Tɔŋ lasálàá 2 - BII BILA

Sálàla fula o tɔlɔɔlan nin-ndan

¹ «Te vanndo va pɛ hunɔɔ o Mɛlɛka lo a ɲɛm vaan le ndu sálàá solullo, o bɛnda mò cua kpeyanndo, mò dɔw cuɛima olivean lecoo, mò handu vɛlɛ ansan lecoo.

² Mò yoo vanaa-solia-lasálàá, poaa Aarɔn-nda ɲɛm mun. Mì vana-solia-lasálàá pilɛ ɲɔla kpeyan co kon o muulianndo a cuɛiyan-ndo, mò cua vɛlɛ ansan kpow, mò lom ndu latulu o fonda-loamaa-lasálàá coo le loonɔnndo a ya Mɛlɛka o kɔɔ. Sálà ŋɔa o yin-ndo co kon ni, o ya Mɛlɛka tuɛi cun mì ɲɔɔ hɛnan ya-o.

³ Ɲɛ tɔ̀ lonin o sálà ɲɛm vaa kon nin-ndo vànin le Aarɔn nda poaa ndɔa. Ɲɛ diandaa-diandaa pila ɲɛ tɔ̀ kon co ni, kani o sálà nda solul Mɛlɛka o yinnden nin-ndo nin o fula ni.

⁴ Te vanndo va pɛ sálàá solio a ɲɛ o tuɛi nɛɛ loamaa bulua-o, o bɛnda mò yɔngu dɛɛ toaŋaa o toosiaa a kpeyanndo-o, kɛ o bɛnda mò vow lɛvɛnndo telen o co va dɛɛ kon toosiaa-o le. O bɛnda mò vɔɔca ndu o cuɛiyan nin, te kon te mò yɔngu dɛɛ toaŋaa toosian a lɛvɛn too, mó vow cuɛiyan lecoo.

⁵ Te vanndo soli pɛ sálàá a kulun o toŋ o kpɛɛnɛi tɛsɛkɛi nin-ndon, o bɛnda mò cua kpeyan vɔɔcan a cuɛiyan-ndo, kɛ o bɛnda mò vow lɛvɛnndo lenin te,

⁶ mò yimiyimi ndu, mò vow cuɛiyan lecoo. Sálà fula o ɲɛm vaan nin-ndo co kon ni.

⁷ Te o va pɛ ɲɛ vana toaŋ o kpɛɛnɛi nin-ndo, kpeyanndo bɛnda mò vɔɔcan o cuɛiyan nin.

⁸ Sálà toosian lende-o vana bɛnda le ya Mɛlɛka yɔngoo ni. Vana cua ndu pɛ, a yɔngu vana-solia-lasálàá, ndu kɔ kɛsi sálà kon o fonda-loamaa-lasálàá ikɛi.

⁹ O kon, vana-solia-lasálàá faŋa ɲɛ co le loonɔnndo a Mɛlɛka o kɔɔ-o, o lom ndu o fonda-loamaa-lasálàá coo. Sálà ŋɔa o yin-ndo co kon ni, o ya Mɛlɛka tuɛi cun mì ɲɔɔ hɛnan ya-o.

¹⁰ Ɲɛ tɔ̀ lonin-ndo vànin le Aarɔn nda poaa ndɔa. Ɲɛ diandaa-diandaa pila ɲɛ tɔ̀ kon co ni, kani o sálà nda solul Mɛlɛka o yinnden nin-ndo nin o fula ni.

¹¹ Kpeyan niaa hun o ya Mɛlɛka lo le ya sálàá solullo-o kpow, la bɛnda mì la toosiaa ndu a lɛvɛnndo le, kani kpeyan niaa co Mɛlɛka sálàá solullo, mì la va ndu lomɔɔ o yin-ndo bɛnda mò toosian a lɛvɛnndo, te kon te a lɛan te.

¹² Te o va pɛ ɲɛm tasen fula o vaala niaalan a o baalala niaalan nin-ndon, la nɔla mì la hin a mun o ya Mɛlɛka lo, kɛ vana lum mun o fonda-loamaa-lasálàá coo maa sálàla cuɛima cun kɛndɛlan te.

¹³ A bɛnda ma vow hɛlle o kpeyan n co Mɛlɛka sálà ɲɛm vaa solullo-o kpow nin. A bɛnda ma pɔɛɛnun le hɛlii kpema Hala nɔmndo vowvo o kpeyan nɔmndo nin te. O sálàla nɔmndan nin kpow, a bɛnda ma vow hɛlle.

¹⁴ Taa yeema pɛ le ya Mɛlɛka sálàá solullo a ɲɛm tasen n kow-von, a bɛnda ma yɔngu ya yasala n toŋ o yin má cui lan-ndan.

¹⁵ A bɛnda ma vow cuɛiyan lecoo, ma kɛsi vɛlɛ ansan lecoo. Sálà fula o ɲɛm vaan nin-ndo co kon ni.

¹⁶ O kon, vana-solia-lasálàá lom ɲɛ co le loonɔnndo a Mɛlɛka o kɔɔ-o: kpeyanndo o tiŋ, cuɛiyan matiŋ a lasikɔlɔ kon kpow. Sálà nda loam o yin le ya Mɛlɛka-o co kon ni.»