Marke 14 - BII BILA

Simlacia yii Yeesu dúmbú

¹ Ndóò lo palɛi ndii ŋiin, mì kafo-hiavaa-coo a kafo bulu toosian a lɛvɛn too ndóò tiiya. Mí bolii vanaa-solia-lasálàá a vanaa pɛɛkaa latɔŋnda can nɛilan nuwviaa le Yeesu biyɔɔ a kɔlkalu vɔɔndo, le ndu diyɔɔ.

² Kani nuaa nda va dimio ni aa: «O bɛnda o paale kafolen coo le, yɔŋii vɔkɔ-vɔkɔɔ yɔŋnun vannda tɛɛn.»

Cuaa pum pɔla Yeesu a cuɛima cun kɛndɛan

³ Yeesu va Betani o Simɔn nàà siaŋaa va-o lo cɛinin. Tuma o va ɲɛdiaa dioo-o, mí vanalanɔɔ pum luɛi. Ndóò nɔ sianio pum o ba a cuɛima cun kɛndɛma báà kalan mapum lenin. Mó pial siani kon, mó taaliaa cuɛima man Yeesu o lebol.

⁴ Mí vanaa va lon-nda a pum a tambu kɔltan, má va dimulanndo aa: «Le yɛɛ nɛ cuɛima cun kɛndɛan man tɛɛmbuuo?

⁵ Vanáà nɔla man pisi le volin latámán kɛmɛ leyáá a ɲɛ lecoo, mí vanáà yɔngu vanaa bala fondoa volin mun.» Mí ɲɔɔ va nda palaa a cua kon.

⁶ Kɛ mí Yeesu dimi aa: «La mal cuaa ho. Le yɛɛ niaa co yɛ ndu palaa ho? Dɛnɛ kɛndɔɔ o tosal-la ni.

⁷ Kani la nɔ vanaa bala fondoa niaa tɛɛn lɔ́ɔ́-lɔ́ɔ̀, la tiwba mì la tosal nda dɛnɛ kɛndɔɔ tuma-tuma niaa yeema pɛ. Kɛ ya ya, la nɔ́ ya niaa tɛɛn lɔ́ɔ́-lɔ́ɔ̀ le.

⁸ Ɲɛ o nɔla-o o tosa ni. Cuɛima cun kɛndɛma o taaliaa ya man coo-an, le kumbɔɔ nuu o bɛɛndiaa pɔɔ dialun nun nuaa ni.

⁹ I co niaa toɲaa dimul, nɛɛ-nɛɛ Yoongu kɛndɔɔ hun yondan pɛ o ceendo coo, a diminin vɛlɛ dɛnɛ cuaa ho tosa hoo-o le loonɔnndo a ndu o kɔɔ.»

Yuda yeema mo mal Yeesu bolii vanaa-solia-lasálàá o ba

¹⁰ O kon mí Yuda Iskariɔt, ó va kaandennɔɔ pilɛ o kaandeŋaa tɔ́ a à ŋiɔnda tɛɛn-ndo, kɔ komal bolii vanaa-solia-lasálàá le Yeesu malɔɔ nda o ba.

¹¹ Mɛɛ simlacia kan tuei ndu diom lende, mí ɲɔɔ hɛnan nda. Má cua ciɛɔn le ndu volion keo. Mí Yuda kandu dɔ́ɔ́ nɛilan nuwviaa le Yeesu malɔɔ nda o ba.

Yeesu de ɲɛdiaa kafo-hiavaa-coo nda kaandeŋaa ndɔa

¹² O paale tasele kafo bulu toosian a lɛvɛn too len coo, paale ndáà diw saa téndéa le kafo-hiavaa-coo tosaa len, mí kaandennda ɲuna Yeesu aa: «Kuɛɛ nɛ n yeema yɛ mì n kɔ bɛɛndial nɔm ɲɛdiaa le kafo-hiavaa-coo?»

¹³ O kon, mó viam kaandeŋaa ndɔa a ŋiɔn, mó dimul nda aa: «La kɔ o kobio nin, la bɔŋannin a langbanɔɔ pum, ó vanin hunɔɔ a bonyii mamɛnnde-o. La kɔ ndu kɔɔli.

¹⁴ Nɛɛ o kɔ luɛinin-nda, la ɲuna vana ciɛi kon aa: ‹Kɔɔfa ɲuna aa kuɛɛ nɛ o dia yɛnin ɲɛdiaa kafo-hiavaa-coo nda kaandeŋaa ndɔa?›

¹⁵ O cɔmnin niaa cɛi lenin bɛndu o cii nin toosiaa o cɛi coocoo nin-ndo. Lon niaa toosiaanin ɲɛdiaa le naa ni.»

