Tɔŋ lasálàá 27 - BII BILA

Silalan a dɛnɛ ciɛ́ɔn peeloo a volion o kɔɔ

¹ Mí Mɛlɛka soaa o Moise lo, mó dimul ndu aa:

² «Soo o Israɛlla lo, ma dimul nda aa: ‹Te vanndo yeema pɛ le ciɛ́ɔn o cua-on peeloo, o bɛnda mò sala volion mɛɛ vɔngu vanndacieaa yoomaa solin sálà o Mɛlɛka lo-a co yɛ.

³ Vɔngula lan la co lan ni: Le vanaciee yoomaa nɔ vɔsilan kandɔɔ bidiin kɔlan tiyaa háá vɔsilan belaŋɔmum-ndo, volin latámán beleŋuɛɛnu, mɛɛ volin co dionnɔndo o Cɛi-Diandaa nin-ndon co yɛ.

⁴ Le vanalanɔɔ, volin latámán beleyaa.

⁵ Le cuaambɔ lembu nɔ vɔsilan kandɔɔ laŋuɛɛnu kɔlan tiiyaa háá vɔsilan bidiin-ndo, volin latámán bidiin le poombɔ piaandoo, volin latámán tɔ́ le cuaambɔ laandoo.

⁶ Le cɛlɛkpɛ nɔ kandɔɔ vɔsio pilɛ háá kɔlan tiiyaa vɔsilan laŋuɛɛnu-o, volin latámán mún ŋuɛɛnu le cɛlɛkpɛ piaandoo, volin latámán mún yáá le cɛlɛkpɛ laandoo.

⁷ Le vanaciee hiow vɔsilan belaŋɔmpum coo-o, volin latámán tɔ́ a ŋuɛɛnu le vanapɔnɔɔ, volin latámán tɔ́ le vanalanɔɔ.

⁸ Te vanndo va pɛ vana ikɔɔ mò nɔla le vɔngu kelun-ndo sɔlaa le, a bɛnda ma kɔɛ a ndu vana-solia-lasálàá o hɔl, o kon mì vana-solia-lasálàá kelu vɔngoo mɛɛ sɔla vana cua kon ciɛ́ɔn-ndo co yɛ.

⁹ Te o va pa a cɔlu bɛnda le Mɛlɛka sálàá solullo-o o kɔɔ ciɛ́ɔn cuannun ni, mɛɛ cɔlu-cɔlu vana yɔngu pɛ, kon siŋnun teengen le Mɛlɛka.

¹⁰ Vana baŋa ndu a cɔlu celen te. Vana singa ndu a cɔlu kɛndɛ celen te, vana singa ndu vɛlɛ a cɔlu vɔɔn celen te. Kɛ a ken kpede, te vanndo yɔngu pɛ cɔlu celen le cɔlu nda cua ciɛ́ɔn o kɔɔ-o singaa, cɔlua ŋiɔŋaa kan kpow a siŋnun teengen le Mɛlɛka.

¹¹ Te cɔlu dindu loo cɔlu nda cua kon ciɛ́ɔn o kɔɔ-o co ni, cɔlu vana bɛnda mì vana solul Mɛlɛka sálà le-o pɛɛn, a bɛnda ma sim cɔlu kon vana-solia-lasálàá o hɔl,

¹² mì vana-solia-lasálàá kelu ndu iyama mɛɛ o naŋ yɛ, te kon te mɛɛ o vɔw yɛ. O kon yamɛi vana-solia-lasálàá kelu ken-nde bɛnda mi i cɛlnun.

¹³ Te vana yeema nin pɛ le ndu baŋaa, vana kon cɔɔlu ipilɛ o ŋuɛɛnu oo ŋuɛɛnu coo o vɔngu kelun-ndo coo.

¹⁴ Te vanndo soli pɛ cɛi ndɔɔ sálà maa ɲɛ co teengen le Mɛlɛka-o, vana-solia-lasálàá bɛnda mò kelu cɛi kon iyama mɛɛ o naŋ yɛ, te kon te mɛɛ o vɔw yɛ. O kon, yamɛi vana-solia-lasálàá kelu ken-nde bɛnda mi i cɛlnun.

¹⁵ Te vana cɛiyo yeema pɛ le cɛi kon baŋaa, o bɛnda mò handu ipilɛ o ŋuɛɛnu oo ŋuɛɛnu coo o vɔngu vana-solia-lasálàá kelu kon-ndo coo, o kon cɛiyo muungu cɛi ndɔ.

¹⁶ Te vanndo soli pɛ yondola ndɔlan o pilɛ sálà o Mɛlɛka lo, vɔngu yondo kon bɛnda mò kelun mɛɛ yɛyii vana saŋ lon-nde co sɛ́lɛ́ yɛ. Volin latámán beleŋuɛɛnu le fonda vana saŋ ɔrse kilolan kɛmɛ leyáá-o.

¹⁷ Te o Vɔsi Kɔlkɛndɛ Bɛndoo nin vanndo soli yondo kon sálà ni, vɔngu kelun-ndo bɛnda mò cɛlnun lende.

