co ko maa langbanɔ tofán o tofanndo nin-ndo.

²⁴ Mɛɛ o cii tofan, mó kɔannun, mó kɔ pɔɛɛnun dɔ́ɔ́ mɛɛ o va yɛ.

²⁵ Kɛ vana-vana yɔngun pɛ, mò pɛɛku tɔŋ peelanndo, tɔŋ ihɔɔyaa, mò kela lecoo a biuvɔnndo, o co ka le ndu tueyɔɔ mò pɔɛɛnun te, kɛ mò kela lecoo ɲɛkɛndɛi, vana kon sɔlanin dɛnɛ kɛndɔɔ o dɛnnda ndɔlan nin.

²⁶ Te vanndo pum co pɛ cɔnnɔnndo maa vana biilaa Hala-o o co ni, kɛ mò bii diɛɛmule ndɔlen te, mò pala kɔl ndɔɔ, mɛɛ kaannde vana kon le connun fúú.

²⁷ Dina diandaa, o nɔ sɔŋ Hala Fuɲaa o hɔl too, ndu co le vííya a vanlaandua vii piaandua-a yilɔɔ le sangala ndalan ni, a vana pila mandanndo le dɛnnda nɔɔlɛila ceendo ho.