Misee 7 - BII BILA

Vannda kpow a vow balan o dɛnɛ vɔɔndo nin

¹ «Kpòkóó, má cè dɛnɛ palaa le ya sii! I siŋnun maa vana fula a tuma kiandaa kɔmnde levɔɔ, maa vana kɔɛ rɛsɛnndon nuwviaa tuma caanda cìì nin mun kiɔndɔɔ-o. Hali kpɔ̀nyɔ̀ɔ́ pilɛ ve lɛ le dioo le, hali voosun sɛnɛin ya yeema taw-von i pilɛ bɛɛ ve lɛ le.

² Mbɔ̀ vanaa lo o lediom coo-a cuu o lɛŋnden nden nin! Vana sandaa co lɛ lenin te few. Nda kpow a cal mɛngɛlianndo le koovan sooluanndo, vana-vana co puapilɛ ndɔɔ yaŋɔɔlen kɛsullo.

³ Tenndaa pila bala ndalan la tennda o dɛnɛ vɔɔndo tosaa nin ni. Simlacia co ɲunaa le nda salaa, vanaa kialaa n'yamaa bɛɛ kilu yamɛi fondo le, fɔ ma ce tɔnɔ ndaa lenin, vanaa kùndàá bɛɛ a co ɲɛ nda yeema-o kiolɔɔ. Lende nda kpow a co cɛlanndo ni le dɛnnda vɔɔnndan tosaa.

⁴ Vana hiow vaa fisa o nda tɛɛn-ndo, maa yɔm n'yɔɔn ndu co ni. Vana hiow nda sandei-yo, maa bɔ̀ɔ̀ n'yɔ ndu co ni. Paale dɛnɛ palaale niaalen le tiiya nuaa ni, paale kpalilaa niaa dimi len, vanaa-tɛɛngaa-diom Hala-a pɛɛn. La co nihau a kɔl isiòòndo.

⁵ La láálan vanayan niaan te, la kɛ́sì kɔllo caaŋaa niaa coo le. La mandaa sondola niaalan, hali o va bɛɛ landaa niaa o hɔl.

⁶ Kani po vialaa co fuɲaa bɛɛlan tɛɛmbuuo, cuaambɔ laandoo co kala ndɔ simullo, lanɔɔ poo co kala-lɛɛ ndɔ ciŋilanndo. Yaamɔɔ vana-vana fulanin o yungu vana kon pila nin.»

Hala tiindanndo a ndu piɛiyo

⁷ «Kɛ ya, o Mɛlɛka lo kínɛí ya nɔ hɔlla ni, Hala nɔ cinda nuu o ba-o ya tiindan ni, ndu Hala nuu tuɛinin ya diom mò mulul-la.

⁸ Nɔm yaamɔɔ nuu sei, dɔawnun ɲaale a dɛnɛ nuu o kɔɔ le! Kani i del bɛɛ, i co cɔnɔn, i va bɛɛ icali o ɲumndan nin, Mɛlɛka co ɲɛ-tengaa nuu ni.

⁹ Fɔ mì biwnun kɔltuw Mɛlɛka-o, kani hakio ya cua a ndu ni. Telen co tiiya, o soaanin le ya, mò ke ya dí nuu. O solinin ya o ɲɛ-tengaa, mò tosal-la dɛnɛ kɛndɔɔ.

¹⁰ Yaamɔɔ nuu canin ken, mì siɛmbulan la bii ndu mɔ́ɔ̀yɔ̀ɔ̀. Ndu yaamɔɔ kon va ya dimullo ni aa: ‹Kuɛɛ nɛ Mɛlɛka Hala nɔmndo co yɛ?› Yaamɔɔ nuu nɛwnunnin a labɛngu maa looli co o nɛilan coo-o, mì ce ken a lehɔl kpendekele.

¹¹ Paale nda minginin kpakila nɔmndan cɔvɔɔ len, paale len nda co pɛɛngula lɛŋnde nɔmnden cɔɔlu mingi a makɔɔ ni.

¹² Paale len vannda hunnin o nɔm ndo fulaa Asiri a o kobila co o lɛŋnde Esipte len nin-ndan, cɔnɔnndo o peo Esipte háá o peo Efrate kɔngɔ. À pum hunnin fulaa o mɛmma ihɛllan kɔngɔ, à pum fulaa o tàndála n'pembulan coo.

¹³ Lɛŋnden le dɔawnunnin yɛɛvɛ le kela vɔɔn vanndacieea co lecoo-a.

¹⁴ Sim vanaa nɔmnda laci a tinda vana mandaa n'saa o ba, vanaa co kɛ́ nɔmndo-a pɛɛn. À co nda pilɛ kpé yondoo nin, o tɔlɔɔla iyɔmndan tɛɛn. Mɛɛ n tosa lɔ́ɔ́ kon a nda yɛ, kɔ a nda o yondola puiyaalan Basan nin a o lan o tàndá Kalaad-o nin.

¹⁵ Maa o paale n soli naa Esipte len, cɔm naa dɛnnda kɔndɔfiltan.

¹⁶ Vanaa-mangalaa-isɔɔa canin ndan, mì siɛmbulan la bii nda. O kon, a kpaaya bɛndoo kpow, à handunnin balan o lasondo, mì nilan la baŋul nda.

¹⁷ A deembuunin cundoo maa n'kɛw, maa ɲaa yoomaa sasun lɛŋ-nda. À fulanin o fondala ndala mayoomulan nin, mà hin a ɲiiyaa o nɔm Mɛlɛka Hala naa lo. Siòònde biinin nda mà vo nɔm.

¹⁸ Hala kuɛɛ nɛ co yɛ maa nɔm Hala, ó vɔɔsuu haki cuavaa ndɔa-o, ó mal nila kalula vanaa ndɔa lo yoomu-a haki-o? Kɔl nɔmndo lo o tuw le fɛɛn a fɛɛn te. Kani ɲííye vannda tuinɔnndo hɛnan nɔm ni.

¹⁹ O laan vɛlɛ nɔm Hala, a co naa iɲíí tuinɔn, a biinin naa maa tɛɛmbuula naalan la co yɛ le. A viawnin hakila naalan kpow o mɛmma ihɛllan nin polon.

²⁰ O laan vɛlɛ, a co cuavaa Yakɔb-a cɔm maa Hala lo o diomnden coo-o n co ni, mà cɔm cuavaa Abraham-nda sakpoyɛi nɔmnde, mɛɛ n yiilu sindɛ fuɲaa naa mamaa kpemaa yɛ.»