Matie 7 - BII BILA

La kialu yamɛi caanda le

¹ «La kialu yamɛi vana le, haliko vana kialu yamɛi niaa le.

² Kani yamɛi niaa co caanda kilullo-e kilulunnin niaa ni. A ɲɛ niaa co tuuvo nda tuunin niaa ni.

³ Le yɛɛ n co yɛ bilte co puapilɛ nɔmndo o hɔl-ten tofaa, a dow yɔm ipɛngɛ co nɔm pila o lehɔl-lo taasi le?

⁴ Te kon te, vɛ̀ɛ́ n dimul-lɛnin puapilɛ nɔmndo aa: ‹Mɛi-yɔ i soli nɔm bilte co nɔm o hɔl-ten›, te yɔm ipɛngɔɔ co pɛ nɔm pila o lehɔl?

⁵ Nɔm vana muuluanndo ho, nɔm pila solin fɔlɔn yɔm ipɛngɔɔ o lehɔl, o kon a ce niko válán le puapilɛ nɔmndo bilten solio o lehɔl.

⁶ La ke tunnda ɲɛm diandan te, yɔŋii nda mulin ma kisikisi niaa. La vuulu pewva ɲɛm niaan báà kalan te, yɔŋii nda nɛw mun.»

Le piɛilen biuvɔnndo

⁷ «La piɛi, a kenin niaa. La nuwviaa, la saalunnin. La lɔɔ dioo, a kumbilnin niaa.

⁸ Kani vana-vana piɛi pɛ, ndu sɔla. Vana nuwviaa pɛ, ndu saalun. Nduyɛ vana lɔaa dioo-o nda kumbil ni.

⁹ O niaa tɛɛn, ɔ́ɔ̀ vana po ndɔɔ piɛi buloo mò ke ndu powvo-o?

¹⁰ Nɛɛ po ndɔɔ piɛì yɛ suwvo, mò ke ndu kɛwvo?

¹¹ Niaa vanaa vɔɔnda ha, te niaa sinà pɛ le cuavaa niaa ɲɛm kɛndɔn keo, vɛ̀ɛ̀ Fuɲa niaa co o halataala-o ndu kɛɛ yɛnin le vanaa ɲunanin ndu-a ɲɛm kɛndɔn keo?

¹² Ɲɛ-ɲɛ niaa yeema pɛ mì caanda tosal niaa, mɛɛ niaa bɛɛ la tosal nda lende, kani lende tɔŋndo a vanaa-tɛɛngaa-diom Hala-a dimi ni.»

Nɛilan tan tiɔn

¹³ «La luɛi o dio sɔɔkɛɲɛɛo! Kani dio tongu taw-vo, nɛi kela kindu coo loo, ndu yaa vana o ɲánndávàà ni. Nduyɛ, vanaa bɔɔ-bɔɔ a co luɛyɔɔ o dio kon.

¹⁴ Kɛ dio sɔɔkɛɲɛɛo, nɛile piondonnde kɔlan la kendu coo len, ɲɛm mun yaa vana o cinda fɛɛn-fɛɛndo nin ni. Vanaa saalun lan-nda co sɛ́lɛ́ le.»

Le vanaa-tɛɛngaa-diom Hala-a lacòòvaa

¹⁵ «La mandan a vanaa-tɛɛngaa-diom Hala-a lacòòvaa. A co hunɔɔ o niaa lo maa n'saa, kɛ lenin ndaa tunaa yondoa vɔɔn-vɔɔnda nda co ni.

¹⁶ O komɔɔ ndaa niaa sinanin nda ni. Vɛ̀ɛ̀ vana kiandu pá rɛsɛnndon o yɔm n'yɔɔ, te kon te vooson o siɛmbullo?

¹⁷ Yɔm oo yɔm co yɔm kɛndɔɔ, kulun kɛndɔn o koam ni. Kɛ yɔm co a naa-o, kulun vɔɔnndon ndu koam ni.

¹⁸ Yɔm kɛndɔɔ kum kulun vɔɔnndon te, yɔm co a naa-o bɛɛ kum kulun kɛndɔn te.

¹⁹ Yɔm oo yɔm kum kulun kɛndɛ le, a kelu ndu, a viow ndu o yin.

²⁰ Lelan o komɔɔ ndaa niaa sinanin vanaa-tɛɛngaa-diom Hala-a locoovaa ni.»

Kaandeŋaa kpeekpeiya

²¹ «O co vanaa co ya veeloo aa: ‹Maalii, Maalii›-a kpede le a luɛinin o masale halataala len nin te, kɛ vanaa co hɛnan Fuɲa ni co o halataala-o tosaa-a daama a luɛinin ni.

²² Vanaa bɔɔ-bɔɔ a dimulnin ya paale len aa: ‹Maalii, vɛ̀ɛ̀ o co o diola nɔmndan te naa n tɛɛngul vannda sɔɔn Hala-on te? Vɛ̀ɛ̀ o co o diola nɔmndan te naa n tow ɲinaa vɔɔnda, mí n tosa dɛnnda kaamaalan taw le?›»

²³ O kon, i dimulnin nda aa: «Lepilɛ bɛɛ i sina niaa le. La faŋan ya, niaa vanaa tosaa dɛnnda vɔɔnda ha!»

Cɛila tiɔnndan

²⁴ «Lelan, vana-vana tuei pɛ sɔɔn nun mun, mò kela lecoo, ndu vanin maa vana taasi tangul cɛi ndɔɔ o pow bandíláà coo-o.

²⁵ Mí piɔɔ sia, mí mɛnndan ma hun, mí hoeiye hɔŋ, mí i lɔaa cɛi kalaa, kɛ o komba le. Kani o pow bandíláà coo ndóò kilan ni.

²⁶ Kɛ vana tuei pɛ sɔɔn nun mun, mò kela lecoo le, ndu vialnin vana pe lebol too, o tangul cɛi ndɔɔ o siòòndon coo-o.

²⁷ Mɛɛ piɔɔ sia, mí mɛnndan ma hun, mí hoeiye hɔŋ, mí i lɔaa cɛi kalaa, mó komba, mó tambu tambei pila.»

Kpaaya Yeesu-o

²⁸ Yeesu ciiyo sɔɔn mun dimio, mí sɛ́lɛ́ bɛndu o dimi mun o hɔl-lo dɔawnun kɔndɔfili a pɛɛku ndɔɔ.

²⁹ Kani kpaaya bɛndoo pila va o pɛɛku ndɔɔ nin ni, o ve maa pɛɛkula vanaa ndaa pɛɛkaa latɔŋnda le.