Marke 6 - BII BILA

Yeesu kɔɛ Nasarɛt

¹ Mí Yeesu faŋan ndon, mó kɔa o lɛŋnde ndɔlen nin. Mí kaandeŋaa ndɔa kɔa ndu kɔɔli.

² Paale pɛngiaalen tiiyaa, mó kɔa vannda pɛɛkoo o cɛi lekaando nin. Mí sɛ́lɛ́ bɛndu va ndu nilan yaŋɔɔ-o dɔawnun kɔndɔfili. Mí vannda va dimio aa: «Kuɛɛ o fula yɛ a hee kpow? Kɔlkalu súú yɛɛ kennun yɛ ndu hoo? Vɛ̀ɛ̀ o looku yɛ dɛnnda kaamaalan ndan kpow tosaa?

³ O co langbanɔɔ cua hoo yindɔlan-ndo le? O co po Mari-o le, bɛndoo Nsaki, Yosɛf, Yude a Simɔn pɛɛn? O co yemaa ndɔa le co naa haa tɛɛn nanu le?» Mí ken yɔŋnun pow boŋaa le nda.

⁴ Kɛ mí Yeesu dimul nda aa: «Vana-tɛɛngaa-diom Hala-o sɔla biiloo o lɛŋnde ndɔlen nin te, vanayan ndɔn tɛɛn a o ndu lo cɛinin pɛɛn.»

⁵ Yeesu nɔ́lá kaamaa kɛ́-kɛ̀ tosa lon te, fɔ vanaa o handu balan coo mó singi nda-a.

⁶ Mó dɔawnun kɔndɔfili le laalan nda kɛɛ-o. Mí Yeesu balu o cieon va lon-ndon nin kpow le vannda pɛɛkoo.

Ɲɛ kaandeŋaa tɔ́ a à ŋiɔnda tosa-o

⁷ O kon kɔɔli, mó veelu kaandeŋaa tɔ́ a à ŋiɔnda, mó va nda vomɔɔ a ŋiɔn-ŋiɔn. Mó ke nda kpaayaa ɲinaa vɔɔnda coo,

⁸ mó congun nda aa: «La cua ɲɛ-ɲɛ o kɔlan te, fɔ sionnden daama. La cua ɲɛdiaa le, la cua bɔlɔ le, la vownun n'voli o yifɔ le.

⁹ Kɛ la vownun samtalan, la cua domala tiɔn te.»

¹⁰ Mó dimul nda vɛlɛ aa: «Cɛi niaa luɛi pɛ, la lo lon háá mi la faŋan o fonda kon.

¹¹ Nɛɛ niaa kɔɛ pɛ mì vannda cɛl niaa le, te kon te mà yeŋ niaa lani le, la va pɛ faŋanndo lon, la koŋ cundu vanin niaa o n'pelu-o, cundu kon vanin lesei le nda.»

¹² Má kɔa, má kɔ yonda Sɔɛi Hala-e maa vannda mal yɔŋ vɔɔndo mà mangalan.

¹³ Má va ɲinaa vɔɔnda tovɔɔ taw, má va vanaa lanàà bɔɔ-bɔɔ pɔlaa, má va nda singio.

Piɔ́m Nsaŋ Vana yinaa-o

¹⁴ Mí masaa Herɔde tuɛi sɔɛi ken, kani Yeesu ndóò kela nin tɔ́ɔ́ taw. Mí vannda va dimio aa: «Nsaŋ Vana-yinaa tendu fulaa vanvílɛ́iya tɛɛn, o fula ciee-piɔ́m mó muungu yoomu, lelan o nɔ kpaayaa le dɛnnda kaamaalan tosaa nuaa ni.»

¹⁵ A pum a va dimio aa: «Elii ni.» Mì a pum nda va dimio aa: «Vana-tɛɛngaa-diom Hala-o maa haa sindɛ cɛn nuaa ni.»

¹⁶ Herɔde tueyɔɔ sɔɔn vannda va mun dimio-on kpow, mó dimi aa: «Nsaŋ Vana-yinaa ya vem vannda má kialu ndu bollen-ndo ni, ndu muungu yoomu nuaa ni!»

¹⁷ Kani mí Herɔde ndóò dimi maa a bii Nsaŋ, mà baa ndu yɔlɔn o kaasoo le Herodiade, lanɔɔ Filipe puapilɛ ndɔ ndu Herɔde ndóò yil o nɔ̀u nin-ndo pɛɛn.

¹⁸ Kani Nsaŋ ndóò dimul ndu Herɔde ni aa: «A bɛnda ma cua lanɔɔ puapilɛ nɔmndo o nɔ̀u nin te!»

