Misee 6 - BII BILA

Mɛlɛka kɔɔsal vanaa ndɔa

¹ «La yaŋ ndɔ nilan mì la tuei ɲɛ Mɛlɛka dimi-o! O vem ya aa ya cɔn le kɔɔsɔɔ, aa ya tɛɛnguu diomndo ho pembun bɛndon a pembun pɔmbɔn o hɔl.

² Pembon sei, la yaŋ nilan o yamɛi Mɛlɛka-e! Niaa fondala lɛŋnden le kɛsi tumndo coo lan sei, yamɛi hin kiolu Mɛlɛka nda yungu ndɔɔ tɛɛn! Mɛlɛka luɛi kɔɔsɔɔ a Israɛlla.

³ O dimul nda aa: ‹Niaa vanaa nia, yɛɛ nɛ ya yɔŋ yɛ niaa? O yɛɛ nin ya saangiaa yɛ niaa? La mulul-lɔ ya!

⁴ Kani ya soli niaa o cɛlen nin o lɛŋnde Esipte len nin ni, mí heelu a niaa, Ya vim niaa Moise, Aarɔn a Miriam, le niaa simndan laci ni.

⁵ Vanaa nia sei, la yiyan-ndɔ mɛɛ Balak masaa Moab ndóò tuu le niaa dɛnɛ vɔɔndo tosallo yɛ. La loonun-ndɔ mɛɛ Balaam po Beɔr-o mulul ndu yɛ. O kon kɔɔli, mí ya pila sim niaa laci cɔnɔnndo Sitim háá Kilkal. La co sina o kon maa dɛnɛ sandaa tuŋ ya Mɛlɛka co niaa tosallo ni.›»

Kaannde kpeekpeilen

⁶ «A yɛɛ kpeekpei ya fula yɛnin Mɛlɛka o hɔl? A yɛɛ o ba ya baŋ yɛnin vulan Hala co coocoo-o o labɛngunin? Bàà a navaa téndéa nɔ vosio pilɛ-a ya fulanin ndu o hɔl ni le sálàla loamaalan solio?

⁷ Mɛlɛka cɛlnin pá saa kóndóa hali sɛ́lɛ́ bɛndoo? O cɛlnin pá cuɛima lakongima cuu man kɔɔli le-an? Vɛ̀ɛ̀ mì ke ndu po ni tasoo haliko mo mal-la haki a kɔlvesɛi nuu? Bàà mì ke ndu hɔ́ɔ́ ya solin o ipulu-o le haki ni ya pila tosa-o?

⁸ Niaa vanndacieea sei! Kámáá a cɔm niaa dɛnɛ sandaa! À cɔm niaa ɲɛ Mɛlɛka yeema mì vanndacieea tosa-o. Ɲɛ kon co ni mì la kela kela sandaa, mì la kaola lou o diomnden coo, mì la kela ɲɛkɛndɛi o nɛila Hala niaa cɔm niaa lan coo.»

Mɛlɛka kɔngɔlan vanaa lakafaa

⁹ «Mɛlɛka co sɔɛi o vanaa co o kobio nin-nda lo. O ciindiaanin vanaa nɔ siòòŋii ndɔɛi-ya. La yaŋ nilan o yondaa a dɛnɛ palaa co hunɔɔ-o o kɔɔ, mì la yaŋ vana tuu le dɛnɛ kon tosaa-o nilan!

¹⁰ Vɛ̀ɛ̀ ɲɛ-sɔlaa lakafaa co vɔ o vana kɔlvesɛiyo lo cɛinin? Vɛ̀ɛ̀ panila o dɔɔniaa lan la co vɔ ndu o ba? Dɛnnda tɛ́ɛ́mbùù ya kɔllo lan la co lan ni.

¹¹ Vɛ̀ɛ̀ mì meilul vanaa co keiyo ɲɛm pilan piondɔɔ o panila bɔɔfiɛilan nin-nda? Bàà mì meilul nda a ɲɛla tuvaala n'ɲɛla lakafalan nda o labɔlɔ?

¹² Vanaa bolofaa co o kobio ho nin-nda kafalan kposon nda cal coo ni. Còòlan tuŋ vanaa co icali lenin-nda co keiyo hɔŋndo ni, huiyo kínɛí nda co vannda a diɛɛmuei nda lasondo ni.

¹³ Lelan ya bɛɛ, i kpukpanin niaa a sangaa, mì tɛɛmbuu niaa le hakila niaalan.

¹⁴ La vanin dio, kɛ la pimnin te. Yiaan ma vanin niaa o ladembe. La vanin baloo kɛsio nɛɛ pum le ndu mandaa, kɛ la nɔlanin ndu manda le. La manda yɛ pɛ ɲɛ pum, i tosanin mì cɔwvo tɛɛmbuu ndu.

¹⁵ La saŋnin, kɛ la kuwnin te, la pesinin oliveon, kɛ la solinnin kpeku a macuɛi le, la vɔɔciaanin rɛsɛnndon, kɛ la kolnin mɔima ndɔan te.

¹⁶ La delnin tɔɔmaselela vɔɔnnda Ɔmri lan kɔɔli, la delnin kelala yungu Akab po ndɔ lan kɔɔli. O silala ndalan coo niaa co kelaa ni. Lelan ya bɛɛ, i co hunɔɔ kobi niaa piɔlɔɔ vɔ́-vɔ́! I tosanin mì vannda mam niaa vanaa co icali lenin-nda, mì siɛmbula bii vanaa nia lan la bii niaa mɔ́ɔ̀yɔ̀ɔ̀.»