Luke 12 - BII BILA

Silalan a sɔɔn muluanndon o kɔɔ

¹ O telen kon mí vannda taw a cuungian háá ma va nɛwvanndo. Mí Yeesu kandu sɔɛi o kaandeŋaa ndɔa lo, mó dimul nda aa: «La mandan a lɛvɛn Faliisia, sɔɔn muluanndon pɛɛn.

² Ɲɛ-ɲɛ co o kumbaa, o fulanin ceen kpendekele. Ɲɛ-ɲɛ co vɛlɛ o vianaa, vannda sinanin ndu.

³ Lelan, o niaa dimi o ɲumndan nin-ndo, vannda tueinin ndu ipala déŋ. O niaa dimi tootoo cɛinin-ndo, vannda yondanin ndu o luŋ kpendekele.»

Vana vana bɛnda le vou-vo

⁴ Mì dimul niaa, niaa caaŋaa nia, la vo vanaa dii diallon, o kon kɔɔli a nɔla lɛ ɲɛ-ɲɛ tosa le-a le.

⁵ Kɛ i cɔmnin niaa vana niaa bɛnda le vou-vo. La vo Hala, o nɔ kpaayaa-o, te o cii pɛ vana diyɔɔ, o viow o ɲánndávàà. Maa lekɛ́ndɛi, mì dimul niaa, ndu niaa bɛnda mì la vo ni.

⁶ Vɛ̀ɛ̀ o co kooliion mún miun te nda pisi nɛ́ɛ̀nɛ́ɛ̀a nda ŋuɛɛnu le? Nduyɛ, Hala pɔɛɛnun hali o pilɛ o nda tɛɛn te.

⁷ Hali yiŋii co niaa o lebol-le, i co icɔmɛi kpede. Lelan, la buulan te. Niaa co fisa a nɛ́ɛ̀nɛ́ɛ̀a sɛ́lɛ́ bɛndoo.

Sɔlɔlanndo te kon te kɛɔ Yeesu vannda kpow o hɔl

⁸ Mí Yeesu dimi aa: «Mì dimul niaa, vana-vana sɔlɔlan pɛ vannda o hɔl maa le ya o co ni, ya Po vanacieo bɛɛ sɔlɔlannin sɔɛi vana kon mɛlɛkaa Hala-a o hɔl.

⁹ Kɛ vana viinun pɛ sɔɛi nii vanndacieea o hɔl, ya bɛɛ i vuununnin sɔɛi vana kon mɛlɛkaa Hala-a o hɔl.

¹⁰ Vana-vana dimi pɛ diom vɔɔndo a Po vanacieo o kɔɔ, ndu malnunnin haki. Kɛ vana-vana dimi pɛ diom vɔɔndo a Hala Kɔl-Diandaa, ndu melnunnin haki le.

¹¹ Lɔ́ɔ́ nda kɔanin a niaa o cɛila lakaanndan nin, te kon te simlacia o hɔl, te kon te vɛlɛ vanaa bɛndua o hɔl le niaa yamɛi kiolɔɔ-o, la buulan le kɔɔsɔɔ, te kon te le ɲɛ niaa diminin-ndo le,

¹² kani Hala Kɔl-Diandaa cɔmnin niaa o niaa bɛnda le dimio-o o telen kon kpafii.»

Tale vana bolofaa nɔ taasi loo

¹³ Mí vana pilɛ o sɛ́lɔ́ɔ́ tɛɛn dimi aa: «Vana bɛndoo! Dimul puapilɛ nuu mì n piɔw kɛ́ɔ naa ndu.»

¹⁴ Mí Yeesu ɲuna ndu aa: «Fallo, nɛ̀ɛ́ kɛsi yɛ ya le vaa vana kialaa n'yamaa a vana piɔvaa n'ɲɔɔ niaa tɛɛn?»

