Matie 16 - BII BILA

Faliisia a Sadusea ɲuna dɛnɛ kaamaa le tɔɔmaseloo

¹ Mí Faliisia a Sadusea sɔɔnguu Yeesu ikɛi le ndu kɔlɔɔ solio. Má ɲuna ndu le nda dɛnɛ kaamaa fula o halataala-o cɔmndo.

² Mó mulul nda aa: «A paale delaalen, la dimi aa: ‹Valoo vanin ni, kani coocoo co o siaŋa.›

³ Idii, la dimi aa: ‹Piɔɔ co hau sia, kani coocoo co o siaŋa mì ɲɔɔ va yifidii.› La co càá halataalaa taasio dɔvɔɔ, kɛ la co ba tiw le kaamaala telenndan ndan taasi dɔvɔɔ le.

⁴ Vanaa vɔɔnda a vanaa suundɛiya ha yeema le dɛnɛ kaamaa cɔu! Kɛ dɛnɛ kaamaa celen cɔmnunnin nda o dɛnɛ Yonas-o kɔɔli le.» O kon mó mɛi nda, mó kɔannun.

Lɛvɛn Faliisia a Sadusea

⁵ Tuma kaandennda va taŋɔɔ o kɔngɔɔ pilɔɔ-o, má pɔɛɛnun le buloo cuaa.

⁶ Mí Yeesu dimul nda aa: «La mandan a lɛvɛn Faliisia a Sadusea!»

⁷ Mí kaandennda can sɔɛi nda pila tɛɛn aa: «Le bulu naa n cue loo o co dimio nuaa ni.»

⁸ Yeesu biyɔɔ sɔɛi nda va ken-nde bila, mó dimul nda aa: «Le yɛɛ niaa co yɛ dimio niaa pila tɛɛn aa: ‹Le bulu naa n cue loo o co dimio nuaa ni›? Laalan niaa dɔɔnan bɔɔ dɛ!

⁹ La bii yɔ bila le? La loonun a bulula ŋuɛɛnula vanaa vaala ŋuɛɛnua de, mí la lo kambɛilan taw, mí la kɔannun a lan-ndan te?

¹⁰ La loonun ndɔ vɛlɛ a bulula ŋɔmmɛwla piɔwnun vannda vàálan tan hiɔɔlu, mí la kɔa a latɔ̀lan kambɛilan taw lan te?

¹¹ Te i dimul niaa pɛ aa: ‹La mandan a lɛvɛn Faliisia a Sadusea›, le yɛɛ niaa co yɛ kɛɛ bila biyɔɔ maa o co le ɲɛdiaa le ya soo lende le?»

¹² O kon mí kaandennda bii bila maa o co sɔɛi lɛvɛn ndáà vow o buloo-o le o va dimio le, kɛ pɛɛkula Faliisia a Sadusea.

Piɛr dimi vana Yeesu co-o

¹³ Yeesu tiiyaa o tàndá Sesaree Filipe-o nin, mó ɲuna kaandeŋaa ndɔa aa: «Vɛ̀ɛ̀ vannda co yɛ dimio le vana ya co-o, ya Po vanacieo?»

¹⁴ Má muli aa: «A pum co dimio aa Nsaŋ Vana-yinaa n co ni, a pum nda co dimio aa Elii, a pum nda co vɛlɛ dimio aa Yeremi, te kon te aa vana-tɛɛngaa-diom Hala-o pum n co ni.»

¹⁵ Kɛ mí Yeesu ɲuna nda aa: «Kɛ niaa yɛ, vɛ̀ɛ̀ niaa co yɛ dimio le vana ya co-o?»

¹⁶ Mí Simɔn Piɛr muli aa: «Nɔm co Krista ni, Po Hala kiyɛiyo.»

¹⁷ O kon mí Yeesu dimul ndu aa: «Dɛnɛ kɛndɔɔ co le nɔm Simɔn po Yonas-o, kani o co vanaciee le cɔm nɔm dɛnɔɔ ho le, kɛ Fuɲa ni co o halataala-o.

¹⁸ Ya, i co nɔm dimul, Piɛr n co ni, powvo pɛɛn, o powvo ho coo ya tangulnin kunda vanaa laalaŋaa nia ni, kpaaya piɔ́mndo nɔlanin kunda kon ɲɛ-ɲɛ tosa le.

¹⁹ I kenin nɔm kiin masale halataala len: ɲɛ n yii pɛ o lɛŋnden coo, ndu yiinunnin o halataala, o n timbi pɛ o lɛŋnden coo, ndu timbinnin o halataala.»

²⁰ O kon mí Yeesu dimul kaandennda ndɔa kpéŋ-kpéŋ maa a dimul vana-vana maa ndu le co Krista le.

Yeesu soo le piɔ́m ndɔɔ a tendul ndɔɔ

²¹ Cɔn nin a telen kon, mí Yeesu kandu kaandeŋaa ndɔa dimullo vakpa aa mɛɛ mò kɔɛ Yerusalɛm, mò kɔ sanga vanaa bɛndua o ba, simlacia vanaa-solia-lasálàá a vanaa pɛɛkaa latɔŋnda, mà dii ndu, mò tendul, mò fula vanvílɛ́iya tɛɛn o paale yàándɔlen.

²² Mí Piɛr veelu ndu landɔ, mó kɔ dimul ndu aa: «A foofen! Màá Hala cɛl mì dɛnɛ vaa lende yɔŋnun nɔm te, Maalii!»

²³ Kɛ mí Yeesu mulin, mó dimul Piɛr aa: «Faŋan ya kɔɔli, Setana! A yeema mà luei ya o pɔwlan nin, o co yiyannda Hala le n nɔ lan te, yiyannda vanndacieea kposon n nɔ ni.»

²⁴ O kon, mí Yeesu dimul kaandeŋaa ndɔa aa: «Vana yeema pɛ le ya hunɔɔ kɔɔli, mɛɛ o pɔɛɛnun a ndu pila, mò siilun yɔm singafilaa ndɔɔ, mò del-la kɔɔli.

²⁵ Kani vana-vana yeema pɛ le yoomu ndɔɔ ciindiaa, o hialunnin ndu, kɛ vana-vana yoomu ndɔɔ hɛlun pɛ le ya, ndu sɔlanin ndu.

²⁶ Vanacieo sɔla bɛɛ ceendo ho kpede, te yoomu ndɔɔ hɛlun ndu pɛ, tɔnɔ yɛɛ o sɔla yɛ o kon? Te kon te, yɛɛ kpeekpei vanacieo yɔngù yɛ le yoomu ndɔɔ singaa?

²⁷ Kani Po vanacieo co hunɔ̀ɔ̀ o biilu Fuɲa ndɔ-o nin a mɛlɛkaa ndɔa, o kon o dɔawnin vana-vana vɔ́ngɔ̀ mɛɛ dɛnnda ndɔlan la co yɛ.

²⁸ Mì dimul niaa toɲaa, vanaa pum niaa tɛɛn nanu a vi vɔnin te, mà ce Po vanacieo hunɔɔ o masale ndɔlen nin.»