Matie 26 - BII BILA

Simlacia yii Yeesu dúmbú

¹ Yeesu ciiyo sɔɔn mun kpow dimio, mó dimul kaandeŋaa ndɔa aa:

² «La sinà maa o lo palɛi ndii ŋiin le kafo-hiavaa-coo tiiyaa. À malnin Po vanacieo vannda o ba le ndu baŋɔɔ o yɔm singafilaa coo.»

³ O kon, mí bolii vanaa-solia-lasálàá a simlacia lelɛŋnda cuungian o Kaif lo bɛ́ɛ̀, o va bolle vanaa-solia-lasálàá-o.

⁴ Má kɔ mɛi le kɔlkalu vɔɔndo nuwviaa le Yeesu biyɔɔ, haliko mi ndáà dii ndu.

⁵ Má dimi aa: «N bíìnun ndu o paale kafolen coo le, yɔŋii vɔkɔ-vɔkɔɔ yɔŋnun vannda tɛɛn.»

Vanalanɔɔ pum suu Yeesu cuɛima cun kɛndɛan Betani

⁶ Tuma Yeesu va Betani o Simɔn nàà siaŋaa va-o lo cɛinin-ndo,

⁷ mí vanalanɔɔ pum sɔɔnguu ndu ikɛi. Ndóò nɔ sianio pum o ba a cuɛima cun kɛndɛma báà kalan mapum lenin. Tuma nda va ɲɛdiaa dioo-o, mó taaliaa cuɛima man Yeesu o lebol.

⁸ Kaandennda cɔu lende, má tambu kɔltan, má ɲuna aa: «Le yɛɛ nɛ man tɛɛmbuuo ho nuaa?

⁹ Ndóò va fisa mí vanáà pisi cuɛima báà kalan man, mí vanáà piɔw vanaa bala fondoa ɲɛ-sɔlaa kon.»

¹⁰ Mí Yeesu bii sɔɛi ken bila, mó dimul nda aa: «Le yɛɛ niaa co yɛ palaa ho? Dɛnɛ kɛndɔɔ o tosal-la ni.

¹¹ Kani la nɔnin vanaa bala fondoa lɔ́ɔ́-lɔ́ɔ̀ niaa tɛɛn. Kɛ ya ya, la nɔ́nìn ya lɔ́ɔ́-lɔ́ɔ̀ niaa tɛɛn te.

¹² Cuɛima cun kɛndɛma o taaliaa ya man coo-an, le lɔ́ɔ́ nda co hunɔ̀ɔ̀ ya kumbɔ̀ɔ̀-o o bɛɛndiaa ya pɔɔ lende ni.

¹³ I co niaa toɲaa dimul, nɛɛ-nɛɛ Yoongu kɛndɔɔ ho hun yondan pɛ o ceendo coo, a diminin vɛlɛ dɛnɛ cuaa ho tosa hoo-o le loonɔnndo a ndu o kɔɔ.»

Yuda nuwviaa nɛilan le Yeesu malɔɔ vannda o ba

¹⁴ Mí kaandennɔ pilɛ o kaandeŋaa tɔ́ a à ŋiɔnda tɛɛn, o ndáà veelu aa Yuda Iskariɔt-o kɔ komal bolii vanaa-solia-lasálàá,

¹⁵ mó dimul nda aa: «Te i mal pɛ ndu niaa o ba, yɛɛ nɛ niaa ke yɛnin ya?» Má cua volin latámán beleyaa, má yɔngu ndu.

¹⁶ Kandɔɔ nin tuma kon, mí Yuda kandu nɛilan nuwviaa le Yeesu malɔɔ nda o ba.

Yeesu de ɲɛdiaa kafo-hiavaa-coo nda kaandeŋaa ndɔa

¹⁷ O paale tasele kafo bulu toosian a lɛvɛn too len coo, mí kaandennda hun ɲuna Yeesu aa: «Kuɛɛ nɛ n yeema yɛ mì n bɛɛndial nɔm ɲɛdiaa le kafo-hiavaa-coo?»

¹⁸ Mí Yeesu mulul nda aa: «La kɔ o kobio nin, o vanndo pum ndo, mì la dimul ndu aa: ‹Kɔɔfa dimi aa telen ndɔɔ tiiya, o nɔm ndo o tosanin kafo-hiavaa-coo nda kaandeŋaa ndɔa ni.›»

¹⁹ Mí kaandennda tosa mɛɛ Yeesu dimul nda yɛ. Má toosiaa ɲɛdiaa kafo-hiavaa-coo.

²⁰ Icɔllo, mí Yeesu cal ɲɛdiaa dioo nda kaandeŋaa tɔ́ a à ŋiɔnda.

