Luke 23 - BII BILA

A kɔɛ a Yeesu o Pilate lo

¹ Mí vanaa bɛndua kan kpow a can, má kɔa a Yeesu o Pilate lo.

² Má kɔ hɛɛnduu ndu sɔɔn coo aa: «Langbanɔɔ ho naa n komal vannda lueyo o pɔwlan nin ni, o va nda dimullo maa a mel Sesar muloo le, ndu pila va vɛlɛ dimio maa ndu co Krista ni, masaa pɛɛn.»

³ Mí Pilate ɲuna ndu aa: «Nɔm co masa Yuifia ni?» Mí Yeesu mulul ndu aa: «Nɔm pila cii dimi.»

⁴ Mí Pilate dimul simlacia vanaa-solia-lasálàá a sɛ́lɛ́ va lon-ndo aa: «I ci isɔɔ oo isɔɔ langbanɔɔ ho tosa mì vana yaala ndu le.»

⁵ Kɛ má baŋ kangalan aa: «O co keiyo vannda luɛyɔɔ nin a pɛɛkula ndɔlan. Kalile pɔ́ o kandu ni, mó kei o tàndá Yuda-o nin kpede, háá mó tiiya nanu.»

A kɔɛ a Yeesu o Herɔde lo

⁶ Pilate tueyɔɔ lende, mó ɲuna le sinaa te Kalilenɔɔ Yeesu va ni.

⁷ Ndóò sinaa maa o tàndá Herɔde va masalen tosaa coo-o nin Yeesu fula ni, mó yaa ndu o Herɔde lo, kani ndu bɛɛ va telen kon Yerusalɛm ciee.

⁸ Herɔde ndóò cɔu Yeesu, mí ɲɔɔ hɛnan ndu taw, kani ndóò tuei nin isɔɔ a ndu o kɔɔ, ndóò nɔ yeemɛi taw le ndu cɔu. O va yiyanndo maa Yeesu va hunɔɔ dɛnɛ kɔndɔfillo pum tosa ndu o hɔl.

⁹ Mó ɲuuniaa ndu sɔɔn taw, kɛ Yeesu muli ɲɛ-ɲɛ le.

¹⁰ Simlacia vanaa-solia-lasálàá a vanaa pɛɛkaa latɔŋnda va lon, ma va ndu sɔɔn vɔɔn-vɔɔnndon hɛɛndoo coo.

¹¹ Mí Herɔde nda vanaa va ndu hɔlten nda sui ndu diɔmnde. Ndáà ciiyo ndu mamɔɔ, má vow ndu doma sɔvɛ-sɔvɛ bɛndoo, má mingi ndu o Pilate lo.

¹² Paale len canyɛi kandun Pilate nda Herɔde tɛɛn ni, kani vɔvanndo pila ndáà vɔvan paandu ni.

A yaala Yeesu le piɔ́mndo sɔlaa

¹³ Mí Pilate veelu bolii vanaa-solia-lasálàá, simlacia a vannda kpow,

¹⁴ mó dimul nda aa: «La cùú ya langbanɔɔ ho mí la dimul-la maa vannda o co luɛyɔɔ nin ni. I ɲuna ndu niaa kpow o hɔl. I ci tɛɛmbuu kɛ́-kɛ̀ o sɔɔn vɔɔn niaa hɛɛnduu ndu coo-on nin te.

¹⁵ Herɔde bɛɛ ci tɛɛmbuu ndɔ le, lelan o mingul naa ndu nanu ni. I ce maa o tɛɛmbuu sɔɛi o bɛnda mò sɔla piɔ́m te.

¹⁶ Lelan, i co vannda vomɔɔ mà lɔɔ ndu, o kon kɔɔli mì mal ndu.»

¹⁷ Nduyɛ, telen oo telen kafo-hiavaa-coo ndóò tiiya pɛ, mɛɛ mì Pilate ndóò soli vana kaasoo o pilɛ, mì ndóò mal ndu.

¹⁸ Kɛ mí nda kpow yonda o lepilɔɔ aa: «Dimi mì langbanɔɔ ho sɔla piɔ́mndo, mà mel naa Barabas!»

