Matie 19 - BII BILA

Pɛɛku Yeesu yɔngu a dɛnɛ nɔ piɔlɛiyo o kɔɔ-o

¹ Yeesu ciiyo sɔɔn mun dimio, mó faŋan Kalile, mó kɔa o tàndá Yuda-o nin, Yurdɛn leeloo.

² Mí sɛ́lɛ́ bɛndoo kɔa ndu kɔɔli lon, mó singi vanaa lanàá ndaa.

³ Mí Faliisia pum sɔɔnguu le ndu kɔlɔɔ solio, má ɲuna ndu aa: «Vɛ̀ɛ̀ o bɛnda pá mì vanapɔnɔɔ kɛɛ laa ndɔ le sɔɛi súú-súù ka?»

⁴ Mó muli aa: «Vɛ̀ɛ̀ la ci o sɛvaa maa vanapɔnɔɔ nda vanalanɔɔ le Vana cɔw ɲɔɔn-ndo ndóò cɔw o tasendɔ le?

⁵ Mɛɛ o cɔw nda, mó dimi aa: ‹Lelan, vanapɔnɔɔ faŋannin fuɲa ndɔ a kala ndɔ ni, mò holnun laa ndɔ, mà siŋnun dialii pilɛi nda ŋiɔn›.

⁶ O kon, a ve lɛnin vanaa ŋiɔn te, kɛ a siŋnun vanndo ndu pilɛ. Lelan, vanacieo bɛnda mò sɛi ɲɛ Hala mɔɔsa-o le.»

⁷ Mí Faliisia kan ɲuna ndu vɛlɛ aa: «Le yɛɛ nɛ niko mí Moise dimi maa vana va pɛ laa ndɔ kɛɔ, vana kon sɛva sɛbɛ tɛɛmbua nɔu mò yɔngu ndu?»

⁸ Mí Yeesu muli aa: «Le nila kalula niaalan Moise cɛl ni mì la kɛɛ laandaa niaa. Kɛ o tasendɔ, o co lende le i va le.

⁹ Kɛ i co niaa dimul, vana-vana kɛɛ pɛ laa ndɔ, te o co yɛ le dɛnɛ suundɛi vanalanɔ kon te, mò cua lanɔ celen, mɛɛ vana kon ndu suunda.»

¹⁰ Mí kaandeŋaa ndɔa dimul ndu aa: «Te lende i kelun vanapɔnɔɔ coo le laa ndɔ ni, mɛɛ o co fisa hali mì vana cua lanɔ le.»

¹¹ Mó mulul nda aa: «O co vannda kpow le a bii sɔɛi ken bila le, fɔ vanaa sinapɛngu kon kennun le sɔɛi ken bilaa biyɔɔ-a.

¹² Kɔlɔla kuuna vanapɔnɔɔ lanɔɔ yilɔɔ lan la co yɛ́-yɛ́. Vannda pum, kabi nda fula kalaa ndaa o ladembe, a hin n'vanpiaandu le. A pum nda, vanndacieea dii nda lɛmbɛ. A pum yɛ, nda pila kɛɛ le laandua cuaa ni, le masale Hala len. Vana bii pɛ bila, ndu bii bila!»

Yeesu dɔw cuaambɔa pɔmbɔa duaa

¹³ O kon, mí vannda pum hun a cuaambɔa o Yeesu lo, haliko mi ndóò handu nda balan coo, mì ndóò piɛi Hala le nda. Kɛ mí kaandennda kuuna nda.

¹⁴ Mí Yeesu dimi aa: «La mal cuaambɔa pɔmbɔa hunɔɔ o ya lo, la kuuna nda le. Kani le vanaa co maa nda-a masale halataala len le co ni.»

¹⁵ Mó handu nda balan coo. O kon kɔɔli, mó faŋan o fonda kon.

