Matie 5 - BII BILA

PƐƐKU YEESU PƐƐKU VANNDA O PEMBEI COO-O (5-7) Dɛnɛ kɛndɛ kpeekpeiyo

¹ Yeesu cɔu sɛ́lɛ́ bɛndoo, mó hel o pembei coo, mó cal. Mí kaandeŋaa ndɔa sɔɔnguu ndu ikɛi.

² Mó cua sɔɛi le nda pɛɛkoo, mó dimi aa:

Dɛnɛ kɛndɛ kpeekpeiyo

³ «Dɛnɛ kɛndɔɔ co le vanaa tuisin tootoo o kɔlta ndalan nin-nda, kani masale halataala len le co le nda.

⁴ Dɛnɛ kɛndɔɔ co le vanaa co caŋndo-a, kani a sɔlanin ɲɔɔloo.

⁵ Dɛnɛ kɛndɔɔ co le vanaa vi kɔltan-nda, kani a sɔlanin lɛŋnden kɛ́ɔ.

⁶ Dɛnɛ kɛndɔɔ co le vanaa yeemɛi bii le dɛnɛ sandaa mɛɛ yiaan a kolɔɔ bii vana nuaa yɛ-a, kani a pumnin.

⁷ Dɛnɛ kɛndɔɔ co le vanaa tuinun vannda iɲíí-a, kani a sɔlanin ɲííye tuinɔnndo.

⁸ Dɛnɛ kɛndɔɔ co le vanaa dendu kɔltan-nda, kani a canin Hala.

⁹ Dɛnɛ kɛndɔɔ co le vanaa yɔngu kɔlɲuloo-a, kani a sɔlanin veeloo aa cuavaa Hala-a.

¹⁰ Dɛnɛ kɛndɔɔ co le vanaa nda co yɛlen tollo le dɛnɛ sandaa-a, kani masale halataala len le co le nda.

¹¹ Dɛnɛ kɛndɔɔ vanin le niaa, telen nda yeownin niaa, mà tol niaa yɛlen, mà hɛɛnduu niaa sɔɔn vɔɔŋun súú-súù ka coo le ya-o.

¹² La naŋ kɔl mì la dɔwnun ɲaale, kani vɔ̀ngɔ̀ niaa vanin o bɔɔ o halataala. Kani lende nda tol vanaa-tɛɛngaa-diom Hala-a hiow niaa laci-a yɛlen ni.»

Hɛlle a ɲɛ-tengaa o ceendo coo

¹³ «Hɛlle niaa co o lɛŋnden coo ni. Kɛ te yeelaa fula pɛ hɛlle, vɛ̀ɛ̀ vana mingi yɛ ndi yeeliaa? I niŋ ndɛ le ɲɛ-ɲɛ le, fɔ le ndi viovɔɔ o bɛ́ɛ̀, mì vannda nɛw ndi.

¹⁴ Ɲɛ-tengaa ceendo niaa co ni. Kobi co o pembei coo-o nɔla vionnɔnndo le.

¹⁵ Vana mɛndul fitinaa le ndu kumbɔɔ le, kɛ le ndu kɛsio o ɲɛ kɛsiaa lafitinaa coo, haliko mo teengiaa cɛiyo lenin le vanaa co lenin-nda kpow.

¹⁶ Ɲɛ-tengaa niaa bɛnda mò tenga lende vannda o hɔl, haliko ma ce dɛnnda niaala kɛndɛlan, o kon mà biilu fuɲa niaa co o halataala-o.»

Peelɔn tɔŋndo

¹⁷ «La yiyan tei maa tɔŋndo, te kon te sɔɔn vanaa-tɛɛngaa-diom Hala-a ya hin tɛɛmbuu ni. I hin le mun tɛɛmbuu le, kɛ le mun peeloo.

¹⁸ I co niaa toɲaa dimul, te halataalaa a lɛŋnden le co vɔ pɛ, hali diomnde hiow dɔɔnanndo len, te kon te sɛva hiow dɔɔnanndo-o faŋannin o tɔŋndo coo le, háá mì mɛɛlula ɲɛ-ɲɛ la tiiya.

