Tɔŋ lasálàá 7 - BII BILA

Sálà bɛɛndiaa isɔɔ

¹ «Silaa co hoo le sálà bɛɛndiaa isɔɔ solio ni: sálà diandaa-diandaa o co ni.

² À bɛnda mà kelu cɔlu yɔngun le sálà bɛɛndiaa isɔɔ solio-o bololan nɛɛ nda kialu cɔlua sálà loamaa bololan-nda, mà balu kooma ndɔan taaliaa o fonda-loamaa-lasálàá pindo.

³ O kon, à yɔngu ya Mɛlɛka cuɛima ndɔan kpow, puile ndɔlen, cuɛima kumbu pulon-ndan,

⁴ kɔlkelen miunndon, cuɛima holnun mun mì ma kumbu kpengun miunndon-ndan a bungɛi hiow naŋɔɔ o yemnde nin-nde, i vana faŋa a kɔlkelon latulu-e pɛɛn.

⁵ Mì vana-solia-lasálàá lom ɲɛm mun maa sálà ŋɔa o yin le ya Mɛlɛka o fonda-loamaa-lasálàá coo-o. Sálà bɛɛndiaa isɔɔ co kon ni.

⁶ Vanpiaandua o yungula vanaa-solia-lasálàá nin kínɛí bɛnda ni mà de visin mun. À bɛnda mà de mun nɛɛ diandaa pum, kani ɲɛdiaa diandaa-diandaa co kon ni.

⁷ Tɔŋnda co le sálà bɛɛndiaa isɔɔ lan, lan koni la co le sálà co le hakio sɔlaa malɔɔ-o ni, faleŋun pilɔn kpé. Vana-solia-lasálà simnin sɔɔn laci mò tosa faleŋii malaa hakiei-yo, ndu nɔnin visin cɔlu sálà kon ni.»

O vana-solia-lasálàá bɛnda mò sɔla-o

⁸ «Te vanndo yɔngu pɛ cɔloo le sálà loamaa solio, vana-solia-lasálà símnin sɔɔn laci mò tosa faleŋii malaa hakiei-yo, ndu nɔnin yáw cɔlu kon ni.

⁹ Sálàla ɲɛm-vaala nda lom o cɛi loamaa buloo nin-ndan kpow, a la nda toŋ o kpɛɛnɛi nin-ndan, vana-solia-lasálàá símnin faleŋun sálàn laci-o, ndu nɔnin ndan ni.

¹⁰ Kɛ le kpeyan funguɲaa a le dɛɛ nda vɔɔca a cuɛiyan-ndo yɛ, poaa Aarɔn-nda kpow piɔviannin kon tɛɛn kpen-kpen ni.»

Mɛɛ vana soli sálà kɔlɲuloo yɛ

¹¹ «Silaa co hoo le sálà kɔlɲuloo solio o Mɛlɛka lo ni:

¹² te vanndo soli pɛ sálà vaa lende a ya Mɛlɛka balikaa mello latulu, o bɛnda mò hin a dɛɛ toaŋaa nda vɔɔca kpeyan ndɔɔ o cuɛiyan nin-ndo, kɛ a bɛnda ma vow lɛvɛnndo lenin te, a fùlúfúlù nda muulian toosiaa a cuɛiyan-ndo, a kpeyan nda toŋ dɛɛ ndɔɔ o kpɛɛnɛi nin-ndo.

¹³ Mò yɔngu vɛlɛ sálà ɲɛm vaa a dɛɛ toaŋaa nda toosiaa a lɛvɛnndo-o. O kon, a soli ndu a sálà kɔlɲuloo latulu a balikaa malɔɔ.

¹⁴ Mà faaŋiaa kundalan lapilɛn-pilɛn o sálàla ɲɛm-vaalan kpow coo le ya Mɛlɛka, kundala lan la vanin le vana-solia-lasálà fasaŋiaa kooma cɔlu sálà kɔlɲuloo o kpengun fonda-loamaa-lasálàá-o ni.

¹⁵ Visin cɔlu nda soli sálà kɔlɲulu kon le Mɛlɛka balikaa mello-on bɛnda mì n dennun paale sálà kon fulanin nden kpow, ɲɛ-ɲɛ bɛnda mò mandan le diimandɔɔ le.

¹⁶ Te vanndo soli pɛ sálà kɔlɲuloo le yoole o baa o Mɛlɛka lo len timbio, te kon te mò soli sálàá a yeemɛi ndɔɛi ndu pila-e, vana nɔla ma de sálà kon paale o fulanin nden, mì ɲɛ tɔ̀ lonin-ndo dennun vɛlɛ diimandɔɔ.

¹⁷ Kɛ te vision pum lo vɛlɛ pɛ háá paale yàándɔlen, a bɛnda mà lom mun o yin.

¹⁸ Te vanndo de pɛ visin cɔlu o yɔngu le sálà kɔlɲulu ndɔɔ-on o paale yàándɔlen coo, Mɛlɛka cɛlnin sálà kon te, o siŋnunnin fúú le vana solinin ndu-o, kani dɛnɛ nɔɔlɛiyo co kon ni. Lelan, sanga haki vana kon vanin ndu pila o lebol.

