Matie 22 - BII BILA

Tale kafo lanɔ sɛnɛiyo

¹ Mí Yeesu soaa vɛlɛ o nda lo o talelan nin, mó dimi aa:

² «Masale halataala len le co maa masa yaw ɲɛdiaa kafoo le lanɔ sɛnɛi po ndɔɔ-o.

³ Mó viam buɛyaa ndɔa le vanaa ndóò yoongu le ɲɛdiaa kon-nda kɔlan veeloo, kɛ vanaa kan a cɛl le hunɔɔ le.

⁴ Mó viam vɛlɛ buɛyaa celen aa: ‹La kɔ dimul vanaa ya yoongu-a maa ɲɛdiaa cuu yaw, i cii nawva a cɔlua celulaa diyɔɔ, ɲɛ-ɲɛ cuu toosiaa, a hun le ɲɛdiaa kafo lanɔ sɛnɛiyo dioo.›

⁵ Kɛ a saalan sɔɛi ken te, mí vana-vana kɔannun o mako ndɔ nin. Mì o pum kɔannun o ndu lo panga, mí o pum kɔannun yulalen.

⁶ Mí vanaa tɔ̀a bii buɛyaa kan, má saangiaa nda, má diw nda.

⁷ Mí masaa tuulu kɔl, mó viam vanaa ndɔa cɔwva, má kɔ diw vanaa diuvaa kan, má loam kobi ndaa.

⁸ O kon mó dimul buɛyaa ndɔa aa: ‹Ɲɛdiaa kafo lanɔ sɛnɛiyo cuu toosiaa, kɛ vanaa yáà yoongu-a ndáà bɛnda le veelu sɔla le.

⁹ Lelan la kɔ o nɛilan, mì la veelu vanaa niaa komalnin-nda le ɲɛdiaa kafoo ho dioo.›

¹⁰ Mí buɛyaa ndɔa piɔl o nɛilan coo, má mɔɔsiaa vanaa nda komal lon-nda kpede, a vɔɔnda a à kɛndɛa. O kon mí cɛi kafoo va tosanndo nin-ndo pia cá a vanáà hin-nda.

¹¹ Mí masaa luɛi le vanáà hin kan-nda tofaa, mó saalun langbanɔɔ pum, ndóò nɔ volɔɔla kafo lekɔɔ le.

¹² Mó ɲuna ndu aa: ‹Caan nuu sei! Vɛɛ nɔm looku yɛ luɛyɔɔ nanu a sɔla volɔɔla kafo lanɔ sɛnɛiyo le?› Langbanɔ kon kuŋ te o soli le.

¹³ O kon mí masaa dimul buɛiya aa: ‹La yii ndu pelon a balan, mì la viow ndu o ɲumndan nin o bɛ́ɛ̀, nɛɛ caŋndan a ciŋndon sɔmndo vanin-nda.›

¹⁴ Kani vanaa bɔɔ-bɔɔ a veelun, kɛ a hɛlin-nda co sɛ́lɛ́ le.»

Le Sesar muloo solullo

¹⁵ Mí Faliisia kɔ yii dúmbóó le nɛilan nuwviaa le Yeesu biyɔɔ o sɔɛi ndɔɛi sondoei nin.

¹⁶ Má vim ndu kaandeŋaa ndaa a vanaa va Herɔde kɔɔli-a a pum. Má kɔ dimul ndu aa: «Kɔɔfa, n sina maa vana toɲaa n co ni, a co vannda nɛila Hala lan pɛɛkoo a toɲaa, a nɔ sika a vana-vana le, kani a tofa vanndacieea le mɛɛ nda co yɛ le.

¹⁷ Lelan dimul naa: O bɛnda pá mì n mal muloo Sesar o ba?»

¹⁸ Kɛ le tùú Yeesu ndóò sina yiyannda ndala vɔɔnndan-ndo, mó muli aa: «Le yɛɛ niaa co yɛ ya yaŋɔɔlen hendullo, niaa vanaa muuluannda ha?

¹⁹ La cɔm-ndɔ ya volin niaa mal muloo-on.» Má cɔm ndu volii támái.

²⁰ Mó ɲuna nda aa: «Hɔlaa nɛ̀ɛ́ a diola nɛ̀ɛ́ la co yɛ lan lecoo?»

²¹ Má mulul ndu aa: «Sesar ni.» O kon mó dimul nda aa: «Mɛɛ la mingul Sesar ɲɛ co le Sesar-o, mì la mingul Hala ɲɛ co le Hala-o.»

²² Mí kɔndɔfillo bii nda a muli nda tuei kon-ndo, má mal ndu, má kɔannun.

