Matie 15 - BII BILA

Pɛɛkoo a naamula fuɲaa-mamaa mɛi lan o kɔɔ

¹ Paale pilɛ, mí Faliisia a vanaa pɛɛkaa latɔŋnda can Yerusalɛm, má hun o Yeesu lo, má ɲuna ndu aa:

² «Le kɔlɔ yɛɛ kaandeŋaa nɔmnda co yɛ naamula fuɲaa naa mamaa tɛɛmbuuo? Kani a pulù balan le ɲɛdiaa dioo mɛɛ naamu naa co yɛ le.»

³ Mó muli aa: «Niaa yɛ, le yɛɛ niaa co yɛ tɔŋ Hala-o tɛɛmbuuo le naamu niaa?

⁴ Kani Hala dimi aa: ‹Biilu fuɲa nɔm a kala nɔm›, mó dimi vɛlɛ aa: ‹Vana dimi pɛ diomnde vɔɔnnden a fuɲa ndɔ, te kon te a kala ndɔ, o bɛnda mò sɔla piɔ́mndo›.

⁵ Kɛ niaa, la co dimio maa hali mi vana dimul fuɲa ndɔ, te kon te kala ndɔ-o aa: ‹Ɲɛ yáà kenin nɔm le nɔm malaa-o, ndu ya tuu le Hala sálàá solullo ni›.

⁶ Vana kon nɔ mako le fuɲa ndɔ, te kon te kala ndɔɔ bɛɛlen ke le. Lende niaa co sɔɛi Hala-e malɔɔ ni le naamu niaa.

⁷ Niaa vanaa muuluannda ha, a niaa o kɔɔ kpeekpei Esai soo ni aa:

⁸ ‹A n'cɔcɔ vannda ha co ya biiloo ni, kɛ kɔlta ndalan la co bɔɔ ya levil.

⁹ Kaannde fondolen fúú nda co o diola nilan ni, mà pɛɛku vannda sɔɔn nda pila co tosaa-on.›»

Ɲɛm nɔɔliaa vanacieo-von

¹⁰ O kon kɔɔli, mí Yeesu veelu sɛ́lɔ́ɔ́, mó dimul nda aa: «La yaŋ nilan mì la bii bila.

¹¹ O co ɲɛ luɛì vanacieo o sondo-o le nɔɔliaa ndu le. Kɛ ɲɛ fulà ndu o sondo-o, ndu nɔɔliaa vana ni.»

¹² O kon mí kaandennda sɔɔnguu Yeesu ikɛi, má ɲuna ndu aa: «A sina pá maa sɔɔn n dimi mun-ndon tɛɛmbuu Faliisia kɔltan?»

¹³ Mó muli aa: «Yɔm oo yɔm Fuɲa ni co o halataala-o tol te, ndu sungunnin.

¹⁴ Lelan la mɛi nda lon, vanaa sumɛyaa co kɔlan a vanaa sumɛyaa celen-nda nda co ni. Te vana sumɛiyo see yɛ pɛ vana sumɛiyo tindaa, nda ŋiɔn kpow a kɔ del o soondo nin.»

¹⁵ Mí Piɛr cua sɔɛi, mó dimul ndu aa: «Tɛɛsial naa kɔlɔ tale kon.»

¹⁶ Mí Yeesu dimi aa: «Mò va maa niaa bɛɛ la kindu lakɔl te?

¹⁷ La sina le maa ɲɛ-ɲɛ luɛi pɛ o sondo, o tol o dembe, o kon kɔɔli o kɔ fula nɛɛ vana sɔndan-nda le?

¹⁸ Kɛ o kɔllo nin ɲɛ fula o sondo-o can ni, nduyɛ, ndu nɔɔliaa vanacieo ni.

¹⁹ Kani o kɔllo nin yiyannda vɔɔnndan, yeemɛi diyaa n'vanndacie-e, tiɔmɔɔ, suundaa, vuilen, seile lakafalen timbio a vannda diolan tɛɛmbuuo fula ni.

²⁰ Mun nɔɔliaa vanacieo ni, kɛ kɛɔ balan pulɔɔ o ɲɛdiaa dioo, kon nɔɔliaa vana le.»

Vanalanɔ kanannɔɔ pum laalan Yeesu

²¹ Mí Yeesu faŋan ndon, mó kɔa o lɛŋnde Tir a Sidɔn nden nin.

