Matie 25 - BII BILA

Tale felengia laandua n'van tɔ́a

¹ Mí Yeesu dimi aa: «Masale halataala len le vanin ko kpen a felengia laandua n'van tɔ́, á cua fitinala ndalan, má fula le kɔlan vana yil lanɔɔ sɛnɛi-yo bɔŋaa-a.

² Felengia nɔ taasi le-a va nda tɛɛn nda ŋuɛɛnu, a nɔ taasio-a nda ŋuɛɛnu.

³ Mí felengia nɔ taasi le-a a cua fitinala ndalan, kɛ a kue a cuɛima celen o ba le.

⁴ Mí á nɔ taasio-a nda cua fitinala ndalan, má cua vɛlɛ cuɛima celen.

⁵ Nuyɛ, vana yil lanɔɔ sɛnɛi-yo yala hunɔɔ le. Mí nda kpow a yinda, má hiawnun o lɔan.

⁶ A di-tɛɛndo, má tuɛi yondaa aa: ‹Má cè vana lanɔ sɛnɛiyo hunɔɔ! La fula le ndu bɔŋaa.›

⁷ O kon mí felengia laandua kan kpow a can, má toosiaa fitinala ndalan.

⁸ Mí á nɔ taasi le-a dimul á nɔ taasio-a aa: ‹La ke naa cuɛima nian ɲɛ-pɔmbɔ. Fitinala naalan la cɛn ɲumndo.›

⁹ Kɛ mí felengia nɔ taasio-a muli aa: ‹Ɛ-ɛ, ma tiwnin le naa niaa le, o co fisa mì la kɔɛ o vanaa co man pisio-a lo, mì la kɔ piondu ma niaan.›

¹⁰ Telen nda va kon kɔlan man piondɔɔ-o, mí vana lanɔ sɛnɛiyo tiiya. Mí felengia ŋuɛɛnua va a bɛɛndiannda-a luɛi nda ndaa latulu o ciɛi kafo liilaa lanɔ sɛnɛi kon nin, mí vannda kinda dioo.

¹¹ Ɲɔɔ viovɔɔ ká-ká, mí felengia laandua pilla bɛɛ a hun, má dimi aa: ‹Maalii! Maalii! Kumbil naa dioo!›

¹² Kɛ mó muli aa: ‹I co niaa toɲaa dimul, i sina niaa le.›

¹³ Lelan, la va o lapɔɛyɔn nin te, kani la sina paale len te, la sina telen kon te.»

Tale buɛyaa yáá-a

¹⁴ «Masale halataala len le vanin maa langbanɔ va kɔlan kelaa, mó veelu buɛyaa ndɔa, mó yɔngu nda bolofaa le mandaa-o.

¹⁵ Mó ke o pilɛ sianin n'kpungban kɛmɛ leŋuɛɛnu, mó yɔngu o diinndɔɔ sianin n'kpungban kɛmɛ lediin, mó yɔngu o yàándɔɔ sianin n'kpungban kɛmɛ. Mó yɔngu vana-vana mɛɛ o nɔla yɛ. O kon kɔɔli, mó kɔannun.

¹⁶ Fɔ́ɔ́fɔ̀, mí vana sɔla sianin n'kpungban kɛmɛ leŋuɛɛnu-o kɔa, mó kɔ tosa yulalen a mun, mó sɔla tɔnɔɔ sianin n'kpungban kɛmɛ leŋuɛɛnu lecoo.

¹⁷ Mí vana sɔla sianin n'kpungban kɛmɛ lediin-ndo bɛɛ kɔ tosa lende, mó sɔla tɔnɔɔ sianin n'kpungban kɛmɛ lediin lecoo.

¹⁸ Kɛ mí vana sɔla sianin n'kpungban kɛmɛ-o kɔ toaw soondo lɛŋ, mó vian sianin vana ndɔ bɛndoo lon.

