Matie 12 - BII BILA

Ɲɛ Yeesu dimi a paale pɛngiaalen o kɔɔ-o

¹ Telen bingi o kon kɔɔli, mí Yeesu va hiovɔɔ o ciɛi n'malle nin o paale pɛngiaalen coo. Yiaan ma va kaandeŋaa ndɔa nɛiyo, má kandu yasala n'mal-tan kilio le dioo.

² Faliisia cɔu ken, má dimul ndu aa: «Tofa vɔ kaandeŋaa nɔmnda, a co ɲɛ bɛnda le tosa o paale pɛngiaalen coo loo tosaa.»

³ Kɛ mí Yeesu mulul nda aa: «La ci ɲɛ David tosa-o o sɛvaa le, ɲɛ o tosa telen yiaan ma va ndu nɛiyo nda vanaa va ndu kɔɔli-a-o?

⁴ Mɛɛ o luɛi o Cɛi-Hala-o nin, mó dia bulu sálà va o kɛsiaa-o nda vanaa va ndu kɔɔli-a. Nduyɛ, fɔ vanaa-solia-lasálàá daama ndáà bɛnda le bulu sálà kon dioo ni, David a vanaa va ndu kɔɔli-a ndáà bɛnda le ndu dio le.

⁵ Te kon te, la ci o sɛvaa o tɔŋndo nin te maa vanaa-solia-lasálàá va tɔŋ paale pɛngiaa tɛɛmbuuo o Cɛi-Hala-o nin, kɛ a ve kasi delɔɔ le?

⁶ Nduyɛ i co niaa dimul, o hiow Cɛi-Hala-o co nanu.

⁷ Te niáà bii pɛ kɔlɔ sɔɛi he bila aa: ‹Vannda ɲííye tuinɔnndo hɛnan ya ni, o co sálàlan solio le›, la ve vanaa tɛɛmbuu haa isɔɔ le-a yaala le.

⁸ Kani Po vanacieo co masa paale pɛngiaa ni.»

Langbanɔ baa vi-o

⁹ Mí Yeesu faŋan ndon, mó kɔa o cɛi lekaan ndaa nin.

¹⁰ Langbanɔ ba vílɛ́iyo pum va lon. Má ɲuna Yeesu aa: «Vɛ̀ɛ̀ o co pá o cɛlnan le vannda singio o paale pɛngiaalen coo?» Nɛila ndáà handu ndu sɔɛi coo lan nda va nuwviaa kon lende ni.

¹¹ Mí Yeesu mulul nda aa: «O niaa tɛɛn, ɔ́ɔ̀ vana nɔ saa ndu pilɛ, mì saa kon del o soondo nin o paale pɛngiaalen coo, mò kɛɛ ndu biyɔɔ le ndu solio-o?

¹² Nduyɛ vanacieo ndu hiow saa polon! Lelan, o bɛnda mì vana tosa dɛnɛ kɛndɔɔ o paale pɛngiaalen coo.»

¹³ O kon, mó dimul langbanɔɔ aa: «Siɛndi ba nɔmndo!» Mí langbanɔɔ siɛndi baa, mí ba kon muungu kɛndia maa o pilɔɔ.

¹⁴ Mí Faliisia fula, má kɔ tundu le mɛɛ nda kei má dii Yeesu yɛ.

Vana baala Hala hɛli-o

¹⁵ Kɛ Yeesu tueyɔɔ lende, mó faŋan ndon. Mí sɛ́lɛ́ bɛndoo del ndu kɔɔli, mó singi vanaa lanàá kpow,

¹⁶ mó dimul nda kpéŋ-kpéŋ maa a cɔɔmuu ndu le,

¹⁷ haliko mi sɔɛi Esai vana-tɛɛngaa-diom Hala-o dimi-e ndíì peelun aa:

¹⁸ «Vana ni baala ya hɛli-o co hoo ni, o ya kaola-o, o ya hini kɔl-lo pɛɛn. I tuisinin Kɔl nuu ndu coo, mò cɔm vanaa-mangalaa-isɔɔa dɛnɛ sandaa.

¹⁹ O venin vana lasɛɛngian te, o deŋinin te, vana tuinin ndu diom o nɛilan coo le.

