Misee 2 - BII BILA

Kɔngɔlanndo le vanaa del caanda coo-a

¹ «Dɛnɛ palaa co nda cum, vanaa túù tuula vɔɔnndan, ma yíì vannda dúmbúlan o kpelela ndalan coo icɔl-la. Paalen le sɛ dɔ́ɔ́ pɛ, a peelu sɔɔn nda tuu mun-ndon.

² Yondolan lapum bɛɛ la hɛnan nda ni, a poonda. Cɛilan lapum bɛɛ nda fula hɔlten ni, a hɛlu. Delɔɔ nda del vanacieo coo a cɛi ndɔɔ kpow ni, ma de ndu a kɛ́ ndɔɔ kpede.

³ Lelan Mɛlɛka dimi ni aa: ‹I co kpundɛ bɛndoo tuisi vanaa kan coo. La nɔlanin kɛsei solio lebɛngu le. La cue lɛnin bollen lɔ́ɔ́-lɔ́ɔ̀ o kelaa nin te, kani telen dɛnɛ palaa co o nɛi.›

⁴ Paale len le hun tiiya pɛ, vannda diminin taloo a niaa o sondo, mà soli condii imɔnɛi aa: ‹Mbɔ̀ naa n cuu itambu! Yondola naalan a ɲɛm nan cuu naa hiɔlɔn. Yaamɔaa naa cii mun piɔvan. Le yɛɛ nda co yɛ naa mun hiɔlɔɔ o ba?›

⁵ Lelan, tuma yungu Mɛlɛka-o vanin vɛlɛ lɛŋnden piɔwvo-o, o niaa tɛɛn, vana-vana sɔlanin lelɛŋ te.›»

Vanaa-tɛɛngaa-diom Hala-a nɔ hiluma n'volian-nda

⁶ «Vannda pum a co ya dimullo aa: ‹Pɛngi tombola fondoo ho! Diɔmnde i co ni le dimio aa n nɔla siɛmbula ndan kpakpalaa le.›

⁷ Mò va maa dangaa co cuavaa Israɛlla coo ni? Vɛ̀ɛ̀ Mɛlɛka sanga a biuvɔnndo ni? Vɛ̀ɛ̀ lende o dema tosa ni? Ya yɛ, vɛ̀ɛ̀ i dímì sɔɔn kɛndɛ a vana co kela sandaa-o le?

⁸ Kɛ niaa niaa, mí Mɛlɛka dimul niaa aa: ‹La co siŋnɔnndo yaamɔɔa le vanaa nia, la co vanaa co fulaa o cɔwvo má va hiovɔɔ a kɔlɲuloo-a volɔɔlan solio lekɔɔ.

⁹ La co vanlaandua yungu nuu solio o cɛila ndala nda kaola lan nin, mì la va cuavaa ndaa biilu ya yɔngu nda-o tuŋɔɔ le fɛɛn a fɛɛn.

¹⁰ La cɔn mì la kɔɛ! Kani lɛŋnden nden le co fonda pɛngia le, le cuu nɔɔliaa a hakila niaalan. Le hee, la sanganin taw-taw.›

¹¹ Vanaa caa còòlan bɛɛndiaa, má va lan keiyo saŋɔɔ o hoeiye nin-nda cɛn pɛ a dimul nda aa: ‹La co hunɔɔ mɔiyan sɔla, mɔima nɛyaa-nɛyan pɛɛn.› Vanaa-tɛɛngaa-diom Hala-a vaa lende a bɛnda le vannda ha ni.»

Mɛlɛka mɔɔsiaanin Israɛlaa lonin yoomu-a

¹² Mí Mɛlɛka dimi aa: «A toɲa, i mɔɔsiaanin niaa kpow, niaa cuavaa Yakɔb-a pɛɛn. I mɔɔsiaanin niaa nɛɛ pilɛ, niaa Israɛlaa tɔ̀a lonin yoomu-a pɛɛn. I mɔɔsiaanin niaa o hèéo nin maa n'saa, maa cɔlua nda mal o bil puiyaa nin-nda, mì la siŋnun vɛlɛ sɛ́lɛ́ bɛndoo sɔkɔ-sɔkɔ.

¹³ Vana co niaa nɛiyo bulullo-o co kɔlan niaa laci. La sɔla baŋaa, la co tɛɛngei bulio, mì la va keiyo lon, mì la va fulaa. Masa niaa co kɔlan niaa laci, Mɛlɛka pɛɛn, o co simndan niaa laci-o.»