Nehemi 3 - BII BILA

Vanaa cɔavaa kpaki-a

¹ O kon mí Eliasib bolle vanaa-solia-lasálàá nda puapilɛa ndɔa vanaa-solia-lasálàá can, má tangul Dio-n'saa, má sɔaa ndu Hala o ba, má luei ndu koŋndan. Má sɔaa vɛlɛ kpakio Hala o ba kandɔɔ o cɛi coocoo Lakɛmɔɔ háá o cɛi coocoo Hananeɛl.

² Vannda Yeriko va tangullo Eliasib ikɛi, mí Sakur po Imri-o bɛɛ va nda tangullo ikɛi.

³ Mí poaa Ha-Senaa-a nda toosiaa Dio-n'suwvo. Má toosiaa kèédei, má luei ndu koŋndan, sɔkɔma n'cilinndan a ɲɛla kindaa diolan.

⁴ Meremɔt, po Uri-o, po imama Hakɔt-o va baalaa kan ikɛi ni. Mí Mesulam po Berekia-o, o fula o polale Mesesabeɛl-ten nin-ndo va baala kan ikɛi. Mí Sadɔk, po Baana-o ndu va baalaa kan ikɛi.

⁵ Mí vanaa fula Tekoa-a va baalaa kon ikɛi, kɛ simlacia ndáà cɛl le tuisinndo vanaa va baalaa simndan laci-a o labɛngunin te.

⁶ Mí Yoyada po Pasea-o a Mesulam po Besodia-o nda va dio paandoo bɛɛndiaa, má toosiaa kèédei, má luei koŋndan ndon, má baŋ sɔkɔan a ciliŋun bɛndun vana kanda dioo-on.

⁷ Vanaa va baalaa nda ikɛi-ya va Melatia fula Kabaɔn-ndo ni, handun niko Yadon fula Meronɔte-o a vanpiaandua Kabaɔnnda pum a vanpiaandua pum fulaa Mispa. Nda kpow masa ibunga va peo leelo a ba paalen le del-lo-o ndóò vem nda ni.

⁸ Mí Usiɛl vana dindia n'sianio, fulaa o polale Harhaya len nin, nda Hanania vana bɛɛndiaa cuɛima cun kɛndɔɔ va baalaa nda ikɛi. Má mingi Yerusalɛm tangul háá nɛɛ kpakio ndóò tongu-a.

⁹ Mí Refaya po Hur-o va baalaa nda ikɛi, Hur kon va masalen tosaa Yerusalɛm baa pilɔɔ kpow coo ni.

¹⁰ Mí Yedaya po Harumaf-o va baalaa nda ikɛi o cɛi ndɔɔ hɔl-ndɔ. O kon mí Hatus po Hasabnia-o va baalaa ndu ikɛi.

¹¹ Mí Malkia po Harim-ndo, nda Hasub po Pahat-Moab-o bɛɛndiaa kpakio kpengei pilɛi a cɛi coocoo latóndó leyinndo.

¹² Mí Salum po Hallɔhɛs-o, ó va simlacinɔɔ Yerusalɛm baa pilɔɔ coo-o tosa baalaa kan i ikɛi nda cuavaa ndɔa laandua.

¹³ Mí Hanun a vanaa fula Sanoa-a nda bɛɛndiaa dio co a ba Bóllo-o. Ndáà ciiyo ndu toosiaa, má luei ndu koŋndan, má handu ndu sɔkɔan, a ciliŋun vana kinda dioo-on. Handɔɔ o kon coo, má cɔaw vɛlɛ kpakio dunndo vàá pilɛ (1 000) háá tiiyaa o Dio-puulu-sállo.

¹⁴ Mí Malkia po Rekab va masalen tosaa o lɛŋnde ibungalen Bɛt-Hakerɛm coo-o bɛɛndiaa Dio-puulu-sállo. Mó luei kèédei, mó handu sɔkɔan a ciliŋun vana kinda dioo-on.

¹⁵ Mí Salum po Kɔl-Hɔse-o, ó va masaa o tàndá Mispa-o coo-o ndu bɛɛndiaa Dio-pee-lebollo. Mó cɔaw ndu, mó handu koŋndan, sɔkɔan a ciliŋun vana kinda dioo-on. Mó mingi vɛlɛ cìì cɛi va o dalaa Siloe ikɛi-ye cɔvɔɔ, cìì cɛi va o nakɔɔ masaa nin-nde, tolɔɔ háá o kobi David-o nin.

¹⁶ Ndu cɔnɔnndo, mí Nehemi po Asbuk-o, ó va masaa le tàndá tálá Bɛt-Sur-o va baalaa cɔnɔnndo o sɛila David lan keiyo o dala mandaa mamɛn ndáà cɔw-vo, kɔlan tiiyaa háá o cɛi kuubaa cɔwva.

¹⁷ Mí Rehum po Bani-o, Hasabia, simlacinɔɔ le bungɛi talɛi lɛŋnde Keila len a tosa baalaa nda kɔɔli. Leviia nda va ni.

¹⁸ Mí puapilɛa ndaa tosa baalaa nda ikɛi. Nda yɔŋnun haa ni: Bavai, po Henadad va masaa o tàndá tálá Keila-o coo-o,

¹⁹ a Esɛr po Yosue-o, ó va simlacinɔɔ Mispa-o, ndu va kpakio baa pilɔɔ bɛɛndiaa ndu ikɛi a ba sɔngilen o cɛi ndáà kɛsi ɲɛm cɔwvon nin-ndo ikɛi.

