Matie 24 - BII BILA

Yeesu soo a tambii Cɛi-Hala-o o kɔɔ

¹ Mɛɛ Yeesu fula o Cɛi-Hala-o nin, mó bii kɔnndan, mí kaandeŋaa ndɔa sɔɔnguu o ndu lo le ndu cɔmndo mɛɛ Cɛi-Hala kalaa ndóò cɔwnun yɛ.

² Kɛ mó dimul nda aa: «La ce mɛɛ o co kpede yɛ le? I co niaa toɲaa dimul, powvo pilɛ bɛɛ lonin o powvo coo le, la co koombiaa kpow.»

Dɛnnda palaalan a yɛle tolaale ceen mɛɛlaa

³ Mɛɛ Yeesu va icali o Pembii oliviei coo, mí kaandennda hun ɲuna ndu nda pilɛ kínɛí aa: «Dimul naa, telen kuɛɛ dɛnnda lan la yɔŋnun yɛnin? Ɔ́ɔ̀ tɔɔmasele hunɔɔ nɔmndo a tɔɔmasele mɛɛlula ceendo?»

⁴ Mí Yeesu mulul nda aa: «La caa dɛ, yɔŋii vana luei niaa o pɔwlan nin.

⁵ Kani vanaa bɔɔ-bɔɔ a hunnin o diola nilan, mà dimi aa: ‹Ya co Krista ni.› À lueinin vannda taw o pɔwlan nin.

⁶ La tuɛinin sɔɔn cɔwvon a ɲiimu-ɲiimu lacɔwvo. Kɛ la caa, yɔŋii kɔlta niaalan la laasian. Kani fɔ mì ken tosan, kɛ o ve vɔnin lamɛɛlu le la vanin ndan te.

⁷ Vanaa-mangalaa-isɔɔa cannin vanaa-mangalaa-isɔɔa celen cɔlɔba, mì masalen le cɛn masale celen cɔlɔba. Yima fofolan ma luɛinin o fondalan lapum, mì lɛŋnden le ɲiiya o fondalan lapum.

⁸ Kɛ kon kpow vanin-ndɔ ko mɛɛ pulii vialɛi kandu vanalanɔɔ nɛiyo nuaa yɛ.

⁹ A tuisinin dɛnɛ palaa súú-súù ka niaa coo, mà diw niaa, mì vanaa-mangalaa-isɔɔa kpow a pɛɛsa niaa le diola nilan.

¹⁰ Ken tosanin mì vanaa bɔɔ-bɔɔ a del, mà huinan, mà nɛɛnɛan vellaa-velle.

¹¹ Vanaa-tɛɛngaa-diom Hala-a lacòòvaa cannin taw, mà luei vanaa bɔɔ-bɔɔ o pɔwlan nin.

¹² Dɛnɛ vɔɔndo kuinin háá mì kaola vanaa bɔɔ-bɔɔ nɔ le Mɛlɛka-o dɔɔnan.

¹³ Kɛ vana lonin biuvɔnndo háá o mɛɛlulan-ndo, ndu sɔlanin cindaa.

¹⁴ Yoongu kɛndɛ soo a masale Hala len o kɔɔ-o yondannin o ceendo coo kpow, haliko mi ken i va seilen le vanaa-mangalaa-isɔɔa súúlan kpow. O kon kɔɔli, mɛɛlulan la tiiya.»

Dɛnnda lamààla bɛndula nɔɔliaanin Cɛi-Hala-o lan

¹⁵ «Tuma niaa canin mì dɛnɛ nɔɔlɛi tɛɛmbua bɛndoo, ò Daniɛl vana-tɛɛngaa-diom Hala-o dimi sɔɛi ndɔɛi-yo, kɛsin o fonda diandaa-o, (vana co sɛbɔɔ ho dimio-o bɛnda mò bii bila),

¹⁶ o tuma kon, vanaa vanin o tàndá Yuda-o nin-nda bɛnda ma ɲaanun le kɔnndan o pembon coo.

¹⁷ Vana vanin o cɛiyo coo-o ndu bɛnda lɛ mo tol le ɲɛ vaa cɛinin cua le.

¹⁸ Vana vanin o ciɛi nin-ndo ndu bɛnda lɛ mo muungu le volɔɔ ndɔ cuɛinan cua le.

¹⁹ Dɛnɛ palaa vanin le vanlaandua vanin a folilan-nda a le vanlaandua vanin vɔɛsio palɛi ken-nda.

²⁰ La piɛi Hala, màá telen niaa ɲaanunnin kon-ndo va o sialten nin te, o va vɛlɛ o paale pɛngiaa coo le.

²¹ Kani tuma kon, sanga bɛndoo yɔŋnunnin. Kabi ceendo kandun háá hau, sanga bɛndu vaa lende yɔŋnun-ndɔ le. Nduyɛ sanga bɛndu vaa lende yɔŋnun ndɛnin le fɛɛn a fɛɛn te.

²² Te palɛi ken ndíì dɔɔnian te, vana-vana óò cindanin te. Kɛ le vanaa sɔla hɛlio-a, mí palɛi ken i dɔɔnian.

²³ Lelan te vanndo dimul niaa pɛ aa: ‹Krista co nanu›, te kon te aa: ‹o co o nda›, la láálan ndu le.

²⁴ Kani kristaa lacòòvaa a vanaa-tɛɛngaa-diom Hala-a lacòòvaa cannin, mà tosa dɛnnda kɔndɔfilta bɛndulan a kaamaalan, mà kɔɛ bɛɛ hali le vanaa sɔla hɛlio-a lueiyo o pɔwlan nin, taa tiw pɛ ba.