¹⁹ Herodiade va nɛyɔnndo a Nsaŋ, ndóò yeema le ndu diyɔɔ. Kɛ ndóò nɔla le,

²⁰ kani Herɔde va Nsaŋ vou, bau o va sinaa maa vana sandaa a vana diandaa Nsaŋ va ni, o va ndu vɛlɛ kandaa. Telen oo telen ndóò yaŋ pɛ Nsaŋ nilan, kɔllo ndóò laasian ndu. Kɛ nduyɛ, ɲɔɔ pila ndóò hɛnan ndu le ndu yaŋnɔnndo ni.

²¹ Kɛ paale pilɛ, ɲin Herɔde va paale ndɔle vialannden yelelaa-o, mó yaw ɲɛdiaa le vanaa ndɔa lebɛɛa, simlacia vanaa cɔwva a vanaa sɔvɛa kɛ́-kɛ̀ va Kalile.

²² Mí cua Herodiade-o luɛi, mó ya. Mí ɲɔɔ hɛnan Herɔde nda vanaa ndɔa o veelu-a. Mí masaa dimul cuaambɔɔ aa: «Piɛi ya ɲɛ n yeema-o, mì ke nɔm ndu.»

²³ Mó mɛnalan ndu aa: «Ɲɛ-ɲɛ n yeema pɛ, i kenin nɔm ndu, hali o va bɛɛ aa tala masale nilen ni.»

²⁴ Mí cuaambɔɔ fula, mó kɔ ɲuna kala ndɔ aa: «Yɛɛ ya kɔ piɛi yɛ ndu?» Mí kala ndɔ mulul ndu aa: «Bolle Nsaŋ Vana-yinaa len.»

²⁵ Mí cuaambɔɔ keleŋa muungu cɔ́-cɔ́ o masaa lo, mó dimul ndu aa: «I yeema ma ke ya bolle Nsaŋ Vana-yinaa len sunsun o siɛtio nin.»

²⁶ Mí mɔnɛi bii masaa, kɛ le tùú ndóò cii nin mɛnan-ndo, a le tùú vanaa ndóò veelu-a va icali-o, o kɛɛ ndu diom te.

²⁷ Fɔ́ɔ́fɔ̀, mó viam vana cɔwvo le kɔlan hunɔɔ a bolle Nsaŋ Vana-yinaa len.

²⁸ Mí vana cɔw kon kɔa, mó kɔ kialu Nsaŋ bollen nɛɛ o va o kaasoo-a, mó hun a len o siɛtio nin. Mó ke cuaambɔɔ len, mí cuaambɔɔ ndu yoo kala ndɔ.

²⁹ Kaandeŋaa Nsaŋ-nda tueyɔɔ lende, má hun cua dialun ndɔn, má kɔ kumbu.

Yeesu dɔw vannda vàála ŋuɛɛnu balo

³⁰ Mí kaandennda cuungian o Yeesu lo, má dimul ndu ɲɛ-ɲɛ nda tosa a ɲɛ nda pɛɛku vannda-o.

³¹ Mó dimul nda aa: «La fula vannda tɛɛn mì la kɔɛ lándán o lɛŋnde veselɛilen nin, mì la kɔ pɛngi ɲɛ-pɔmbɔ.» Kani vannda taw a va kɔlan a hunɔɔ, ndáà nɔ bɛɛ fonda hali le ɲɛdiaa dioo le.

³² Má luɛi o dɛ̀ndɔ̀ɔ́ nin, má kɔa lándán nɛɛ vana ve le-a.

³³ Mí vannda taw ca nda kɔlan, má sina nɛɛ nda va kɔlan-nda. Má fula o kobilan kpow nin, má ɲaanun a n'pelu, má hiaw nda laci, má kɔ cum nda lon.

³⁴ Yeesu fulaa dɔ́ɔ́ o dɛ̀ndɔ̀ɔ́ nin, mó ca vannda sɛ́lɛ́ bɛndoo, mí ɲííye bii ndu a nda, kani maa saa nɔ vana mandaa le-a nda va ni, o kon mó can nda pɛɛkoo o sɔɔn taw coo.

³⁵ Le tùú telenndo ndóò kɔɛnnun nin taw-vo, mí kaandeŋaa ndɔa sɔɔnguu ndu ikɛi, má dimul ndu aa: «Vana co o fondaa ho le, nduyɛ paalen le kɔɛnnun.

³⁶ Mìngì vannda, mà kɔɛ o sɔndɔkɔltan a o cieon co macɛlu-on, mà kɔ piondu ɲɛdiaa.»