²¹ Tuma nda va ɲɛdiaa dioo-o, mó dimul nda aa: «I co niaa toɲaa dimul, vana pilɛ o niaa tɛɛn malnin ya vannda o ba.»

²² Mí kaandennda kpow a tambu kɔltan taw, má va ndu ɲuuniaa a pilɛn-pilɛnnda aa: «Maalii, o co ya le le?»

²³ Mí Yeesu muli aa: «Vana naa n co baa vowvo naa ndu o hɛngɛi pilɔɔ nin-ndo, ndu malnin ya vannda o ba ni.

²⁴ Po vanacieo co hunɔɔ piɔ́mndo sɔla mɛɛ o sɛvan a ndu o kɔɔ o Sɛbɛ Hala-o nin yɛ. Kɛ dɛnɛ palaa co le vana malnin ndu vannda o ba-o. Ndóò va fisa hali mì vana kon ndóò vilun te.»

²⁵ Mí Yuda va ndu malɔɔ vannda o ba-o cua sɔɛi, mó ɲuna aa: «Kɔɔfa, o co ya le le?» Mí Yeesu mulul ndu aa: «Nɔm pila cii dimi.»

Ɲɛdiaa Maalii-o

²⁶ Tuma nda va ɲɛdiaa dioo-o, mí Yeesu cua buloo, mó dɔaw ndu duaa, mó yimiyimi ndu, mó yɔngu kaandeŋaa ndɔa, mó dimul nda aa: «La bii mì la de, dialun nun co mun ni.»

²⁷ Mó cua vɛlɛ taala kólaa, mɛɛ o cii balikaa malɔɔ, mó ke nda ndu, mó dimi aa: «Niaa kpow la kol,

²⁸ kooma nian ma co man ni, kooma kpema-an, ma fula le vannda taw hakio malɔɔ-an.

²⁹ I co niaa dimul, i kol-lɛnin mɔima n'rɛsɛnndan man te, háá fɔ nin o masale Fuɲa nuu nin, mì hun kol ma sɛnɛiyan naa niaa.»

³⁰ Ndáà ciiyo condun Hala-on solio, má kɔa o Pembii oliviei coo.

Yeesu dimi maa Piɛr vuununnin sɔɛi ndɔɛi

³¹ O kon mí Yeesu dimul nda aa: «Cɔɛllɛn, niaa kpow la kɛɛnin ya, kani o co o sɛvaa aa: ‹I lɔaanin vana mandaa n'saa, mì kunda saa puusian.›

³² Kɛ telen ya tendulnin fulaa vanvílɛ́iya tɛɛn-ndo, i kɔanin niaa laci Kalile.»

³³ Mí Piɛr cua sɔɛi, mó dimul Yeesu aa: «Vanaa tɔ̀a kpede kɛɛ bɛɛ nɔm, ya, i kɛɛnin nɔm te few.»

³⁴ Mí Yeesu dimul ndu aa: «I co nɔm toɲaa dimul, cɔɛllɛn, nanu a sɔɔ koovaa, a vuununnin sɔɛi nii leyàá.»

³⁵ Mí Piɛr mulul ndu aa: «Hali i sɔla bɛɛ piɔ́mndo, i viinunnin sɔɛi nɔmnde le.» O kon mí kaandennda kpow dimi ɲɛ pilɛ kon.

Yeesu piɛi Hala Sɛtsemane

³⁶ O kon kɔɔli, mí Yeesu kɔa a kaandeŋaa ndɔa o fondaa pum diolan Sɛtsemane, mó dimul nda aa: «La cal nanu, mì kɔɛ pɔɔ piɛilen o nda.»

³⁷ Mó kɔa a Piɛr a poaa ŋiɔŋaa Sebedee-a kɔɔli. Mó kandu kɔllo tambei a buulanndo taw.

³⁸ O kon mó dimul nda aa: «Kɔl nuu sanga háá pɛɛngu piɔ́mndo, la lo pɔɔ nanu, mì la va lahɔl a ya latulu.»

³⁹ O kon mɛɛ o kɔɛ tiŋ laci, mó del o kuumbuan lɛŋ, mó piɛi Hala aa: «Pua, too nɔla pɛ tosan, cɛl mi i kol a taala kólaa sangaa ho le. Kɛ nduyɛ, o va mɛɛ ya i yeema yɛ le, tosa mɛɛ o hɛnan nɔm yɛ.»

⁴⁰ O kon kɔɔli, mó muungu nɛɛ kaandennda va-a, mó komal nda o lɔan, mó ɲuna Piɛr aa: «La nɔla bɛɛ vaa lahɔl a ya latulu le lɛɛlɛ pilɛ le!

