Marke 7 - BII BILA

Pɛɛkoo a naamula fuɲaa-mamaa mɛi lan o kɔɔ

¹ Mí Faliisia a vanaa pɛɛkaa latɔŋnda pum mɔɔsian Yeesu ikɛi, Yerusalɛm ndáà fula ni.

² Má ca kaandeŋaa Yeesu-a pum ɲɛdiaa dioo, aa pilu laba le.

³ Nduyɛ Faliisia a Yuifia kpede, ndáà di ɲɛdiaa lende le, mɛɛ mi ndáà pilu balan ɲɛkɛndɛi, kani lende naamu nda komal fuɲaa ndaa mamaa o ba-o va ni.

⁴ Ndáà fula pɛ sɛ́lɔ́ɔ́ tɛɛn mì ndáà muungu, mɛɛ mì ndáà dindin mɛɛ naamu ndaa va yɛ malan ndáà dia ɲɛdiaa. Naamula celen la va vɛlɛ taw, la nda va kelaa coo lan: maa mɛɛ taalala kólaalan, bɔlɔla yáwla mamɛnndan a hɛngɛila n'daɲalan tueiyo co nuaa yɛ.

⁵ Mí Faliisia a vanaa pɛɛkaa latɔŋnda ɲuna ndu aa: «Le yɛɛ nɛ kaandeŋaa nɔmnda co yɛ kɛɔ kelaa o naamula fuɲaa naa mamaa coo, mà va ɲɛdiaa dioo a bala nɔɔlɛilan?»

⁶ Mí Yeesu mulul nda aa: «Esai dimi lɔ́ɔ́ kon sɔɛi niɛi, niaa vanaa muuluannda ha, kani o co o sɛvaa aa: ‹Hala dimi aa o cɔcɔn coo kínɛí vannda ha nɔ bɛɛle nilen ni, kɛ kɔlta ndalan la co levil a ya.

⁷ Kaannde fondolen fúú vannda ha co ya tosallo ni, kani kɛɛsuulan a tɔŋnda vanndacieea kínɛí nda co vannda pɛɛkoo ni.›

⁸ La co tɔŋnda Hala lan mɛiyo ikɛi, mì la va simndan o naamula vanndacieea coo.»

⁹ Mó hiaw laci a nda dimullo aa: «Lekɛ́ndɛi, tɔŋ Hala-o niaa co kɛɔ ni, mì la va kelaa o naamula niaalan coo.

¹⁰ Kani mí Moise dimi aa: ‹Biilu fuɲa nɔm a kala nɔm›, mó dimi vɛlɛ aa ‹Vana yei pɛ fuɲa ndɔ te kon te kala ndɔ, ndu bɛnda mò sɔla piɔ́mndo.›

¹¹ Kɛ mí niaa la va dimio aa: ‹Te vanndo dimul pɛ fuɲa ndɔ te kon te kala ndɔ aa: «Ɲɛ yáà malanin nɔm-ndo, ndu ya solulnin Hala sálàá ni»,

¹² la cɛl-lɛ mò tosal fuɲa ndɔ kon, te kon te kala ndɔ kon ɲɛ-ɲɛ le.

¹³ Lende niaa co sɔɛi Hala-e faŋaa o fonda ndɔɔ le vannda naamula niaalan pɛɛkoo ni. La co sɔɔn celen tosaa, n co maa mun-ndon.›»

Ɲɛm nɔɔliaa vana-on

¹⁴ O kon kɔɔli, mó veelu vɛlɛ sɛ́lɔ́ɔ́, mó dimul nda aa: «Niaa kpede la yaŋ ya nilan mì la bii bila.

¹⁵ Ɲɛ-ɲɛ fula mò luɛi vanacieo nin mò nɔɔliaa ndu le, kɛ ɲɛ fula vanacieo nin-ndo, ndu nɔɔliaa ndu ni.

¹⁶ Vana nɔ pɛ nilan le tueyɔɔ, mɛɛ ndu tuei.»

¹⁷ Ndáà luɛyɔɔ cɛinin, má mɛi sɛ́lɔ́ɔ́ lándán, mí kaandeŋaa ndɔa ɲuna ndu kɔlɔ tale kon.

¹⁸ Mó dimul nda aa: «Mò va maa niaa bɛɛ la nɔ kɔlkalu le? La bii bila maa ɲɛ-ɲɛ fula mò luɛi vanacieo nin, o nɔla ndu nɔɔliaa le le?