¹⁹ Vana-vana tɛɛmbuu pɛ tɔŋ hiow dɔɔnanndo o tɔŋndan ndan tɛɛn-ndo o pilɛ, mò pɛɛku vannda tosaa maa ndu, vana kon ndu hiawnin dɔɔnanndo o masale halataala len nin ni. Kɛ vana kela pɛ lecoo, mò pɛɛku vannda lan biyɔɔ, ndu vanin vana bɛndoo o masale halataala len nin.

²⁰ Kani mì dimul niaa, te dɛnɛ niaa sandaa hiw dɛnɛ sandaa vanaa pɛɛkaa latɔŋnda a Faliisia le, mɛɛ la lueinin o masale halataala len nin te.»

Pɛɛkoo a kɔltuwvo o kɔɔ

²¹ «La tuei maa mí ndíì dimulun sindɛ fuɲaa naa mamaa aa: ‹Dii vana le›, vana dii pɛ vanacieo, a kelu ndu iyama.

²² Kɛ ya, i co niaa dimul: vana-vana tuulu pɛ kɔl a puapilɛ ndɔɔ, a kiolu ndu iyama. Vana dimul pɛ puapilɛ ndɔɔ aa: ‹A kindu kɔl te›, vanaa bɛndua kialu yaman lelɛŋndon-nda bɛnda mà cal o sɔɛi ndɔɛi coo. Vana dimul pɛ puapilɛ ndɔɔ aa: ‹Diɔmndo n co ni›, ndu bɛnda mò kɔɛ o ɲánndávàà.

²³ Lelan taa hin pɛ a sálà nɔmndo o fonda-loamaa-lasálàá, mà lo lon, mà yiyan maa puapilɛ nɔmndo nɔ tɛɛ nɔmndo o kɔl,

²⁴ mɛɛ mɛi-yɔ sálà nɔm kon o fonda-loamaa-lasálàá hɔl-ndɔ, mà kɔ toosiaa sɔɛi co nɔm ken tɛɛn niaa puapilɛ nɔm kon-nde. O kon kɔɔli, a hun soli niko sálà nɔmndo.

²⁵ Keleŋá sɛɛngian co nɔm tɛɛn niaa vanndo-o toosiaa telen niaa co vɔ nɛi-tɛɛn-ndo, yɔŋii o kɔ mal nɔm vana kialaa n'yamaa o ba, mì ndu hivi nɔm o kpalilnɔɔ lo, mì kpalilnɔɔ kɔ mal nɔm o kaasoo.

²⁶ A toɲa, mì dimul nɔm, hali tààngáà ndu pilɛ bɛɛ lonin yondo le fula nɔmndo lon te.»

Pɛɛkoo a suundaa o kɔɔ

²⁷ «La tuei maa mí ndíì dimin aa: ‹Suunda le.›

²⁸ Kɛ ya, i co niaa dimul: vana-vana tofa pɛ vanalanɔɔ tofa yeemɛi vɔɔndo, mɛɛ ndu cii suunda a vanalanɔ kon o kɔl ndɔɔ nin.

²⁹ Te hɔlte nɔmnde ba kɛndɛlen le co tosa ni ma del o pɔwlan nin, mɛɛ kala len, ma viow len polon. Kani o co fisa mi dialii nɔmnde ndii pilɛ i tambu a nɔm pila kpow viownɔnndo o ɲánndávàà.

³⁰ Te ba kɛndɛ nɔmndo co tosa ni ma del o pɔwlan nin, mɛɛ kiolu ndu, ma viow ndu polon. Kani o co fisa mi dialii nɔmnde ndii pilɛ i tambu, a nɔm pila kpow kɔlan o ɲánndávàà.»

Pɛɛkoo a nɔ piɔlɛiyo o kɔɔ

³¹ «Mí ndíì dimin maa vana kɛɛ pɛ laa ndɔ, mɛɛ o yɔngu ndu sɛbɛ pialaa nɔu.

