Nehemi 13 - BII BILA

Dɛnnda mɛɛlaala Nehemi mingi toosiaa lan

¹ «Telen pilɛ kon, lɔ́ɔ́ nda va sɛbɛ Moise-o dimio vannda kpede o hɔl vakpa-o, má tiiya o fondaa pum, o va o sɛvaa lon maa le fɛɛn a fɛɛn Amɔnnda nda Moabua bɛnda mà luɛi o kunda vanaa Hala-a nin te.

² Kani a bii sindɛ Israɛlla le, a ke nda ɲɛdiaa le, a ke nda mamɛm le kolɔɔ le. Mí Moabua hiaw Balaam kɔɔli, má ke ndu volion le Israɛlla dangaa dɔvɔɔ, kɛ mí Hala naa mangala danga kalaa duaa.

³ Lɔ́ɔ́ Israɛlla tuei sɔɛi tɔŋ kon-ndo, má soli mialla kpow nda tɛɛn.

⁴ Kɛ lɔ́ɔ́ telen kon hun tiiya, ndáà cii nin Eliasib, vana-solia-lasálàá hɛli le cɛila pɔmbɔla holnun Cɛi-Hala naa lan hɔlten nɔu coo. Kani vanayɛi kpeekpeii Tobiya-e o va ni.

⁵ Mó ke ndu cɛi bɛndoo pum, nɛɛ ndáà kɛsi ɲɛm-kéan fula o ɲɛm vaan nin-ndon, ansan, a ɲɛm-laandun Cɛi-Hala-o o tasendɔ-a. Lon koni ndáà kɛsi vɛlɛ ɲɛm vanaa-solia-lasálàá, o-tɔ́ndɔ n'mallo, o-tɔ́ndɔ mɔima sɛnɛiyo a o-tɔ́ndɔ macuɛiyo ni, ɲɛm mun va le leviia, vanaa solia n'condua a le kpalilaa cumulaa ladioa ni.

⁶ Lɔ́ɔ́ dɛnnda lan la va tosanndo-o, i ve Yerusalɛm te, kani o vɔsi beleyaa a o tiɔnndɔɔ o masale Artasɛrsɛs, masaa Babilɔn-nden bɛngu, mí yáà muungu ndu ikɛi. Telen bingi hiovɔɔ, mí masaa cɛl-la le muungoo Yuda.

⁷ O kon mí sina maa dɛnɛ vɔɔndo Eliasib ndóò tosa le Tobiya cɛiyo yɔngoo o cɛiláà holnun Cɛi-Hala-o lan tɛɛn ni.

⁸ Mí tambu kɔllo taw, mí soli volɔɔla Tobiya la va o cɛi kon nin-ndan kpow, mí viaw lan o bɛ́ɛ̀.

⁹ O kon kɔɔli, mí dimul vannda le cɛila lan dindio few-few, mí mingi ɲɛm-laandun valin Cɛi-Hala-o, ɲɛm-kéan a ansan lenin.

¹⁰ Mí tuɛi vɛlɛ maa leviia a vanaa solia n'condua va baalaa-a mal baala ndaa, mí vana-vana muungu vali yondoo, kani a ve lɛ ɲɛ kelun le nda-o sɔla le.

¹¹ Mí soaa a vanaa bɛndua, mí ɲuna nda aa: ‹Le yɛɛ nɛ niaa lo yɛ tofaa mí Cɛi-Hala-o lo fondo?› Mí veelu vɛlɛ leviia a vanaa solia n'condua, mí mingi nda o baalaa nin.

¹² O kon mí Yuifia kandu vɛlɛ hunɔɔ a o-tɔ́ndɔ n'mallo, o-tɔ́ndɔ mɔima sɛnɛy-yo a o-tɔ́ndɔ macuɛiyo, má luei ɲɛm mun o cɛila va le mun mandaa lan nin.

¹³ Mí hɛli vannda pum le hɔlten nɔu o cɛila lan coo. Vanaa kan va haa ni: Selemia vana-solia-lasálàá, Sadɔk vana sɛvaa latɔŋndo a Pedaya leviinɔ. Mí kɛsi Hanan, po Sakur-o, po imama Matania-o nda ikɛi. Kani vanaa vannda ndáà laalan-nda nda va ni. Baala ndaa va le ɲɛm-kéan piɔwvo puapilɛa ndaa tɛɛn ni.

¹⁴ ‹Éé Hala nuu, loonun a dɛnnda ya tosa lan kpow! Pɔɛɛnun dɛnɛ sandaa ya lo tosaa le Cɛi-Hala-o a le kaannden-ndo le!›

¹⁵ O telen pilɛ kon bɛngu, mí ca vanaa va o tàndá Yuda-o nin-nda rɛsɛnndon nɛwvo o doolaa nin o paale pɛngiaalen coo. A pum va tumbula n'mal-tan vilio, a pum nda va mɔiyan, rɛsɛnndon, bumbuuon, a ɲɛm súú-súù ka heeloo sofɛlɛa o lakɔɔ le hunɔɔ a mun Yerusalɛm o paale pɛngiaalen coo. Mí ciŋilan nda, mí kanalan nda le ɲɛm mun pisio o paale pɛngiaalen coo.

