Luke 24 - BII BILA

Yeesu tendul fulaa vanvílɛ́iya tɛɛn

¹ O paale tasele lɔ́ɔ́ coo, mí vanlaandua kɔa o sɛiyo sondoo a cuɛima cun kɛndɛma ndáà toosiaa-an.

² Má komal pow va o sɛiyo sondoo-o o pimbulaa, o ve lɛ o sɛiyo ikɛi le.

³ Má luɛi o sɛiyo nin, a komal kɔɔle Maalii Yeesu len ndon te.

⁴ A lo kɔltan keeliaa, mí vanpiaandua nda ŋiɔn a cɔmnun nda o lepilɔɔ a volɔɔla ŋɛlɛŋi-ŋɛlɛŋilan lekɔɔ.

⁵ Mí siòònde bii nda, má tundu hɔlla lɛŋ. Mí vanaa kan ɲuna nda aa: «Le yɛɛ nɛ niaa co yɛ vana co yoomuo nuwviaa vanvílɛ́iya tɛɛn?

⁶ O co nanu le, o tendu fulaa vanvílɛ́iya tɛɛn. La loonun ɲɛ ndóò dimul niaa lɔ́ɔ́ o va Kalile-o aa:

⁷ ‹Mɛɛ mà mal Po vanacieo vanaa lahakia o ba, mà baŋ ndu o yɔm singafilaa coo, o paale yàándɔlen, o tendulnin fulaa vanvílɛ́iya tɛɛn.›»

⁸ O kon, má yiyan a sɔɔn Yeesu ndóò dimi mun-ndon.

⁹ Má faŋan o sɛiyo sondoo, má kɔ dɔwnun kaandeŋaa tɔ́ a ò pilɛa tɔ̀a sɔɔn mun kpow kona.

¹⁰ Vanlaandua kan yɔŋnun haa ni: Mari fula Makdala-o, Nsaŋ a Mari kalaa Nsaki. Mí vanlaandua celeŋaa va lon-nda bɛɛ a kɔ tiiyal kiilaa kona pilɛ kon.

¹¹ Kɛ mí kiila kan ndáà yiyan maa diɔmndon daama vanlaandua kan va nda dimullo lende ni, a laalan nda le.

¹² Kɛ nduyɛ, mí Piɛr can, mó ɲaanun, mó kɔa o sɛiyo sondoo. Mó kɔ tundun, kɛ kolala ndáà simbulu kɔɔle Yeesu len nin-ndan daama o ce ni. O kon kɔɔli, mó muungu o ndu lo a kɔndɔfillo le dɛnnda o kɔ cɔ lan ndan.

Yeesu cɔɔmun kaandeŋaa ndɔa pum

¹³ Paale pilɛle len, mí Yeesu cɔɔmun kaandeŋaa ndɔa nda ŋiɔn, a va kɔlan Emmais. Ciee kon va le kɔla vàà lɛɛlɛla tiɔn cɔnɔnndo Yerusalɛm.

¹⁴ A va kɔlan a baltan o dɛnnda hiow lan coo.

¹⁵ Telen nda va kon sɔɛi ma va suukanndo-o, mí Yeesu pila sɔɔnguu nda ikɛi, má bii nɛiyo le kɔlan nda ndaa.

¹⁶ A va ndu cɔu, kɛ mí ɲɛ pum va nda kuuna ndu sinaa.

¹⁷ Mí Yeesu ɲuna nda aa: «O sɔɛi yɛɛ coo niaa co yɛ kɔlan a suukanndo ho?» Má sim, mí mɔnɛi bii nda.

¹⁸ Mí vana pilɛ o vanaa ŋiɔŋa kan tɛɛn, diolan Keleopas mulul ndu aa: «I ce maa o Yerusalɛmnda tɛɛn kpow, nɔm pilɛ kpé kɛɛ vɔ sina dɛnndan yɔŋnun o palɛi he bɛngu lan ni?»

¹⁹ Mí Yeesu ɲuna nda aa: «Dɛnnda yɛɛ nɛ lan?» Má mulul ndu aa: «Ɲɛ yɔŋnun Yeesu fula Nasarɛt-o pɛɛn, o yɔŋnun Vana-tɛɛngaa-diom Hala kpaayaa-o, o cɔm kon o dɛnnda o tosa lan nin a sɔɔn o va dimi-on nin Hala o hɔl a vannda kpow o hɔl.

²⁰ Mí bolii vanaa-solia-lasálàà naa a simlacia naa mal ndu vannda o ba le ndu diyɔɔ, má baŋ ndu o yɔm singafilaa coo.

²¹ Naa naa, n nɔ kɔlkɛsiaa maa ndu óò baŋanin Israɛlla ni. Handɔɔ o kon coo, kabi dɛnnda lan la hiow, paale yàándɔlen naa n co hau nuaa ni.

²² Nduyɛ màá lekɛ́ndɛi, vanlaandua pum naa tɛɛn a dɔw naa kɔndɔfili taw. Diilɛn púŋ, má kɔa o sɛiyo sondoo,

²³ kɛ a komal kɔɔle ndɔlen ndon te. Má hun dimul naa maa mɛlɛkaa cɔmnun nda, má dimul nda maa o co yoomu.

²⁴ Mí vanaa pum naa tɛɛn kɔa o sɛiyo sondoo, má kɔ komal dɛnndan mɛɛ vanlaandua kan dimi yɛ kpafii, kɛ a ci ndu le.»

²⁵ O kon mí Yeesu dimul nda aa: «Niaa vanaa nɔ haa kɔlkalu le-a, kɔlta niaalan la yala sɔɔn vanaa-tɛɛngaa-diom Hala-a dimi-on biyɔɔ le!