¹⁵ O kon kɔɔli, mó dimul nda kpow aa: «La caa mì la mandan le yeemɛi vɔɔnde, kani o co ka o bolofaa bɛndoo nin te vana sɔla yoomoo le.»

¹⁶ Mó dimul nda taloo pum aa: «Langbanɔɔ bolofaa pilɛ ndóò nɔ tɔlɔɔlan, la va kɔmnden ɲɛkɛndɛi.

¹⁷ Mɛɛ tɔlɔɔla ndɔla lan la kom lende, mó ɲunan aa: ‹Ko vɛ̀ɛ̀ ya tosa yɛ? I nɔ lɛ fonda oo fonda ya cuungiaa ɲɛm ya kow-von kpow le.›

¹⁸ O kon kɔɔli, mó dimi aa: ‹O ya co tosa-o co hoo ni: i puusiaa pɛ kondala paandulan ndan, i tangul la celen, la hiow vaa la bɔɔ lan. O kon, i dɔw malun nun a ɲɛm nun kpow lenin.

¹⁹ O kon i dimul kɔl nuu aa: A nɔ ɲɔɔn taw n kɛsiaa le vɔsila bɔɔ-bɔɔ. Buulan te, dio mà kol, mà dɔwnun ɲaale.›

²⁰ Kɛ mí Hala mulul ndu aa: ‹Diɔmndo ho, cɔɛllɛn kpeekpei ya co yoomu nɔmndo hiɔlɔɔ ni, ɲɛm n bɛɛndiaa mun-ndon, nɛ̀ɛ́-nɛ̀ n co yɛ mun mel?›»

²¹ Mí Yeesu hiaw vɛlɛ laci a sɔɛi, mó dimi aa: «Lende koni o vanin vɛlɛ le vana landu kɔllo le ɲɛm ceenndon cuungiaa le ndu pila-o ni, o co bolofaa cuungiaa le Hala loo pɛɛn.»

La tiindan Hala

²² O kon kɔɔli, mí Yeesu dimul kaandeŋaa ndɔa aa: «Lelan, mì dimul niaa, la buulan le yoomu niaa, te kon te le ɲɛ niaa dianin-ndo le, la buulan vɛlɛ le dialun nian, te kon te le ɲɛ niaa cuɛinunnin-ndo le.

²³ Kani yoomoo hiow baloo, diallon bɛɛ n hiow ɲɛ cuɛinanndo.

²⁴ La tofa vɔ basabasakoendea, a seŋ te, a kuw le, a nɔ nɛɛ mandaa ɲɛ le, a nɔ konda le, kɛ Hala co nda baloo dɔvɔɔ. Niaa la hiow yowva polon!

²⁵ O niaa tɛɛn, ɔ́ɔ̀ vana cɔɔlu nin yoomu ndɔɔ bɛndi hali paale pilɛ le buulannda ndɔlan-ndo?

²⁶ Te la bumba yɛ pɛ sɔɛi pɔmbɔɛi vaa lende, le yɛɛ niaa co yɛ niko buulanndo le ɲɛm tɔ̀un?

²⁷ La tofa vɔ mɛɛ billo pum punga yondoo nin yɛ, o tosa baala le, o vomul te. Kɛ nduyɛ mì dimul niaa, hali Salomɔn a bolofaa bɛndu ndóò nɔ-o kpow, o tiiya cuɛinɔnndo maa fula bil kon o pilɛ le.

²⁸ Te Hala cuɛi pɛ billo lende, o co hau yondoo nin, siɔdii mò hun viownun o yin-ndo, vɛ̀ɛ̀ o kɛɛ yɛnin niaa vanndaciee cuɛi hiovɔɔ billo coo? Mbɔ̀ laalan niaa dɔɔnan bɔɔ!

²⁹ La fafala le ɲɛ niaa dianin-ndo, te kon te le o niaa kolnin-ndo le. Kɔlta niaalan la sanga le.