¹⁸ Te Vɔsi Kɔlkɛndɛ Bɛndoo hiow pɛ mì vanndo soli yondo ndɔɔ sálà, vana-solia-lasálàá bɛnda mò kelu vɔngoo, o dɔɔniaa vɔngu kon mɛɛ vɔsilan la lo le Vɔsi Kɔlkɛndɛ Bɛndoo tiiyaa yɛ.

¹⁹ Te vana yondoo yeema pɛ le yondo ndɔɔ baŋaa, o bɛnda mò handu ipilɛ o ŋuɛɛnu oo ŋuɛɛnu coo o vɔngu vana-solia-lasálàá kelu-o coo, malan yondoo muungu yondo ndɔ.

²⁰ Te o baŋa yondo ndɔɔ le, kɛ mò pisi vana celen o ba, ndu pila bɛnda lɛ mò baŋa ndu le.

²¹ Vɔsi Kɔlkɛndɛ Bɛndoo tiiya pɛ, yondo kon muungu yondo Mɛlɛka-o, o siŋnun ɲɛ co teengen le Mɛlɛka-o, o vana nɔla baŋa loo. O kon, o siŋnun yondo vanaa-solia-lasálàá.

²² Te vanndo soli pɛ yondoo sálà o Mɛlɛka lo, te yondo kon co yondo o loo kɛ le, kɛ yondo o pendu-o,

²³ vana-solia-lasálàá bɛnda mò tuu vɔngoo mɛɛ vɔsilan la lo le Vɔsi Kɔlkɛndɛ Bɛndoo tiiyaa yɛ, mì vana yondoo sala vɔngu kon paale len. O kon, mì volin mun siŋnun ɲɛ co teengen le Mɛlɛka-o.

²⁴ Kɛ Vɔsi Kɔlkɛndɛ Bɛndoo tiiya pɛ, yondo kon muungu vana tase nɔ ndu-o o ba.

²⁵ Vɔngu oo vɔngu va pɛ kiolɔnndo, o bɛnda mò kelun mɛɛ volin latámán co dionnɔnndo o Cɛi-Diandaa nin-ndo co yɛ. Volin mun lusul tààngá ndɔɔ pilɛ co kalamulan tɔ́.›

Sálàla yɛ́-yɛ́lan

²⁶ ‹Vana-vana nɔ dí mò soli cɔlu piaandu tase ndɔɔ sálà o Mɛlɛka lo le ndu pila le, kani cɔlu piaandu tasoo ndu co nin o mandaa le Mɛlɛka, o va naw tova, o va cuin toovi, o va saa kóndó.

²⁷ Te cɔlu dindu loo kom cɔlu piaandu tasoo ni, vana cɔloo nɔla mò baŋa ndu, mò handu ipilɛ o ŋuɛɛnu oo ŋuɛɛnu coo o vɔngu vana-solia-lasálàá kelu-o coo o vɔngu vana-solia-lasálàá kelu-o coo. Te o baŋa ndu le, vana-solia-lasálàá nɔla mò pisi cɔlu kon vana celen o ba mɛɛ o kialunin vɔngoo yɛ.

²⁸ Ɲɛ-ɲɛ vanndo soli pɛ sálàá fasɛi le Mɛlɛka, ɲɛ kon bɛnda mò pisin te, o bɛnda vɛlɛ mò baŋan te, o va vanaciee, o va cɔlu, o va yondo ndɔ kɛ. Ɲɛ-ɲɛ nda soli pɛ sálà fasɛi le Mɛlɛka, ɲɛ diandaa-diandaa co kon le Mɛlɛka ni.

²⁹ Hali vanaciee nda soli sálàá fasɛi o Mɛlɛka lo ni, o bɛnda mò sɔla baŋa le, o bɛnda mò sɔla piɔ́mndo.

³⁰ Le Mɛlɛka o-tɔ́ndɔ fula o tɔlɔɔlan kpow nin-ndo co ni, o va o-tɔ́ndɔ fula o yɛyun vana saŋ-ndon nin-ndo, o va ó fula o yɔmii koamɛi nin-ndo. Ɲɛ co le Mɛlɛka-o co kon ni.

³¹ Te vanndo yeema pɛ le ɲɛ pum baŋaa o o-tɔ́ndɔ ndɔɔ nin, o bɛnda mò sala vɔngu kpeekpeiyo, mò handu vɛlɛ ipilɛ o ŋuɛɛnu oo ŋuɛɛnu coo.

³² O cɔlua nin, nawva, saa a cuinnda, cɔlu tɔ́ndɔɔ o cɔlua tɔ́ coo nda handu pondalen ni le ndu siinguuo teengen le Mɛlɛka.

³³ Vana n'cɔloo bɛnda mì ndu pila hɛli cɔlua le, o va cɔlua kɛndɛ o va cɔlua vɔɔn. O bɛnda mò singa cɔlu-cɔlu le. Te o singa pɛ cɔloo pum a cɔlu celen, cɔlua ŋiɔŋaa kan kpow a siŋnun teengen le Mɛlɛka. Vana bɛnda mi vana baŋa nda le.›»

³⁴ Tɔŋndan ndan Mɛlɛka yɔngu Moise o pembei Sinai coo le Israɛlla ni.