Tɔŋ lasálàá 22 - BII BILA

Tɔŋndo o sálàla diandaala nda solul Mɛlɛka lan coo

¹ Mí Mɛlɛka soaa o Moise o lo, mó dimul ndu aa:

² «Soo o Aarɔn ndo a o poaa ndɔa lo, ma dimul nda aa: ‹Telenndan lapum, a bɛnda mà caa taw a ɲɛm dian diandan Israɛlla co ya Mɛlɛka sálàla diandaalan solullo-on. A bɛnda mà sɔɔnguu o ɲɛm mun ikɛi o telennda lan nin te, yɔŋii nda del kasi a diola nila diandaalan. Ya co Mɛlɛka ni.›

³ Dimul nda aa: ‹Háá le fɛɛn a fɛɛn, o polale vanaa-solia-lasálàá coo, te vanndo va pɛ o nɔɔlɛiyo Mɛlɛka o hɔl, mò sɔɔnguu o ɲɛm dian diandan Israɛlla co ya Mɛlɛka sálàla diandaalan solullo-on ikɛi, vana kon bɛnda mò faŋan o baala nuu nin, mò faŋan ya o hɔl. Ya co Mɛlɛka ni.

⁴ O polale Aarɔn-nden coo, te nàà siaŋaa bii pɛ vanndo, te kon te mì nàà kɔɔsinaa bii ndu, vana kon bɛnda mò de sálàla diandaalan te, fɔ mò dindin fɔlɔn. Lende koni o co vɛlɛ le vana pilan vana sɔɔnguu vana vílɛ́iyo ikɛi mo siŋnun vana nɔɔlɛiyo-o a vana mɛmma ivanapɔnɔyan ma fula-o ni.

⁵ Hali vana pilan ɲɛ huulaa-o, te kon te vana pilan vanaciee co o nɔɔlɛiyo Mɛlɛka o hɔl-lo-o, o nɛi oo nɛi o kei pɛ coo mò siŋnun vana nɔɔlɛiyo, o bɛnda mò de ɲɛm mun te.

⁶ Vana nɔɔlian pɛ o nɛila vaa lende coo, o bɛnda mò lo o nɔɔlɛiyo lende háá icɔllo. O kon kɔɔli, fɔ mò pulun fɔlɔn cɛ́kɛ́lɛ́ malan o dia ɲɛm dian diandan nda solul Mɛlɛka sálàlan-ndon.

⁷ Te paalen le del pɛ, o muungu o siŋnun vana diandaa. O nɔla niko mò de vɛlɛ ɲɛm dian diandan nda soli mún sálàlan-ndon. Kani ɲɛ ndɔ diaa co kon ni.

⁸ Vana-solia-lasálàá bɛnda mò de visin cɔlu vi o ba ndɔɔ coo-o le, o bɛnda vɛlɛ mo de visin cɔlu visi biyaa dii-o le. Kani o de mun pɛ, o siŋnun vana nɔɔlɛiyo. Ya co Mɛlɛka ni.

⁹ Vanaa-solia-lasálàá bɛnda mà bii silala nilan, yɔŋii nda cua hakio ma kɔndu dɛnɛ le ɲɛ nda diaa. Kani te a del pɛ kasi a ɲɛdiaa kon o kɔɔ, a sɔla piɔ́mndo. Ya co Mɛlɛka ni, ya kɛsi nda teengen le baala nuu ni.

¹⁰ Vana co vana-solia-lasálà loo bɛnda mò de ɲɛm dian diandan nda soli mún sálàá-on te. Hali o va bɛɛ vana niaa yoongu-o, te kon te vana co baalaa tosaa vana-solia-lasálàá o ba le salaa sɔlaa-o, a bɛnda mà de sálà diandaa kon te.

¹¹ Kɛ te vana-solia-lasálàá nɔ pɛ cɛ o pendu a volion-ndo, te kon te mì vanndo velun o vana-solia-lasálà kon ndo cɛinin, vanaa kan nda nɔla ma de sálàla diandaalan.

¹² Te cua vana-solia-lasálàá velu-o cal pɛ o nɔu vana co vana-solia-lasálà loo o ba, cua kon bɛnda lɛ mo de ɲɛdiaa nda faŋa o sálàla diandaalan nin-ndo le.

¹³ Kɛ te pɔnɔɔ cua vana-solia-lasálàá velu-o vi pɛ, te kon te mà kɛyan nda pɔnɔ ndɔ, te o vilu hɔ́ɔ́ le, mò muungu o fuɲa ndɔ lo cɛinin le calle maa telen o va cuaambɔ felengoo-o, ndu tiwba mo de ɲɛdiaa fuɲa ndɔ co dioo-o. Kɛ vana celen bɛnda mò de ɲɛdiaa kon te.

¹⁴ Te vana celen sìná le mo de ɲɛm sálà diandan mun, o bɛnda mò sala ɲɛ o de-o vana-solia-lasálàá o ba, mò cɔɔlu vɛlɛ ipilɛ handɔɔ o ŋuɛɛnu oo ŋuɛɛnu coo.

