Marke 10 - BII BILA

Pɛɛkoo a nɔ piɔlɛiyo o kɔɔ

¹ Mí Yeesu bii nɛiyo le kɔlan a ba Yuda-o, a Yurdɛn peo leeloo. Mí sɛ́lɔ́ɔ́ cuungian vɛlɛ nɛɛ o va-a, maa mɛɛ o dema tosa yɛ, mó kandu nda vɛlɛ pɛɛkoo.

² Mí Faliisia hinul ndu a ɲuuniaalan le ndu kɔlɔɔ solio, má ɲuna ndu aa: «I co pá i cɛlnan le vanapɔnɔɔ laa ndɔ kɛɔ?»

³ Mó mulul nda aa: «Yɛɛ nɛ Moise dimul lɛ niaa?»

⁴ Má dimul ndu aa: «Moise cɛl mì vanapɔnɔɔ sɛva sɛbɛ lesei pialaa nɔu telen o co va laa ndɔ kɛw-vo.»

⁵ Mí Yeesu ndu dimul nda aa: «Le nila kalula niaalan Moise sɛval niaa lende ni.

⁶ Kɛ o ceendo cɔwnɔn-ndo, vanapɔnɔɔ nda vanalanɔɔ Hala toosiaa ni.

⁷ Lelan vanapɔnɔɔ faŋannin fuɲa ndɔ a kala ndɔ, mò holnun laa ndɔ,

⁸ mì vanaa ŋiɔŋaa kan cal o nɔ̀u nin, mà siŋnun dialle ndii pilɛ. O kon a co lɛ falun miuun te, kɛ ndii pilɛ.

⁹ Lelan, vanacieo bɛnda mò siɛi ɲɛ Hala mɔɔsa-o le.»

¹⁰ Telen nda va cɛinin-ndo, mí kaandennda cɔɔlu ndu sɔɛi ken ɲuna.

¹¹ Mó dimul nda aa: «Vana-vana kɛɛ pɛ laa ndɔ, mò yil o celen, ndu cua hakio a laa ndɔ tasoo le suunda o suunda-o.

¹² Te vanalanɔɔ kɛɛ pɛ pɔnɔ ndɔ, mò kɔ cal o nɔ celen, o suunda.»

Yeesu dɔw cuaambɔa pɔmbɔa duaa

¹³ Mí vannda cuu ndu cuaambɔa pɔmbɔa le nda balan handɔɔ coo. Kɛ mí kaandennda va nda kuunaa.

¹⁴ Yeesu cɔu lende, mó tambu kɔllo, mó dimul nda aa: «La mal cuaambɔa pɔmbɔa hunɔɔ o ya lo, la kuuna nda le, kani le vanaa co maa nda-a masale Hala len le co ni.

¹⁵ I co niaa toɲaa dimul, vana-vana cɛl masale Hala len maa cuaambɔ pɔmbɔɔ le, ndu luei lenin te few.»

¹⁶ O kon mó kɔɔmian nda, mó handu nda balan coo, mó dɔaw nda duaa.

Langbanɔ bolofaa

¹⁷ Yeesu cɔnɔnndo kɔlan, mí langbanɔɔ pum ɲaanun ndu kɔɔli, mó kɔ baŋ vulan ndu o labɛngunin. Mó ɲuna ndu aa: «Kɔɔfanɔ kɛndɔɔ, yɛɛ ya tosa yɛ mì sɔla cinda fɛɛn-fɛɛndo?»

¹⁸ Mí Yeesu dimul ndu aa: «Le yɛɛ n co yɛ ya veeloo aa ‹o kɛndɔɔ?› Vana-vana niŋ te, fɔ Hala ndu pilɛ kpé.

¹⁹ A sina tɔŋndan aa: ‹Dii vana le, suunda le, yɔŋ levui le, timbul vana seile lakafa le, del vana coo le, biilu fuɲa nɔm a kala nɔm.›»

²⁰ Mí langbanɔɔ mulul ndu aa: «Kɔɔfa, kabi o cuaambɔyɛi nii nin, i bii nin sɔɔn mun kpow.»

