Matie 9 - BII BILA

Yeesu singi langbanɔ falun vílɛ́iyo

¹ Mí Yeesu luɛi o dɛ̀ndɔ̀ɔ́ nin, mó kei vɛlɛ o dalaa tɛɛn, mó kɔa o kobi ndɔɔ nin.

² Má cuu ndu vana falun vílɛ́iyo ihini o yalaa nin. Yeesu ndóò cɔu laalan ndaa, mó dimul vana nàà kon aa: «Kindi diallon, po nuu! Hakila nɔmndan la malnun haki.»

³ O kon mí vanaa pɛɛkaa latɔŋnda pum a dimulan aa: «Langbanɔɔ ho dimi sɔɛi tanɛi.»

⁴ Yeesu ndóò sina nin yiyan ndaa, mó ɲuna nda aa: «Le yɛɛ niaa nɔ yɛ yiyannda vɔɔnndan o lakɔl?

⁵ I kuɛɛ hiow yɛ va bɛɛn-bɛɛn o sɔɔn miunndon mun nin, dimio aa: ‹Hakila nɔmndan la malnun haki›, a dimio aa: ‹Cɔn ma kela?›

⁶ Nduyɛ mɛɛ mì la sina maa Po vanacieo nɔ kpaayaa le hakilan malɔɔ o lɛŋnden coo.» Mí Yeesu dimul langbanɔ falun vílɛ́i kon aa: «Cɔn, cua yala nɔmndo mà muungun o nɔm ndo.»

⁷ Mí langbanɔɔ can, mó kɔannun o ndu lo.

⁸ Sɛ́lɛ́ va lon-ndo cɔu dɛnɛ kon, mí siòònde bii nda, má biilu Hala le vanndacieea kpaaya vaa lende yɔngoo.

Yeesu veelu Matie

⁹ Mɛɛ Yeesu faŋan ndon, mó kɔa lándán, mó ca langbanɔɔ pum icali o cɛi biyaa muloo nin, diolan ndu Matie. Mó dimul ndu aa: «Del-la kɔɔli!» Mí Matie can, mó kɔa ndu kɔɔli.

¹⁰ Mɛɛ Yeesu cal ɲɛdiaa dioo cɛinin nda kaandeŋaa ndɔa, mí vanaa biyaa mulua taw a vanaa lahakia kɔ cal nda ikɛi.

¹¹ Faliisia cɔu lende, má ɲuna kaandeŋaa Yeesu-a aa: «Le yɛɛ vana niaa bɛndoo co yɛ dioo nda vanaa biyaa mulua a vanaa lahakia latulu?»

¹² Mɛɛ Yeesu tuei ɲuna kon, mó dimi aa: «O co vanaa connun kɛndia-a le a nɔ makoo a vana singia n'vanndo le, fɔ vanaa co a nààlan-nda.

¹³ La kɔ nuwviaa kɔlɔ sɔɛi he aa: ‹Vannda ɲííye tuinɔnndo hɛnan ya ni, o co sálàlan solio le.› Kani o co vanaa sandaa le ya hin veelu le, kɛ vanaa lahakia.»

O Yeesu soo a sumndo biyɔɔ o kɔɔ-o

¹⁴ Tuma pum, mí kaandeŋaa Nsaŋ-nda hun o Yeesu lo, má ɲuna ndu aa: «Le yɛɛ nɛ naa a Faliisia n co yɛ sumndo biyɔɔ, kɛ kaandeŋaa nɔmnda nda co sum biyɔɔ le?»

¹⁵ Mí Yeesu mulul nda aa: «Mialaa hin vana yil lanɔɔ sɛnɛi-yo o bɛngu coo-a nɔla pá mà yii hɔlla, te vana yil kon lanɔɔ sɛnɛi-yo co vɔ pɛ nda tɛɛn? Telen vanin mà faŋa ndu nda tɛɛn, o kon nda biinin sumndo ni.

¹⁶ Vana-vana cue pɛngɛi kola sɛnɛiyo ma hol ndi pɛɛmaa o volɔɔ cuɛinan paandoo le, kani te pɛngɛi kola sɛnɛii ken i kindu pɛ volɔɔ cuɛinan paandu kon, ɲɔɔ cɔɔlu sɛɛsa taw.

¹⁷ Vana vow vɛlɛ mɔima sɛnɛiyan o bɔlɔla yáwla paandulan nin te, yɔŋii bɔlɔla yáwla lan la piɔsi, mì mɔiyan ma coŋ, mì bɔlɔlan bɛɛ la tambu. O bɔlɔla yáwla sɛnɛilan nin vana vow mɔima sɛnɛiyan ni, mì ma mandan latulu.»