²² Mí vanalanɔ Kanannɔ fula kpengii ken-ndo can yondaa aa: «Tuinun ya iɲíí Maalii, Po David-o. Ɲinaa co bɔɔ cua nuu saangiaa!»

²³ Kɛ Yeesu kuŋ te, o soli le. Mí kaandeŋaa ndɔa sɔɔnguu, má dimul ndu aa: «Dimul ndu mò muungu, o co bɔɔ hunɔɔ a yoondiaa naa kɔɔli.»

²⁴ Mí Yeesu muli aa: «O saa laasian fulaa o cɛi Israɛl-lo nin-nda lo daama ya sɔla vomɔɔ ni.»

²⁵ Kɛ mí cua kon hun baŋ vulan ndu o labɛngunin, mó dimul ndu aa: «Maalii, mala ya!»

²⁶ Mí Yeesu muli aa: «O niŋ mì vana cua ɲɛdiaa cuaambɔa, mì vana vowlu tunaa cuawva le.»

²⁷ Mí cuaa dimi aa: «Toɲaa ken co ni, Maalii. Kɛ nduyɛ, tunaa cuawva nɔla mà de kùún deli o tabali vana nda bɛndoo bɛngu-on.»

²⁸ O kon mí Yeesu mulul ndu aa: «Cuaa, laalan nɔmndo co o bɔɔ. Màá i tosalan nɔm mɛɛ n yeema yɛ!» Mí cua ndɔɔ siangu dɔ́ɔ́ telen kon kpafii.

Yeesu singi vanaa lanàá taw

²⁹ Mí Yeesu faŋan o tàndà kon nin, mó kɔa o dalaa Kalile kɔngɔ. Mó hel o pembei coo, mó kɔ cal lon.

³⁰ Mí sɛ́lɛ́ bɛndoo va hunɔɔ o ndu lo a namtaa, vanaa sumɛiya, boboa, vanaa falun vílɛ́iya a vanaa lanàà súú-súù ka. Má hun kɛsi nda ndu o labɛngunin, mó singi nda.

³¹ Lɔ́ɔ́ sɛ́lɛ́ bɛndu kon ce boboa sɔɛi, vanaa falun vílɛ́iya siongɔɔ, namtaa kɔlan sakpo a vanaa sumɛiya cɔu-vo, mí kɔndɔfili bɛndoo bii nda, má candu Hala Israɛlla.

Yeesu dɔw vannda vàála hiɔɔlu balo

³² Mí Yeesu veelu kaandeŋaa ndɔa, mó dimul nda aa: «Ɲííye co ya a sɛ́lɛ́ bɛndoo ho, kani o co nihau palɛi ndii yáá n co nanu naa ndaa, a nɔ yɛ ɲɛdiaa le. I yeema ma muungu a yiaan lende le, yɔŋii nda kei deli nɛi-tɛɛn.»

³³ Mí kaandennda ɲuna ndu aa: «Kuɛɛ naa n fula yɛnin a ɲɛdiaa o lɛŋnde veselɛilen nden nin le sɛ́lɛ́ bɛndoo ho kpow pimio?»

³⁴ Mí Yeesu ɲuna nda aa: «Vɛ̀ɛ̀ kpɛɛ niaa nɔ yɛ bululan?» Má mulul ndu aa: «Laŋɔmmɛw a suvaa pɔmbɔa ɲɛ-pɔmbɔ.»

³⁵ O kon, mó dimul vannda le calle lɛŋ.

³⁶ Mó cua bulula ŋɔmmɛwla lan a suvaa kan. Ndóò ciiyo balikaa malɔɔ, mó yimiyimi lan, mó yɔngu kaandeŋaa ndɔa lan, mí nda piɔw vannda lan.

³⁷ Mí nda kpow a dia, má pum. Má cɔwviaa bulula bingi-bingila lo lan, mí la pia kambɛilan tan ŋɔmmɛw.

³⁸ Vanaa de ɲɛdiaa kon-nda va vanpiaandua vàálan tan hiɔɔlu, a cɔm vanlaandua a cuaambɔa le.

³⁹ O kon kɔɔli, mó mal vannda le kɔlan o la nda lo, mó luɛi o dɛ̀ndɔ̀ɔ́ nin, mó kɔa o lɛŋnde Makadan-nden nin.