¹⁹ Le tùú Barabas kon ndóò dii vanndo telen poopoo cɛn cieo coo-o ndáà mal ndu o kaasoo ni.

²⁰ Pilate ndóò yeema mì ndóò mal Yeesu, le hee, mó soaa vɛlɛ sɛ́lɔ́ɔ́ o lani.

²¹ Kɛ mí vannda yonda o lepilɔɔ aa: «Baŋ ndu! Baŋ ndu!»

²² Mí Pilate ɲuna nda vɛlɛ o bɛmbɛ yàándɔɔ aa: «Dɛnɛ vɔɔn yɛɛ langbanɔɔ ho tosa yɛ? Ya ya, i ci tɛɛmbuu kɛ́-kɛ̀ o bɛnda le piɔ́m sɔla le. Lelan, i co vannda vomɔɔ mà lɔɔ ndu, o kon mì mal ndu.»

²³ Kɛ má hiaw laci a yondiaa maa a baŋ ndu o yɔm singafilaa coo. Yondiala lan la va hiovɔɔ laci tuŋ.

²⁴ O kon mí Pilate cɛl sɔɛi nda va ndu ken kɔɔli-e.

²⁵ Mó soli vana va o kaasoo le poopoo yɔŋnun ciee-o a le vanaciee ndóò dii-yo-o, mó mal niko Yeesu nda o ba le hɛnan ndaa tosaa a ndu.

A baŋ Yeesu o yɔm singafilaa coo

²⁶ Telen nda va kɔlan a Yeesu-o, má kei bɔŋan a Simɔn fula Sirɛn-ndo, o va fulaa yondoo nin. Má bii ndu, má siiluu ndu yɔm singafilaa le kɔlan a ndu Yeesu kɔɔli.

²⁷ Vannda sɛ́lɔ́ɔ́ taw va ndu kɔlan kɔɔli, vanlaandua va kɔlan a yeelan ma va lɔlulan lɔɔnɔnndo.

²⁸ Yeesu mulinndo o nda lo, mó dimi aa: «Vanlaandua Yerusalɛm, la caŋ le ya le! Kɛ la caŋ le niaa pila a le cuavaa niaa.

²⁹ Kani palɛi pum co tiiya, mì la dimi aa: ‹Dɛnɛ kɛndɔɔ co le vanlaandua vilu hɔ́ɔ́ le-a. Dɛnɛ kɛndɔɔ co le vanlaandua cue foli má vialu le-a, a hɔ́ɔ̀ vɔɛi mɛɛma ndan te-a pɛɛn!›

³⁰ O kon vannda dimulnin pembon aa: ‹La komba naa coo!› Mà dimul buubuuon aa: ‹La kumbu naa.›

³¹ Kani taa tosa pɛ nuaa a yɔm kiyɔɔ, vɛ̀ɛ̀ kpeekpei i va yɛnin a o vesɛiyo?»

³² Má kɔa vɛlɛ a vanaa yɔŋ vɔɔnda pum nda ŋiɔn le nda diyɔɔ latulu nda Yeesu-a.

³³ Ndáà tiiyaa o fonda nda veelu aa: Kpòkpòó-o, má baŋ Yeesu o yɔm singafilaa coo, má baŋ vɛlɛ vanaa yɔŋ vɔɔŋaa ŋiɔŋaa kan, o pilɛ ndu o ba kɛndɔɔ coo, o pilɔɔ ndu o ba mɛllo coo.

³⁴ Mí Yeesu dimi aa: «Pua, mal nda haki, kani a sina ɲɛ nda co tosaa-o le.» O kon kɔɔli, má mal siondei le volɔɔla ndɔla cuɛinanndan piɔvanndo.

³⁵ Vannda va isisi lon má va tofaa. Simlacia Yuifia va ndu mamɔɔ aa: «O ciindiaa caanda, mɛɛ ndu pila ciindian-ndɔ hau. Te ndu co Krista vana Hala hɛli-o ni.»

³⁶ Mí vanaa cɔwva bɛɛ a va ndu mamɔɔ. Má sɔɔnguu, má ke ndu mɔima vaalɛiyan,

³⁷ má dimi aa: «Te nɔm co masa Yuifia ni, mɛɛ nɔm pila ciindian niko!»

