Nehemi 5 - BII BILA

Nehemi kuuna dɛnɛ sandaa lepɛŋndo

¹ «Paale pilɛ, mí vanaa pum o Israɛlla tɛɛn, nda laandaa ndaa cɛɛŋun a puapilɛa ndaa Yuifia.

² Mí a pum a va dimio aa: ‹Poaa naa, cuavaa naa laandua a naa pila, n co sɛ́lɛ́. N yeema mì n sɔla maalon le dioo yɔŋii naa n vu.›

³ Mí a pilla nda va dimio aa: ‹Tuma yiaan ma co hoo-o, n malnun ciɛɔn naan, nakɔla n'rɛsɛnnda naalan a cɛila naalan o landon nin le maalon sɔlaa.›

⁴ A pum nda va vɛlɛ dimio aa: ‹Le mulu masaa malɔɔ, n cua volion mí n lendul ciɛɔn naan a nakɔla naala n'rɛsɛnndan.

⁵ Nduyɛ, falun pilɔn naa n nɔ naa puapilɛa naa ni. Ɲɛ pilɔɔ cuavaa naa a cuavaa ndaa co ni. Kɛ nduyɛ n co poaa naa a cuavaa naa laandua malɔɔ o cɛlen nin, cuavaa naa laandua pum co nin lenin, n nɔ lɛ mɛ̀ɛ́-mɛ̀ɛ́ tosaa le. Le caanda ciɛɔn nan a nakɔla naala n'rɛsɛnndan la co nin ni.›

⁶ Lɔ́ɔ́ ya tuei cɛɛŋɔnnda ndala lan-ndo, mí tambu kɔllo taw-taw.

⁷ Mí soaa vanaa bɛndua a vanaa kialaa n'yamaa aa: ‹Vɛ mì la va kueelan malɔɔ puapilɛa niaa o ba le tɔnɔɔ sɔlaa?› O kon kɔɔli mí veelu nda kpow,

⁸ mí dimul nda aa: ‹Naa pila n baŋa puapilɛa naa Yuifia nɛɛ nda va a pisiaa o cɛlen nin vanaa celennda o ba-a ni. Kɛ niaa niaa, la co puapilɛa niaa piisuanndo niaa pila o laba.› Má mei kpili, a sɔla mɛ̀ɛ́-mɛ̀ɛ́ mulia le.

⁹ Mí dimi vɛlɛ aa: ‹La co ɲɛ kɛndɛ tosa le dɛ! O siòòŋii Hala naa nin niaa bɛnda le kelaa ni, yɔŋii siɛmbulan la bii naa vanaa súúla celennda o hɔl, yaamɔaa naa pɛɛn.

¹⁰ Naa bɛɛ, ya pila, vanaa nia baalaa a puapilɛa nia, mí n dɔnda vannda volion, mí n dɔnda nda maalon. Kɛ n mal nda le kueela lan.

¹¹ Lelan hau hauve he, la mingi nda ciɛɔn ndan, nakɔla n'rɛsɛnnda ndalan a cɛila ndalan o laba. La nuwviaa vɛlɛ tɔnɔ celen o ɲɛm niaa dɔnda nda-on coo le, o va n'voli, o va n'malu, o va mamɔi te kon te macuɛi.›

¹² Má muli aa: ‹N co tosa mɛɛ n dimi yɛ, n co nda ɲɛm ndan mingul, n suuku lɛnin nda le.› O kon mí veelu vanaa-solia-lasálàá, má hun mɛnan vanaa-solia-lasálàà kan o hɔl le lou o diomnde ndalen coo.

¹³ O kon kɔɔli, mí koaŋ bɔɔle doma ni bɛndoo, mí dimi aa: ‹Màá Hala koŋ vanaa lonin o diomnde ndalen coo le-a, mò faŋa nda o cɛila ndalan nin a o bolofaa ndaa coo, maa mɛɛ ya tosa a domaa nuu nuaa yɛ. Màá vanaa kan a lo fondo!› Mí vannda kpow a cɛl aa: ‹Amiina!› Má mel Mɛlɛka balika. Mí vannda lo o diomnde ndalen coo.

¹⁴ Kandɔɔ o vɔsi bidiinndɔɔ kɔlan háá o vɔsi beleyaa a o diinndɔɔ, mí masaa Artasɛrsɛs suili ya masa ibungaa o tàndá Yuda-o coo. O vosila tɔ́ a latiɔnnda lan bɛngu, puapilɛa nia a ya pila, n di ɲɛm lemasa le.

¹⁵ Nduyɛ masaa n'bungaa cal-la tase-a va vannda delɔɔ coo le muloo malɔɔ a ɲɛm dian a á mɔiyan. Handɔɔ o kon coo, má va nda volin latámán belehiɔɔlu biyɔɔ coo le bolle vana pilɛ. Hali buɛyaa ndaa va nin vannda masalen tosaa coo. Kɛ ya yɛ, i tosa lende le, kani siòòŋii Hala-e va ya.

¹⁶ O kon kɔɔli, vanaa va ya o ba bɛngu-a a ya pila, mí n sɔɔnguu le kpakio mingio cɔvɔɔ. I kindin mì pendu lelɛŋ le ya pila le.

¹⁷ Yuifia a vanaa kialaa n'yamaa kɛmɛ a beleŋuɛɛnu va baloo dioo o ya lo cɛinin ni. Handɔɔ niko o vanaa celeŋaa va fulaa o vanaa-mangalaa-isɔaa celennda tɛɛn-nda coo.

¹⁸ Lepalaa-lepala, nawvo o pilɛ, saa kɛndɛ-kɛndɛa a ŋɔmpum a sɔɔa ndáà yaw o ya lo cɛinin ni. O palɛi tɔ́ oo palɛi tɔ́ bɛngu, mɛɛ mi ndáà bɛɛndiaa mɔima kɛndɛ-kɛndɛan taw. Kɛ a kon kpede, i bii ɲɛ-ɲɛ vana o ba le, kani baalaa va vannda saangiaa.

¹⁹ Éé Hala nuu, yiyan ya coo mà tuinun ya iɲíí le dɛnnda ya tosa le vannda ha kpow lan!»