Tɔŋ lasálàá 19 - BII BILA

Mɛɛ vana va o diandaa Mɛlɛka o hɔl-lɛ

¹ Mí Mɛlɛka soaa o Moise lo, mó dimul ndu aa:

² «Soo o Israɛlla lo mà dimul nda aa: ‹La va vanaa diandaa, kani o diandaa fó-fó ya Mɛlɛka co ni, Hala niaa pɛɛn.

³ Niaa kpow, vana-vana bɛnda mò yɔngu kala ndɔ a fuɲa ndɔ bɛɛlen, mò bii paale pɛngiaalen mò ke len bɛɛlen. Ya co Mɛlɛka ni, Hala niaa pɛɛn.

⁴ La múlìn o halaa fondoa lo le nda sooloo le, la tééngiàà cilinndon o yin mì la cɔw piɔmnda a mun te. Ya co Mɛlɛka ni, Hala niaa pɛɛn.

⁵ Te la va pɛ ya Mɛlɛka sálà kɔlɲuloo solullo, la soli ndu mɛɛ o bɛnda le tosaa yɛ, haliko mi cɛl ndu.

⁶ La nɔla mì la de visin cɔlu nda soli sálàá-on paale sálà kon fulanin-nden a diimandɔɔ. Kɛ te vision lo pɛ kuya háá o paale yàándɔlen, la bɛnda mì la lom mun kpúlúká o yin.

⁷ Te vanndo de nin pɛ mun o paale yàándɔlen, mɛɛ visin tumulɛiyon o de mun ni, ya Mɛlɛka, i cɛl dɛnɛ kon te.

⁸ Vana de mun pɛ, mɛɛ o del kasi, o nɔɔliaa ɲɛ solin sálà le ya Mɛlɛka-o. Lelan, a faŋannin ndu Israɛlla tɛɛn few-few.

⁹ Lɔ́ɔ́ niaa tiiyanin o lɛŋnde ya yɔngu niaa len nin mì la cal-lo, la vàá pɛ ciɛɔn mì la va mun kovɔɔ, la cii mun kovɔɔ háá o dangalaa le, la cɔ́wviàà vɛlɛ yasala vanin delio o kovɔɔ lan te.

¹⁰ La múúngù vɛlɛ o nakɔla n'rɛsɛnnda niaala nin mì la kɛndu kpɔ̀nyɔ̀la koamaala niaa pɔɛɛnun-ndan te, la cɔ́wviàà rɛsɛŋun deli lɛŋ-ndon te. La bɛnda mì la mɛi ɲɛm mun le vanaa ikɔɔa a le mialaa co icali niaa o bɛngu coo-a. Ya co Mɛlɛka ni, Hala niaa pɛɛn.

¹¹ La yɔ́ŋ levui le, la dímùl caanda lacòò mì la tosal nda lakafa le.

¹² La pial diola nilan mì la mɛnan o còòlan coo le, kani vana tosa pɛ kon, mɛɛ o nɔɔliaa diola Hala ndɔɔ. Nduyɛ, ya co Mɛlɛka ni, Hala niaa pɛɛn.

¹³ La sáángiàà caaŋaa niaa le tɔnɔɔ sɔlaa o sanga nda kon nin te, la púú ɲɛ vana a sondo yeelaa le, la mándan sala vana baalaa bɛnda le sɔlaa hau-vo o ba háá siɔdii le.

¹⁴ La yéow vana nila baŋulɛiyo le, la hándù vana sumɛiyo ɲɛ laci mò kei boŋ ndon te. Kɛ la cɔm o kelala niaalan nin maa la nɔ bɛɛle nilen. Kani ya co Mɛlɛka ni, Hala niaa pɛɛn.

¹⁵ La tósà lakafa o yaman kiolɔɔ nin te: la sím vana bala fondoo kɔɔli o kafalan coo le, la sím vɛlɛ vana bɛndoo kɔɔli o còòlan coo le. Kɛ la kiolu yaman caanda o sandei nin.

¹⁶ La cóngù vanaa niaa co vanaa pilɛa-a le. La hɛ́ɛ́ndùù vanaa niaa co-a sɔɔn coo háá mà sɔla piɔ́mndo le. Ya co Mɛlɛka ni.

¹⁷ La nɔ́ nɛyɔn puapilɛa niaa o lakɔl te. Kɛ te a tosa pɛ sɔɛi vɔɔnde, la veelu nda mì la soo nda, yɔŋii niaa cua hakio le sɔɛi niaa kɛɛ nda-e.

