Nehemi 2 - BII BILA

Piɛile Nehemi len le mulin

¹ «O vɔsi bidiinndɔɔ nin o masale Artasɛrsɛs len bɛngu, o paangii Nisan nin, mɔiyan ma va makɛsiaa ndu masaa Artasɛrsɛs laci, mí cua mɔima man mí yɔngu ndu man. Kabi bɛɛ yáà fula vɔ ndu o hɔl a kɔltambɛiyo le.

² Mí masaa ɲuna ya aa: ‹Vɛ hɔlla ɲaandiaa bɛndoo ho? A co yɛ a nàà le? Yɛɛ nɛ tɛɛmbuu yɛ nɔm kɔllo tɛɛmbuu bɛndoo ho?› Mí siòònde bii ya yaw.

³ O kon mí mulul masaa aa: ‹Masaa, màá va yoomu le fɛɛn a fɛɛn! Kɛ vɛ̀ɛ̀ ya kɛɛ yɛnin kɔllo itambu? Kobi sɛila fuɲaa nia imamaa la co nin-ndo tambu, yinnden le lom koŋnda ndɔlan.›

⁴ O kon mí masaa ɲuna ya aa: ‹Yɛɛ nɛ co yɛ niko bahavɛi nɔmndo?› Fɔ́ɔ́fɔ̀, mì piɛi-yɔ fɔlɔn Hala co o halataala-o.

⁵ O kon kɔɔli, mí mulul masaa aa: ‹Mɛɛ nɔm masaa ce ya vana nɔm baalaa ɲia yɛ, mɛɛ n hini kɔl a ya yɛ, cɛl-la mì kɔɛ o tàndáá Yuda nin, o kobi sɛila fuɲaa nia imamaa la co nin-ndo nin, mì kɔ mingi ndu tangul.›

⁶ Mí masaa lo nɛ́ɛ́ o va icali laa ndɔ ikɛi-ya, mó ɲuna ya aa: ‹Vɛ̀ɛ̀ kpɛ́ɛ́ n kɔ viaw yɛnin ndon? Lɔ́ɔ́ kuɛɛ n co yɛ muungu nanu?› O kon mí masaa cɛl le ya malɔɔ kɔlan, mí yim ndu lɔ́ɔ́ muungaa.

⁷ Mí dimul masaa aa: ‹A yandi masaa, taa cɛl pɛ, sɛva sɛbɛlan ma yɔngu ya, mì masaa n'bungaa co Efrate peo leeloo-a cɛl-la mì hiow háá mì tiiya o tàndá Yuda-o nin,

⁸ mì sɛbɔɔ pilɛ sɛvan vɛlɛ le Asaf, vana mandaa bundɛ masaa, haliko mo ke ya yɔmnde le koŋnda kpaki co o Cɛi-Hala-o ikɛi kpɛɛlun-ndan toosiaa, le kpaki kobio a le cɛi ya vanin nin-ndo.› Mí masaa yɔngu ya sɛbɛla lan, kani Hala nuu va ya ikɛi.

⁹ Mí masaa soli kuubaa cɔwva a vanaa ɲaanun o soa coo-a le ya liilaa. Mí kɔ yoo masaa n'bungaa va Efrate peo leloo-a sɛbɛla lan.

¹⁰ Lɔ́ɔ́ Sanballa Horoniinɔ nda Tobiya Amɔnnɔ, ó va vana ndɔ baalaa-o tuei maa vanndo pum hin le dɛnɛ kɛndɛ Israɛlla-o, má tambu kɔltan taw-taw.»

Nehemi mɛɛndian kpakilan Yerusalɛm

¹¹ «Yaa tiiyaa Yerusalɛm, mí tosa palɛi ndii yáá lon.

¹² O kon kɔɔli, mí can icɔllo a vanpiaandua pum kɔɔli, i dimul vana-vana ɲɛ Hala ndóò soo ya o kɔl le tosaa Yerusalɛm-ndo le. Cɔlu bana-bana celen ve ya o ba le, fɔ o ya pila yáà hel coo-o.

¹³ Mí kei a ba dio Bóllo, mí kɔa a ba Pee tambálakáà, mí kɔa a ba Dio-puulu-sállo, le kpaki tambɛi va Yerusalɛm-ndo mɛɛndianndo a le kɔllo keeliaa o koŋnda ndɔla yinnden le lom-ndan coo.

¹⁴ Mí kei o Dio-pee-lebollo a o Dala masaa ikɛi, fonda ve lɛ le cɔlu ya va o kɔɔ-o hiovɔɔ le.

¹⁵ Icɔl pilɛ kon, mí heelu a ba bóllo le kpakio mɛɛndianndo vɛlɛ. O kon kɔɔli, mí luɛi o Dio bóllo, mí muungu.

¹⁶ Vanaa bɛndua va ciee lon nda bii bila nɛɛ yáà kɔɛ-a le, a sina bɛɛ ɲɛ ya tosa-o le, kani yáà downun-ndɔ Yuifia, vanaa-solia-lasálàá, vanaa bɛndua, kaasoŋaa kɔlkalua kona le. Hali vanaa va le sɔɔn bɛɛndiaa-a, a bii ɲɛ-ɲɛ bila le.»

Nehemi luei vannda yoomuan le kpakio cɔvɔɔ

¹⁷ «O kon, mí dimul nda aa: ‹Niaa pila co cɔu dɛnɛ palaa co naa coo-o! Yerusalɛm tambu, koŋnda ndɔlan la cuu ŋɔ! Lelan, la hun mì n mingin kpakio Yerusalɛm cɔvɔɔ haliko mi siɛmbulan ndan la faŋan nin naa coo›

¹⁸ Mí downun nda niko kona mɛɛ Hala nuu kanda ya yɛ, mí dimul nda vɛlɛ sɔɔn masaa dimul-la-on. Má muli o lepilɔɔ aa: ‹N cɔ̀nnun mì n tangulun.› O kon má lueinan yoomuan o diom nda yii-o coo.

¹⁹ Lɔ́ɔ́ Sanballa Horoniinɔ nda Tobiya Amɔnnɔ, ó va vana ndɔ baalaa-o a Kesɛm Arabunɔ a tuei sɔɔn mún-ndo, má mam naa, má pɛɛsa vɛlɛ naa. Má dimi aa: ‹Yɛɛ niaa co yɛ kon tosaa? Masaa niaa yeema simullo ni?›

²⁰ Mí mulul nda aa: ‹Hala co o halataala-o kenin naa kpaayaa mì n nɔla. Kani vanaa ndɔa baalaa naa n co ni, n co cɔnɔn mì n mingi tangul. Kɛ niaa, la nɔ kɛ nanu le, la nɔ dí le ɲɛ-ɲɛ nanu, la nɔ ɲɛ-ɲɛ vana loonun a niaa o kɔɔ Yerusalɛm te.›»