Nehemi 8 - BII BILA

A dimi sɛbɛ tɔŋndo má tɛɛsiaa ndu

¹ O kon mí vannda kpow cuungian o lepilɔɔ o fonda co o Dio-mamɛnndo hɔl-ndɔ-o. Má dimul Ɛsdras vana sɛvaa latɔŋndo le hunɔɔ a sɛbɛ tɔŋ Moise-o, tɔŋ Mɛlɛka hendul Israɛlla-o.

² Mí Ɛsdras vana-solia-lasálàá hun a sɛbɛ tɔŋ kon vannda kpow o hɔl, vanpiaandua, vanlaandua a vanáà tiwba le tɔŋndo bilaa biyɔɔ-a kpow. Ɲinkon va paale taselen o paangii ŋɔmmɛwndɔɛi nin ni.

³ Mí Ɛsdras lo isisi sɛbɔɔ dimio o Dio-mamɛnndo hɔl-ndɔ vanpiaandua, vanlaandua a vanáà tiwba le tɔŋndo bilaa biyɔɔ-a o hɔl, kandɔɔ idiiyo háá mí paalen le tiiya o pol. Vana-vana va nilan yaŋɔɔ ɲɛkɛndɛi lɔ́ɔ́ sɛbɛ tɔŋ kon va diminndo-o.

⁴ Ɛsdras vana sɛvaa latɔŋndo va isisi o bàndóó coo, o ndáà baŋ le dɛnɛ kon-ndo. Matitia, Sema, Anaya, Uri, Hilkiya a Maseya a va isisi ndu o ba kɛndɔɔ coo, mí Pedaya, Mikaɛl, Makia, Hakum, Hasbadana, Sakari a Mesulam nda va isisi ndu o ba mɛllo coo.

⁵ Ɛsdras va isisi nɛɛ yesa-a vannda kpow o hɔl, mí vana-vana ca ndu sɛbɔɔ kumbio. Fɔ́ɔ́fɔ̀, mí nda kpow a can o lepilɔɔ.

⁶ Mí Ɛsdras mel Mɛlɛka, ó co Hala bɛndoo-o balika, o kon mí vannda kpow a va cɛlɔɔ a balan heeloo aa: «Amiina!Amiina!» O kon má tundun má baŋ vulan Mɛlɛka o hɔl le ndu biiloo.

⁷ Mí vana-vana lo isisi o fonda ndɔɔ, mí Yosue, Bani, Serebia, Yamin, Akub, Sabetai, Hodia, Maseya, Kelita, Asaria, Yosabad, Hanan, Pelaya a leviia a va vannda tɔŋndo tɛɛsiallo.

⁸ Má va sɛbɛ tɔŋ Hala-o dimio fɛ́ɛ́-fɛ́ɛ́ a ndu tɛɛsiaa, haliko mi vannda ndáà bii ɲɛ dimin lenin-ndo bila.

⁹ Mɛɛ vannda tuei sɔɔn tɔŋndo dimi-on, mí nda kpow a del a caŋndo. Mí Nehemi masa ibungaa, Ɛsdras va vana-solia-lasálàá a vana sɛvaa latɔŋndo-o a leviaa va vannda pɛɛkulan yɔngoo-a dimul nda aa: «Paalen nden hau, paale diandaalen le co le Mɛlɛka Hala niaa ni. Lelan la va hau a hɔlaa yiyaa le, la caŋ te!»

¹⁰ Mí Ɛsdras dimul vannda aa: «La kɔ mì la de ɲɛdiaa sɔvɛɔ, mì la kol mɔima sɔvɛ-sɔvɛan, mì la ke vanaa nɔ ɲɛdiaa o bɛɛndiaa le-a. Kani paalen nden hau, paale diandaalen le co le Mɛlɛka naa ni. La va a kɔltambɛi le. Bau kɔlkɛndɛ Mɛlɛka-o, ndu co yoomuma niaan ni.»

¹¹ Mí leviia ɲulul vannda kpow kɔltan, má dimul nda aa: «La mei! Paalen nden, paale diandaalen le co ni. La va a kɔltambɛi le!»

¹² O kon mí vannda kpow a muungu o la nda lo le ɲɛdiaa dioo a kolɔɔ, má ke vanaa nɔ ɲɛ le-a ɲɛdiaa, má dɔawnun ɲaale taw-taw. Má bii diom dimulun nda-o bila.

Kafo lakùùo

¹³ Diimandɔɔ, mí bolii lapangɛi Israɛlla kpow, vanaa-solia-lasálàá a leviia a cuungian o Ɛsdras vana sɛvaa latɔŋndo lo, le sɔɔn sɛvan o sɛbɛ tɔŋndo nin-ndon bilaa biyɔɔ ɲɛkɛndɛi.

¹⁴ Má komal sɔɛi pum o tɔŋ Mɛlɛka ndóò yɔngu kon Moise le Israɛlla-o-o nin maa Israɛlla bɛnda ma va icali o kùùlan bɛngu o palɛi kafo lakùùe kpow nin, kafo tosan o paangii ŋɔmmɛwndɔɛi nin-ndo pɛɛn.

¹⁵ Sɔɛi ken ndíì bɛnda le yondanndo o kobilan kpow nin a Yerusalɛm ciee aa vannda kpow a kɔ o pembei coo le pei oliviee nda tɔl-lo, pei oliviee yondoo, pei yɔm Mirte, siɔ̀ɔ́lan a yɔmii puiyɛi bɛɛsiaa, le kùùlan tangullo.

¹⁶ O kon mí Israɛlla kɔa, má nuwviaa ɲɛm mun le kùùlan tangullo. Mí a pum tangul kùùla ndalan o cɛila ndalan sɛmtɛ, a pum o la nda lo bɛɛ, a pum o bɛ́ɛ̀ Cɛi-Hala-o, a pum o fonda Dio-mamɛnndo, a pum yɛ vɛlɛ o Dio-Efraim-ndo sondoo.

¹⁷ Mí vanaa fula kan o cɛlen nin-nda kpow a tangul kùùlan, má cal lenin. Mí kon yɔŋnun dɛnɛ ɲaale bɛndoo, bau kabi o paale Yosue po Nun-ndo len Israɛlla ndáà mɛɛlu kafo kon tosa ni.

¹⁸ O palɛi kafoei kpow nin, kandɔɔ o paale taselen háá o paale mɛɛlaalen, a va bungɛi ipilɛ dimio o sɛbɛ tɔŋ Hala-o nin maa mɛɛ o sɛvan yɛ. Mí kafoo tosan o palɛi ndii ŋɔmmɛw bɛngu. O paale ŋɔmaandɔlen coo, má tosa bɔŋan lekaando mɛɛ ndóò sɛvan yɛ.