²¹ Mí Yeesu tofa ndu a kaolaa, mó dimul ndu aa: «Ɲɛ pilɛ lo vɔ nɔm le tosaa: Kɔ, mà pisi ɲɛm n nɔ-on kpede, mà ke vanaa bala fondoa, o kon a sɔlanin bolofaa o halataala. O kon kɔɔli a hin niko, a del-la kɔɔli.»

²² Kɛ le sɔɛi ken, mí langbanɔɔ kɔannun a suumaa, kani bolofaa pila ndóò nɔ ni.

²³ Ndóò mɛɛndianndo ndu pila balɔɔ, mó dimul kaandeŋaa ndɔa aa: «O kendu le vanaa bolofaa luɛyɔɔ o masale Hala len nin!»

²⁴ Mí kɔndɔfillo bii kaandennda a sɔɔn mun. Kɛ mí Yeesu miinguu ndi dimi aa: «Cuavaa nia, o kendu le luɛyɔɔ o masale Hala len nin dɛ!

²⁵ Ɲɔɔmɛɔ keiyo o tɛɛngii lesiɛndɛi nin hiow va bɛɛn-bɛɛn a vana bolofaa luɛyɔɔ o masale Hala len nin.»

²⁶ Mí kɔndɔfillo cɔɔlu kaandennda biyɔɔ, ma va dimulanndo aa: «Mɛɛ nɛ̀ɛ́ nɔla yɛnin cindaa sɔlaa o kon?»

²⁷ Mí Yeesu tofa nda, mó dimi aa: «Vanndacieea nɔla ken tosa le, kɛ i co lende a Hala le, kani ɲɛ-ɲɛ kindu a ndu Hala le.»

²⁸ Mí Piɛr cua sɔɛi, mó dimul ndu aa: «Naa naa, ɲɔɔn kpow naa n mɛi ni mí n del nɔm kɔɔli.»

²⁹ Mí Yeesu muli aa: «I co niaa toɲaa dimul, vana-vana mɛi pɛ cɛi ndɔɔ, puapilɛa ndɔa, yemaa ndɔa, kala ndɔ, fuɲa ndɔ, cuavaa ndɔa te kon te lɛŋnde ndɔlen le ya a le Yoongu kɛndɔɔ,

³⁰ ɲɛla lan kpede la mingulunnin ndu fɔ́ɔ́fɔ̀, kɛmɛlan a kɛmɛlan o ceendo coo nanu: cɛilan, puapilɛa, yemaa, kalla, cuawva a yondolan, yɛle tolaalen bɛɛ. O sɔlanin yoomu fɛɛn-fɛɛndo o ceen co naa laci-o nin.

³¹ Vanaa tasea bɔɔ-bɔɔ a siŋnunnin vanaa mɛɛlaa, mì vanaa mɛɛlaa bɔɔ-bɔɔ a siŋnun vanaa tasea.»

Yeesu soo le piɔ́m ndɔɔ a tendul ndɔɔ

³² A va nɛi-tɛɛn le helɔɔ Yerusalɛm, Yeesu va nda kɔlan laci. Kaandennda va buulanndo, siòònde va vanaa va kɔlan nda kɔɔli-a. Mí Yeesu sɔɔngun vɛlɛ kaandeŋaa ndɔa ikɛi, mó va nda ɲɛ yɔŋnunnin ndu-o dimullo.

³³ Mó dimul nda aa: «Má cè naa helɔɔ Yerusalɛ! À kɔ malnin Po vanacieo bolii vanaa-solia-lasálàá a vanaa pɛɛkaa latɔŋnda o ba. A kialunin yamɛi ndɔɛi, mà yaala ndu le piɔ́mndo sɔlaa, mà mal ndu vanaa sina Hala le-a o ba.

³⁴ A mamnin ndu, mà tufu ndu lɔluan coo. A soaŋnin ndu, mà dii ndu. Kɛ palɛi yaa o kon kɔɔli, o muungunin yoomu.»

Piɛile poaa Sebede-a piɛi len

³⁵ Mí poaa ŋiɔŋaa Sebede-a, Nsaki nda Nsaŋ a sɔɔnguu Yeesu ikɛi, má dimul ndu aa: «Kɔɔfa, n yeema mà tosal naa ɲɛ naa n ɲunanin nɔm-ndo.»

