Nehemi 1 - BII BILA

A dimul Nehemi dɛnɛ palaa co Yuifia coo Yuda-o

¹ Sɔɔn Nehemi po Hakalia-o-on co mun ni. «O vɔsi bidiinndɔɔ nin o paangii Kisleu nin, telen ya va o kobi lebollo Suse nin-ndo,

² mí puapilɛ nuu pilɛ, Hanani nda poaa pum a fula Yuda, má hun. Mí ɲuna nda le dɛnɛ Yuifia tɔ̀a lo yoomu-a, á fula o cɛlen nin má lo yoomu-a a le kobio Yerusalɛm.

³ Má mulul-la aa: ‹Vanaa tɔ̀a lo yoomu fulaa o cɛlen nin-nda co lon, o tàndá Yuda-o nin. Kɛ ɛnɛ palaa a siɛmbula bɛndulan koni la co nda coo ni, kpakio Yerusalɛm co o buulua kpow, koŋnda ndɔlan bɛɛ la ŋɔɛ.›»

Piɛile Nehemi len

⁴ Lɔ́ɔ́ ya tuei sɔɔn mun-ndo, mí cal, mí koŋul, mí mɔnɛi bii ya le palɛi taw. Mí bii sumndo, mí piɛi Hala co o halataala-o.

⁵ Mí dimi aa: «Éé Mɛlɛka! Nɔm Hala co o halataala-o, Hala bɛndoo a Kpúlúnkùmaa, nɔm Vana yii kpemaa má o lo o lediom coo a vanaa kaola nɔm, má va silala nɔmndan biyɔɔ-a-o!

⁶ Sisa, tofa ya vana nɔm baalaa, ma yaŋ nilan, ma tuei piɛile ya co nɔm idii a icɔl-ten. I co nɔm piɛiyo le vanaa nɔmaa baalaa, Israɛlla pɛɛn, le hakila nda cua a nɔm-ndan sɔlɔlanndo nɔm o hɔl. Yungu nuu a ya pila, n cua hakio a nɔm,

⁷ n pilan nɔm tana, n bii silala nɔmndan te few, tɔŋndan a sɔɔn n sɛval Moise vana nɔm baalaa sindɛ-on pɛɛn.

⁸ Loonun a sɔɛi n dimul Moise vana nɔm baalaa-e, yandi. Má dimul ndu aa: ‹Te la cua pɛ hakio, i sɛŋinin niaa vanaa súúla celennda tɛɛn.

⁹ Kɛ te la muungu pɛ ya o ibuŋ, mì la bii silala nilan, mì la kela lecoo, hali a kɔ bɛɛ a niaa háá lɛŋnde mɛɛlu, i nuwviaanin niaa, mì cuungiaa niaa nɛɛ pilɛ, mì kɔɛ a niaa o fonda ya hɛli le diola nilan vaa piɔlnɔnndo lon-ndo.›

¹⁰ Nduyɛ, vannda ha, vanaa nɔmaa baalaa, a yungu nɔmndo nda co ni, à n baŋa a yoomuma nɔmndan a á ba nɔm kpaayaa-a.

¹¹ Éé Mɛlɛka! Yaŋ nilan o piɛile nilen a o piɛile vanaa nɔmaa baalaa, á yeema le diola nɔmndan bɛɛlen keo-va. Hau, tosa mì langbanɔɔ ho ce ya vana nɔm baalaa ɲia. Tuma kon yɛ, ya óò toosiaa mɔima masaa ni.»