Matie 8 - BII BILA

Yeesu singi vana nàà siaŋaa

¹ Yeesu tolɔɔ pembei, mí sɛ́lɛ́ bɛndoo kɔa ndu kɔɔli.

² O kon, mí vana nàà siaŋaa pum sɔɔnguu, mó baŋ vulan ndu o labɛngunin, mó dimi aa: «Yandi, Maalii singi ya, kani a nɔla.»

³ Mí Yeesu siɛndi baa, mó pilan ndu, mó dimi aa: «I cɛl, siongu!» Fɔ́ɔ́fɔ̀, mí nàà siaŋa va ndu-o siangu.

⁴ O kon mí Yeesu dimul ndu aa: «Dimul vana-vana ndi le, kɛ kɔ cɔmnun vanaa-solia-lasálàá, mà soli sálà Moise dimi-o, haliko mi ndu va seilen le nda.»

Vana baala simlacinɔ vanaa cɔvaa kɛmɛa sɔla siongɔɔ

⁵ Yeesu kandɔɔ tiiyaa Kapɛrnaum, mí simlacinɔ vanaa cɔvaa kɛmɛa komal ndu,

⁶ mó tɛɛlun ndu aa: «Maalii, vana ni baalaa co ihini cɛinin, falon kpede n vi ndu, o co sangaa taw.»

⁷ Mí Yeesu dimul ndu aa: «I co lakɔ ndu singi.»

⁸ Mí simlacinɔ kon muli aa: «Maalii, i co o sɔvɛ le nɔm kɔlan o ya lo cɛinin te. Dimio bɛɛ n dimi ni maa o siongu, o nɔla mo sengu.

⁹ Kani ya co hoo-o, vanaa co ya bollen-nda co. I nɔ vanaa cɔwva ya o ba bɛngu. O ya dimul pɛ aa ‹Kɔ›, ndu kɔɛ, i dimul pɛ o celen aa ‹Hun›, ndu hin. I vem pɛ vana ni baalaa le ikɛ́-kɛ̀ tosaa, o tosa.»

¹⁰ Yeesu tueyɔɔ ndu sɔɔn mun dimio, mí ɲɔɔ hɛnan ndu a langbanɔ kon. Mó dimul vanaa va ndu kɔlan kɔɔli-a aa: «Mì dimul niaa toɲaa, hali Israɛl, i seelun-ndɔ vana nɔ laalan bɛndu vaa nuaa le.

¹¹ Mì dimul niaa, vanaa bɔɔ-bɔɔ a fulanin a ba paalen le can-ndo a á ba paalen le del-lo, mà de o tabali pilɔɔ nda Abraham, Isaak a Yakɔb o masale halataala len nin.

¹² Kɛ mà viow vanáà bɛnda le masalen loo kɛɔ-va o ɲumndan nin o bɛ́ɛ̀, nɛɛ vannda vanin caŋndan a ciŋndon sɔmndo-a.»

¹³ O kon mí Yeesu dimul simlacinɔ kon aa: «Kɔnnun o nɔm ndo. Màá i tosalan nɔm mɛɛ laalan nɔmndo co yɛ!» O telen kon kpafii, mí buɛi ndɔɔ siangu.

Yeesu singi vanaa lanàá taw

¹⁴ O kon kɔɔli, mí Yeesu kɔa o Piɛr lo cɛinin, mó komal lefu ndɔ laandoo a dialun tuwvon.

¹⁵ Mó pilan ndu baa, mí dialun tuwvon pɛngi. Mí ndu lefoo Piɛr kalaa can, mó ke Yeesu ɲɛdiaa.

¹⁶ Paalen delɔɔ, má cuu ndu vanaa nààla ɲinaa. Mó soaa, mí ɲinaa va vanaa kan kɔɔli-a ɲaanun. Mó singi vanaa lanàá kpow.

¹⁷ O kon mí sɔɛi Esai vana-tɛɛngaa-diom Hala-o dimi-e peelun aa: «O cua namtale naalen, mó siilun nààla naalan.»

Mɛɛ vana del Yeesu kɔɔli yɛ

¹⁸ Yeesu mɛɛndanndo sɛ́lɛ́ óò balu ndu-o, mó dimi le taŋɔɔ kɔngɔɔ leeloo.