²⁶ Mɛɛ mì Krista ndóò sanga o dɛnnda lan nin kpow lende lɔ́ɔ́ pá mì ndóò luɛi o biilu ndɔɔ nin.»

²⁷ O kon kɔɔli, mó tɛɛsial nda ɲɛ sɛvan kandɔɔ o sɛbɛla Moise lan nin-ndo, kɔlan a o sɛvan o sɛbɛla vanaa-tɛɛngaa-diom Hala-a nin a ndu o kɔɔ lan kpow.

²⁸ Mɛɛ nda kandu tiiya o ciee nda va kɔlan-ndo ikɛi, mí Yeesu hiawnun.

²⁹ Kɛ má dimul ndu aa: «N lonnun nanu naa niaa. Paalen le co nihau kɔlan delɔɔ nuaa ni, mì ɲumndan ma tol.» O kon, mó luɛi, mó lo lon nda ndaa.

³⁰ Telen Yeesu cal le dioo nda ndaa-o, mó cua buloo, mó dɔaw duaa, mó yimiyimi ndu, mó yɔngu nda.

³¹ O kon mí hɔlta ndalan la kumbin, má sina ndu. Kɛ mó lo nda o hɔl le pilɛ kpé.

³² Má muungu dimulanndo vellaa-velle aa: «Sɔɔn ndɔn n va naa kɔltan pilanndo telen o va sɔɛi o naa lo nɛi-tɛɛn, mó va naa mun kɔlɔlan tɛɛsiallo o Sɛbɛ Hala-o nin-ndo.»

³³ Fɔ́ɔ́fɔ̀, má can, má muungu Yerusalɛm. Ndáà tiiyaa ciee, má komal kaandeŋaa tɔ́ a ò pilɛa a vanaa va nda kɔɔli-a nɛɛ pilɛ.

³⁴ Mí nda kpow a dimul kaandeŋaa ŋiɔŋaa kan aa: «Toɲaa ni, Maalii tendul fulaa vanvílɛ́iya tɛɛn! O cɔmnun Simɔn!»

³⁵ Mí vanaa ŋiɔŋa kan bɛɛ cɔm ɲɛ kei nda tosalan nɛi-tɛɛn-ndo, a mɛɛ nda sina Yeesu telen o yimiyimi buloo-o yɛ.

Yeesu cɔmnun kaandeŋaa tɔ́ a ò pilɛ-a

³⁶ A lo sɔɛi ken, mí Yeesu pila fula nda tɛɛn, mó dimul nda aa: «Màá la sɔla kɔlɲuloo!»

³⁷ Mí siòònde bii nda, má ɲiiya, má yiyan maa ɲinaa nda va cɔ kon lende ni.

³⁸ Kɛ mí Yeesu ɲuna nda aa: «Le yɛɛ niaa co yɛ buulanndo? Le yɛɛ niaa co yɛ sikaa o kɔlta niaalan nin?

³⁹ La tofa vɔ ya balan a pelon, ya kpeekpei ni! La pilan ya mì la ce, kani ɲinaa ndu nɔ n'dial te, o nɔ lapaa le, kɛ ya yɛ, i nɔ.»

⁴⁰ Mɛɛ Yeesu va sɔɔn mun dimio, mó cɔm nda balan a pelon.

⁴¹ Kaandennda ndáà laalan-ndɔ le, kani a va a ɲaaloo, kɔndɔfillo va nda vɛlɛ taw, kɛ mí Yeesu ɲuna nda aa: «Vɛ̀ɛ̀ la nɔ ɲɛ pum nanu le dioo?»

⁴² Má yɔngu ndu bungɛi suw toaŋaa ipilɛ.

⁴³ Mó bii, mó dia nda o hɔl.

⁴⁴ O kon kɔɔli, mó dimul nda aa: «Telen naa n va vɔ naa niaa latulu-o, mí dimul niaa maa fɔ mì ɲɛ-ɲɛ co o sɛvaa a ya o kɔɔ o sɛbɛ tɔŋ Moise-o nin, o sɛbɛla vanaa-tɛɛngaa-diom Hala-a nin, a o sɛbɛ condii lisai nin kpow-vo ndóò peelun.»

⁴⁵ O kon, mó kumbi kɔlta ndalan le Sɛbɛ Hala-o sinaa.

⁴⁶ Mó dimul nda aa: «Ɲɛ co o sɛvaa lenin-ndo co hoo ni aa: Krista co hunɔɔ sanga, mò tendul fulaa vanvílɛ́iya tɛɛn o paale yàándɔlen,

⁴⁷ mì vannda balu vanaa-mangalaa-isɔɔ kpow dimullo, kandɔɔ Yerusalɛm maa a mal yɔŋ vɔɔndo, mà mangalan, mà sɔla hakilan malɔɔ.

⁴⁸ Niaa co seiya le dɛnndan ndan kpow ni.

⁴⁹ Ya ya, i yɔŋnin niaa o Fuɲa nuu dimi-o, kɛ la lo ciee nanu háá mì Kpaayaa fula o halataala, mò tol niaa coo.»

Yeesu hel o halataala

⁵⁰ O kon kɔɔli, mí Yeesu kɔa a nda ba Betani-o, mó heelu balan, mó dɔaw nda duaa.

⁵¹ O lo o nda duaa dɔvɔɔ, mó sɛyan a nda, mó helnun o halataala.

⁵² Telen nda cii Yeesu biilu-o, má muungu Yerusalɛm a ɲaale bɛndoo.

⁵³ A va Hala candɔɔ lɔ́ɔ́-lɔ́ɔ̀ o Cɛi-Hala-o nin.