Tɔŋ lasálàá 6 - BII BILA

Nɛila yɛ́-yɛ́lan le sálàla loamaalan a sálàla ɲɛm-vaalan solio

¹ Mí Mɛlɛka soaa o Moise lo, mó dimul ndu aa:

² «Yɔngu Aarɔn nda poaa ndɔa tɔŋndan ndan, ma dimul nda aa: ‹Nuaa nda bɛnda le sálà loamaa solio ni: sálà loamaa bɛnda mò lɔl ŋɔu pii o yinnden nin háá idiiyo o fonda-loamaa-lasálàá coo, mì yinnden le va biyɔɔ.

³ Mì vana-solia-lasálàá vownun doma ndɔ bɛndu toosian a kola keesoo-o, mò vownun vɛlɛ lɛmbɛla lebɛngula toosian a kola keesoo lan, mò faaŋiaa pulta cal o yinnde sálà loamaa o fonda-loamaa-lasálàá coo lan, mò dii lan o fonda kon ikɛi.

⁴ Kon cuu pɛ, o soli volɔɔla co ndu lekɔɔ lan, o vownun volɔɔla súú celen, o soli pultan o dɔ́ɔ́ngɔ́ɔ̀ kɔɔli, o kɔɛ a lan nɛɛ diandaa pum.

⁵ Fɔ mì yinnden le va biyɔɔ o fonda-loamaa-lasálàá coo tuŋ, le bɛnda mì le ɲum te, vana-solia-lasálàá bɛnda mò va yɔmnde vowvo o yin idii oo idii, mò handu sálà loamaa lecoo telen pá mo lom visin macuɛin cɔlua co le sálà kɔlɲuloo-a lecoo.

⁶ Mì yinnden le va biyɔɔ lɔ́ɔ́-lɔ́ɔ̀ o fonda-loamaa-lasálàá coo, le bɛnda mì le ɲum te.›»

Sálàla ɲɛm-vaalan

⁷ «Nuaa nda bɛnda le sálàla ɲɛm-vaalan solio ni: poaa Aarɔn-nda bɛnda ni mà cɔm Mɛlɛka sálà ɲɛm vaa kon o fonda-loamaa-lasálàá hɔl-ndɔ.

⁸ Mì vana-solia-lasálàá faŋa kpeyanndo baa ca, cuɛiyan a ansan kpow, o nda handu o sálà ɲɛm vaa coo-o pɛɛn, mà lom ndu kpúlúká o fonda-loamaa-lasálàá coo, mò fula cun kɛndɔɔ le loonɔnndo a Mɛlɛka o kɔɔ.

⁹ Mì Aarɔn nda poaa ndɔa de ɲɛ tɔ̀ lonin-ndo, mà de ndu nɛɛ diandaa pum, o bɛ́ɛ̀ Cɛi-Diandaa nin. Kɛ a va pɛ ndu toosiaa le dioo, a bɛnda mà vow lɛvɛnndo le.

¹⁰ A bɛnda mà toosiaa ndu a lɛvɛnndo le few, kani o sálàla kei o yinnden nin le ya Mɛlɛka lan nin, ɲɛ ya yɔngu nda-o co kon ni. Ɲɛ diandaa-diandaa co kon ni, maa ɲɛ nda sɔlà o sálàá co le hakio sɔlaa malɔɔ-o nin a o sálà bɛɛndiaa isɔɔ nin-ndo koni.

¹¹ Vanaa bɛnda mà de ɲɛ kon-nda co hɔ́aa piaandua o cuavaa Aarɔn-nda tɛɛn ni, o yɔngun niaa-o co kon ni. Silaa co hoo le niaa pila a le cuavaa niaa imamaa le fɛɛn a fɛɛn ni, nuaa niaa bɛnda le tosaa a sálàla ŋɔa o yin le ya Mɛlɛka lan ni. Mɛɛ o co o diandaa yɛ, vana-vana pilan ndu pɛ, ndu siŋnun teengen le Mɛlɛka.»

¹² Mí Mɛlɛka soaa o Moise lo, mó dimul ndu aa:

¹³ «Te Aarɔn nda poaa ndɔa sɔla pɛ pɔlaa, a bɛnda mà soli sálàá a ɲɛm vaan. Ɲɛ nda bɛnda mà cua le sálà kon-ndo co hoo ni: lepalaa-lepala kpeyanndo kiloo leyàá: idii kiloo ca a tálá icɔl ca a tálá.

¹⁴ A bɛnda mà toŋ ndu a cuɛiyan o kpɛɛnɛi nin. Mà yimiyimi dɛɛ toaŋaa sálà cun kɛndɛ kon bungan, mà hun yɔngu ya Mɛlɛka ndu.

¹⁵ O poaa Aarɔn-nda tɛɛn, vana sɔlanin pɔlaa le siŋnɔnndo bolle vanaa-solia-lasálàá maa Aarɔn fuɲa nda-o, ndu bɛnda le sálà kon solio ni. Silaa co hoo le niaa le fɛɛn a fɛɛn ni. Sálà ɲɛm vaa kon bɛnda mò ŋɔɛ kpow le ya Mɛlɛka.

¹⁶ Kani vana-solia-lasálàá yɔngu pɛ ɲɛm vaan le sálàá solio, sálà kon bɛnda mò dennun te, o bɛnda mò ŋɔɛ kpow o yin.»

Sálàá le hakio sɔlaa malɔɔ

¹⁷ Mí Mɛlɛka soaa o Moise lo, mó dimul ndu aa:

¹⁸ «Soo o Aarɔn nda poaa ndɔa lo, mà dimul nda aa: ‹Nuaa niaa bɛnda ni mi la soli sálàá le hakio sɔlaa malɔɔ: o fonda nda kelu cɔlu sálà loamaa bololan-ndo koni nda bɛnda vɛlɛ mà kelu cɔlu co le sálàá le hakio sɔlaa malɔɔ-o bololan Mɛlɛka o hɔl ni. Sálà diandaa-diandaa co kon ni.

¹⁹ Vana-solia-lasálà tosanin faleŋun sálà kon-ndo nɔla mo de visin cɔlu kon. Kɛ te o va pɛ mun dioo, o de mun nɛɛ diandaa pum o bɛ́ɛ̀ cɛi-kola-toandaa-labɔɔŋianndo nin.

²⁰ Vana-vana pilan pɛ visin mun, ndu siŋnun teengen le Mɛlɛka, te kooma ndɔan ma vesulun pɛ o ɲɛ cuɛinanndo, à bɛnda mà tɔɔ ɲɛ cuɛinan kon nɛɛ diandaa pum.

²¹ Te visin mun yawnun pɛ o kpɛɛnɛi puuluei nin, te yawvo cuu pɛ a pɛl kpɛɛnɛi ken. Taa yaw yɛ mun pɛ o kpɛɛnɛi nda cɔw a daɲan-nde nin, a bɛnda mà suusiaa ndi, mà tɔɔ ndi cɛ́kɛ́lɛ́ a mɛnndan taw.

²² Vanpiaandua o yungula vanaa-solia-lasálàá nin kínɛí a bɛnda mà de visin mun ni. Kani ɲɛdiaa diandaa-diandaa co kon ni.

²³ Kɛ nduyɛ, taa luɛi nin pɛ a kooma cɔlu co le sálàá le hakio sɔlaa malɔɔ-o-an o cɛi-kola-toandaa-labɔɔŋianndo nin, mà tosa faleŋii malaa haki-e a man o Cɛi-Diandaa kon nin, vana bɛnda lɛ ma de visin cɔlu kon te, n bɛnda mì n ŋɔɛ kpúlúká o yin.›»