¹⁶ Handɔndo o kon coo, vanaa fula Tir má va calle Yerusalɛm-nda bɛɛ va hunɔɔ a suwva a á ɲɛm pisian celen o paale pɛngiaalen coo, le mun pisio vanaa va Yerusalɛm-nda a Yudaa o ba.

¹⁷ Mí soaa a vanaa bɛndua Yuda, mí ɲuna nda aa: ‹Vɛ̀ɛ̀ la co pá dɛnɛ vɔɔn niaa co hoo tosaa-o bilaa biyɔɔ? La co paale pɛngiaalen lebɛɛ ke mɛɛ o bɛnda yɛ le.

¹⁸ Nuaa fuɲaa niaa mamaa bɛɛ ndáà tosa ni. Nduyɛ, lelan Hala tuisi naa dɛnɛ palaa coo o kobio ho nin ni. La co tosaa mí Hala va kɔllo tuuloo a Israɛlla, kani la co paale pɛngiaalen lebɛɛ ke le!›

¹⁹ Kandɔɔ telen kon, mí dimul nda le diolan Yerusalɛm kindaa a paale delaalen, lɔ́ɔ́ pá mì paale pɛngiaalen léè tiiya, mì la lo vɛlɛ lakindaalan háá mì paale pɛngiaalen léè hiow. Mí kɛsi buɛyaa nia a pum cumullo, le vannda kuunaa luɛyɔɔ a ɲɛm pisian kɛ́-kɛ̀ o paale pɛngiaalen coo.

²⁰ O kon mí yulaa pisi kan ɲɛm súú-súù ka-a hun háá bɛmbɛ lediin, má cal a vɔngula ndalan o kpakio Yerusalɛm kɔɔli.

²¹ Kɛ mí kanalan nda, mí ɲuna nda aa: ‹Le yɛɛ nɛ niaa co yɛ hunɔɔ calle o kpaki kobio kɔɔli? Te la tosa nin pɛ lende, i co niaa baa holɔɔ.› Kandɔɔ nin o telen kon, a hin-ndɛ lon lɔ́ɔ́-lɔ́ɔ̀ o paale pɛngiaalen coo le.

²² O kon kɔɔli, mí dimul leviia le dindinndo, le kɔlan cumullo o diola kobio, haliko mi vannda ke paale pɛngiaalen bɛɛlen. ‹Éé Hala nuu, loonun vɛlɛ a ya le ken. Tuinun ya iɲíí, mɛɛ dɛnɛ nɔm kɛndɔɔ co o bɔɔ yɛ!›

²³ O telen kon, mí ca maa Yuifia ndáà cii nin laandua yilɔɔ o vanlaandua Asdɔdea, Amɔnnda a Moabua tɛɛn.

²⁴ Cuavaa ndaa táláá pilɔɔ a va sɔɛi Asdɔdea ndaa soaa-e sɔɛi, ndáà cee sɔɛi Yuifia le. Fɔ sɔɔn vanaa-mangalaa-isɔaa celennda.

²⁵ Mí soaa nda, mí dɔaw nda vɛlɛ danga, mí lɔaa bɛɛ a pum, mí suingi nda yiinde. O kon má mɛnalan ya o diola Hala lan, maa a kɛsi lɛnin cuavaa ndaa laandua o nɔ̀lan mialla o ba le, maa a yil-lɛnin vɛlɛ laandaa mangalaa isɔɔa le poaa ndaa, te kon te le nda pila le few.

²⁶ Mí ɲuna nda aa: ‹Vɛ̀ɛ̀ o co lende le Salomɔn masa Israɛlla kei mó luɛi o hakio nin te? O vanaa-mangalaa-isɔaa co o ceendo coo-a kpow tɛɛn, masa kɛ́-kɛ̀ óò sulan a ndu le, Hala ndɔɔ ndóò yeema ndu taw. Mí Hala siinguu ndu masaa Israɛlla kpow coo. A kon kpede, mí vanlaandua mangalaa isɔɔa luei ndu o hakio nin.

²⁷ N yeema lɛ mì n tuei dɛnɛ vɔɔn bɛndu vaa lende niaa tɛɛn a Hala naa le, le vanlaandua mangalaa isɔɔa yilɔɔ o nɔ̀lan.›

²⁸ Lelan, mí toaw po Yoyada-o pilɛ, mó faŋan ya ikɛi. Po imama Eliasib bolle vanaa-solia-lasálàá-o o va ni, lefoo Sanballa fula Horɔn-ndo.

²⁹ ‹Éé Hala nuu, pɔɛɛnun a nda le. Kani a cii baala solia lasálàá a kpema vanaa-solia-lasálàá nda leviia yii-o nɔɔliaa.›

³⁰ Mí soli mialla nda tɛɛn few-few. Mí mingi vɛlɛ tɔŋnda lan handɔɔ mɛɛ la va paandu yɛ, tɔŋnda vanaa-solia-lasálàá a leviia ndáà bɛnda le peeloo, vana-vana o baala ndɔɔ nin-ndan pɛɛn.

³¹ Mí bɛɛndiaa vɛlɛ dɛnɛ ɲɛm-kéan iyɔmun ndáà bɛnda le yɔngoo o telen kelunndo-on, a dɛnɛ ɲɛm-kéan ndáà cua o ɲɛm vaan tason nin-ndon. ‹Éé Hala nuu, loonun a ya mà tuinun ya iɲíí!›»