¹⁹ Kani o co ndu o kɔl te o co luɛyɔɔ le, kɛ o luɛi pɛ ndu o dembe, o kɔ soli ndu yondoo nin.» Nduyɛ, ɲɛ o va dimio o sɔɔn mun nin-ndo co ni maa ɲɛ-ɲɛ vana de co o diandaa.

²⁰ Mó dimi aa: «Ɲɛ fula vanacieo nin-ndo, ndu nɔɔliaa ndu ni.

²¹ Kani vanacieo nin, o kɔlta vanndacieea nin yiyannda vɔɔnndan la fula ni: sɔɔn lasiɛmbon, vuilen, vannda diwvo,

²² suundaa, ɲɛm pilan yeemaa, vana vɔɔnyɛi, kɔlkalu vɔɔndo, ilaasi-laasiei, paŋalaa, sɔɔn pɔmbɔn, yongaa a diɔmndon.

²³ Dɛnnda vɔɔnndan ndan kpow la fula vanacieo nin ni mì la nɔɔliaa ndu.»

Laalan vuɛɛn kaanannɔɔ

²⁴ Mí Yeesu faŋan o fonda kon, mó kɔa o lɛŋnde Tir len nin. Mó luɛi o cɛiyo pum nin, ndóò yeema mì vana-vana óò sina le, kɛ o nɔla vionnɔnndo le.

²⁵ Nduyɛ vuɛɛn pilɛ va lon, ɲina vɔɔndo va cua ndɔɔ kɔɔli. Ndóò tueyɔɔ sɔɛi Yeesu-e, mó hun del ndu o labɛngunin.

²⁶ Krɛkenɔɔ vuɛɛn kalaa va ni, kɔɔlima ndɔan ma va Fenisi o lɛŋnde Sirilen nin ni. Mó dimul Yeesu le ɲina vɔɔn kon tovɔɔ cua ndɔɔ kɔɔli.

²⁷ Kɛ mí Yeesu dimul ndu aa: «Cum-ndɔ fɔlɔn mì cuaambɔa pim, kani vana vowlu tunaa cuawva ɲɛdiaa co le cuaambɔa-o le.»

²⁸ Mó mulul ndu aa: «Lende i co ni vana bɛndoo, kɛ tunaa cuawva nɔla mà cɔwviaa kuun cuaambɔa mɛli-on.»

²⁹ O kon mó dimul ndu aa: «Le sɔɛi n dimi hee-e, muungun, ɲina vɔɔndo fula cua nɔmndo nin.»

³⁰ Ndóò muungoo o ndu lo, mó komal cuaambɔɔ ihini o kpele sanaa, ɲina vɔɔndo ndóò fulan nin ndu nin.

Yeesu singi bobonɔɔ

³¹ Mí Yeesu faŋan o lɛŋnde Tir len nin, mó kei a Sidɔn, mó kialu tàndá kobila tɔ́-o tɛɛn, mó hun a ba dalaa Kalile.

³² Má cuu ndu langbanɔɔ pum. Langbanɔ kon ndóò tui le, ndóò nɔla vɛlɛ sɔɛi le. Má ɲɔɔlu Yeesu le po kon balan handɔɔ coo.

³³ Mí Yeesu kɔa nda ndu, má mɛi sɛ́lɔ́ɔ́ lándán, mó kɔ vow ndu suon o lani, mó sui ndu lɔluan o lediɛɛmu.

³⁴ O kon mó heelu hɔlla o halataala, mó yoomu fúú, mó dimi aa: «Efata», kon co dimio ni aa: «Kumbin».

³⁵ Fɔ́ɔ́fɔ̀, mí nilan la kumbin ndu, mí diɛɛmulen le timbin ndu, mó kandu dɔ́ɔ́ sɔɛi ɲɛkɛndɛi.

³⁶ Mí Yeesu dimul nda maa a dimul vana ndi le. Kɛ mɛɛ o va nda kuunaa faw, lende koni nda va sɔɛi kalɛi keeliaa ni.

³⁷ Mí kɔndɔfili bɛndu-bɛndoo bii nda, má va dimio aa: «Dɛnnda kaamaalan tuŋ o tosa ni, hali boboa, mò tosa mà tuei, mà soo.»