¹⁹ Mí vana pɛɛkaa latɔŋndo pum sɔɔnguu, mó dimul ndu aa: «Kɔɔfa, ba-ba n kɔɛ pɛ, i kɔanin nɔm kɔɔli.»

²⁰ Mí Yeesu mulul ndu aa: «Kàá nɔ buulula nda lɔl nin-ndan, yovaa co kelaa coocoo-a bɛɛ a nɔ vɛɛnde, kɛ Po vanacieo ndu nɔ bɛɛ nɛɛ yambaa lebol te.»

²¹ Mí vana celen o kaandennda tɛɛn dimul ndu aa: «Maalii, cɛl-la mì kɔ kumbu fɔlɔn fuɲa nuu.»

²² Kɛ mí Yeesu mulul ndu aa: «Del-la kɔɔli. Mal vanvílɛ́iya vanvílɛ́yaa ndaa kumbɔɔ.»

Yeesu kpaa piɔɔ hoeyii fùkù-fùkoo

²³ Yeesu luɛyɔɔ o dɛ̀ndɔ̀ɔ́ nin, mí kaandeŋaa ndɔa luɛi ndu kɔɔli.

²⁴ Fɔ́ɔ́fɔ̀, mí piɔɔ hoeyii fùkù-fùkù bɛndoo pum can siaa o dalaa coo, mí mɛnndan ma va biiŋɔnndo, mí ma va dɛ̀ndɔ̀ɔ́ kumbɔɔ. Kɛ Yeesu ndu va o lɔan.

²⁵ Mí kaandennda sɔɔnguu ndu ikɛi, má tindi ndu, má dimi aa: «Maalii, ciindiaa naa, cuuo naa n co nuaa ni!»

²⁶ Mó dimul nda aa: «Le yɛɛ niaa co yɛ a siòònde? Laalan niaa dɔɔnan dɛ!» O kon, mó can, mó kpaa hoeiye a mɛnndan, mí ɲɔɔ mei o lepilɔɔ doŋ.

²⁷ Mí kɔndɔfili bɛndoo bii vanaa kan kpow, má va dimulanndo aa: «Vanaciee súú yɛɛ co yɛ hoo? Hali hoeiye a mɛnndan ma bii sɔɛi ndɔɛi!»

Yeesu singi langbaa ŋiɔŋaa ɲinaa vɔɔnda va kɔɔli-a

²⁸ Yeesu tiiyaa o kɔngɔɔ pilɔɔ o lɛŋnde Kadareniia nin, mí langbaa ɲinaa vɔɔnda va kɔɔli-a pum a fula nda ŋiɔn nɛɛ ndáà kumbu vanvílɛ́iya-a, má hun ndu laci. Siòòŋii ndɛi va vannda taw-taw, lelan vana óò cɛl lɛ le keiyo a kpengii ken te.

²⁹ Má can yoondiaa aa: «Yɛɛ n yeema yɛ le naa yɔŋndo, nɔm po Hala-o? Vɛ̀ɛ̀ le naa saangiaa n hin ni lɔ́ɔ́ pá mì telenndo tiiya?»

³⁰ Pevaa sɛ́lɛ́ bɛndua pum a va diólan a kpengii ken,

³¹ mí ɲinaa vɔɔŋaa kan a ɲɔɔlu Yeesu aa: «Te tovɔɔ n co naa ni, mɛɛ yɔɔ naa mì n kɔ luɛi pevaa kundaa ha tɛɛn.»

³² Mí Yeesu dimul nda aa: «La kɔ!» Má fula langbaa kan nin, má kɔ luɛi pewva nin. O kon mí pevaa kundaa kan kpede a toal a kiltan o kɔngɔ feke-feke va lon-ndo, má kɔ deli o dalaa nin, má vu kpow o mɛnndan nin.

³³ Mí vanaa va nda mandaa-a ɲaanun, má kɔa ciee, má kɔ dimul vannda dɛnɛ yɔŋnun-ndo kpede. Kɛ taama-taama o yɔŋnun a langbaa ɲinaa vɔɔnda va nin-nda-o.

³⁴ O kon, mí vanaa va o ciee kon nin-nda kpede a fula, má kɔa nɛɛ Yeesu va-a. Mɛɛ nda ce ndu, má tɛɛlun ndu maa a faŋan o lɛŋnde ndalen nin.