Luke 18 - BII BILA

Tale vana kialaa n'yamaa vɔɔndo

¹ Mí Yeesu dimul kaandeŋaa ndɔa taloo le nda cɔmndo maa o bɛnda mà va Hala piɛiyo lɔ́ɔ́-lɔ́ɔ̀, maa a vu n'dial te.

² Mó dimul nda aa: «Vana kialaa n'yamaa pilɛ va o kobio pum nin, ndóò nɔ isiòòŋ a Hala le, ndóò vo vɛlɛ vana-vana le.

³ Vuɛɛn pɔnɔ ndɔ vi-o va o kobi kon nin, o va kɔlan lɔ́ɔ́-lɔ́ɔ̀ o vana kialaa n'yama kon-ndo, mó va ndu dimullo aa: ‹Ke ya dio naa yaamɔɔ nuu tɛɛn.›

⁴ Mí ɲɔɔ viaw ka, o cɛl te. Kɛ o mɛɛlulan kpɔŋ, mó yiyan o kɔl ndɔɔ nin maa: ‹Hali mi nɔ bɛɛ isiòòŋ a Hala nuaa le, mi vo bɛɛ vana nuaa le,

⁵ kɛ le tùú vuɛɛndo ho co ya saangiaa-o, i co ndu dí ndɔɔ ke, o kon mò faŋan ya kɔɔli.›»

⁶ Mí Maalii hiaw laci a sɔɛi, mó dimi aa: «La tuei-yɔ o vana kialaa n'yama lakafaa ho dimio!

⁷ Vɛ̀ɛ̀ Hala kenin vanaa ndɔa o hɛli, ma va ndu piɛiyo idii a icɔl-la di le? Vɛ̀ɛ̀ tamalaa o tamalanin le nda malaa ni?

⁸ Mì dimul niaa, o kenin nda dí ndaa cɔ́-cɔ́. Kɛ te Po vanacieo hin pɛ, o komalnin pá vanaa laalannda o lɛŋnden coo?»

Tale Faliisinɔɔ nda vana biyaa muloo

⁹ Mí Yeesu dimi taloo ho a vanaa pum o kɔɔ, a cennun nda pila vanaa sandaa, a ci caaŋaa ndaa ɲɛ-ɲɛ le-a aa:

¹⁰ «Langbaa pum va nda ŋiɔn, má kɔa o Cɛi-Hala-o nin le piɛilen. O pilɔɔ Faliisinɔɔ, o pilɔɔ ndu vana biyaa muloo.

¹¹ Mí Faliisinɔɔ sim, mó piɛi Hala o kɔl nin aa: ‹Hala, i mel nɔm balika, kani i co maa vanaa tɔ̀a le, vuiya, vanaa yɔŋ vɔɔnda a vanaa suundaa pɛɛn. I co vɛlɛ maa vana biyaa muloo hoo le.

¹² O lɔ́ɔ́ oo lɔ́ɔ̀ bɛngu, lediin ya bii sumndo ni. I co o-tɔ́ndɔɔ solio o ɲɛm nun kpow nin.›

¹³ Mí vana biyaa muloo ndu sim levil pɔ́, o tiw bɛɛ ba hɔlla cuaa mo tofa o halataala le, kɛ mo va buŋnde lɔɔnɔnndo a dimio aa: ‹Hala, tuinun ya iɲíí, kani vana lahakio ya co ni.›

¹⁴ I co niaa dimul, mí Hala tuinun vana biyaa muloo iɲíí, mó muungu o ndu lo bɛ́ɛ̀, kɛ o tuinun o pilɔɔ iɲíí le. Lelan, vana-vana heelun pɛ, ndu sɔlanin tuisio tootoo. Kɛ vana-vana tuisin pɛ, ndu sɔlanin heeloo.»

Yeesu dɔw cuaambɔa duaa

¹⁵ Vannda va hunɔɔ a cɛlɛkpɛa o Yeesu lo, haliko mi ndóò handu nda balan coo. Kɛ kaandeŋaa ndɔa cɔu lende, má can vanaa kan kuunaa.

¹⁶ Kɛ mí Yeesu veelu cuaambɔa, mó dimul nda aa: «La mal cuaambɔa hunɔɔ o ya lo, la kuuna nda le, kani le vanaa súú vaa nuaa Masale Hala len le co ni.

¹⁷ Mì dimul niaa toɲaa kpendekele, vana-vana cɛl Masale Hala len maa cuaambɔ le, ndu lueinin lenin te.»

Yeesu nda vana bolofaa

¹⁸ Mí simlacinɔ Yuifinɔɔ pilɛ ɲuna Yeesu aa: «Vana pɛɛkaa kɛndɔɔ, yɛɛ nɛ ya tosa yɛ mì sɔla yoomu fɛɛn-fɛɛndo?»

¹⁹ Mí Yeesu dimul ndu aa: «Le yɛɛ nɛ n co yɛ ya veeloo aa vana pɛɛkaa kɛndɔɔ? Vana-vana co o kɛndɛ le, fɔ Hala.