¹⁶ Mí kaandennda kɔa, má tiiya o kobio nin, má komal dɛnndan mɛɛ Yeesu ndóò dimul nda yɛ. O kon, má toosiaa ɲɛdiaa kafo-hiavaa-coo.

¹⁷ Icɔllo, mí Yeesu hun nda kaandeŋaa tɔ́ a à ŋiɔnda.

¹⁸ Tuma nda va icali ɲɛdiaa dioo-o, mí Yeesu dimi aa: «I co niaa toɲaa dimul, vana pilɛ o niaa tɛɛn, ò naa n co dioo naa ndu latulu-o, malnin ya vannda o ba.»

¹⁹ Mí kaandennda kpow a va ndu ɲuuniaa a pilɛn-pilɛnnda a mɔnɛi aa: «O co ya le le?»

²⁰ Mí Yeesu mulul nda aa: «Vana naa n co baa vowvo naa ndu o hɛngɛi pilɔɔ nin-ndo.

²¹ Nduyɛ, Po vanacieo co hunɔɔ piɔ́mndo sɔla mɛɛ o sɛvan a ndu o kɔɔ o Sɛbɛ Hala-o nin yɛ. Kɛ dɛnɛ palaa co le vana malnin ndu vannda o ba-o. Ndóò va fisa hali mì vana kon ndóò vilun te.»

Yeesu de nda kaandeŋaa ndɔa latulu

²² Tuma nda va ɲɛdiaa dioo-o, mí Yeesu cua buloo, mó dɔaw ndu duaa, mó yimiyimi ndu, mó yɔngu nda, mó dimul nda aa: «La bii, dialun nun co mun ni.»

²³ Mó cua vɛlɛ taala kólaa, mɛɛ o cii balikaa malɔɔ, mó ke nda ndu, mí nda kpow kol.

²⁴ Mó dimul nda aa: «Kooma nian ma co man ni, kooma kpema-an, ma fula le vannda taw-van.

²⁵ I co niaa toɲaa dimul, háá nin mì hun kol mɔima sɛnɛiyan o masale Hala len nin, i kol-lɛnin mɔima n'rɛsɛnndan man te.»

²⁶ Ndáà ciiyo condei, má kɔa o Pembii oliviei.

Yeesu dimi maa Piɛr vuununnin maa o sina ndu le

²⁷ Mí Yeesu dimul nda aa: «Niaa kpow la sɔlanin tɔɔndanndo le niaa faŋaa o nɛiyo coo, kani i co isɛvaa aa: ‹I lɔaanin vana mandaa n'saa, mì saa sɛŋin.›

²⁸ Kɛ te i tendul pɛ mì fula vanvílɛ́iya tɛɛn, i kɔanin niaa laci Kalile.»

²⁹ Mí Piɛr dimul ndu aa: «Vannda kpow a sɔla bɛɛ tɔɔndanndo mà mal nɛiyo, ya-ya, i melnin nɔm te.»

³⁰ Mí Yeesu dimul ndu aa: «I co nɔm toɲaa dimul, hau-hau, cɔɛllɛn pɛɛn, lɔ́ɔ́ pá kongillo peelu koovaa lediin, a vuununnin leyáá maa a sina ya le.»

³¹ Kɛ mí Piɛr baŋ ndi dimio aa: «Te vuo ni, n vi naa nɔm, kɛ i viinunnin mì kɛɛ nɔm te few.» Mí vanaa tɔ̀a kpow dimi lende.

Yeesu piɛi Hala Sɛtsemanee

³² O kon kɔɔli, má kɔa o fondaa pum diolan Sɛtsemanee, mí Yeesu dimul kaandeŋaa ndɔa aa: «La cal nanu, mì kɔ piɛi Hala o nda.»

³³ Mó kɔa a Piɛr, Nsaki a á Nsaŋ kɔɔli. Mó kandu kɔllo tambei a buulanndo taw.

³⁴ Mó dimul nda aa: «Kɔl nuu sanga háá pɛɛngu piɔ́mndo, la lo pɔɔ nanu mì la va o piɛilen nin a ya latulu.»

³⁵ Mɛɛ o kɔɛ tiŋ laci, mó hini, mó kuumbuu hɔlla lɛŋ, mó piɛi Hala le mɛɛ telen kon ndóò hiaw ndu coo yɛ.