⁴¹ La tiondu mì la piɛi, yɔŋii niaa del o tɔɔndanndo nin. La co yiyanndo le tosaa lende, kɛ dialun vílɛ́iyon co niaa.»

⁴² Mí Yeesu faŋan vɛlɛ faŋan diinndɔɔ, mó kɔ piɛi Hala aa: «Pua, te o nɔla tosan mì taala kólaa sangaa ho faŋan ya ikɛi le, maa fɔ mi i kol a ndu, maa hɛnan nɔmndo tosan!»

⁴³ Ndóò muungoo, mó komal nda vɛlɛ o lɔan. Kani lɔan ma va nda o hɔl taw.

⁴⁴ Mí Yeesu faŋan nda vɛlɛ, mó kɔ piɛi Hala o yàándɔɔ, mó miinguu sɔɔn pilɛn mun.

⁴⁵ O kon kɔɔli, mó muungu nɛɛ kaandeŋaa ndɔa va-a, mó dimul nda aa: «La co vɔ o lɔan a pɛngio háá sisa? Telenndo cɛn tiiyaa, mì Po vanacieo del vanaa yɔŋ vɔɔnda o ba.

⁴⁶ La cɔn, n kɔnnun. La tofa vɔ vana co ya malɔɔ nda o ba-o hunɔɔ!»

A kɔɛ Yeesu biyɔɔ

⁴⁷ Yeesu lo sɔɛi, mí Yuda, vana pilɛ o kaandeŋaa tɔ́ a à ŋiɔnda tɛɛn hun a vannda sɛ́lɛ́ bɛndoo kɔɔli. Mɔɔn cɔwvon a yɔmii bingiei va nda o laba. Bolii vanaa-solia-lasálàá a simlacia lelɛŋnda ndáà vem nda ni.

⁴⁸ Mí vana va nda Yeesu malɔɔ o ba-o cɔm nda tɔɔmasele ndáà sinanin ndu-o aa: «Vana ya yilnin mì kɔman-ndo, mɛɛ ndu ni, la bii ndu!»

⁴⁹ Fɔ́ɔ́fɔ̀, mí Yuda sɔɔnguu Yeesu ikɛi, mó yil ndu aa: «Kɔɔfa isɛ!» Mó kɔman ndu.

⁵⁰ Mí Yeesu dimul ndu aa: «Caan nuu, tosa ɲɛ n hin tosa-o.» O kon mí vanaa tɔ̀a sɔɔnguu, má bii Yeesu.

⁵¹ Mí vana pilɛ o vanaa va Yeesu kɔɔli-a tɛɛn siɛndi baa, mó nan mɔɛi ndɔɛi cɔwve, mó kialu buɛi bolle vanaa-solia-lasálàá nilen.

⁵² O kon mí Yeesu dimul ndu aa: «Míngi mɔɛi nɔmii cɔwve o boo nin. Kani vana cɔlɔba pɛ a mɔɛi cɔwve, a dii ndu a mɔɛi cɔwve.

⁵³ Sina pɛngu maa te yáà dimul pɛ Fuɲa nuu le ya malaa, ndóò nɔla mì ndóò yɔŋ ya mɛlɛkaa cɔwva kundalan tɔ́ a latiɔn.

⁵⁴ Kɛ te i tosa pɛ lende, vɛ̀ɛ̀ ɲɛ sɛvan o Sɛbɛ Hala-o nin-ndo peelun yɛnin? Kani o co o sɛvaa maa lende i bɛnda le tosan-ndo ni.»

⁵⁵ O kon kɔɔli, mí Yeesu dimul sɛ́lɔ́ɔ́ aa: «La vɛ hunɔɔ le ya biyɔɔ a mɔɔn cɔwvon a á yɔmii bingiei maa vui? Lepalaa-lepala, i va icali o Cɛi-Hala-o nin niaa tɛɛn le pɛɛkulan yɔngoo, la bii ya le.

⁵⁶ Kɛ hee kpede tosan, haliko mi sɔɔn vanaa-tɛɛngaa-diom Hala-an sɛvan-ndon peelun.» O kon mí kaandennda kpow mal ndu, má sɔɔndian.

A kɔɛ a Yeesu o vanaa bɛndua kialu yaman lelɛŋndon-nda lo

⁵⁷ Mí vanaa bii Yeesu-a kɔa a ndu o Kaif bolle vanaa-solia-lasálàá lo, vanaa pɛɛkuu tɔŋ Hala-o-a a simlacia va a cuungiannda lo.

