Marke 3 - BII BILA

Yeesu singi vanndo o paale pɛngiaalen coo

¹ Mí Yeesu muungu vɛlɛ luɛyɔɔ o cɛi lekaando nin. Langbanɔ baa ndóò vi-o pum va lon.

² Mí vannda va Yeesu tofaa, te ndóò singinin ndu o paale pɛngiaalen coo. O kon mì ndáà sɔla talen le ndu kɔɔsallo.

³ Mí Yeesu dimul langbanɔ ndóò nɔ kon ba vílɛ́iyo-o aa: «Cɔn ma sim vannda tɛɛn.»

⁴ O kon mó ɲuna nda aa: «I co pá i cɛlnan le vanndo dɛnɛ kɛndɔɔ te kon te dɛnɛ vɔɔndo tosallo o paale pɛngiaalen coo, baa ciindiaa ndu, te kon te malɔɔ ndu mo vinnun?» Kɛ má mei kpili.

⁵ O kon mí Yeesu keela nda hɔlten coo a kɔl tambɛiyo a á mɔnɛi le nila kalula ndalan, mó dimul langbanɔɔ aa: «Siɛndi baa!» Mí langbanɔɔ siɛndi baa, mí ba ndɔɔ siangun.

⁶ Fɔ́ɔ́fɔ̀, mí Faliisia fula, má kɔ tundu nda vanaa va o kunda Herɔde-o coo-a le nɛilan nuwviaa le Yeesu diyɔɔ.

Sɛ́lɛ́ bɛndoo hin o Yeesu lo

⁷ Mí Yeesu kɔa a ba dalaa nda kaandeŋaa ndɔa. Mí sɛ́lɛ́ bɛndoo del ndu kɔɔli fulaa Kalile,

⁸ Yuda, Yerusalɛm, Idumee, Yurdɛn peo leeloo a o lɛŋnde Tir a Sidɔn-nden nin.

⁹ Mó dimul kaandeŋaa ndɔa le ndu dɛ̀ndɛ̀ pɔmbɔɔ pum bɛɛndiallo haliko mi ndóò luɛi lenin yɔŋii sɛ́lɛ́ bɛndu kon ndóò ŋoviŋovi ndu.

¹⁰ Kani o va vanaa bɔɔ-bɔɔ singio, mí vanaa lanàá kpede va ifili-filiei ndu coo le ndu pilanndo.

¹¹ Ɲinaa vɔɔŋaa va ndu cɔu-va va vulan baŋɔɔ ndu o labɛngunin ma va deŋio aa: «Nɔm co Po Hala-o ni!»

¹² Kɛ mó va nda dimullo a kɔl tambɛiyo maa a tosa mì vannda sina vana o co-o le.

Yeesu hɛli kaandeŋaa tɔ́ a à ŋiɔnda

¹³ O kon kɔɔli, mó hel o pembei coo, mó veelu vanaa ndóò nɔ makoo-a, má kɔa nɛɛ o va-a.

¹⁴ Mó hɛli n'van tɔ́ a vanaa ŋiɔn le vaa nda ndaa latulu,

¹⁵ a le nda vomɔɔ sɔɛi Hala-e yondaa. Mó ke nda dio le ɲinaa vɔɔnda tovɔɔ.

¹⁶ N'van tɔ́ a vanaa ŋiɔŋaa Yeesu hɛli kan-nda a co haa ni: Simɔn, o ó ke diolan aa Piɛr-o,

¹⁷ Nsaki po Sebede-o nda Nsaŋ puapilɛ ndɔ, nda Yeesu ndóò veelu ni aa Boanɛrsɛs, kon co dimio ni aa poaa letaŋnda,

¹⁸ Andre, Filipe, Bartelemi, Matie, Tomas, Nsaki po Alfee-o, Tadee, Simɔn langbanɔ yeema lɛŋnde ndɔlen-ndo,

¹⁹ a Yuda Iskariɔt, o mal Yeesu vannda o ba-o.

Hakio cuaa a Hala Kɔl-Diandaa

²⁰ O kon kɔɔli, mí Yeesu kɔa cɛinin, mí sɛ́lɛ́ bɛndoo hun cuungian vɛlɛ lon. Yeesu nda kaandeŋaa ndɔa nɔla bɛɛ ɲɛdiaa dioo le.

²¹ Vanayan Yeesu-on tueyɔɔ lende, má hun le ndu cuaa, kani a va dimio aa: «O co lɛhau o ndu pila nin te.»

Yeesu muli a sɔɔn nda hɛɛnduu ndu coo-on o kɔɔ

²² Mí vanaa pɛɛkaa latɔŋaa fula Yerusalɛm-nda va dimio aa: «Beɛlsebul co ndu nin nuaa ni, a kpaaya bolle ɲinaa vɔɔnda o co ɲinaa vɔɔnda tovɔɔ ho ni.»

²³ Mí Yeesu veelu nda, mó dimul nda isɔɔ o tale nin aa: «Vɛɛ Setana nɔla yɛ mo tow Setana?

²⁴ Te masalen pila le simulun pɛ, masale len le nɔla kpaayaa sɔlaa le.

²⁵ Cɛi oo cɛi piɔvan pɛ ndu pila, cɛi kon nɔla kpaayaa sɔlaa le.

²⁶ Te Setana simul pɛ ndu pila, mɛɛ o piɔvan, o nɔla lɛ kpaayaa sɔla le, i ndɔɛi cuu.

²⁷ Vana-vana nɔla luɛyɔɔ o vana mayoomoo lo cɛinin, mà cua ɲɛm ndɔn te, kɛ a bii ndu pɛ fɔlɔn, a yii ndu. O kon kɔɔli, a cua niko ɲɛm ndɔn.

²⁸ I co niaa toɲaa dimul, hakilan kpede a sɔɔn tanan vanndacieea dimi-on n malnunin haki,

²⁹ kɛ vana dimi pɛ sɔɛi tanai a Hala Kɔl-Diandaa, ndu sɔlanin hakio malɔɔ le: kani o tosa haki fɛɛn-fɛɛndo.»

³⁰ Yeesu dimul nda lende fondo le, bau nuaa nda va dimio ni aa: «Ɲina vɔɔndo co ndu nin ni.»

Kalaa Yeesu nda pɔmbɔa Yeesu-a

³¹ Mí kalaa Yeesu nda pɔmbɔa Yeesu-a hun, má sim o dio. Má viam vanndo ndu veelu.

³² Sɛ́lɔ́ɔ́ va ndu o balaa sɔ́, má dimul ndu aa: «Kala nɔm, pɔmbɔa nɔmnda a yemaa nɔmnda nɔ makoo a nɔm o dio.»

³³ Mó muli aa: «Nɛ̀ɛ́ co yɛ kala nuu, nɛ̀ɛ̀aa co yɛ pɔmbɔa nia?»

³⁴ O kon, mó keela hɔlla vanaa va icali ndu a balaa sɔ́-a coo, mó dimi aa: «Kala nuu a pɔmbɔa nia, nda co haa ni.

³⁵ Vana-vana tosa pɛ hɛnan Hala-o, ndu co puapilɛ nuu, yema nuu a kala nuu ni.»