²⁰ A sina tɔŋndan: ‹Suunda le. Dii vanaciee le. Yɔŋ levui le. Tɛnda seile lakafa le. Ke fuɲa nɔm nda kala nɔm bɛɛlen.›»

²¹ Mí langbanɔɔ muli aa: «I bii nin sɔɔn mun kpow kabi o felengiyɛi nii nin.»

²² Mɛɛ Yeesu tuei sɔɔn mun, mó dimul ndu aa: «Ɲɛ pilɛ lo vɔ nɔm le tosaa: pisi ɲɛ-sɔlaa nɔmndo kpow, mà piɔw vanaa bala fondoa volin mun, a co hunɔɔ bolofaa sɔla o halataala. O kon kɔɔli, a del-la kɔɔli.»

²³ Langbanɔ bolofaa kon tueyɔɔ lende, mó yii hɔlla, kani vana bolofaa bɛndoo o va ni.

²⁴ Yeesu tofaa ndu, mó dimi aa: «O kendu le vanaa bolofaa luɛyɔɔ o masale Hala len nin!

²⁵ Kani ɲɔɔmɛɔ keiyo o tɛɛngii siɛndɛle sɔandaalen nin hiow va bɛɛn-bɛɛn a vana bolofaa luɛyɔɔ o masale Hala len nin.»

²⁶ Mí vanaa va ndu nilan yaŋɔɔ-a ɲuna aa: «Mɛɛ nɛ̀ɛ́ nɔla yɛnin cindaa sɔlaa o kon?»

²⁷ Mí Yeesu muli aa: «Dɛnɛ vanndacieea nɔla tosa loo, Hala ndu bumba kon tosa le.»

²⁸ O kon mí Piɛr dimi aa: «Naa naa, ɲɛm náà n nɔ-on kpow naa mɛi ni mí n del nɔm kɔɔli.»

²⁹ Mí Yeesu mulul nda aa: «A toɲa, mì dimul niaa, vana-vana mel yungu ndɔɔ, laa ndɔ, puapilɛa ndɔa, vanayan ndɔn, te kon te cuavaa ndɔa le masale Hala len,

³⁰ mò kɛɛ ɲɛm hiow mun polon-ndon sɔla o ceendo coo nanu le, mɛɛ o sɔlanin yoomu fɛɛn-fɛɛndo siɔdii laci le.»

Yeesu soo vɛlɛ a piɔ́m ndɔɔ a á tendul ndɔɔ o kɔɔ

³¹ Mí Yeesu kɔa a kaandeŋaa tɔ́ a à ŋiɔnda, mó dimul nda aa: «Má cè naa helɔɔ Yerusalɛm! Dɛnnda vanaa-tɛɛngaa-diom Hala-a sɛva a Po vanacieo o kɔɔ lan kpow la co hunɔɔ peelɔn.

³² Kani a malnin ndu vanaa sina Hala le-a o ba, mà mam ndu, mà saangiaa ndu, mà tufu ndu lɔluan coo.

³³ A soaŋnin ndu, o kon kɔɔli mà dii ndu. O paale yàándɔlen, o tendulnin mò muungu yoomu.»

³⁴ Kɛ kaandeŋaa kan a bii sɔɔn mun bila le. A ci kɔlɔ sɔɔn mun te, a sina ɲɛ Yeesu va nda dimullo-o le.

Yeesu singi vana sumɛiyo Yeriko

³⁵ Tuma Yeesu cɛn tiiyaa Yeriko-o, vana sumɛiyo pum va icali o nɛiyo dangalaa, o va vannda ɲɔɔn piɛiyo.

³⁶ Mɛɛ o tuei sɛ́lɔ́ɔ́ ivoolun-voolunnde, mó ɲuna nda ɲɛ yɔŋnun-ndo.

³⁷ Má dimul ndu maa Yeesu Nasarɛt co hiovɔɔ ni.

³⁸ O kon mó yonda aa: «Yeesu, Po David-o, tuinun ya iɲíí!»

³⁹ Vanaa va ndu kɔlan laci-a va ndu yaalianndo haliko mi ndóò mei, kɛ mó va cɔɔloo yondaa aa: «Po David-o, tuinun ya iɲíí!»

⁴⁰ Mí Yeesu sim, mó dimi le ndu vana sumɛiyo cuuo. Ndáà sɔɔnguuo a ndu ndu ikɛi, mí Yeesu ɲuna ndu aa:

⁴¹ «Yɛɛ n yeema yɛ mì tosal nɔm?» Mó muli aa: «Maalii, tosa mì ce vɛlɛ maa paandu.»

⁴² Mí Yeesu dimul ndu aa: «Mɛɛ cɔ! Laalan nɔmndo cii nɔm ciindiaa.»

⁴³ Fɔ́ɔ́fɔ̀, mó ca maa paandu. Mó bii kɔlan Yeesu kɔɔli a Hala candɔɔ. Vannda kpow cɔu dɛnɛ kon, má biilu Hala.