Sɔɛi tendul vanvílɛ́iya

²³ Paale pilɛle len, mí Sadusea, a va dimio maa vanvílɛ́iya tendulnin te-a, a hun ɲuna Yeesu aa:

²⁴ «Kɔɔfa, Moise dimi aa: Te vanndo vi pɛ, mò mɛi hɔ́ɔ́ le, puapilɛ vana kon bɛnda mò loo lanɔ o mɛi-yo, mò koma vilul vana vi kon-ndo cuawva.

²⁵ Nduyɛ puapilɛa pum va naa tɛɛn nda ŋɔmmɛw. Mí o tasoo cua lanɔɔ, mó vu. Le tùú o mɛi hɔ́ɔ́ loo, mó mel puapilɛ ndɔɔ laa ndɔ.

²⁶ Mí dɛnɛ pilɛ kon tosan a o diinndɔɔ. O kon kɔɔli, mó tosan lende a o yàándɔɔ kɔlan tiiyaa háá di a o ŋɔmmɛwndɔɔ.

²⁷ O nda kpow kɔɔli, mí lanɔ kon bɛɛ vu.

²⁸ O tendul vanvílɛ́iya, lanɔɔ nɛ̀ɛ́-nɛ̀ cua kon va yɛnin o puapilɛa ŋɔmmɛvaa kan tɛɛn? Kani nda kpow, o kei nda o ba.»

²⁹ Mí Yeesu mulul nda aa: «O pɔwlan nin niaa co nuaa ni! Kani la bii ɲɛ co o sɛvaa o Sɛbɛ Hala-o nin-ndo bila le, la bii vɛlɛ kpaaya Hala-o bila le.

³⁰ Kani o tendul vanvílɛ́iya, vanpiaandua yilnin n'laandu le, vanlaandua bɛɛ a celnin o lanɔ le, kɛ maa mɛlɛkaa co o halataala-a vanndacieea vanin ni.

³¹ Le o co a tendul vanvílɛ́iya o kɔɔ-o yɛ, vɛ̀ɛ̀ la ci sɔɛi Hala dimul niaa o Sɛbɛ ndɔɔ nin-nde i sɛvaa le aa:

³² ‹Ya co Hala Abraham-ndo ni, Hala Isaak-o a Hala Yakɔb-o›? Hala co Hala n'vanvílɛ́i le, kɛ Hala vanaa yoomaa o co ni.»

³³ Mí pɛɛkuu Yeesu-o pilan sɛ́lɛ́ va lon-ndo kɔltan.

Tɔŋ hiow vaa o bɔɔ-o

³⁴ Faliisia tueyɔɔ maa Yeesu kinda Sadusea sondolan, má cuungian,

³⁵ mí vana pilɛ o nda tɛɛn, vana pɛɛkaa latɔŋndo pum ɲuna ndu le ndu kɔlɔɔ solio aa:

³⁶ «Kɔɔfa, o tɔŋndan nin kpow, ɔ́ɔ̀ tɔŋ hiow vaa o bɔɔ-o?»

³⁷ Mí Yeesu mulul ndu aa: «Kaola Mɛlɛka, o co Hala nɔmndo-o a kɔl nɔmndo kpow, a yoomu nɔmndo kpow a á yiyan nɔmndo kpow.

³⁸ Tɔŋ tasoo a tɔŋ hiow tɔŋnda tɔ̀lan-ndo co kon ni.

³⁹ O diinndɔɔ co hoo ni, ndu bɛɛ velan a o tasoo: kaola caanda maa nɔm pila.

⁴⁰ O tɔŋnda tiɔnndan ndan nin tɔŋnda tɔ̀lan kpow a sɔɔn vanaa-tɛɛngaa-diom Hala-a dimi-on n kɛsi tumndo ni.»

Krista, po David-o

⁴¹ Mɛɛ Faliisia va a cuungiannda nɛɛ pilɛ yɛ, mí Yeesu ɲuna nda aa:

⁴² «Vɛ̀ɛ̀ niaa yiyan yɛ a Krista? Po nɛ̀ɛ́ o co yɛ?» Má mulul ndu aa: «Po David-o o co ni.»

⁴³ Mí Yeesu ɲuna nda aa: «Le kɔlɔ yɛɛ David veelu yɛ ndu niko o kpaaya Kɔl-Diandaa bɛngu aa: ‹Maalii›? Kani telen pilɛ mó dimi-o aa:

⁴⁴ ‹Mɛlɛka dimul Maalii nuu aa: Cal-la o ba kɛndɔɔ coo, háá mì luei yaamɔaa nɔmnda nɔm o pelon bɛngu.›

⁴⁵ Te David pila veelu ndu pɛ aa ‹Maalii›, vɛ̀ɛ̀ o nɔla yɛ vɛlɛ mò va po ndɔɔ?»

⁴⁶ Hali diomndo pilɛ, vana nɔla ndu mulullo le. Kandɔɔ nin ɲinkon, vana-vana tɔɔndan-ndɛ le ndu isɔɔ ɲuna le.