Marke 11 - BII BILA

Yeesu luɛi Yerusalɛm ciee

¹ Ndáà kandɔɔ tiiyaa Yerusalɛm, o co Bɛtfasee a Betani ikɛi-yo, a kpengii Pembei olivie, mí Yeesu viam kaandeŋaa ndɔa nda ŋiɔn, mó dimul nda aa:

² «La kɔ o ciee co niaa laci-o. La tiiya dɔ́ɔ́ pɛ, la komalnin sofɛlɛ téndóó o baa, o vana-vana cel-lɔ coo loo. La timbi ndu, mì la hin a ndu.

³ Te vanndo ɲuna pɛ niaa aa: ‹Le yɛɛ nɛ niaa co yɛ hee tosaa?› La mulul ndu aa: ‹Maalii nɔ makoo a ndu ni, kɛ o co ndu mingi nanu sisa.›»

⁴ Má kɔa, má komal sofɛlɛ téndóó o baa o nɛi, o dio cɛiyo pum ikɛi. Má timbi ndu.

⁵ Mí vanaa va lon-nda pum a ɲuna nda aa: «Le yɛɛ niaa co yɛ sofɛlɛ téndé kon timbio?»

⁶ Má mulul nda mɛɛ Yeesu dimul nda yɛ. O kon mí vanaa kan mal nda kɔlan.

⁷ Má cuu Yeesu sofɛlɛ téndé kon, má hɛɛnduu domala ndala bɛndulan ndu o kɔɔ, mí Yeesu cal lecoo.

⁸ Mí vannda taw a pɛngɛliaa domala ndala bɛndulan o nɛi, mí a pum a pɛngɛliaa siɔɔla nda kelu yondoo nin-ndan.

⁹ Mí vanaa va kɔlan Yeesu laci-a a haa ndu kɔɔli a va yondaa aa: «Biiloo co le Hala! Biiloo co le vana co hunɔɔ o diola Mɛlɛka lan-ndo!

¹⁰ Duaa co le masale co hunɔɔ len, masale David fuɲa naa len! Biiloo co le Hala o halataala coocoo!»

¹¹ Mí Yeesu luɛi Yerusalɛm ciee, mó luɛi o Cɛi-Hala-o nin. Ciiyo ndu mɛɛndianndo kpede, mó kɔannun Betani nda kaandeŋaa ndɔa tɔ́ a à ŋiɔnda, kani paalen léè del nin.

Yeesu dɔw voosu tumndo danga

¹² Diimandɔɔ, telen nda va faŋanndo Betani-o, mí yiaan ma va Yeesu nɛiyo.

¹³ Ndóò cɔu voosu tum puiyaa lándán, mó kɔ tofa te ndóò saalunnin ɲɛ lecoo. Kɛ ndóò sɔɔnguuo macɛlu, mó ca maa pei daama va lecoo ni, kani o ve telen voosun koam te.

¹⁴ O kon mó cua sɔɛi, mó soaa o voosu tumndo lo aa: «Le fɛɛn a fɛɛn nin, vana di lɛnin kɔmnde nɔm te!» Mí kaandennda tuɛi ndu diom kon dimio.

Yeesu tow yulaa o Cɛi-Hala-o nin

¹⁵ Má tiiya Yerusalɛm, mí Yeesu luɛi o Cɛi-Hala-o nin. Mó can vanaa va ɲɔɔn pisio-a a vanaa va ɲɔɔn piondɔɔ o Cɛi-Hala kon nin-nda tovɔɔ. Mó ɲiinduu tabalila vanaa singaa n'volia a ɲɛla calaala vanaa pisia n'kangboa.

¹⁶ O cɛl mì vannda cua ɲɛ-ɲɛ, mà kei a ndu o bɛ́ɛ̀ Cɛi-Hala-o le.