³⁷ Mí Yeesu mulul nda aa: «Niaa pila ke nda ɲɛdiaa.» Kɛ má mulul ndu aa: «Mò va maa n kɔ piondu buloo a volin latámán kɛmɛ lediin, mì n hun ke nda ni?»

³⁸ Mó mulul nda aa: «Vɛɛ niaa nɔ yɛ bululan? La kɔ tofa vɔ!» Ndáà mɛɛndianndo, má dimi aa: «Bululan tan ŋuɛɛnu a suwva nda ŋiɔn naa n nɔ nanu ni.»

³⁹ Mó dimul nda le vannda kɛsio a kundalan o bil puiyaa coo.

⁴⁰ Má cal a polan, n'van kɛmɛ-kɛmɛ, n'van beleŋuɛɛnu-beleŋuɛɛnu.

⁴¹ Mó cua bulula ŋuɛɛnula lan a suvaa ŋiɔŋaa kan, mó heelu hɔlla o halataala, mó dɔaw duaa. O kon mó yimiyimi bululan, mó ke kaandennda le sɛ́lɔ́ɔ́ lan piɔwvo. Mó piɔw vɛlɛ suvaa ŋiɔŋaa kan vannda kpow tɛɛn.

⁴² Mí nda kpow a dia, má pum,

⁴³ má kɔa a bulu tɔ̀ lo-o a á suvaa tɔ̀a lo-a kambɛilan tɔ́ a latiɔn lapiaa cá-cá.

⁴⁴ Vanáà de bulu kon-nda va vanpiaandua vàála ŋuɛɛnu.

Yeesu kɔɛ o mɛnndan coo

⁴⁵ Sɔɔn mun cuvɔɔ dɔ́ɔ́, mí Yeesu baŋ kaandeŋaa ndɔa helɔɔ o dɛ̀ndɔ̀ɔ́ nin le ndu hiovɔɔ laci o kɔngɔɔ pilɔɔ, a kpengii kobio Bɛtsaida, o kon mì ndu pila koma lo sɛ́lɔ́ɔ́ mingio.

⁴⁶ Tuma o cii sɛ́lɔ́ɔ́ mingi-yo, mó kɔa o pembei coo le piɛilen.

⁴⁷ Ɲumndan tolɔɔ, dɛ̀ndɔ̀ɔ́ va o mɛmma ihɛllan tɛɛn, mí Yeesu ndu va o kɔngɔ.

⁴⁸ Mó ca maa kaandennda va sangaa le dɛ̀ndɔ̀ɔ́ yɔɔ nɛɛ ndáà yeema mì ndóò kɔɛ-a, kani hoeiye ve lakɔ nɛɛ ndáà yeema-a le. A telen di-tɛɛn paale siaa, mó kei o mɛnndan coo le kɔlan nɛɛ nda va-a, o va le nda hiovɔɔ.

⁴⁹ Ndáà cɔu ndu kɔlan o mɛnndan coo, má yiyan maa ɲinaa ni, má mɛli yeelan.

⁵⁰ Kani nda kpow a va ndu cɔu, má laasian kɔltan. Fɔ́ɔ́fɔ̀, mí Yeesu soaa o nda lo, mó dimul nda aa: «La laalan maa ya ni, siòòŋii bii niaa le.»

⁵¹ O kon kɔɔli mó luɛi nda ikɛi o dɛ̀ndɔ̀ɔ́ nin, mí hoeiye cal. Mí kɔndɔfili bɛndoo bii kaandennda,

⁵² kani a bii kaamaa ndóò tosan a buloo-o bila le, kani nila kalulan la va nda.

Yeesu singi vannda o tàndá Kenesarɛt-o nin

⁵³ Ndáà siowvo taŋɔɔ, má tiiya o lɛŋnde Kenesarɛt len nin.

⁵⁴ Ndáà fulaa dɔ́ɔ́ o dɛ̀ndɔ̀ɔ́ nin, mí vannda sina Yeesu,

⁵⁵ má balu lɛŋnde len kpow, nɛɛ-nɛɛ vannda ndáà tuei pɛ maa o co lon, ndáà hin a vanaa lanàá o yalalan nin.

⁵⁶ O va o kobi nin, o va o cieon a o sɔndɔkɔltan, nɛɛ-nɛɛ Yeesu ndóò luɛi pɛ, a sooluu vanaa lanàá o ifal, vannda kɔ tɛɛlun maa o cɛl mì vanaa lanàá pilan bɔɔle doma ndɔɔ daama. Nduyɛ vanaa-vanaa va ndu pilanndo, a va siongɔɔ sɔlaa.