³⁶ Mó piɛi aa: «Aba, Pua, te o nɔla pɛ tosan, cɛl mì kol a taala kólaa imɔnɔɔ ho le. Kɛ nduyɛ, o va mɛɛ ya i yeema yɛ le, tosa mɛɛ o hɛnan nɔm yɛ.»

³⁷ O kon kɔɔli, mó muungu nɛɛ kaandeŋaa ndɔa va-a, mó komal nda o lɔan, mó dimul Piɛr aa: «Simɔn, la nɔla vaa lahɔl hali le lɛɛlɛɛ pilɛ bɛɛ le?

³⁸ La tiondu mì la piɛi Hala, yɔŋii niaa del o tɔɔndanndo nin. La nɔ̀ yiyanndo le tosaa lende, kɛ dialun vílɛ́iyon co niaa.»

³⁹ O kon, mí Yeesu faŋan nda vɛlɛ le Hala piɛiyo, mó kɔ miinguu sɔɔn pilɛn mun.

⁴⁰ Ndóò muungoo, mó komal nda vɛlɛ o lɔan, kani lɔan ma va nda o hɔl taw. Ndáà sina ɲɛ-ɲɛ nda dimul ndu le.

⁴¹ Ndóò muungoo o yàándɔɔ, mó dimul nda aa: «La co vɔ lɔan a pɛngio? Sɔɛi del fɔ́! Telenndo tiiya, mì Po vanacieo del vanaa yɔŋ vɔɔnda o ba.

⁴² La cɔn, n kɔnnun. La tofa vɔ vana co ya malɔɔ nda o ba-o hunɔɔ!»

A kɔɛ Yeesu biyɔɔ

⁴³ Yeesu lo sɔɛi, mí Yuda, vana pilɛ o kaandeŋaa tɔ́ a à ŋiɔnda tɛɛn hun a vannda sɛ́lɛ́ bɛndoo kɔɔli. Mɔɔn cɔwvon a yɔmii bingiei va nda o laba. Bolii vanaa-solia-lasálàá a simlacia ndáà vem nda ni.

⁴⁴ Mí Yuda va nda Yeesu malɔɔ o ba-o cɔm nda tɔɔmasele ndáà sinanin ndu-o aa: «Vana ya yilnin mì kɔman-ndo, mɛɛ ndu ni. La bii ndu mì la kɔɛ a ndu ɲɛkɛndɛi!»

⁴⁵ Yuda tiiyaa dɔ́ɔ́ Yeesu ikɛi, mó yil ndu aa: «Kɔɔfa isɛ!» Mó kɔman ndu.

⁴⁶ O kon mí vanaa tɔ̀a sɔɔnguu, má bii Yeesu.

⁴⁷ Mí kaandennɔ Yeesu-o pilɛ nan mɔɛi ndɔɛi cɔwve, mó kialu buɛi bolle vanaa-solia-lasálàá nilen.

⁴⁸ Mí Yeesu ɲuna nda aa: «La vɛ hunɔɔ le ya biyɔɔ a mɔɔn cɔwvon a á yɔmii bingiei maa vui?

⁴⁹ Lepalaa-lepala, i va icali o Cɛi-Hala-o nin niaa tɛɛn le pɛɛkulan yɔngoo, la bii ya le. Kɛ hee kpede tosan, haliko mi sɔɔn sɛvan o Sɛbɛ Hala-o nin-ndon peelun.»

⁵⁰ O kon mí kaandennda kpow mal ndu, má sɔɔndian.

⁵¹ Langbanɔɔ pum va kɔlan Yeesu kɔɔli, kolaa pum daama ndóò saiyan ni. Ndáà biyɔɔ ndu,

⁵² mó yamnun kola kalaa, mó kɔannun kɔɔle fondo.

A kɔɛ a Yeesu le ndu yamɛi kiolɔɔ

⁵³ Má kɔa a Yeesu o bolle vanaa-solia-lasálàá lo, nɛɛ simlacia vanaa-solia-lasálàá, vanaa pɛɛkaa latɔŋnda a simlacia va a cuungiannda-a.

⁵⁴ Haa ma tiiya a Yeesu o bolle vanaa-solia-lasálàá lo bɛɛ, Piɛr va ndu kɔlan kɔɔli, tiŋndo va nda tɛɛn lándán. Mó kɔ cal hangɔɔ lon nda kpalilla latulu.

⁵⁵ Mí simlacia vanaa-solia-lasálàá a vanaa bɛndua kpow va nɛilan nuwviaa le Yeesu sɔɔn hɛɛnduuo coo haliko mi ndáà dii ndu, kɛ a seelun nɛi oo nɛi le.