³⁸ Sɛvaa pum va ndu o bollen coo aa: «Hoo co masa Yuifia ni».

³⁹ Mí vana pilɛ o vanaa yɔŋ vɔɔŋaa o va kan o baŋaa-a tɛɛn-nda can ndu yeowlan aa: «Vɛ̀ɛ̀ o co nɔm te co Krista le? Nɔm pila ciindian, mà ciindiaa naa!»

⁴⁰ Kɛ mí o pilɔɔ cenelan caan ndɔ kon aa: «Yaala pilɔɔ kpé n co sɔlaa ho maa ndu ni, vɛ̀ɛ̀ siòòŋii co nɔm a Hala le?

⁴¹ Naa naa, o co baalan te nda baalan naa le, kani sala dɛnnda naala vɔɔnndan naa n co sɔlaa ho ni. Kɛ hoo ndu, o tosa ɲɛ-ɲɛ vɔɔn te.»

⁴² O kon kɔɔli, mó dimul Yeesu aa: «Yeesu, loonun a ya telen n hunnin o masale nɔmnden nin-ndo.»

⁴³ Mí Yeesu mulul ndu aa: «A toɲa, mì dimul nɔm, hau-hau, a vanin ya ikɛi o haliyɛnɛ.»

Piɔ́m Yeesu-o

⁴⁴ A telen paalen le sim o pol-lo kínɛí, mí ɲumma bɛndu-bɛnduan ma toal o lɛŋnden kpow coo, mí ma lo lende háá o lɛɛlɛ yàándɔɔ a paale yɔngannden.

⁴⁵ Mí kola landaa va o Cɛi-Hala-o nin-ndo tɛnda tɛɛn kpala-kpala.

⁴⁶ Mí Yeesu yonda kpélén aa: «Pua, i mingi nɔm kɔl nuu o ba.» Ciiyo diom kon dimio, mó malnun kɔl.

⁴⁷ Bolle vanaa cɔvaa kɛmɛa cɔw ɲɛ yɔŋnun-ndo, mó biilu Hala, mó dimi aa: «A toɲa, vana sandaa langbanɔɔ ho va ni.»

⁴⁸ Sɛ́lɛ́ bɛndu hin tofaa-o cɔw dɛnnda lan kpow, má muungu a mɔnɛi bɛnduei, ma va lɔlulan lɔɔnɔnndo.

⁴⁹ Mí vanáà sina Yeesu-a a vanlaandua va ndu kɔɔli cɔn Kalile-a kpow a sim kɔɔli-kɔɔli le dɛnnda va yɔŋnɔnndo lan tofaa.

A kumbu Yeesu o sɛiyo nin

⁵⁰ Langbanɔ pilɛ va o kunda vanaa kialaa n'yamaa lelɛŋnda tɛɛn, diolan Yosɛf, vana sandaa a vana ndóò naŋ súú-o o va ni.

⁵¹ O kue o tundɔɔ vanaa tɔ̀a va-o le, o del vɛlɛ nda kɔɔli o dɛnnda nda va tosaa lan nin te. Arimatee o kobi Yuifia nin ndóò fula ni. O va masale Hala len cumndo.

⁵² Mó kɔa o Pilate lo, mó kɔ piɛi ndu dialun Yeesu-on.

⁵³ Mó tuisi Yeesu o yɔm singafilaa coo, mó toosiaa ndu o kola fengbɔɔ nin, mó kɔ kɛsi ndu o sɛi ndáà tow o powvo nin-ndo nin, o ndáà kumbu vɔ vana lenin too.

⁵⁴ Vannda va bɛɛndianndo le paale pɛngiaalen diimandɔɔ.

⁵⁵ Mí vanlaandua cɛn Kalile mí ndáà hun Yeesu kɔɔli-a liila Yosɛf, má kɔ ca sɛiyo a mɛɛ ndáà kɛsi kɔɔle Yeesu len lenin yɛ.

⁵⁶ Má muungu, má kɔ bɛɛndiaa ɲɛm cun kɛndɔn a ansan. O kon má pɛngi o paale pɛngiaalen coo mɛɛ tɔŋ ndaa va yɛ.