²⁵ I cii niaa ndi dimul ei!

²⁶ A dimul niaa bɛɛ aa: ‹O co o lɛŋnde veselɛilen nin›, la kɔa le, te kon te aa: ‹O co cɛinin o nda›, la láálan te.

²⁷ Kani mɛɛ piɔɔ-volia kandun a ba paalen le can-ndo, mò kɔɛ háá a ba paalen le del-lo nuaa yɛ, lende hunɔɔ Po vanacieo vanin ni.

²⁸ Nɛɛ ɲɛ vílɛ́iyo co-a, lon duàá cuungian ni.»

Hunɔɔ Po vanacieo

²⁹ «Palɛi sanga bɛndui ken i hiow dɔ́ɔ́ pɛ, paalen le piimiaanin, paangei dindunin te, loeon fulanin coocoo mì n deli, mì kpaayala co o halataala lan la hiilun.

³⁰ O kon tɔɔmasele Po vanacieo fulanin o halataala. Vannda súúlan kpow o lɛŋnden coo a somisominnin, mà ce Po vanacieo hunɔɔ o yumbuyumboo nin cɔnɔnndo o halataalaa a kpaaya bɛndoo a á biilu bɛndoo.

³¹ O viamnin mɛlɛkaa ndɔa a diom bulu bɛndoo, mà mɔɔsiaa vanaa o hɛli-a fulaa o kpengun hiɔɔlun ceendo, cɔnɔnndo o halataalaa mɛɛlulan kɔlan tiiyaa háá o mɛɛlulan kpengei pilɛi.»

Pɛɛkoo a voosu tumndo o kɔɔ

³² «La bìí tale voosu tumndo ho bila: lɛɛndun ndɔn kuumiaa dɔ́ɔ́ pɛ mì pei lendei pui, la siná dɔ́ɔ́ maa vɔɔlen le co le tiiyaa.

³³ Lende koni, niaa bɛɛ, tuma niaa canin dɛnnda lan kpow-vo, la sina niko maa Po vanacieo co lɛ levil te, maa o co nin niaa o dio.

³⁴ I co niaa toɲaa dimul, lambio ho hiwnin te, mì dɛnnda lan kpede la peelun.

³⁵ Halataalaa a lɛŋnden le hiawnin, kɛ sɔɔn nun hiwnin te.»

Hala ndu pilɛ kpé sina telen ceendo co cuvɔɔ-o ni

³⁶ «Le paale len a le telen kon, vana-vana sina le, mɛlɛkaa co o halataala-a sina le, Po vanacieo sina le, fɔ Fuɲa nuu ndu pilɛ kpé sina ni.

³⁷ Kani, mɛɛ ɲɔɔ yɔŋnun o palɛi Noe-e yɛ, lende hunɔɔ Po vanacieo vanin ni.

³⁸ Kani lɔ́ɔ́ pá mí kpundɛ mamɛnndo tosan, vanndacieea va dioo a kolɔɔ, a va nɔlan yiiyo, a va cuavaa ndaa laandua kɛsio o nɔlan, a va laandua yilɔɔ le poaa ndaa háá paale Noe luɛi o dɛ̀ndɔ̀ɔ́ nin-nden.

³⁹ Buulan ve nda le ɲɛ-ɲɛ le, háá mí mɛnndan ma hun, mí ma cii nda tɛɛmbuu. Lende koni o tosannin o hunɔɔ Po vanacieo ni.

⁴⁰ O kon, vannda nda ŋiɔn a vanin o panga, mì vanndo pilɛ cuannun, mì o pilɔɔ lo lon.

⁴¹ Vanlaandua nda ŋiɔn a vanin cúo o ciei, mì o pilɛ cuannun, mì o pilɔɔ lo lon.

⁴² Lelan, la mɛɛndian, kani la sina paale Maalii niaa hunnin-nden te.

⁴³ La sina hee pɛɛngu: te vana cɛiyo ndóò sina pɛ telen vuiyo co hunɔɔ ndu ciimbuu o ɲumndan nin-ndo, o va lo lahɔl. Ndóò cɛlnin mì vuiyo ndóò pɛl cɛi ndɔɔ le.

⁴⁴ Lelan niaa bɛɛ, la va a bɛɛndiannda, kani a telen niaa venin kɔl too Po vanacieo co hunɔɔ ni.»

Vana baala kɛndɔɔ nda vana baala vɔɔndo

⁴⁵ «Ɔ́ɔ̀ vana baala kɔlkalu lò kon o diomnden coo-o, ò vana ndɔ bɛndoo handu buɛyaa ndɔa bollen le nda baloo keo o telen bɛnda-o-o?

⁴⁶ Dɛnɛ kɛndɔɔ co le vana baala kon, o vana ndɔ bɛndoo komalnin baala kon tosaa telen o muungunin-ndo-o.

⁴⁷ Mì dimul niaa toɲaa, vana ndɔ bɛndoo handunin ndu ɲɛm ndɔn kpow bollen.

⁴⁸ Kɛ te o va pɛ vana baala vɔɔndo, o co dimi aa: ‹Vana ni bɛndoo yalanin hunɔɔ le›.

⁴⁹ O kon o kandu caaŋaa ndɔa lɔɔ, o luɛi dioo a kolɔɔ nda vanaa kolaa latulu.

⁵⁰ Vana bɛndu vana baala kon hunnin paale o venin ndu kɔl te len a telen o sinanin too.

⁵¹ O pesinin ndu, mò tosal ndu mɛɛ vana tosal vanaa muuluannda yɛ. Mò yɛɛ ndu nɛɛ caŋndan a ciŋndon sɔmndo vanin ni.»