³⁰ Kani ɲɛm mun kpow, vanaa sina Hala le-a co fafaláà le mun ni. Kɛ niaa niaa, Fuɲa niaa Hala sina maa la nɔ makoo le mun sɔlaa.

³¹ La nuuvia Masale Hala len, o kon ɲɛm mun bɛɛ n yɔngunnin niaa.»

Bolofaa co o halataala-o

³² Saa kunda pɔmbɔa, la yɔŋ isiòòn te, kani dɛnɛ hɛnan Fuɲa nia-o co kon ni le niaa masalen yɔngoo.

³³ La pisi ɲɛm co niaa o laba-on, mí la yɔngu vanaa bala fondoa volin mun. La toosiaa bɔlɔla tembu le lan le niaa pila, bolofaa o halataala pɛɛn. O tembunin too, nɛɛ vui sɔɔnguunin ikɛi le-a, kaangoa tɛɛmbuunin vɛlɛ ndu le.

³⁴ Kani nɛɛ niaa co bolofaa niaa kɛsio-a, lon koni niaa handunin kɔlta niaalan ni.

La va a bɛɛndiannda le hunɔɔ Maalii-o

³⁵ «La yiinun yawve le vallo, mì la va a bɛɛndiannda, mì fitinala niaalan la va la mɛndulaa.

³⁶ La va maa vanaa baalaa co vana nda bɛndoo cumndo-a, haliko telen o hunnin fulaa o kafo lanɔ sɛnɛiyo, mò lɔɔ dioo-o, a kumbil ndu fɔ́ɔ́fɔ̀,.

³⁷ Dɛnɛ kɛndɔɔ co le vanaa baalaa kan, a vana nda bɛndoo komalnin cumullo telen o hunnin-ndo-a! A toɲa, mì dimul niaa, ndu pila cuɛinunnin volɔɔla valtan, mò kɛsi nda le dioo, mò piɔw nda ɲɛdiaa.

³⁸ Dɛnɛ kɛndɔɔ co le vanaa baalaa kan, a vana nda bɛndoo hunnin a di-tɛɛndo, te kon te o telen paale siaa, mò komal nda lahɔl-la!

³⁹ La sina hee pɛɛngu: te vana cɛiyo ndóò sina pɛ telen vuiyo co hunɔɔ ndu ciimbuu-o, ndóò melnin vui kon cɛi ndɔɔ piɔlɔɔ le.

⁴⁰ Niaa bɛɛ, la va a bɛɛndiannda, kani a telen niaa venin kɔl too Po vanacieo co hunɔɔ ni.»

Vana baala lo o lediom coo-o a vana baala lo o lediom coo loo

⁴¹ Mí Piɛr ɲuna ndu aa: «Vana bɛndoo, vɛ̀ɛ̀ le naa kínɛí n co taloo ho dimi ni baa le vannda kpow?»

⁴² Mí Maalii mulul ndu aa: «Ɔ́ɔ̀ niko vana baala kɔlkalu lò kon o diomnden coo-o? Ndu co ò vana ndɔ bɛndoo dimulnin le hɔlla landɔɔ cɛi ndɔɔ coo a le vanaa baalaa tɔ̀a ɲɛdiaa yɔngoo a telen bɛnda-o-o ni.

⁴³ Dɛnɛ kɛndɔɔ co le vana baala kon, o vana ndɔ bɛndoo komalnin baala kon tosaa telen o muungunin-ndo-o.

⁴⁴ Mì dimul niaa toɲaa, vana ndɔ bɛndoo handunin ndu ɲɛm ndɔn kpow bollen.

⁴⁵ Kɛ te vana baala kon dimi pɛ aa: ‹Vana ni bɛndoo co yala hunɔɔ le›, o kon mò saan vanaa baalaa tɔ̀a lɔɔ, a piaandua a à laandua, mò luɛi dioo a kolɔɔ,

⁴⁶ mì vana ndɔ bɛndoo hin paale o venin ndu kɔl te len a telen o sinanin too, o pesinin ndu, mò tosal ndu mɛɛ vana tosal vanaa baalaa lo o lediom coo le-a yɛ.