²⁰ O ndu kɔɔli, mí Baruk po Sabai-yo va kpakio bɛɛndiaa baa pilɔɔ a dialun fulan taw. Kandɔɔ o sɔngilen kɔlan háá o dio cɛi Eliasib-o, Eliasib bolle vanaa-solia-lasálàá pɛɛn.

²¹ Ndu cɔnɔnndo, mí Meremɔt po Uri-o, po imama Hakɔt-o, ndu tosa baalaa kandɔɔ o dio cɛi Eliasib-o kɔlan háá o mɛɛlula bɛ́ɛ̀ ndɔɔ.

²² Mí vanaa-solia-lasálàá fula o tàndá balu Yerusalɛm-ndo nin-nda va baalaa ndu ikɛi.

²³ Mí Bɛnyamɛn nda Hakub va baalaa tosaa o cɛi ndaa dangala. Nda cɔnɔnndo, mí Asaria po Maseya-o, po imama Ananiya-o va baalaa o cɛi ndɔɔ ikɛi.

²⁴ Mí Binnui po Henadad-o va kpengei pilɛi bɛɛndiaa ndu laci, kandɔɔ o cɛi Asaria-o, keiyo o kolokoloo, kɔlan hiovɔɔ háá o sɔngilen.

²⁵ Mí Palal po Usai-yo ndu va baalaa tosaa kandɔɔ o sɔngilen kɔlan tiiyaa háá o cɛi coocoo va o bɛ́ɛ̀ lemasaa laci-o, bɛ́ɛ̀ va o cɛi kaasoo ikɛi-yo. Pedaya, po Pareɔs-o va baalaa tosaa ndu ikɛi.

²⁶ Mí buɛyaa va icali o pembei Ofɛl coo-a nda tosa baalaa kandɔɔ o cɛi coocoo va a ba paalen le can-ndo-o, kɔlan tiiyaa háá o Dio-pee-lebollo. O Cɛi-Mɛlɛka-o nin ndáà tosa baalaa ni.

²⁷ Mí vanaa fula Tekoa-a nda tosa baalaa cɔnɔnndo o cɛi coocoo bɛndoo kɔlan tiiyaa háá o kpaki va o pembei Ofɛl coo-o.

²⁸ Vanaa-solia-lasálàá va baalaa tosaa o Dio-soa a maluaŋ, vana-vana o cɛi ndɔɔ hɔl-ndɔ.

²⁹ Mí Sadɔk po Immɛr-o va baalaa tosaa nda laci o cɛi ndɔɔ hɔl-ndɔ. Semaya po Sekania-o va baalaa tosaa ndu laci a ba dio paalen le can-ndo. Semaya kon va kpalilnɔ cumulaa dio kon ni.

³⁰ O ndu kɔɔli, mí Hanania po Selemia-a nda Hanun po ŋɔmpumndɔ Salaf-o a mingi kpakio bɛɛndiaa baa pilɔɔ. Mí Mesulam po Berekia-o ndu va baalaa tosaa o cɛi ndɔɔ hɔl-ndɔ.

³¹ O kon kɔɔli, mí Malkia vana dindia n'sianio tosa baalaa háá o cɛila buɛiya a yulaa, o dio Mifkad hɔl-ndɔ, kɔlan háá o cɛi coocoo va o kpakio coo o sɔngilen-ndo.

³² Mí vanaa dindia n'siania a yulaa nda tosa baalaa kpaki va cɔnɔnndo o cɛi cumulaa va o cɛi coocoo va o sɔngilen-ndo a Dio-n'saa tɛɛn.

Yaamɔa yeema le baala tangulaa kuunaa

³³ «Telen Sanballa tuei maa n co kpakio mingio cɔvɔɔ, mó tuulu kɔllo, mí ɲɔɔ pala ndu taw-taw, mó saan Yuifia mamɔɔ.

³⁴ Mó ɲuna puapilɛa ndɔa a vanaa cɔwva Samari aa: ‹Yɛɛ Yuifia nɔla haa ɲɛ-ɲɛ le-a co yɛ tosaa ho? Vɛ̀ɛ̀ a siownin pá baala ndaa ho paale pum mà solul Hala ndaa sálàlan? Vɛ̀ɛ̀ a nɔlanin pá powta ŋɔɛ lan mí la cuinun-ndan cɔwviaa, mà mingi lan maa paandu?›

³⁵ Mí Tobiya Amɔnnɔ va ndu ikɛi-yo mulul ndu aa: ‹Tangulu kuɛɛ nɛɛ? Hali kàá bɛɛ hel o kpaki nda kon coo ni, o komba.›»

Yuifia dɔw yaamɔaa ndaa danga

³⁶ «Éé Hala naa, yaŋ nilan, kani vannda co naa pɛɛsaa. Mingi nda siɛmbula nda co lan naa tuisio lan nda pila o lebol. Cɛl mì vannda poondiaa ɲɛm ndan nda o laba, mà kɔɛ a nda o biyɔɔ nin o lɛŋnde celen nin.

³⁷ Mal nda haki le tɛɛmbuu ndaa le. Loonunn a haki ndaa le lɔ́ɔ́-lɔ́ɔ̀, kani a co naa yeowlan kpendekele le tùú naa n co kpakio ho mingio tangullo-o.»

³⁸ «Lende naa n mingi kpakio kpow tangul pindo ni, mí n heelu ndu háá tɛɛn, kani naa kpede, vana-vana ndóò hin a kɔl ndɔɔ le baalaa tosaa.»