Luke 2 - BII BILA

Violɔn Yeesu-o

¹ O telen kon, mí masaa Sesar Okust viam vannda le vanaa va o masale ndɔlen bɛngu-a kpow diolan sɛvaa.

² Sɛva tase kon yɔŋnun telen Kirinius va masa-ibungaa o lɛŋnde Siri len nin-ndo.

³ Mí vannda kpow a kɔa le diolan sɛvanndo, vana-vana o kobi ndɔɔ nin.

⁴ Mí Yosɛf bɛɛ can Nasarɛt o lɛŋnde Kalikee len nin, mó kɔa Bɛtlɛhɛm o tàndá Yuda-o nin, Bɛtlɛhɛm Kobi David-o pɛɛn. Kani o polale David len nin o fula ni.

⁵ Mó kɔa le sɛvanndo nda Mari, o ó va kɔɔli le yilɔɔ o nɔ̀u nin, mo va a foli miaa-o.

⁶ A lo Bɛtlɛhɛm lon, mí paale Mari ndóò bɛnda le violɔɔ len le tiiya.

⁷ Mó vialu po ndɔ tasoo. Mó simbul ndu o kolaa nin, mó yambu ndu nɛɛ nda dow cɔlua billo-a, kani a sɔla fonda o cɛi yiyaa mialla nin te.

Mɛlɛkanɔɔ cɔmnun vanaa mandaa n'saa

⁸ Vanaa mandaa n'saa pum va o tàndá pilɛ kon nin, a va saa ndaa mandaa icɔllo,

⁹ mí mɛlɛkanɔ Hala-o cɔmnun nda, mí biilu Mɛlɛka-o balu nda teenga sɔ́, mí siòònde bii nda taw.

¹⁰ Kɛ mí mɛlɛkanɔɔ dimul nda aa: «Siòòŋii bii niaa le. Kani Yoongu kɛndɔɔ ya hin niaa tiiyallo nuaa ni, ó vanin dɛnɛ ɲaale bɛndoo le vannda kpow-vo.

¹¹ Vana Ciindiaa vilun niaa hau o Kobi David-o nin, ndu co Krista ni, Maalii pɛɛn.

¹² Tɔɔmasele niaa sinanin ndu-o co hoo ni: la komalnin cɛlɛkpɔɔ o simbulaa ihini nɛɛ nda dow cɔlua billo-a.»

¹³ Fɔ́ɔ́fɔ̀, mí mɛlɛkaa fula kunda bɛndoo o halataala, má sɔɔnguu mɛlɛkanɔ kon ikɛi. Má va Hala biiloo a dimio aa:

¹⁴ «Biiloo co le Hala o halataalaa nin coocoo, kɔlɲuloo co o lɛŋnden coo le vanaa hɛnan ndu-a.»

Vanaa mandaa n'saa kɔɛ Bɛtlɛhɛm

¹⁵ Lɔ́ɔ́ mɛlɛkaa faŋan vanaa mandaa n'saa ikɛi le muungoo o halataala-o, mí vanaa mandaa n'saa kan dimulan aa: «N kɔnnun Bɛtlɛhɛm, mì n kɔ cɔ ɲɛ yɔŋnun-ndo, o Mɛlɛka cɔm naa-o.»

¹⁶ Má kɔa cɔ́-cɔ́, má komal Mari, Yosɛf a cɛlɛkpɔɔ o yambaa nɛɛ nda dow cɔlua billo-a.

¹⁷ Mɛɛ nda ce ndu, má dimi sɔɛi ndáà tuei a cɛlɛkpɛ kalaa o kɔɔ-e.

¹⁸ Mí vanaa tuei sɔɔn vanaa mandaa n'saa kpow a va dimio-a a dɔawnun kɔndɔfili.

¹⁹ Kɛ Mari ndu va dɛnnda lan kpow mandanndo o kɔl, o va kɔllo keelaa lecoo ɲɛkɛndɛi.