¹⁹ Te visin mun pilan pɛ ɲɛ co o nɔɔlɛiyo-o, vana di lɛ mun te, n bɛnda mì n lomnun o yin. Kɛ vana-vana co o diandaa, ndu nɔla mo de visin tɔ̀un.

²⁰ Kɛ te vanndo va pɛ o nɔɔlɛiyo mo de visin cɔlu sálà kɔlɲulu nda solul ya Mɛlɛka-o, a faŋanin vana kon Israɛlla tɛɛn few-few.

²¹ Te vanndo pilan vɛlɛ pɛ ɲɛ co o nɔɔlɛiyo-o, o va vanaciee nɔɔlɛi o va visi nɔɔlɛi, te kon te dɛnɛ nɔɔlɛi súú-súù, mo de visin cɔlu sálà kɔlɲulu nda solul ya Mɛlɛka-o, a faŋanin vana kon Israɛlla tɛɛn few-few.»

Silala Mɛlɛka yɔngu Israɛlla lan

²² Mí Mɛlɛka soaa o Moise lo, mó dimul ndu aa:

²³ «Soo o Israɛlla lo, mà dimul nda aa: ‹La bɛnda mì la de cuɛima cɔloo le few, o va cuɛima naw, o va cuɛima saa, o va cuɛima cuin.

²⁴ Cuɛima cɔlu vílɛ́iyo, a cuɛima cɔlu visia yondoa sɛɛsiaa-o, man ma nɔla mì ma soli kpeku celen, kɛ niaa la dia man te.

²⁵ Vana-vana de pɛ cuɛima cɔlu nda yɔngu le ndu lomɔɔ o yin le ya Mɛlɛka-o, a faŋanin vana kon Israɛlla tɛɛn few-few.

²⁶ Fonda oo fonda niaa va pɛ fɛɛn icali, la bɛnda mì la de koovan te, o va kooma yow o va kooma cɔlu celen.

²⁷ Vana-vana de pɛ koovan, a faŋanin vana kon Israɛlla tɛɛn few-few.›»

²⁸ Mí Mɛlɛka soaa vɛlɛ o Moise lo, mó dimul ndu aa:

²⁹ «Soo o Israɛlla lo, mà dimul nda aa: ‹Te vanndo solul pɛ Mɛlɛka sálà kɔlɲuloo, o bɛnda mò hun yɔngu ya Mɛlɛka kunda co le ya o sálà kɔlɲulu kon nin-ndo.

³⁰ Mì vana kon pila hin a ɲɛm ŋɔanin mun o yinnden nin le ya Mɛlɛka-on, ɲɛm mun co mun ni: cuɛima cɔlu kon a kɔŋɔ ndɔɔ, kɔŋɔ kon yɔngunnin le faleŋii vana heelu ɲɔɔ coo le Mɛlɛka ndu cɔmndo-e.

³¹ O kon, vana-solia-lasálàá lom cuɛima man o fonda-loamaa-lasálàá coo. Kɛ Aarɔn nda poaa ndɔa nɔnin kɔŋɔ kon ni.

³² O cɔlua niaa yɔngù le sálà kɔlɲuloo solio-a nin, la bɛnda mì la faŋa lɔlu ba kɛndɔɔ, mì la yɔngu vana-solia-lasálàá ndu.

³³ O poaa Aarɔn-nda tɛɛn, vana cuanin cuɛima cɔlu sálà kɔlɲuloo a kooma ndɔan, mò tosa falenndon a man o fonda-loamaa-lasálàá coo-o, ndu nɔnin lɔlu ba kɛndɛ cɔlu kon ni.

³⁴ Kani kɔŋɔ co kon le faleŋii heelaa ɲɔɔ Mɛlɛka o hɔl-lo-e a lɔlu ba kɛndɛ nda faŋa kon-ndo, i faŋa ɲɛm mun o cɔlua Israɛlla yɔngu le sálà kɔlɲuloo solio-a coo, mí yɔngu Aarɔn nda poaa ndɔa mun. Le nda ɲɛm mun vanin le fɛɛn a fɛɛn ni. La bɛnda mì la tuei silaa ho.

³⁵ Ɲɛm mún co le Aarɔn nda poaa ndɔa o sálàla ŋɔa o yin le ya Mɛlɛka lan ni. Dɛnɛ kon kandun kabi paale nda pɔla nda le siŋnɔnndo vanaa-solia-lasálàá Mɛlɛka-a len.

³⁶ Ɲɛ ya Mɛlɛka dimul Israɛlla kpéŋ-kpéŋ le Aarɔn nda poaa ndɔa yɔngoo-o co kon ni. Kandɔɔ paale nda sɔla pɔlaa len, Israɛlla bɛnda mà va nda ɲɛm mun yɔngoo. La bɛnda mì la bii silaa ho le fɛɛn a fɛɛn.

³⁷ Tɔŋndo co kon le sálàla loamaalan, sálàla ɲɛm-vaalan, sálàla co le hakio sɔlaa malɔɔ lan, sálàla-bɛɛndiaa-isɔɔlan, sálàla-kandaa-baalalan a sálàla kɔlɲululan solio o ya Mɛlɛka lo ni.›»

³⁸ Baalaa ho Mɛlɛka ke Moise le tosaa o pembei Sinai coo ni, paale len o dimul Israɛlla le ndu Mɛlɛka sálàlan solullo o lɛŋnde veselɛilen Sinai nin ni.