Misee 3 - BII BILA

Kanalanndo le simlacia

¹ O kon mí dimi aa: «La yaŋ nilan, niaa simlacia cuavaa Yakɔb-a, niaa simlacia Israɛlla. Vɛ̀ɛ̀ o co niaa le óò bɛnda mí niáà sina dɛnɛ sandaa tosaa le?

² Kɛ dɛnɛ sandaa nɛinun niaa ni, mì la kaola dɛnɛ vɔɔndo. La co lo vannda ɲɛm ndan poondiaa o laba háá mì buu nda yáwlan a vision o paalan coo.

³ Lekɛ́ndɛi, a co vanaa nia yáwlan solio, má va visin ndan dioo, má va nda paalan pesio, má va nda kilikilio mɛɛ vana kili vision le vowvo o kpɛɛnɛi nin yɛ.

⁴ Lelan, a koŋulnin Mɛlɛka o lani, kɛ o mululnin nda le. O mululnin nda mundoo, le dɛnnda vɔɔnnda nda tosa lan.»

Le vanaa tɛɛnguu diom Hala-o a còòlan-nda

⁵ «Ɲɛ Mɛlɛka dimi le vanaa-tɛɛngaa-diom halaa lacòòvaa co vanaa ndɔa laasiaa-a-o co hoo ni: ‹Te vana ke nda dɔ́ɔ́ pɛ ɲɛ nda miaanun-ndo, à dimi yoongu kɔlɲuloo. Kɛ te vana ke nda mel nda ɲɛdiaa o sondo le, à ciŋilan vana kon a sɛɛngianndo.›

⁶ Lelan, ɲumndan ma co niaa tul, niaa vanaa-tɛɛngaa-diom Hala-a. Vana ci lɛnin levundu le. Ɲumma bɛnduan ma co tolɔɔ niaa coo, vana tɛɛnguu lɛnin sɔɔn co hunɔɔ yɔŋnɔn-ndon te. Ɲɔɔ co yɔŋnɔn maa paale delaa, mì ɲumndan ma tol niaa coo kpingbi.

⁷ Vanaa dimi sɔɔn vaa siɔdii-a kpow a viannin hɔlla, mì siɛmbulan la bii vanaa viamaa yavaa. Kani Hala mulul lɛnin nda le.

⁸ Kɛ ya ya, i co o piaa cá a yoomuan, yoomuma fula Kɔl Hala-o o ba-an. I nɔ dío a yoomuan le cuavaa Yakɔb dɛnɛ vɔɔn ndaa cɔmndo, a le Israɛlla haki ndaa cɔɔmullo.»

Misee tɛɛnguu diom Hala-o a tambii Yerusalɛm-nde o kɔɔ

⁹ «Niaa sei! La yaŋnun sɔɛi he, niaa simlacia co cuavaa Yakɔb-a coo-a. Niaa simlacia cuavaa Israɛlla, niaa nɔ nɛyɔn dɛnɛ sandaa mí la va sandei tundɔɔ-a pɛɛn.

¹⁰ Niaa co Siɔn tangullo a kooma vanndacieea nin, mí la va Yerusalɛm tangullo a kɔlvesɛiyo-a.

¹¹ Vanaa ndɔa kialaa n'yamaa co luɛyɔɔninndo cɛlɔɔ o yaman nda co kiolɔɔ-o nin. Vanaa-solia-lasálàà ndaa co vannda pɛɛkoo le salaa sɔlaa kínɛí. Vanaa-tɛɛngaa-diom Hala-a ndaa bɛɛ, le volion koni nda co nin sɔɔn vaa siɔdii dimio ni. Nda yɛ, à co cɔnnɔnndo maa le Mɛlɛka nda co ni. A co dimio aa: ‹Mɛlɛka co naa ikɛi, dɛnɛ palaa kɛ́-kɛ̀ tulnin naa coo le.›

¹² Le dɛnnda niaala lan, Siɔn vaanunnin maa iciɛɛ, Yerusalɛm siŋnunnin bémbélan kposon, mì pembii Cɛi-Hala-o i siŋnun yondoo.»