Marke 8 - BII BILA

Yeesu dɔw vannda vàála hiɔɔlu balo

¹ O palɛi ken bɛngu, mí sɛ́lɛ́ bɛndoo cuungian vɛlɛ. Ɲɛdiaa ve le dioo le, mí Yeesu veelu kaandeŋaa ndɔa, mó dimul nda aa:

² «Ɲííye co ya a sɛ́lɔ́ɔ́ ho, kani palɛi ndii yáá co hoo ni, a co ya ikɛi, a nɔ yɛ ɲɛ-ɲɛ le dioo le.

³ Te i mingi pɛ nda o la nda lo a yiaan, a co kei deli o nɛi, kani vanaa pum nda tɛɛn a fula levil.»

⁴ Mí kaandeŋaa ndɔa mulul ndu aa: «Kɛ vɛ̀ɛ̀ naa n tosa yɛnin le nda ɲɛdiaa keo, mà pim o lɛŋnde veselɛilen nden nin nanu?»

⁵ Mí Yeesu ɲuna nda aa: «Vɛ̀ɛ̀ kpɛ́ niaa nɔ yɛ bululan ndon?» Má muli aa: «La ŋɔmmɛw.»

⁶ O kon mó dimul sɛ́lɔ́ɔ́ le calle lɛŋ. Mó cua bulula ŋɔmmɛwla lan. Ndóò ciiyo balikaa malɔɔ, mó yimiyimi lan, mó yɔngu kaandeŋaa ndɔa lan le piɔwvo.

⁷ Ndáà nɔ vɛlɛ suvaa pɔmbɔa tiŋ. Yeesu ciiyo duaa dɔvɔɔ, mó dimi vɛlɛ le kan piɔwvo.

⁸ Má dia, má pum, má kɔa a ɲɛ tɔ̀ lo-o kambɛilan tan ŋɔmpum lapiaa cá-cá.

⁹ Vanaa de dio kon-nda va le vannda vàála hiɔɔlu. O kon kɔɔli, mí Yeesu dimul nda le kɔlan o la nda lo.

¹⁰ Fɔ́ɔ́fɔ̀, mó luɛi dɔ́ɔ́ o dɛ̀ndɔ̀ɔ́ nin nda kaandeŋaa ndɔa, má kɔa o lɛŋnde Dalmanuta len nin.

Tɔɔmasele fula o halataala-o

¹¹ Mí Faliisia hun, má kandu sɔɛi a Yeesu le ndu kɔlɔɔ solio. Má dimul ndu le kaamaa nda tosallo haliko mi ndu va tɔɔmaseloo le cɔmndo maa o halataala ndu Yeesu fula ni.

¹² Mí Yeesu yoomu fúù, mó dimi aa: «Le yɛɛ nɛ vanndacieea paalen nden hau a co yɛ ɲunaa le nda tɔɔmasele kaamaa tosallo? I co niaa toɲaa dimul, tɔɔmasele kɛ́-kɛ̀ yɔngunnin vanndacieea paalen nden hau le.»

¹³ O kon kɔɔli, mó faŋan ndon, mó luɛi o dɛ̀ndɔ̀ɔ́ nin le taŋɔɔ o kɔngɔɔ pilɔɔ.

Lɛvɛn Faliisia a o Herɔde-o

¹⁴ Mí kaandennda pɔɛɛnun le buloo cuaa, ndu pilɛ kpé va nda o ba o dɛ̀ndɔ̀ɔ́ nin ni.

¹⁵ Mí Yeesu dimul nda aa: «La mandan a lɛvɛn Faliisia a á lɛvɛn Herɔde-o.»

¹⁶ Mí kaandennda kandu sɔɛi nda pila tɛɛn, kani bulu ve nda o ba le.

¹⁷ Mí Yeesu bii bila, mó ɲuna nda aa: «Le yɛɛ niaa co yɛ yiyanndo maa le tùú niaa nɔ bulu o ba loo ni? Vɛ̀ɛ̀ la bii-yɔ sɔɛi nii bila mì la sina ndi le?

¹⁸ La nɔ hɔltan, kɛ la co macoaa cɔ a lan te? La nɔ nilan, kɛ la co macoaa tueyɔɔ a lan te? Vɛ̀ɛ̀ la co loonɔn te,

¹⁹ telen ya yimiyimi bululan tan ŋuɛɛnu le vanpiaandua vàálan tan ŋuɛɛnua-o le, vɛ̀ɛ̀ kpɛ́ la bingi-bingila lo lan la va yɛ kambɛilan?» Mí kaandennda mulul ndu aa: «Tɔ́ a latiɔn!»

²⁰ «Telen ya yimiyimi bulula ŋɔmmɛwlan le vanpiaandua vaala hiɔɔlua-o, vɛ̀ɛ̀ kpɛ́ la bingi-bingila lo lan la va yɛ kambɛilan?» Má dimi aa: «La ŋɔmmɛw!»