Yeesu singi vanalanɔ va paangii ndɔɛi cɔu tuŋ-tuŋ-ndo, mó mingi cua Yairus-o yoomu

¹⁸ Yeesu lo nda sɔɔn mun dimullo, mí simlacinɔɔ pum hun, mó baŋ vulan ndu o labɛngunin, mó dimi aa: «Cua nuu langa vu, kɛ hun mà handu ndu balan coo, o kon mo muungu yoomu!»

¹⁹ Mí Yeesu can, mó kɔa ndu kɔɔli nda kaandeŋaa ndɔa.

²⁰ Fɔ́ɔ́fɔ̀, mí vanalanɔɔ pum sɔɔnguu Yeesu a makɔɔ, vanalanɔ kon va pulɔn ivanalanɔyaa cɔu le vɔsilan tɔ́ a latiɔn, mó pilan bɔɔle doma bɛndu Yeesu-o.

²¹ Kani mó dimin o kɔl nin aa: «Doma ndɔɔ kínɛí bɛɛ ya pilan ni, i co siongɔɔ.»

²² Yeesu mulinndo, mó ca ndu, mó dimi aa: «Kindikindin, cuanndo! Laalan nɔmndo cii nɔm singi.» Mí cua kon siangu dɔ́ɔ́ o foofo kon.

²³ Yeesu tiiyaa o langbanɔ simlacinɔɔ lo bɛɛ, mó ca vanaa hɔŋaa masɛ̀ŋnda a sɛ́lɛ́ va vɔngaa-o. Mó dimul nda aa:

²⁴ «La fula vɔ! Kani cuaambɔɔ vi le, o lɔan o co ni.» Kɛ má va ndu mamɔɔ.

²⁵ Sɛ́lɔ́ɔ́ fulaa kpede, mó luɛi, mó saa cuaambɔɔ baa, o kon mí cuaambɔɔ can.

²⁶ Mí tɔ́ɔ́ kon tiw o bungɛi ken nin kpow.

Yeesu singi vanaa sumɛiya nda ŋiɔn

²⁷ Mɛɛ Yeesu cɛn kɔnndan landan, mí vanaa sumɛiya pum nda ŋiɔn a del ndu kɔɔli a yoondaa aa: «Tuinun naa iɲíí, Po David-o!»

²⁸ Ndóò tiiyaa, mó luɛi cɛinin, mí vanaa sumɛyaa kan a sɔɔnguu ndu ikɛi. Mó ɲuna nda aa: «La laalan maa i nɔla kon tosa?» Má mulul ndu aa: «Oi Maalii!»

²⁹ O kon, mó pilan nda hɔltan, mó dimi aa: «Màá o tosalan niaa mɛɛ laalan niaa co yɛ!»

³⁰ Mí hɔlta ndalan la kumbin. Mí Yeesu dimul nda kpéŋ-kpéŋ aa: «La caa dɛ! Vana-vana tuɛi ndi lei!»

³¹ Kɛ ndáà fulaa dɔ́ɔ́, má sɛŋi ndu tɔ́ɔ́ o tɛɛn kon nin kpede.

Yeesu singi bobonɔɔ

³² Telen langbaa ŋiɔŋaa kan a va kɔnndan-ndo, má cuu ndu vana ɲinaa vɔɔnda siinguu bobonɔɔ-o.

³³ Mó toaw ɲinaa, mí bobonɔ kalaa soaa. Mí kaamaa bɛndoo bii sɛ́lɛ́ va lon-ndo, má dimi aa: «Kabi bɛɛ n ci dɛnɛ vaa nuaa Israɛl te.»

³⁴ Kɛ mí Faliisia va dimio aa: «A kpaaya bolle ɲinaa vɔɔnda o co ɲinaa vɔɔnda tovɔɔ ni.»

Ɲííye bii Yeesu a sɛ́lɛ́ o va cɔnnɔnndo o hɔl-lo

³⁵ Yeesu va keiyo o kobilan kpow nin a o cieon pɔmbɔn, mó va vannda pɛɛkoo o cɛila lekaannda ndalan nin, mó va keiyo Yoongu kɛndɔɔ dimio a masale Hala len o kɔɔ, mó va nààla súú-súù ka a namtale súú-súù ka singio.

³⁶ Ndóò cɔu sɛ́lɔ́ɔ́, mí ɲííye bii ndu a nda, kani a va a sangaa taw, má vu diallon maa saa nɔ vana mandaa le-a.

³⁷ O kon mó dimul kaandeŋaa ndɔa aa: «Cɛi vesa taw le kovɔɔ, kɛ vanaa koavaa co sɛ́lɛ́ le.

³⁸ Lelan la tɛɛlun vana iciɛɔ, mò yɔngu vanaa baalaa le ndi kovɔɔ.»