¹⁷ Mó va nda pɛɛkoo, mó va dimio aa: «I co macoaa i sɛvaa le aa: ‹Cɛi nuu veelunnin aa cɛi piɛyaa le vanaa-mangalaa-isɔɔa súúlan kpow› le? Kɛ mì niaa siinguu ndu buulula vuiya.»

¹⁸ Mí bolii vanaa-solia-lasálàá a vanaa pɛɛkaa latɔŋnda tuɛi sɔɛi ken, má va nɛilan nuwviaa le ndu diyɔɔ, kani ndáà nɔ siòòŋii ndɔɛi, kani pɛɛku ndɔɔ va nda kɔltan pilanndo.

¹⁹ Paalen delɔɔ, mí Yeesu nda kaandeŋaa ndɔa faŋan o kobio nin.

Voosu tum vesa-o

²⁰ Idiiyo, kaandennda va hiovɔɔ, má komal voosu tumndo vesa háá o puundon.

²¹ Piɛr yiyanndo a ɲɛ ndóò yɔŋnun-ndo, mó dimul Yeesu aa: «Kɔɔfa, tofa vɔ, voosu tum n dɔw danga-o vesa.»

²² Mí Yeesu dimul nda aa: «La laalan Hala!

²³ I co niaa toɲaa dimul, te vanndo dimul pɛ pembei he aa: ‹Sungun ndon mà kɔ del o mɛmma ihɛllan nin›, te o sika o kɔl ndɔɔ nin te, kɛ mò laalan maa sɔɛi o dimi-e peelunnin, i tosan lende.

²⁴ Lelan i co niaa dimul, ɲɛ-ɲɛ niaa ɲuna pɛ o piɛilen nin, la laalan maa la cii ndu sɔla, o yɔngunnin niaa.

²⁵ Telen niaa co cɔnɔn isisi le piɛilen-ndo, te sɔɛi pum co pɛ niaa o kɔl a vanndo pum, la mal ndu haki, haliko mi fuɲa niaa co o halataala-o bɛɛ mal niaa haki le tɛɛmbuula niaalan.

²⁶ Kɛ te la mel caanda haki le, fuɲa niaa co o halataala-o bɛɛ melnin niaa haki le tɛɛmbuula niaalan te.»

A ɲuna Yeesu le vana ke ndu dío le dɛnndan tosaa-o

²⁷ Má kɔa vɛlɛ Yerusalɛm. Telen Yeesu va kelaa o Cɛi-Hala-o nin-ndo, mí bolii vanaa-solia-lasálàá, vanaa pɛɛkaa latɔŋnda a kaasoŋaa kɔlkalua lelɛŋnda hun o ndu lo,

²⁸ má ɲuna ndu aa: «Nɛ̀ɛ́-nɛ̀ vem yɛ nɔm dɛnndan ndan tosaa? Nɛ̀ɛ́ ke yɛ nɔm dio le lan tosaa?»

²⁹ Mí Yeesu mulul nda aa: «I co niaa sɔɛi ndii pilɛ kpé ɲuna mì la mulul-la. O kon mì ya bɛɛ i cɔmnin niaa vana vem ya dɛnndan ndan tosaa-o.

³⁰ Yinɔɔ Nsaŋ va vannda-o, Hala vem ndu ni bàà vanndacieea? La mulul-la.»

³¹ Mí nda pila yiyan, má dimi aa: «Te n muli pɛ aa: ‹Hala vem ndu ni›, o co naa ɲuna aa: ‹Kɛ le yɛɛ nɛ niaa kɛɛ yɛ niko ndu laalan?›

³² Te n muli yɛ vɛlɛ pɛ aa: ‹Vanndacieea óò vem ndu ni›…» Siòònde va nda a vannda, kani vana-tɛɛngaa-diom Hala-o vannda kpow va Nsaŋ cɔu ni.

³³ O kon má kɔ mulul Yeesu aa: «N sina le.» Mí Yeesu bɛɛ dimul nda aa: «Mɛɛ ya bɛɛ, i cɔmnin niaa vana vem ya dɛnndan ndan tosaa-o le.»