²¹ O kon mó ɲuna nda aa: «La bii-yɔ bila le?»

Yeesu singi vana sumɛiyo Bɛtsaida

²² Má kɔa Bɛtsaida, má cuu ndu vana sumɛiyo, má ɲɔɔlu ndu le ndu pilanndo.

²³ Mó bii ndu baa, mó kɔa a ndu o cieo kɔɔli. O kon mó sui ndu lɔluan o lahɔl, mó handu ndu balan coo, mó ɲuna ndu aa: «A co ɲɛ pum cɔu?»

²⁴ Mó kumbi hɔlla, mó dimi aa: «I co vanndacieea cɔu, kɛ maa iyɔm ya co nda cɔu kɔlan ni.»

²⁵ Mí Yeesu handu ndu vɛlɛ balan o hɔl. Vana sumɛi kon tofaa ciŋ, mó sɔla siongɔɔ, mó ca ɲɛ-ɲɛ ɲɛkɛndɛi.

²⁶ O kon mí Yeesu dimul ndu le kɔlan o ndu lo aa: «Fula cieo coo le dɛ!»

Piɛr sina maa Yeesu co Vana Mɛlɛka hɛli-o ni

²⁷ Mí Yeesu kɔannun nda kaandeŋaa ndɔa o cieon cɛɛlian a Sesaree Filipe-on. Ndáà tiiyaa nɛi-tɛɛn, mó ɲuna nda aa: «Vɛ̀ɛ̀ vannda co yɛ dimio le vana ya co-o?»

²⁸ Má dimi aa: «A pum co dimio aa Nsaŋ Vana-yinaa n co ni, a pum yɛ aa Elii. A pum nda nda co dimio aa vana-tɛɛngaa-diom Hala paandoo pum cɛn ni.»

²⁹ Mó ɲuna nda aa: «Kɛ niaa yɛ, yɛɛ niaa co yɛ dimio le vana ya co-o?» Mí Piɛr mulul ndu aa: «Nɔm co Krista ni.»

³⁰ Mó kindi nda ndi dimullo maa a dimul vana-vana isɔɔ a ndu o kɔɔ le.

Yeesu soo a piɔ́m ndɔɔ a á tendul ndɔɔ o kɔɔ

³¹ O kon kɔɔli, mí Yeesu kandu kaandeŋaa ndɔa dimullo maa fɔ mì Po vanacieo sanga taw, mì vanaa bɛndua lelɛŋnda kɛɛ ndu, mì bolii vanaa-solia-lasálàá a vanaa pɛɛkaa latɔŋnda kɛɛ ndu, mà dii ndu. Palɛi yaa o kon kɔɔli, mò tendu fulaa vanvílɛ́iya tɛɛn.

³² Mó dimul nda ndi lende kpendekele. Mí Piɛr veelu ndu landɔ, mó kɔ va ndu kpaa le sɔɔn vaa lende dimio.

³³ Kɛ mí Yeesu mulin, mó tofa kaandeŋaa ndɔa, mó soaa Piɛr, mó dimul ndu aa: «Faŋan ya kɔɔli, nɔm Setana, kani yiyannda nɔmndan la co yiyannda Hala le, yiyannda ivanacieeyalan la co ni.»

³⁴ O kon, mó veelu sɛ́lɔ́ɔ́ a kaandeŋaa ndɔa, mó dimul nda aa: «Te vanndo yeema pɛ le ya hunɔɔ kɔɔli, mɛɛ mì ndu pila kɛɛnun, mò siilun yɔm singafilaa ndɔ ndu pila-o, mò del-la kɔɔli.

³⁵ Kani vana-vana yeema pɛ le yoomu ndɔɔ ciindiaa, o hialunnin vana kon, kɛ vana-vana yoomu ndɔɔ hɛlun pɛ le ya a le Yoongu Kɛndɛ Hala-o, ndu sɔla yoomu co le fɛɛn a fɛɛn-ndo.

³⁶ Vanacieo sɔla bɛɛ ceendo kpede, kɛ te yoomu ndɔɔ hɛlun ndu pɛ, ɔ́ɔ̀ tɔnɔ o sɔla-o?

³⁷ Nduyɛ, te yoomu fɛɛn-fɛɛndo hɛlun pɛ vanacieo, o nɔla pá ndu baŋa?

³⁸ Kani vana tosa pɛ siɛmbulan le ya a le sɔɔn nun dimio vanndacieea co haa vaalio ho tɛɛn, a sina haa Hala le-a, a co haa hakilan tosaa-a, Po vanacieo bɛɛ tosanin siɛmbulan a vana kon telen o hunnin o biilu Fuɲa ndɔ-o nin a mɛlɛkaa ndɔa diandaa-o.»