¹⁹ Ɲɔɔ viovɔɔ ká-ká, mí vana nda bɛndoo hun, mó ɲuna nda le konaa dɔwnɔnndo.

²⁰ Mí vana sɔla sianin n'kpungban kɛmɛ leŋuɛɛnu-o sɔɔnguu, mó cɔm sianin n'kpungban ŋuɛɛnun o sɔla tɔnɔɔ-on, mó dimi aa: ‹Vana bɛndoo! Sianin n'kpungban kɛmɛ leŋuɛɛnu nɔm óò sɔɔ ya o ba ni, mí sɔla tɔnɔɔ lecoo sianin n'kpungban kɛmɛ leŋuɛɛnu. Má cè mun!›

²¹ Mí vana ndɔ bɛndoo dimul ndu aa: ‹Nuvali, vana baala kɛndɔɔ a vana baala lo o lediom coo-o n co ni. A yɔŋnun vana lo o lediom coo-o o ɲɛm pɔmbɔn nin, i sɔaanin ɲɔɔn taw nɔm o ba. Sɔɔnguu mì n dɔwnun ɲaale latulu naa nɔm.›

²² Mí vana sɔla sianin n'kpungban kɛmɛ lediin-ndo bɛɛ sɔɔnguu, mó dimi aa: ‹Vana bɛndoo! Sianin n'kpungban kɛmɛ lediin nɔm óò sɔɔ ya o ba ni, mí sɔla tɔnɔɔ lecoo sianin n'kpungban kɛmɛ lediin. Má cè mun!›

²³ Mí vana ndɔ bɛndoo dimul ndu aa: ‹Nuvali, vana baala kɛndɔɔ a vana baala lo o lediom coo-o n co ni. A yɔŋnun vana lo o lediom coo-o o ɲɛm pɔmbɔn nin, i sɔaanin ɲɔɔn taw nɔm o ba. Sɔɔnguu mì n dɔwnun ɲaale latulu naa nɔm.›

²⁴ O mɛɛlulan, mí vana sɔla sianin n'kpungban kɛmɛ-o sɔɔnguu, mó dimi aa: ‹Vana bɛndoo! Yáà sina maa vana n co-o, dɛnɛ nɔmndo kendu bɔɔ. Nɛɛ n seŋ te-a lon n koaw ni, nɛɛ n tol te-a lon n kiandu ni.

²⁵ Siòònde bii ya ni, mí kɔ vian sianin nɔmndon lɛŋ. Má cè mun! Bii ɲɛ co le nɔm-ndo.›

²⁶ Mí vana ndɔ bɛndoo mulul ndu aa: ‹Vana baala vɔɔndo a vana siɛlɛiyo n co ni. Nɔm óò sina maa nɛɛ ya seŋ te-a lon ya koaw ni, nɛɛ ya tol te-a lon ya kiandu ni.

²⁷ Le hee, ndóò va fisa mí nɔm óò kɔ vow sianin nun o cɛi mandaa bolofaa nin. O kon mɛɛ yáà muungu nanu nuaa yɛ, yáà soli mun a tɔnɔɔ lecoo.

²⁸ La hiɔlu sianin mun ndu o ba, mì la yɔngu vana nɔ sianin n'kpungan vaa pilɛ-o.

²⁹ Kani vana nɔ ɲɛ o ba-o, a cɔɔlunnin ndu yɔngu, mì ɲɔɔn kui ndu o ba. Kɛ vana nɔ ɲɛ o ba loo, hali o pɔmbɔ co ndu o ba-o, a hialunin kon ndu o ba.

³⁰ Vana baala nɛŋi hoo vana mako loo ndu, la soli ndu o bɛ́ɛ̀ o ɲumndan nin, nɛɛ caŋndan a ciŋndon sɔmndo vanin-nda.›»

Yamɛi mɛɛlɛi

³¹ Mí Yeesu dimi aa: «Lɔ́ɔ́ Po vanacieo hunnin o biilu ndɔɔ nin a mɛlɛkaa kpow-vo, o calnin o kpɛŋɛ ndɔ lemasaa nin.

