Misee 4 - BII BILA

Hala tosanin masalen Siɔn

¹ «Palɛi pum co hunɔɔ tiiya, mì pembii Cɛi-Mɛlɛka-o co coo-e i hiow pembun bɛndon bandei, mì i hiow pembun pɔmbɔn kpow helɔɔ. Lon vannda súúlan kpow a vanin kɔlan ifili-filiei ni.

² Vanaa-mangalaa-isɔaa bɔɔ-bɔɔ a kɔanin ndon, mà dimi aa: ‹La hun mì n helnun o pembii Mɛlɛka-e coo, o Cɛi Hala Yakɔb-o nin, haliko mo kɔ pɛɛku naa sɔɔn ndɔn, mì n kela o nɛila ndɔlan coo.› Kani Siɔn tɔŋndo fulanin ni, Yerusalɛm diom Mɛlɛka-o fulanin ni.

³ Ndu vanin yamanɔɔ le vanaa súúla bɔɔ-bɔɔ ni, ndu vanin vana kialaa n'yamaa le vanaa-mangalaa-isɔɔa kpaayaa ni, hali a co nɛɛ levil lándan-nda. A cɔawnin dɛndɛlan a mɔɔn ndan cɔwvon, mà cɔw lɛɛnndan a bálta ndalan. Vanaa-mangalaa-isɔaa kɛ́-kɛ̀ a simulan ndɛnin a cɔw le. Vana pɛɛkuu lɛnin cɔw le.

⁴ Vana-vana vanin icali o rɛsɛŋun ndɔn a o voosun ndɔn bɛngu, vana venin le nda kpeeŋiaa le, kani Mɛlɛka-Nɔ-Kpaayaa-Kpow-vo cii dimi.

⁵ Telen vannda súúlan kpow co kelaa le hɛnan halaa ndaa tosaa-o, naa bɛɛ n kelan le hɛnan Mɛlɛka, o co Hala naa-o-o tosaa le fɛɛn a fɛɛn.

Mɛlɛka minginin yungu ndɔɔ mɔɔsiaa nɛɛ pilɛ

⁶ «Mí Mɛlɛka dimi aa: ‹Paale vanin, i mɔɔsiaanin saa nia voosian-nda, i cuungiaanin a co a saŋnannda-a, a yáà bɛpɛla-a pɛɛn.

⁷ I siinguunin a voosian kan-nda ɲɛ tɔ̀ lo yoomu-o, mì siinguu a co a saŋnannda-a vanaa-mangalaa-isɔaa kpaayaa. O kon ya Mɛlɛka, i tosanin masalen nda coo o pembei Siɔn coo le fɛɛn a fɛɛn.

⁸ Kɛ nɔm, pembei Yerusalɛm, nɔm co hoo maa bàndó le lɛŋnden kpalillo-o, o lo cobe ma muungu o masale nɔmnde paandulen coo. Yerusalɛm siŋnunnin vɛlɛ kobi lebollo le masalen kpow.›»

Tɔɔndanndan kei Yerusalɛm coo lan a baŋa o sɔla-o

⁹ «Le yɛɛ nɛ niaa co yɛ niko yondaa? Masa co macoaa o niaa lo le? Mò va maa lou vana nɔm silaa lo ni? Ŋɔnga yɛɛ n co yɛ niko hoo a ɲɛ nɛyaa maa vanalanɔ nda sɔɔnguu lekɔɔ le volɔɔ?

¹⁰ La somisomin a ɲɛ nɛyaa, mì la ŋɔnga maa vanalanɔ nda sɔɔnguu lekɔɔ le volɔɔ. Kani la bɛnda mi la mal kobio sisa, mì la kɔ kila calta niaalan yondoo nin, mì la kɔɛ bɛɛ háá Babilɔn. Lon niaa co lakɔ baŋaa sɔla ni, lon Mɛlɛka hialunin niaa yaamɔaa niaa o ba ni.

¹¹ Nihau, vanaa-mangalaa-isɔaa bɔɔ-bɔɔ a yiinan le niaa hinullo. À co dimio aa: ‹Màá kobi ndaa tambu labɛɛ! N tofan tambii Siɔn-nde kpendekele.›

¹² Kɛ vanaa kan, à sina ɲɛ Mɛlɛka nɔ o kɔl te, a bii bɛɛ tuula ndɔlan bila le. À co sina maa mɔɔsiaa le o mɔɔsiaa nda mɛɛ vana mɔɔsiaa tumbulan o kpele lɔaa n'mallo coo nuaa yɛ le.

¹³ La cɔn, niaa vanaa co Siɔn-nda! La cɔn mì la lɔɔ maalon. I siinguunin niaa maa leela icilin, mì kindi bɛngula niaalan maa buukula idaɲa. La vɔɔciaanin vanaa súúla bɔɔ-bɔɔ. O kon, la handu tanaa o ɲɛ-sɔlaa ndaa coo le Mɛlɛka, la ke Maalii, o co lɛŋnden kpow bollen-ndo bolofaa ndaa.

¹⁴ Kɛ sisa vɔ, niaa Yerusalɛmnda, niaa co haa vanaa niaa cɔwva cuungiaa-a, la tɛɛndian diallon le cɔmndo maa dɛnɛ palaa co niaa coo. Vannda co hunɔɔ le naa tiilaa, à co simlaci Israɛlla kpaŋnde lɔɔ a kpélénkpélénndo.»