²⁰ O kon kɔɔli, mí vanaa mandaa n'saa muungun. A va Hala biiloo, ma va ndu candɔɔ le dɛnnda nda tuei má ca lan kpow, mɛɛ mɛlɛkanɔɔ ndóò dimul nda yɛ.

A ke Yeesu diolan

²¹ O paale ŋɔmaandɔlen, má dii ndu tooma, má ke ndu diolan aa Yeesu, mɛɛ mɛlɛkanɔɔ ndóò dimi lɔ́ɔ́ pá mí kala ndɔ cua foli ndɔɔ yɛ.

Mari nda Yosɛf kɔɛ a Yeesu o Cɛi-Hala-o nin

²² O kon kɔɔli, mí palɛi Mari nda Yosɛf ndáà bɛnda le dindinndo mɛɛ tɔŋ Moise-o ndóò dimi yɛ-e i tiiya. Má cua Yeesu, má kɔa a ndu Yerusalɛm le ndu yɔngoo o Mɛlɛka lo,

²³ mɛɛ o co o sɛvaa o tɔŋ Mɛlɛka-o nin yɛ aa: «Hɔ́ɔ́ tase kɛ́-kɛ̀ velun pɛ vanapɔnɔɔ, le Mɛlɛka kon co ni.»

²⁴ Ndáà kɔɛ vɛlɛ le sálàá solio mɛɛ o co o sɛvaa o tɔŋ Mɛlɛka-o nin yɛ aa: «Piinda nda ŋiɔn, te kon te kangboa tɛlɛa nda ŋiɔn.»

²⁵ Nduyɛ fallo pum va Yerusalɛm, diolan Simeɔn, vana sandaa a vana óò lo o lediom coo a Hala-o o va ni, o va vana óò ciindiaanin Israɛlla-o cumndo. Hala Kɔl-Diandaa va ndu coo.

²⁶ Hala Kɔl-Diandaa kon ndóò cii nin ndu cɔm maa: «O vi le, fɔ mo ce Krista, o Mɛlɛka vem-ndo.»

²⁷ Mí Kɔl-Diandaa va ndu kon coo-o ke ndu yiyanndo, mó kɔa o Cɛi-Hala-o nin. Vanaa Yeesu-a hunɔɔ a ndu Yeesu le tosaa a ndu mɛɛ o va o sɛvaa o tɔŋndo nin yɛ,

²⁸ mí Simeɔn bii Yeesu o ba, mó mel Hala balika, mó dimi aa:

²⁹ «Mɛlɛka, mal niko vana baalaa nɔmndo kɔlan ciee-piɔ́m o kɔlɲuloo nin mɛɛ n dimi yɛ.

³⁰ Kani i ce Vana ciindiaa fula nɔm o ba-o a lehɔl ciŋ,

³¹ cinda n toosiaa vannda kpow o hɔl-lo:

³² ndu co ɲɛ-tengaa cɔmnin vannda kpow sɔɛi nɔmnde-o ni, ndu vanin vɛlɛ biiloo le Israɛlla ni, vanaa nɔmnda.»

Sɔɔn siɔdii laci Simeɔn dimi-on

³³ Kɔndɔfillo va fuɲaa nda kalaa le sɔɔn Simeɔn va dimio a hɔ́ɔ́ kon o kɔɔ-on.

³⁴ Mí Simeɔn dɔaw nda duaa, mó dimul kala ndɔ Mari aa: «Poo ho tosanin mì vanaa bɔɔ-bɔɔ del, te kon te mì a bɔɔ-bɔɔ cɛn o lɛŋnde Israɛl-ten nin. Kɛ vannda kɛɛnin ndu,

³⁵ mì nɔm pila bɛɛ sɔla sangaa mɛɛ mɔɛi cɔwve tɛnda vana kɔllo nuaa yɛ. O kon, yiyannda co vanaa bɔɔ-bɔɔ o kɔltan la sinannin.»

