Misee 5 - BII BILA

Masaa vialunnin Bɛtlɛhɛm

¹ Éé nɔm Bɛtlɛhɛm Efrata! À co bɛɛ ciee pɔmbɔ o cieon co o tàndá Yuda-o nin-ndon kpow tɛɛn nuaa, kɛ o nɔm nin ya solinin vana bɛnda mo tosa masalen Israɛlla kpow coo-o ni. Vana kon pɛn, ó fula o yungu kɔɔlima ndɔan ma kandun kabi sindɛ-sindɛ-o nin-ndo.

² Lelan Mɛlɛka malnin vanaa ndɔa háá mì vanalanɔ bɛnda kon le violɔɔ-o velu. O kon mì puapilɛa ndɔa tɔ̀a vanin o biyɔɔ nin-nda muungu cuavaa Israɛlla tɔ̀a ikɛi.

³ O cannin mò siŋnun simlacinɔ nda a kpaaya Mɛlɛka-o a á biilu diola Mɛlɛka Hala ndɔɔ. Vanaa ndɔa vanin icali nila ɲulu, kani kandɔɔ nihau, o co va biiloo sɔlaa háá o lɛŋnden mɛɛlulan.

⁴ Ndu vanin kɔlɲuloo ni. Telen Asirinɔɔ hunnin o lɛŋnde naalen nin, mò luɛi o cɛila naala lemasalan nin-ndo, n solinin vanaa mandaa n'saa nda ŋɔmmɛw a simlacia nda ŋɔmaa le ndu kɔlan simullo.

⁵ À tosanin masalen o lɛŋnde Asiri len coo a o lɛŋnde Nimrɔd len coo a mɔɛi cɔwve. Nuaa Masa kon o baŋanin naa Asirinɔɔ o ba ni, te Asirinɔ kon hiow pɛ pɛɛngulan, mò luɛi o lɛŋnde naalen nin.»

Mɛɛ Israɛlaa tɔ̀a lonin yoomu vanaa-mangalaa-isɔɔa tɛɛn-nda vanin yɛ

⁶ «Cuavaa tɔ̀a lonin yoomu o polale Yakɔb len coo-a, a vanin vanaa-mangalaa-isɔɔa kunda bɛndoo tɛɛn-nda, a vanin maa mɔ́m fula o Mɛlɛka lo-o, mɛɛ piɔɔ sia o billo coo yɛ, o cel vanaciee cum too, o tiindan vanaciee kɛ́-kɛ̀ loo.

⁷ Cuavaa tɔ̀a Yakɔb-a vanin vanaa súúla celeŋaa sɛ́lɛ́ bɛndua tɛɛn mɛɛ yàlàá va visia yondoa tɛɛn nuaa yɛ, mɛɛ yàlà téndóó va kunda cɔlua letùúa tɛɛn nuaa yɛ. Nɛɛ-nɛɛ o kei pɛ, o kpuva, o sɛɛsiaa, vana co mo hɛlu ndu ɲɛ o ba le.

⁸ Màá ba nɔmndo hel léngbén le yaamɔaa nɔmnda fukpaa! Màá cii nda mɛɛ nda co kpede!»

Hala co tiindannda lacòòvalan yimi

⁹ «Mí Mɛlɛka dimi aa: ‹Paale vanin mì cii soa cɔvaa co o lɛŋnde nɔmnden nin-nda kpow, mì tɛɛmbuu ɲɛla ɲaanannda niaala soa nan-ndan,

¹⁰ mì tɛɛmbuu kobilan o lɛŋnde niaalen nin, mì pesi kpakila niaalan kpow,

¹¹ mì cii dɛnnda lamandela niaalan. Vana viamaa yavaa o pilɛ bɛɛ ve lɛnin o niaalo le.

¹² I puusiaa piɔmaa niaa a powta sálàla niaalan. O kon, la beŋ ndɛnin vulan ɲɛm niaa pila sɛl-lon o labɛngunin te.

¹³ I kaaliaanin yɔmii sooluɛi niɛi, mì pesi kobila niaalan.

¹⁴ Kɔl ni fulaa timbinnin kpenyen, mì mingul vanaa-mangalaa-isɔaa bii diom nuu le-a màá a kɔltuwvo.›»