¹⁸ La míngì màá le, la mándan sɔɔn vɔɔŋun vannda o lakɔl te. Vana-vana bɛnda mò kaola caanda maa ndu pila. Ya co Mɛlɛka ni.

¹⁹ La bii silala nilan. La bɛnda mì la muulian cɔlua co súú pilɛ le-a nda ŋiɔn mà hel te. La sáŋ yɛiyun co súú pilɛ loon mún miun o ciɛɔn niaan nin te. La cuɛ́inùn volɔɔla toosian a kɛilan súúlan tan tiɔn-ndan te.

²⁰ Te vanndo tosa pɛ kpelemɔɔsaa a cɛ laandu vana celen fula nin kɔɔli le nɔu-vo, kɛ te cɛ laandu kon sɔla vɔ baŋaa, te kon te hɔ́ɔ́yɛi ndɔɛi le, vana kon bɛnda mò luɛi bɔnɔ. Kɛ vanaa kan bɛnda mà sɔla piɔ́m te, kani cɛ laandu kon ndóò sɔla vɔ hɔ́ɔ́yɛi ndɔɛi le.

²¹ Vanapɔnɔ kon bɛnda mò hin o Mɛlɛka lo a saa kóndóó o cɛi-kola-toandaa-labɔɔŋianndo sondoo le sálà bɛɛndiaa isɔɔ solio.

²² O hin pɛ a ndu, vana-solia-lasálàá tosa ndu langbanɔ kon faleŋii baŋannde coo Mɛlɛka o hɔl. O kon, o sɔla hakio malɔɔ le dɛnɛ vɔɔn o tosa kon-ndo.

²³ Te la tiiya pɛ o lɛŋnde Kanaan-nden nin, mì la tɔl yɔmii koamɛi súú-súù ka, o vɔsilan tan yáá bɛngu, la diá kɔmnde tɔlɔɔla lan te, la cɔ len maa kɔmnde nɔɔlɛilen le co ni.

²⁴ O vɔsi hiɔɔlundɔɔ, kɔmnde tɔlɔɔla lan la koamnin-nden kpow le bɛnda mì le kɛsin le ya Mɛlɛka, mì la solul-la len sálà o paale kafo lisaa Mɛlɛka len coo.

²⁵ Kandɔɔ nin o vɔsi ŋuɛɛnundɔɔ, la nɔla mì la kɛndu kɔmnde len le niaa pila, mì la de. Te la tosa pɛ lende, tɔlɔɔla niaalan la kom kɔmnden pila, la vangalan. Ya co Mɛlɛka ni, Hala niaa pɛɛn.

²⁶ La diá vision a koovan lenin te. La vá vanaa mangalaa le. La vá vanaa viamaa yava le.

²⁷ La kɛ́làn bollen te, la séndìn kangbalan te.

²⁸ La bóólùù dialun niaan le dɛnɛ palaa le, la kiáŋnun vaasan lekɔɔ mì la tuula ɲɛ-ɲɛ o yáw niaa coo le. Ya co Mɛlɛka ni.

²⁹ La láásiàà cuavaa niaa laandua o nda vomɔɔ suunda soolaa n'piɔmndo le, yɔŋii lɛŋnden kpow le luɛi suunda kon mì vannda luɛi o mààlan.

³⁰ La bii paale pɛngiaalen mì la yɔngu len bɛɛlen. La yɔngu cɛi ni diandaa bɛɛlen. Ya co Mɛlɛka ni.

³¹ La sɔ́ɔ́nguu vanaa soaa a vanvílɛ́iya-a ikɛi le, la sɔ́ɔ́nguu vanaa mangalaa ikɛi le, yɔŋii niaa nɔɔlian maa nda. Ya co Mɛlɛka ni, Hala niaa pɛɛn.

³² La ce pɛ vanaa yuuvɛiya, la cɛn o fondala niaala calaa lan, la ke nda bɛɛlen. La ke ya Hala niaa bɛɛlen. Ya co Mɛlɛka ni.

³³ Te miallo hin pɛ le calle o lɛŋnde niaalen nin, la sáángiàà ndu le tɔnɔɔ sɔlaa o sanga ndɔ kon nin te.

³⁴ Kɛ la bíí ndu mɛɛ niaa bii Israɛlaa pilacieea yɛ, la kaola ndu maa niaa pila. Kani niaa bɛɛ, mialla niaa yɔŋnun o lɛŋnde Esipte len nin ni. La loonun a ken. Ya co Mɛlɛka ni, Hala niaa pɛɛn.

³⁵ La vá vanaa sandaa o ɲɛm niaa co tuuvo-on nin, o va o ