Marke 13 - BII BILA

Yeesu dimi le tambii Cɛi-Hala-o

¹ Tuma Yeesu va fulaa o Cɛi-Hala-o nin-ndo, mí kaandennɔ ndɔɔ pilɛ dimul ndu aa: «Kɔɔfa, tofa vɔ powta kɛndɛlan ndan sei! Tangultan ndan la naŋ dɛ!»

² Mí Yeesu mulul ndu aa: «A ce tangulta bɛndulan ndan te? Powvo pilɛ bɛɛ lonin o powvo coo le, la co hunɔɔ koombiaa kpow.»

Sangalan a yɛle tolaalen

³ Mɛɛ Yeesu va icali o pembii yɔmii oliviee coo, o Cɛi-Hala-o hɔl-ndɔ. Piɛr, Nsaki, Nsaŋ a Andre a hun ɲuna ndu nda pilɛ kínɛí aa:

⁴ «Dimul naa, telen kuɛɛ dɛnnda lan la yɔŋnun yɛnin? Ɔ́ɔ̀ tɔɔmasele cɔmnin mɛɛlula dɛnndan ndan kpow-vo?»

⁵ Mí Yeesu can nda dimullo aa: «La caa dɛ, yɔŋii vana luei niaa o pɔwlan nin.

⁶ Vanaa bɔɔ-bɔɔ a hunnin o diola nilan, mà dimi aa: ‹Ya co ndu ni›. À lueinin vannda taw o pɔwlan nin.

⁷ Tuma niaa tuɛinin sɔɔn cɔwvon a ɲiimu-ɲiimu lacɔwvo-o, la láásiàn kɔltan te. Kani fɔ mì ken tosan, kɛ o ve vɔnin lamɛɛlu le la vanin ndan te.

⁸ Vanaa-mangalaa-isɔɔa cannin vanaa-mangalaa-isɔɔa celen cɔlɔba, mì masalen le cɛn masale celen cɔlɔba. Lɛŋnden le ɲiiyanin o fondalan lapum, mì yima fofolan ma luɛi o fondalan lapum. Kon kpow vanin-ndɔ ko mɛɛ pulii vialɛi kandu vanalanɔɔ nɛiyo nuaa yɛ.

⁹ La caa le niaa pila. A kɔanin a niaa o fondala kialaa n'yamalan, mà lɔɔ niaa o cɛila lekaanndan nin. A kɔanin a niaa o masaa n'bungaa lo a o masaa bɛndua lo le ya, mì la kɔ soli seilen nda o hɔl.

¹⁰ Fɔ mì Yoongu Kɛndɛ Hala-o tiiyalan fɔlɔn vanaa-mangalaa-isɔɔa súúlan kpow.

¹¹ Telen nda kɔanin a niaa o cɛila kialaa n'yamalan nin-ndo, la buulan le ɲɛ niaa kɔ diminin-ndo le, kɛ la diminin ɲɛ Hala Kɔl-Diandaa cɔmnin niaa-o, o co niaa pila le soaanin te.

¹² Vanndo malnin puapilɛ ndɔɔ vannda o ba, mà dii ndu. Mì fuɲaa mal po ndɔɔ vannda o ba, mà dii ndu. Cuavaa vialaa simulnin vanaa velu nda-a, mà diw nda.

¹³ Vannda kpow a kɛɛnin niaa le diola nilan, kɛ vana lonin biuvɔnndo háá o mɛɛlulan-ndo, ndu sɔlanin cindaa.

Mààla bɛndulan

¹⁴ Tuma niaa canin vana nɔɔlɛi tɛɛmbua bɛndoo o kɛsiaa nɛɛ o bɛnda le va le-a-o, (vana co sɛbɔɔ dimio-o bɛnda mò bii bila), o tuma kon vanaa vanin o tàndá Yuda-o nin-nda bɛnda ma ɲaanun le kɔnndan o pembon coo.

¹⁵ Vana vanin o cɛiyo coo-o bɛnda lɛ mò tol le luɛyɔɔ o ndu lo cɛinin le ɲɛ cua le.

¹⁶ Vana vanin o ciɛi nin-ndo ndu bɛnda lɛ mo muungu ciee le doma ndɔ bɛndoo cua le.

¹⁷ Dɛnɛ palaa vanin le vanlaandua vanin a folilan-nda a le vanlaandua vanin vɔɛsio palɛi ken-nda.

¹⁸ La piɛi Hala haliko dɛnnda lan la yɔŋnun o sialten nin te.

¹⁹ Kani palɛi ken vanin bɔɔ palɛi sanga bɛndu. Kabi ceen Hala cɔw-vo kandun háá hau, sanga bɛndu vaa lende yɔŋnun-ndɔ le. Nduyɛ sanga bɛndu vaa lende yɔŋnun ndɛnin le fɛɛn a fɛɛn te.

²⁰ Te Mɛlɛka ndóò dɔɔniaa palɛi ken te, vana-vana óò cindanin te. Kɛ mó dɔɔniaa palɛi ken le vanaa o hɛli-a.

²¹ Lelan te vanndo dimul niaa pɛ aa: ‹Krista co nanu›, te kon te aa: ‹o co o nda›, la láálan ndu le.

²² Kani kristaa lacòòvaa a vanaa-tɛɛngaa-diom Hala-a lacòòvaa cannin, mà tosa dɛnnda kɔndɔfilta bɛndulan a kaamaalan, le vanaa sɔla hɛlio-a lueiyo o pɔwlan nin, taa tiw pɛ ba.

²³ Lelan la va a bɛɛndiannda dɛ! I cii niaa ndi dimul.»

Le hunɔɔ Po vanacieo

²⁴ «O palɛi ken nin, sanga bɛndu kon hiow pɛ, paalen le piimiaanin, paangei dindunin te,

²⁵ loeon fulanin coocoo mì n deli, mì kpaayala co halataala lan la hiilun.

²⁶ O kon vannda canin Po vanacieo hunɔɔ o yumbuyumboo nin a kpaaya bɛndoo a á biiloo.

²⁷ O cuunin mɛlɛkaa ndɔa, mà mɔɔsiaa vanaa o hɛli-a fulaa o kpengun hiɔɔlun ceendo, cɔnɔnndo o lɛŋnden mɛɛlulan, kɔlan tiiyaa o halataalaa mɛɛlulan.»

Pɛɛku voosu tumndo

²⁸ «La bìí tale voosu tumndo ho bila: lɛɛndun ndɔn kuumiaa dɔ́ɔ́ pɛ mì pei lendei pui, la siná dɔ́ɔ́ maa vɔɔlen le co le tiiyaa.

²⁹ Lende koni, niaa bɛɛ, tuma canin dɛnnda lan tosanndo-o, la sìná niko maa Po vanacieo co lɛ levil te, maa o co nin kpɛɛlun.

³⁰ I co niaa toɲaa dimul, lambio ho hiwnin te, mì dɛnnda lan kpede la peelun.

³¹ Halataalaa a lɛŋnden le hiawnin, kɛ sɔɔn nun hiwnin te.»

Hala ndu pilɛ kpé sina telen mɛɛlaa ni

³² «Le paale len a le telen kon, vana-vana sina le, hali mɛlɛkaa co o halataala-a, hali Poo, fɔ Fuɲa nuu ndu pilɛ kpé.

³³ Lelan la caa dɛ! La va o lapɔɛyɔn nin te. Kani la sina paale ken tosannin-nden te.

³⁴ Ɲɔɔ tosannin maa langbanɔ cɛn kɔlan kelaa, mó mɛi cɛi ndɔɔ buɛyaa ndɔa o ba, mó ke vana-vana baala ndɔɔ, mó dimul kpalilnɔɔ le dioo cumullo-o.

³⁵ Lelan la mɛɛndian, kani la sina telen vana cɛiyo hunnin-ndo le, ko icɔllo ni, ko a di-tɛɛndo ni, ko telen sɔɔ koova-o ni, ko idiiyo ni,

³⁶ yɔŋii o hun telen niaa venin kɔl too, mò komal niaa o lɔan.

³⁷ I ya co niaa hee dimullo-e, ndi koni ya co vannda kpow dimullo ni: La va o lapɔɛyɔn nin a niaa pila le.»