²⁰ O siownin kpɛ̀ndɛ̀le co nin le yomɛilen-den kendi le, o siownin tɛngɛ co nin le ɲumndo-o ɲumi le, lende o co lo tosaa ni háá mi dɛnɛ sandaa tiw sɔ́.

²¹ O kon vanaa-mangalaa-isɔɔa kpede a sɔlanin tiindanndo o diola ndɔlan.»

Yeesu soo a sɔɔn nda ɲiinduu ndu-on o kɔɔ

²² O kon kɔɔli, má cuu ndu bobonɔ sumɛi ɲina vɔɔndo va kɔɔli-o. Mó singi ndu, mí bobonɔ kon kandu dɔ́ɔ́ sɔɛi a cɔu.

²³ Mí kɔndɔfili bɛndoo bii sɛ́lɛ́ va lon-ndo, má va dimio aa: «O co po David-o le co hoo le?»

²⁴ Faliisia tueyɔɔ lende, má dimi aa: «A kpaaya Beɛlsebul, bolle ɲinaa vɔɔnda langbanɔɔ ho co ɲinaa vɔɔnda tovɔɔ ni.»

²⁵ Kɛ Yeesu ndóò sina yiyannda ndalan, mó dimul nda aa: «Lemasa oo lemasa le piɔvan pɛ, le tambu. Kobi oo kobi, te kon te cɛi oo cɛi piɔvan pɛ, ndu nɔ lɛ mayoomu le.

²⁶ Te Setana tow pɛ Setana, mɛɛ ndu pila piɔvan ni, vɛ̀ɛ̀ masale ndɔlen le nɔla yɛ mì le lo lemasa?

²⁷ Te o va pɛ aa a kpaaya Beɛlsebul-lo ya co ɲinaa vɔɔnda tovɔɔ ni, mɛɛ a kpaaya nɛ̀ɛ́-nɛ̀ poaa niaa co yɛ ɲinaa vɔɔnda tovɔɔ? Lelan kpeekpei nda pila kialunin niaa iyama ni.

²⁸ Kɛ te o va pɛ aa a Kɔl Hala-o ya co ɲinaa vɔɔnda tovɔɔ ni, mɛɛ masale Hala len le hin o niaa lo dí.

²⁹ Te kon te, vɛ̀ɛ̀ vanndo nɔla yɛ mò kɔ luɛi o vana kpaayaa pum ndo cɛinin, mò cua ɲɛm ndɔn kpow, te o yii fɔlɔn vana kpaaya kon, malan o mulin niko mo cua ɲɛm ndɔn te?

³⁰ Vana-vana naa n co diom pilɛ le, mɛɛ yaamɔɔ nuu ndu co ni. Vana co mɔɔsiaa maa ya le, mɛɛ puusiaa ndu co ni.

³¹ Lelan i co niaa dimul, haki oo haki vanacieo tosa, te kon te diomnde vɔɔnnde oo diomnde vɔɔnnde o dimi, o malnun haki le ken. Kɛ o dimi pɛ sɔɛi tanɛi a Hala Kɔl-Diandaa, ken melnun haki le.

³² Te vanndo dimi pɛ diomnde vɔɔnnden a Po vanacieo, o malnun haki le ken, kɛ vana-vana solin pɛ diomnde vɔɔnnden o sondo a Hala Kɔl-Diandaa, ò sɔla hakio malɔɔ o lɛŋnden coo nanu le, ò sɔlanin vɛlɛ hakio malɔɔ o ceen co laci-o nin te.»

Yɔmndo a komɔɔ ndɔɔ

³³ «Yɔm oo yɔm naŋ pɛ, naŋɔɔ komɔɔ ndɔɔ naŋ ni, te kon te yɔmndo vɔw pɛ, vɔwlen komɔɔ ndɔɔ bɛɛ vɔw ni, kani o komɔɔ lo vana sina yɔmndo ni.

³⁴ Niaa cuavaa hɔ̀ɔ̀lɔ́a ha, vɛ̀ɛ̀ niaa tiw yɛnin ba sɔɔn kɛndɔn dimio, te niaa pila co pɛ a vɔɔn-vɔɔn? Kani ɲɛ pia o kɔllo nin-ndo, ndu sondoo dimi ni.