⁴⁷ Buɛi sina kon hɛnan vana ndɔ bɛndoo, kɛ o toosiaa ɲɛ-ɲɛ loo, o tosa vɛlɛ hɛnan vana ndɔ bɛndoo loo sɔlanin lɔɔ taw.

⁴⁸ Kɛ te buɛiyo sina hɛnan vana ndɔ bɛndoo le, mò tɛɛmbuu, ndu sɔlanin lɔɔ bɔɔ le. Vana nda ke pɛ taw, a ɲuna ndu taw. Vana nda yɔngu yɛ pɛ ɲɔɔn taw mandaa, a ɲuna ndu vɛlɛ taw-taw.»

Le kɔlɔ Yeesu hin o ceendo ho coo-o

⁴⁹ Mí Yeesu hiaw laci a sɔɛi, mó dimi aa: «Yinnden ya cuu o ceendo coo ni, yáà yeema taw mì léè va nin biyɔɔ!

⁵⁰ Mɛɛ mì sɔla yinɔɔ, nduyɛ i co cumndo háá mì sɔɛi ken i keleŋa peelɔn!

⁵¹ La co yiyanndo maa kɔlɲuloo ya hin yɔngu o ceendo coo ni? Ɛ-ɛ, mì dimul niaa, o co ndu le, kɛ sɛyanndo.

⁵² Kandɔɔ sunsun, te vannda va pɛ nda ŋuɛɛnu o yungoo nin, a sɛyannin, mì vanaa ŋiɔnda simul vanaa yaa, mì vanaa yaa bɛɛ simul a ŋiɔnda.

⁵³ Fuɲaa simulnin po ndɔɔ, mì poo simul fuɲaa. Kalacuaa simulnin cuaa ndɔɔ, mì cuaa simul kalaa. Kala-lɛɔ simulnin lanɔɔ po ndɔɔ, mì lanɔ kalaa simul kala-lɛɛ ndɔ.»

Le ɲɛ co hunɔɔ yɔŋnɔn-ndo sinaa

⁵⁴ Mí Yeesu dimul vɛlɛ sɛ́lɔ́ɔ́ aa: «Te la ce pɛ yumbuyumboo a ba paalen le del-lo, la dimi fɔ́ɔ́fɔ̀, aa: ‹Piɔɔ co hau sia›, nduyɛ, mò tosan lende.

⁵⁵ Te la ce pɛ hoeiye hɔŋndo fulaa a ba too, la dimi aa: ‹Haŋullo vanin hau ni›, nduyɛ, mò tosan lende.

⁵⁶ Niaa vanaa muuluannda ha! La tiwba mì la tofa lɛŋnden a halataalaa, mì la bii lan bila. Kɛ le yɛɛ niaa co yɛ niko kɛɛ telenndo ho bila biyɔɔ?»

La cii sɔɔn co niaa tɛɛn niaa yaamɔaa niaa-on

⁵⁷ Mí Yeesu dimi vɛlɛ aa: «Le yɛɛ nɛ niaa pila co yɛ kɛɛ iyama kiolɔn o sandei nin?

⁵⁸ Telen niaa co va kɔlan niaa yaamɔ nɔmndo o vana kialaa n'yamaa lo-o, kindin mì la cii sɔngɔɔ nɛi-tɛɛn, yɔŋii o kɔ a nɔm ndu o hɔl, mì ndu kɔ mal nɔm kpalilnɔɔ o ba, mì kpalilnɔ kon kinda nɔm.

⁵⁹ Mì dimul nɔm, hali voliei ndii pilɛ lo nɔm le salaa ni, a fula le, fɔ ma sala.»