³² Vanaa-mangalaa-isɔɔa kpow a cuungiannin ndu o hɔl. O sɛinin nda mɛɛ vana mandaa n'cɔloo sɛi saa a cuinnda nuaa yɛ.

³³ O hivinnin saa o ba kɛndɔɔ coo, mì cuinnda va ndu o ba mɛllo coo.

³⁴ O kon masaa dimulnin a vanin ndu o ba kɛndɔɔ coo-a aa: ‹La hun, niaa Fuɲa nuu dɔw duaa-a. La hun mì la sɔla Masalen kɛ́ɔ, masale toosian le niaa kabi o ceendo cɔvɔɔ len.

³⁵ Kani mɛɛ yiaan ma nɛi ya, mí la ke ya ɲɛdiaa. Mɛɛ kolɔɔ bii ya, mí la ke ya mí kol. I va miallo, mí la yiya ya.

³⁶ I va a fɛ́lio, mí la cuɛi ya. I va a nàá, mí la yil-la. I va o kaasoo, mí la sɔɔnguu ya ikɛi.›

³⁷ O kon vanaa sandaa mululnin ndu aa: ‹Maalii, lɔ́ɔ́ kuɛɛ naa n ce yɛ nɔm a yiaan mí n ke nɔm ɲɛdiaa, te kon te mí kolɔɔ bii nɔm, mí n ke nɔm má kol?

³⁸ Lɔ́ɔ́ kuɛɛ n hin yɛ sumialii naa, mí n yiya nɔm, te kon te ma va a fɛ́lio, mí n cuɛi nɔm?

³⁹ Lɔ́ɔ́ kuɛɛ naa n ce yɛ nɔm a nàá te kon te o kaasoo, mí n kɔa nɔm yilɔɔ?›

⁴⁰ O kon masaa mululnin nda aa: ‹Mì dimul niaa toɲaa, telen oo telen niaa va o hiow dɔɔnanndo o puapilɛa nia ha tɛɛn-ndo dɛnnda lan tosallo, ya niaa va tosal kon lende ni.›

⁴¹ O kon kɔɔli, o dimulnin a vanin ndu o ba mɛllo coo-a aa: ‹La faŋan ya, niaa vanaa dangaa. La kɔ o yinnde fɛɛn-fɛɛnnden nin, le toosian le masa ɲinaa vɔɔnda a le mɛlɛkaa ndɔa len pɛɛn!

⁴² Kani yiaan ma va ya nɛiyo, la ke ya ɲɛdiaa le. Mí kolɔɔ bii ya, la ke ya mì kol te.

⁴³ I va miallo, kɛ la yiya ya le. Fɛlio va ya, la cuɛi ya le. I va a nàá a o kaasoo, la kue ya yilɔɔ le.›

⁴⁴ O kon nda bɛɛ a ɲunanin aa: ‹Maalii, lɔ́ɔ́ kuɛɛ naa n ce yɛ nɔm a yiaan te kon te mí kolɔɔ bii nɔm, ma va miallo te kon te a fɛ́lio te kon te a nàá, te kon te o kaasoo, mí n kɛɛ nɔm malaa?›

⁴⁵ Masaa mululnin nda aa: ‹Mì dimul niaa toɲaa, telen oo telen niaa va kɛɔ o hiow dɔɔnanndo o puapilɛa nia ha tɛɛn-ndo dɛnnda lan tosallo, ya niaa va lan kɛɔ tosal kon lende ni.›

⁴⁶ Vanaa kan nda nda, dɛnɛ palaa fɛɛn-fɛɛndo toalnin nda coo, kɛ vanaa sandaa kɔanin o yoomu fɛɛn-fɛɛndo nin.»