³⁵ Sɔɔn kɛndɛn co vanaciee kɛndɔɔ o kɔl-lon, mun o soli ceen ni, sɔɔn vɔɔŋun co vanaciee vɔɔndo o kɔl-lon, mun koni ndu bɛɛ soli ceen ni.

³⁶ I co niaa dimul, paale kialaa iyamalen, vanndacieea dɔawnunnin kona a sɔɔn fondon nda va keiyo tombolaa-on o kɔɔ.

³⁷ Kani sɔɔn nɔmndon tosanin ni ma sɔla dí, mun koni n tosanin vɛlɛ ni ma sɔla yaalaa.»

A ɲuna Yeesu le dɛnɛ kaamaa tosaa

³⁸ O kon mí vanaa sɛvaa latɔŋnda pum a Faliisia cua sɔɛi, má dimi aa: «Kɔɔfa, n yeema ma tosal naa dɛnɛ kaamaa pum, mì n ce.»

³⁹ Mó mulul nda aa: «Vanndacieea paale haulen nden a vɔw bɔɔ! A lo o lediom coo a Hala le, a yeema le dɛnɛ kaamaa cɔu, kɛ a cinin o kɛ́-kɛ̀ faŋanndo o dɛnɛ kaama Yonas vana-tɛɛngaa-diom Hala-o kɔɔli le.

⁴⁰ Kani mí Yonas tosa palɛi ndii yáá a lɔma leyàá suw bɛndoo o dembe, lende koni Po vanacieo bɛɛ tosanin palɛi ndii yáá a lɔma leyàá o puuloo bɛngu ni.

⁴¹ Paale kialaa iyamalen, Ninivea cannin mà yaala vanndacieea paalen nden hau. Kani caaŋaa kan, telen Yonas dimul nda sɔɛi Hala-e-o, má mal yɔŋ vɔɔn ndaa, má mangalan. Nduyɛ, vana hiow Yonas-o co nanu.

⁴² Paale kialaa iyamalen, masa laandu fula a ba too-o cannin mò yaala vanndacieea paalen nden hau. Kani caan kon, mó mal nɛɛ lɛŋnden le mɛɛlu-a dí, mó hun le nilan yaŋɔɔ o kɔlkalu Salomɔn-ndo. Nduyɛ vana hiow Salomɔn-ndo co nanu.»

Mɛɛ ɲina vɔɔndo muungu vana nin yɛ

⁴³ «Ɲina vɔɔndo fula pɛ vanndo nin, o kɔ balu o lɛŋnde veselɛilen nin, le fonda pɛngiaa nuwviaa, kɛ ò sɔla fonda le.

⁴⁴ O kon o dimin o kɔl nin aa: ‹I co muungu o ya lo cɛinin, nɛɛ ya fula-a.› O muungu pɛ, mò komal ndu fondo, o basaa, o toosiaa kpede,

⁴⁵ o kɔ cua ɲinaa vɔɔŋaa celen, a hiow ndu vɔwlen-nda a ŋɔmmɛw, o luɛi a nda, a kɔ cal cɛinin ndon. Ceen vana kon cɔɔlú levɔw hiovɔɔ ceen ndɔ paandoo coo. Lende koni i yɔŋnunnin a vanndacieea vɔɔnda ha paalen nden hau ni.»

Kalaa a pɔmbɔa Yeesu-a

⁴⁶ Yeesu va vɔ sɔɛi o sɛ́lɔ́ɔ́ lo, mí kala ndɔ a pɔmbɔa ndɔa hun sim o dio. Ndáà yeema le ndu cɔu.

⁴⁷ Mí vanndo pum dimul ndu aa: «Kala nɔm nda pɔmbɔa nɔmnda co isisi o dio, a yeema le sɔɛi o nɔm ndo.»

⁴⁸ Kɛ mí Yeesu mulul vana kon aa: «Nɛ̀ɛ́ co yɛ kala nuu, nɛ̀ɛ̀aa co yɛ pɔmbɔa nia?»

⁴⁹ O kon mó yulu baa o kaandeŋaa ndɔa lo, mó dimi aa: «Kala nuu a pɔmbɔa nia co haa ni.

⁵⁰ Vana-vana tosa pɛ hɛnan Fuɲa ni co o halataala-o, vana kon co pɔmbɔ nuu, yema nuu a kala nuu ni.»