⁵⁶ Vanaa bɔɔ-bɔɔ va ndu sɔɔn lacòòvan hɛɛnduuo coo, kɛ n ve bɛnda le.

⁵⁷ Mí vannda pum can, má ɲiinduu ndu còòlan coo aa:

⁵⁸ «Langbanɔɔ ho dimi ni maa o co Cɛi-Hala vanndacieea tangul hoo-o tɛɛmbuu, mò mingi o vanaciee tengulnin te-o simi o palɛi ndii yáá bɛngu.»

⁵⁹ Kɛ hali a sɔɛi ndáà dimi ken-nde, seile ndalen le yɔŋnun toɲa le.

⁶⁰ O kon, mí bolle vanaa-solia-lasálàá can o sɛ́lɛ́ kon tɛɛn, mó ɲuna Yeesu aa: «Vɛ̀ɛ̀ a co ɲɛ-ɲɛ dimi a seile vannda ha co nɔm tɛndallo len o kɔɔ le?»

⁶¹ Kɛ mí Yeesu meinun, o muli ɲɛ-ɲɛ le. O kon mí bolle vanaa-solia-lasálàá ɲuna ndu vɛlɛ aa: «Vɛ̀ɛ̀ nɔm co Krista, Po Hala naa n co biiloo-o ni?»

⁶² Mí Yeesu muli aa: «Oi! Ndu ya co ni. La canin Po vanacieo icali Hala, vana kpaayaa kpow o ba kɛndɔɔ coo, mì la ce ndu vɛlɛ hunɔɔ o yumbuyumbu halataala-o nin.»

⁶³ O kon mí bolle vanaa-solia-lasálàá sɛɛsian volɔɔlan lekɔɔ, mó dimi aa: «Ɔ́ɔ̀ seyaa naa n co vɛlɛ ɲuna le hee-a?

⁶⁴ Kámáá niaa pila tuei sɔɛi tanɛi o dimi a Hala-e! Ɔ́ɔ̀ yiyan niaa a sɔɛi he?» Mí nda kpow muli aa: «O del kasi, o bɛnda mò sɔla piɔ́mndo.»

⁶⁵ Mí vannda pum can ndu lɔluan tufɔɔ coo. Má kumbu ndu hɔlla, má kuindikuindi ndu, má va ndu ɲunaa aa: «Dimul-lɔ hau naa vana lɔɔ nɔm-ndo.» Mí kpalilla bii ndu, má lɔaa ndu.

Piɛr viinun

⁶⁶ Piɛr lo icali a ba too o bɛ́ɛ̀, mí buɛi laanndu bolle vanaa-solia-lasálàá pilɛ hun,

⁶⁷ mó ca Piɛr hangɔɔ, mó tofa ndu ciŋ, mó dimul ndu aa: «Nɔm bɛɛ a va Yeesu kɔɔli, langbanɔ fula hoo Kalile-o pɛɛn.»

⁶⁸ Kɛ mí Piɛr vuunun, mó dimi aa: «I sina le, i sina bɛɛ sɔɛi n co hee dimio-e le.» O kon kɔɔli, mó fulan o bɛɔ lekɔɔli.

⁶⁹ Kɛ mí buɛi laandoo ca ndu vɛlɛ, mó dimul vanaa va lon-nda aa: «Langbanɔɔ ho bɛɛ co vana pilɛ o vanaa va ndu kɔɔli-a tɛɛn.» Mí Piɛr vuunun vɛlɛ.

⁷⁰ Telen bingi hiovɔɔ o kon kɔɔli vɛlɛ, mí vanaa va lon-nda sɔɔnguu Piɛr ikɛi, má dimul ndu aa: «A toɲa, a co vana pilɛ o vanaa kan tɛɛn, kani vana tuei dɔ́ɔ́ pɛ nɔm sɔɛi o sina maa Kalilenɔɔ n co ni.»

⁷¹ O kon, mí Piɛr sim vuunɔnndo a mɛɛnianndan aa: «I sina po niaa co hoo ya sɔɛi ndɔɛi holɔɔ-o le few.»

⁷² Fɔ́ɔ́fɔ̀, mí kongillo koova vɛlɛ o diinndɔɔ. O kon, mí Piɛr yiyan sɔɛi Yeesu ndóò dimul ndu-e maa: «Lɔ́ɔ́ pá kongillo koova lediin, a vuununnin leyáá maa a sina ya le.» O kon mó caŋ.