⁵⁸ Háá má tiiya a Yeesu o bolle vanaa-solia-lasálàá lo bɛɛ, Piɛr va ndu kɔlan kɔɔli lándán. Mó luɛi o bɛ́ɛ̀ lon, mó kɔ cal kpalilla tɛɛn le sinaa mɛɛ sɔɛi ken i va mɛɛlu yɛ.

⁵⁹ Mí bolii vanaa-solia-lasálàá a vanaa bɛndua kialu yaman lelɛŋndon-nda va nɛilan nuwviaa le Yeesu còòlan ɲiinduuo, haliko mi ndáà dii ndu.

⁶⁰ Kɛ a sɔɔn lacòòvan vannda dimi mun-ndon kpede, a seelun ɲɛ-ɲɛ le. O mɛɛlulan, mí vanaa ŋiɔn fula, má dimi aa:

⁶¹ «Langbanɔɔ ho dimi ni maa o nɔla Cɛi-Hala-o tɛɛmbuu mò mingi ndu tangalu o palɛi ndii yáá bɛngu.»

⁶² Mí bolle vanaa-solia-lasálàá can, mó ɲuna Yeesu aa: «Vɛ̀ɛ̀ a co ɲɛ-ɲɛ dimi a seile vannda ha co tɛndaa a nɔm o kɔɔ len te?»

⁶³ Kɛ Yeesu kuŋ te, o soli le. O kon, mí bolle vanaa-solia-lasálàá dimul ndu aa: «Mɛnan le Hala co yoomu-o, mà dimul naa, te nɔm co Krista Po Hala-o ni.»

⁶⁴ Mí Yeesu mulul ndu aa: «Nɔm pila cii dimi. I co niaa vɛlɛ dimul, la canin Po vanacieo icali Hala vana kpaayaa kpow o ba kɛndɔɔ coo, mo va hunɔɔ o yumbuyumbu halataala-o nin.»

⁶⁵ O kon, mí bolle vanaa-solia-lasálàá sɛɛsian volɔɔlan lekɔɔ, mó dimi aa: «O dimi sɔɛi tana-i a Hala. Ɔ́ɔ̀ seyaa naa n co vɛlɛ ɲuna le hee-a? Kámáá niaa pila langa tuei mɛɛ o dimi sɔɛi tanɛi a Hala yɛ! Ɔ́ɔ̀ yiyan niaa?»

⁶⁶ Má muli aa: «O bɛnda mò sɔla piɔ́mndo.»

⁶⁷ O kon kɔɔli, má tufu ndu lɔluan o hɔl, má kuindikuindi ndu. Mí vannda pum lɔaa ndu kpaŋnde, má dimul ndu aa:

⁶⁸ «Krista! Cɔm ndɔ naa vana lɔɔ nɔm-ndo.»

Piɛr viinun le Yeesu

⁶⁹ Piɛr ndu va icali o dio o bɛ́ɛ̀ lon, mí buɛi laanndoo pum sɔɔngu ndu ikɛi, mó dimul ndu aa: «Nɔm bɛɛ a va Yeesu langbanɔ fula hoo Kalile-o kɔɔli.»

⁷⁰ Kɛ mó vuunun sɔɛi ken vannda kpow o hɔl, mó dimi aa: «I sina bɛɛ sɔɛi n co hee dimio-e le.»

⁷¹ O kon kɔɔli, mó kɔannun a kpengii dio bɛɔ. Mí buɛi laandu celen ca ndu, mó dimul vanaa va lon-nda aa: «Langbanɔɔ ho bɛɛ va Yeesu fula Nasarɛte-o kɔɔli.»

⁷² Mí Piɛr vuunun vɛlɛ, mó mɛnan po aa: «I sina langbanɔɔ ho le.»

⁷³ Telen bingi hiovɔɔ vɛlɛ, mí vanaa va lon-nda sɔɔnguu Piɛr ikɛi, má dimul ndu aa: «A toɲa, a co vana pilɛ o vanaa kan tɛɛn, kani vana tuei dɔ́ɔ́ pɛ nɔm sɔɛi, a sina.»

⁷⁴ O kon mí Piɛr kandu vuunɔnndo a mɛɛnianndan aa: «I sina poo ho le. Te còòlan ya co dimio ni, màá Hala tuisi ya dɛnɛ palaa coo!» Fɔ́ɔ́fɔ̀, mí kongillo koova.

⁷⁵ O kon, mí Piɛr yiyan sɔɛi Yeesu ndóò dimul ndu-e aa: «Lɔ́ɔ́ pá kongillo koova, a vuununnin leyáá maa a sina ya le.» Mí Piɛr fula, mó kɔ caŋ taw.