³⁶ Mó dimul nda aa: «Yɛɛ niaa yeema yɛ mì tosal niaa?»

³⁷ Má dimul ndu aa: «Cɛl naa mì n kɔ va icali nɔm ikɛi o biilu nɔmndo nin, o pilɛ nɔm o ba kɛndɔɔ coo, o pilɔɔ nɔm o ba mɛllo coo.»

³⁸ Mí Yeesu dimul nda aa: «La sínà ɲɛ niaa co piɛiyo-o le. La nɔla pá kolɔɔ a taala kólaa ya co kolɔ̀ɔ̀-o? Te kon te la nɔla pá yinɔɔ ya sɔlanin-ndo sɔlaa?»

³⁹ Má mulul ndu aa: «N nɔla.» Mí Yeesu mulul nda aa: «Ì co toɲa maa la kolnin a taala kólaa ya kolnin-ndo, mì la nɔla yinɔɔ ya sɔlanin-ndo sɔlaa.

⁴⁰ Kɛ le calle ya o ba kɛndɔɔ coo a o ba mɛllo coo, o co ya le yɔngu vana fondala lan te, le vanaa la toosian-nda la co ni.»

⁴¹ Kaandeŋaa tɔ́a tɔ̀a tueyɔɔ lende, má kandu kɔltan tambei a Nsaki nda Nsaŋ.

⁴² Mí Yeesu veelu nda, mó dimul nda aa: «La sinà maa vanaa co vanaa-mangalaa-isɔɔa-a masalen tosaa coo-a co vanaa-mangalaa-isɔaa kan masalen tosaa coo a paa-kala, maa vanaa ndaa bɛndua bɛɛ a co nda kindilaa.

⁴³ Kɛ o co lende le i co niaa tɛɛn te. Vana-vana yeema pɛ le vaa vana bɛndoo niaa tɛɛn, ndu bɛnda mò siŋnun buɛi niaa.

⁴⁴ Vana-vana yeema pɛ le vaa vana tasoo niaa tɛɛn, ndu bɛnda mò siŋnun cɛɔ le niaa kpow.

⁴⁵ Kani Po vanacieo hín mì vana tosal ndu baala le, kɛ le vannda baalaa tosallo, a le yoomu ndɔɔ yɔngoo le vanaa bɔɔ-bɔɔ baŋaa.»

Yeesu singi Bartimee vana sumɛiyo

⁴⁶ Má tiiya Yeriko. Tuma Yeesu va faŋanndo ciee nda kaandeŋaa ndɔa a sɛ́lɛ́ bɛndoo kɔɔli-o, vana sumɛiyo pum va icali o nɛiyo dangalaa, diolan Bartimee, po Timee-o, o va vannda ɲɔɔn piɛiyo.

⁴⁷ Ndóò tueyɔɔ maa Yeesu fula Nasarɛt-o co hiovɔɔ ni, mó can yondaa aa: «Yeesu, Po David-o, tuinun ya iɲíí!»

⁴⁸ Vanaa bɔɔ-bɔɔ a va ndu yaalianndo haliko mi ndóò mei, kɛ mó va cɔɔloo yondaa aa: «Po David-o, tuinun ya iɲíí!»

⁴⁹ O kon mí Yeesu sim, mó dimi aa: «La veelu ndu.» Má veelu vana sumɛi kalaa, má dimul ndu aa: «Lueí yoomuan, cɔn, o co nɔm veeloo.»

⁵⁰ Mí vana sumɛiyo viaw doma ndɔ bɛndoo, mó can ɲaali, mó kɔa nɛɛ Yeesu va-a.

⁵¹ Mí Yeesu ɲuna ndu aa: «Yɛɛ n yeema yɛ mì tosal nɔm?» Mí vana sumɛiyo dimul ndu aa: «Vana bɛndoo, tosa mì ce vɛlɛ maa paandu.»

⁵² O kon mí Yeesu dimul ndu aa: «Kɔnnun. Laalan nɔmndo cii nɔm singi.» Fɔ́ɔ́fɔ̀, mó ca maa paandu, mó bii kɔlan Yeesu kɔɔli o nɛi.