Anɛɛ, vanalanɔ-tɛɛngaa-diom Hala-o

³⁶ Vanalanɔ-tɛɛngaa-diom Hala-o pum va lon, diolan Anɛɛ, cua Panuɛl-lo, fulaa o polale Asɛr len nin. Anɛɛ ndóò yuuva nin taw. Mɛɛ o cal o nɔu o felengiyɛi nin, vɔsilan tan ŋɔmmɛw o kon kɔɔli,

³⁷ mí pɔnɔ ndɔ vu. Mó lo a vii ken háá vɔsilan belaŋɔmaa a lahiɔɔlu, o faŋan o Cɛi-Hala-o nin te, o va kɔlan kaannden tosaa idii a icɔl. O va sumndo biyɔɔ mo va piɛilen.

³⁸ Telen Simeɔn va kon lon-ndo, mí Anɛɛ hun, mó mel Hala balika. Mó dimul vanaa va cumndo mì Hala ndóò baŋa Yerusalɛm-nda sɔɔn a poombɔ kon o kɔɔ.

Yosɛf muungu Nasarɛt

³⁹ Lɔ́ɔ́ Yosɛf nda Mari cii sɔɔn tɔŋndon peelu mɛɛ ndóò bɛnda yɛ-o, má muungu o kobi ndaa nin Nasarɛt, o tàndá Kalile-o nin.

⁴⁰ Poombɔɔ va hiovɔɔ laci a hindɔɔ, o va vɛlɛ yoomuan sɔlaa. Mó sɔla kɔlkaloo taw, Hala va vɛlɛ ndu kɛndɛi tosallo.

Yeesu luɛi o Cɛi-Hala-o nin

⁴¹ Vɔsi oo vɔsi, yungu Yeesu-o va kɔlan Yerusalɛm le kafo-hiavaa-coo.

⁴² Yeesu sɔlaa vɔsilan tɔ́ a latiɔn, má kɔa Yerusalɛm mɛɛ ndáà dema tosa a naamu kafo kon o kɔɔ yɛ.

⁴³ Kafoo cuvɔɔ, mí yungu ndɔɔ muungun, mí Yeesu lonnun Yerusalɛm, a sina le.

⁴⁴ A va yiyanndo maa o va vanaa nda va kɔlan-nda tɛɛn, má kɔa kɔla paale pilɛ. O kon kɔɔli, má kandu ndu nuwviaa puapilɛa ndaa a caaŋaa ndaa tɛɛn.

⁴⁵ Kɛ a seelun ndu le. Má muungu ndu nuwviaa háá Yerusalɛm.

⁴⁶ O paale yàándɔlen, má kɔ saalun ndu o Cɛi-Hala-o nin, o va icali vanaa pɛɛkaa latɔŋnda tɛɛn. O va nda nilan yaŋɔɔ mo va nda yuuniaa.

⁴⁷ Mí vanaa va ndu diomndo tueyɔɔ-a kpow a dɔawnun kɔndɔfili a kɔlkalu ndɔɔ a á mulila o va yɔngoo lan.

⁴⁸ Yungu ndɔɔ cɔu ndu, má dɔawnun kɔndɔfili, mí kala ndɔ ɲuna ndu aa: «Po nuu, le yɛɛ n tosal-lɛ naa dɛnɛ vaa nuaa? N co nɔm nuwviaa a buulanndo naa fuɲa nɔm.»

⁴⁹ Mó mulul nda aa: «Le yɛɛ niaa co yɛ ya nuwviaa? La sina le maa mɛɛ mì va o Fuɲa nuu lo cɛinin?»

⁵⁰ Kɛ a bii sɔɛi o va nda ken dimullo-e bila le.

⁵¹ Mí Yeesu muungu nda ndaa Nasarɛt, mó bii sɔɛi ndɛi. Kala ndɔ va sɔɔn mun kpow mandanndo o kɔl.

⁵² Yeesu va hiovɔɔ laci a hindɔɔ a á kɔlkaloo sɔlaa, dɛnnda ndɔlan la va Hala hɛnanndo, la va vɛlɛ vannda hɛnanndo.