¹⁵ Vanaa-solia-lasálàá bɛnda mà cɛl mì ɲɛm dian diandan nɔɔlian te, n Israɛlla co faŋaa o ɲɛm dian nda co ya Mɛlɛka sálàla diandaalan solullo-on nin-ndon pɛɛn.

¹⁶ Kani te a de pɛ ɲɛm mun telen nda bɛnda le mun dio loo, mɛɛ a del kasi bɛndu-bɛndoo. Ya co Mɛlɛka ni, ya hɛli nda mí dindi nda le baala nuu ni.›»

Cɔlua bɛnda le sálàá solio-a

¹⁷ Mí Mɛlɛka soaa o Moise lo, mó dimul ndu aa:

¹⁸ «Soo o Aarɔn ndo, o poaa ndɔa lo o a Israɛlla kpow lo, mà dimul nda aa: ‹Te cua pilacieo Israɛl, te kon te mial co niaa icali o bɛngu coo-o yeema pɛ le ya Mɛlɛka sálà loamaa solullo, o va sálà o baa yoolen o ya Mɛlɛka lo-o, o va sálà o co solio a yeemɛi ndɔɛi ndu pilɛi-yo,

¹⁹ te o yeema pɛ mì cɛl sálà ndɔɔ, o bɛnda mò yɔngu cɔlu piaandu nɔ lenamta loo ó cɔlua ndɔa pɔmbɔa, te kon te ó cɔlua ndɔa bɛndua tɛɛn.

²⁰ O bɛnda mò solul-la cɔlu lenamtaa sálàá le, yɔŋii ya kɛɛ sálà ndɔɔ.

²¹ Te vanndo baa pɛ yoolen o ya Mɛlɛka lo, te kon te mo kelu o kɔl ndɔɔ nin le ya sálà kɔlɲuloo solullo, o va a cɔlu bɛndoo, o va a o pɔmbɔɔ o yeema le sálà kon solio ni, o bɛnda mò soli cɔlu nɔ lenamta loo sálàá.

²² Lelan, la cúù ya cɔlu sumɛiyo le, la cúù ya vɛlɛ cɔlua ha le: cɔlu yom pelei-yo, cɔlu kiolu pelei-yo, cɔlu pawve fula-o, cɔlu bákáláá fula-o. La bɛnda mì la lom cɔlua kan o fonda-loamaa-lasálàá coo le ya Mɛlɛka le.

²³ Te cɔloo nɔ pɛ pelii vilɛiye mì ndi hiow pelun tɔ̀un, la tiwba mì la soli ndu sálà niaa pila kelu o kɔl niaa nin a yeemɛi-yo, kɛ kon bɛnda le yoole niaa baa o Mɛlɛka lo len timbio le.

²⁴ Le fɛɛn a fɛɛn, la sólì cɔlu nda tɛnda bosio-o sálà o ya Mɛlɛka lo le. La tósà kon telen niaa tiiyanin o lɛŋnde niaalen nin-ndo le.

²⁵ La bíì mialaa co niaa tɛɛn-nda cɔlua vaa lende o ba le nda sálàá solio o ya Mɛlɛka lo le. Kani bosi nda tɛnda nda kon-ndo co macoaa maa namtalen nda mal nda ni. Lelan, i cɛl cɔlua vaa lende niaa o ba le few.›»

²⁶ Mí Mɛlɛka soaa vɛlɛ o Moise lo, mó dimul ndu aa:

²⁷ «Te nawvo, saa, te kon te cuinndo kom pɛ, cualen le bɛnda mì le lo kala ndɔ ikɛi háá palɛi ndii ŋɔmmɛw. Kɛ kandɔɔ o paale ŋɔmaandɔlen, la tiwba mì la soli cuale len sálà ŋɔa o yin le ya Mɛlɛka-o.

²⁸ Kɛ nduyɛ, la mɔsɔŋa cɔloo diyɔɔ o paale pilɛlen nin nda cuale ndɔlen te, o va naw, o va saa, o va cuin.

²⁹ Te la va pɛ ya Mɛlɛka sálà malaa balikaa solullo, la soli ndu mɛɛ hɛnan nuu co yɛ, haliko mi cɛl ndu.

³⁰ Te la dii pɛ cɔloo le sálà vaa lendeo, la bɛnda mì la de visin ndɔn kpow paale niaa dii ndu len, la mɛi ɲɛ-ɲɛ le diimandɔɔ le. Ya co Mɛlɛka ni.

³¹ La bii tɔŋnda nilan a silala nilan mì la kela lecoo. Ya co Mɛlɛka ni.

³² La nɔ́ɔ́liàà diola nila diandaalan te, haliko mi Israɛlla sina válán maa Mɛlɛka diandaa co teengen-ndo ya co ni. Ya co Mɛlɛka ni, ya hɛli niaa ni mì dindi niaa le vaa cuavaa nia.

³³ I soli niaa o lɛŋnde Esipte len nin haliko mi va Hala niaa. Ya co Mɛlɛka ni.»