³² Kɛ ya, i co niaa dimul: vana-vana kɛɛ pɛ laa ndɔ, te o co yɛ mò suunda le, ndu vem laa ndɔ kon suundaa. Vana cua yɛ pɛ vanalanɔ kɛyan nda pɔnɔ ndɔ-o o nɔ̀u nin, mɛɛ vana kon suunda.»

Pɛɛkoo a mɛnanndo o kɔɔ

³³ «Mí la tuɛi vɛlɛ maa mí ndíì dimulun fuɲaa naa mamaa aa: ‹Mɛnan te! Kɛ kɛɛ le sɔɛi n mɛnan coo-e peeloo le.›

³⁴ Kɛ ya, i co niaa dimul: la mɛnan te. La mɛnan a halataalaa le, kani lon co ɲɛ-calaa lemasa Hala-o ni.

³⁵ La mɛnan a lɛŋnden te, kani len le co ɲɛ kɛsiaa n'pelu ndɔɔ ni. La mɛnan a Yerusalɛm te, kani kobi masa bɛndoo co kon ni.

³⁶ La mɛnan vɛlɛ a bolle niaalen te, kani la tiwba yiinnde niaalen lepilɛ bɛɛ mingio lehumbu, te kon te le tiŋi le.

³⁷ Sɔɛi niaa cɛl pɛ aa ‹Oi› ndi lo lende, i niaa dimi pɛ aa ‹Ɛ-ɛ› ndi lo vɛlɛ lende. I kɛ́-kɛ̀ vana handu nin pɛ o kon kɔɔli, Vana vɔɔndo o ba ken fula ni.»

Pɛɛkoo a màá dɛnɛ vɔɔndo mingio o kɔɔ

³⁸ «La tuei maa mí ndíì dimin aa: ‹Te vanndo pɛl pɛ vanndo hɔlten, ndu bɛɛ a piɔl ndu hɔlten. Te vanndo bɛŋi pɛ vanndo ciŋnde, ndu bɛɛ a bɛŋi ndu ciŋnde.›

³⁹ Kɛ ya, i co niaa dimul: la simul vanaa kɔlvesɛiya le. Te vanndo lɔɔ pɛ nɔm kpaŋii ba kɛndɛi, mulul ndu vɛlɛ kpaŋnde pilɛi.

⁴⁰ Te vanndo yeema pɛ le kɔɔsɔɔ a nɔm le doma nɔm lebɛngoo cuaa, mal ndu mò cua vɛlɛ doma nɔm bɛndoo.

⁴¹ Te vanndo baŋ pɛ nɔm le kɔla piasa vàá pilɛ niaa ndu, mɛɛ cɛl mì la kɔɛ kɔla piasa vàála tiɔn.

⁴² Ke vana piɛi nɔm-ndo, tuŋ vana yeema le nɔm ɲɔɔ yowvo o ba-o le.»

Le yaamɔɔa kaolaa

⁴³ «La tuei maa mí ndíì dimin aa: ‹Kaola vana kaola nɔm-ndo, mà tol vana tol nɔm yɛlen-ndo leyɛ.›

⁴⁴ Kɛ ya, i co niaa dimul: la kaola yaamɔaa niaa, la piɛi Hala le vanaa co niaa saangiaa a niaa yɛlen tollo-a.

⁴⁵ O kon, la vanin cuavaa fuɲa niaa co o halataala-o-a. Kani o soli paalen le vanaa vɔɔnda a le vanaa kɛndɛa, mó tuisi piɔɔ le vanaa sandaa a le vanaa sendu le-a.

⁴⁶ Kani te la kaola pɛ vanaa kaola niaa-a daama, vɔ̀ngɔ̀ yɛɛ nɛ niaa sɔ̀là yɛnin o kon? Vɛ̀ɛ̀ o co lende le vanaa biyaa mulua bɛɛ tosa le?

⁴⁷ Te o va pɛ maa puapilɛa niaa daama niaa yìl ni, ɔ́ɔ̀ dɛnɛ bɛndu niaa tosa o kon-ndo? Vɛ̀ɛ̀ o co lende le vanaa sina Hala le-a bɛɛ a tosa le?

⁴⁸ Lelan, niaa la peelun mɛɛ fuɲa niaa co o halataala-o peelun yɛ.»