Langbanɔ bolofaa pum

¹⁶ Paale pilɛ, mí langbanɔɔ pum sɔɔnguu, mó ɲuna Yeesu aa: «Kɔɔfa, dɛnɛ kɛndɛ yɛɛ ya tosá yɛ mì sɔla yoomu fɛɛn-fɛɛndo?»

¹⁷ Mí Yeesu mulul ndu aa: «Le yɛɛ n co yɛ ya ɲunaa a dɛnɛ kɛndɔɔ o kɔɔ? Ɲɔɔ ndu pilɛ kpé naŋ ni. Taa yeema pɛ le cindaa sɔlaa, mɛɛ bii tɔŋndan.» Mí langbanɔɔ ɲuna ndu aa:

¹⁸ «Ɔ́ɔ̀ tɔŋnda lan?» Mí Yeesu mulul ndu aa: «Dii vanacieo le, suunda le, tɛnda seile lakafalen te, yɔŋ levui le.

¹⁹ Biilu fuɲa nɔm a kala nɔm, mà kaola caanda maa nɔm pila.»

²⁰ Mí langbanɔɔ mulul ndu aa: «I bii nin sɔɔn mun kpow. Yɛɛ lo yɛ ya vɛlɛ?»

²¹ Mí Yeesu mulul ndu aa: «Taa yeema pɛ ma peelun, mɛɛ kɔ pisi ɲɛm n nɔ-on, ma piɔw vanaa bala fondoa, o kon ma sɔla bolofaa o halataala. O kon kɔɔli, a hin, a del-la kɔɔli.»

²² Kɛ langbanɔɔ tueyɔɔ sɔɛi ken, mó kɔannun a suumaa, kani bolofaa pila ndóò nɔ ni.

²³ Mí Yeesu dimul kaandeŋaa ndɔa aa: «Mì dimul niaa toɲaa, o kendu le vana bolofaa luɛyɔɔ o masale halataala len nin dɛ!

²⁴ Mì cɔɔlu niaa ndi dimul, ɲɔɔmɛɔ keiyo o tɛɛngii lesiɛndɛi nin hiow va bɛɛn-bɛɛn a vana bolofaa luɛyɔɔ o masale Hala len nin.»

²⁵ Kaandennda tueyɔɔ sɔɔn mun, mí kɔndɔfili bɛndoo bii nda. Má va dimio aa: «Mɛɛ nɛ̀ɛ́ nɔla yɛnin cindaa sɔlaa o kon?»

²⁶ Mí Yeesu tofa nda, mó dimul nda aa: «Vanndacieea nɔla ken tosa le, kɛ Hala ndu nɔla dɛnndan kpow tosaa.»

²⁷ O kon mí Piɛr dimul ndu aa: «Naa naa, ɲɔɔn kpow naa n mɛi ni mí n del nɔm kɔɔli. Vɛɛ la va yɛnin le naa?»

²⁸ Mí Yeesu mulul nda aa: «Mì dimul niaa toɲaa, telen dɛnndan kpow la muungunin lasɛnɛi, mì Po vanacieo va icali o kpɛŋɛ ndɔ lemasa biilaa nin-ndo, niaa vanaa del-la kɔɔli-a bɛɛ, la vanin icali o kpɛŋɛla lemasalan tɔ́ a latiɔn nin le yamɛi polama tɔ́ a mamiɔmma Israɛlla kiolɔɔ.

²⁹ Nduyɛ vana-vana mɛi pɛ cɛila ndɔlan, puapilɛa ndɔa, yemaa ndɔa, fuɲa ndɔ, kala ndɔ, laa ndɔ, cuavaa ndɔa, te kon te yondola ndɔlan le diola nilan, ndu sɔlanin o hiow kon polon-ndo. O kon kɔɔli, o sɔlanin yoomu fɛɛn-fɛɛndo.

³⁰ Vanaa tasea bɔɔ-bɔɔ a siŋnunnin vanaa mɛɛlaa, mì vanaa mɛɛlaa bɔɔ-bɔɔ a siŋnun vanaa tasea.»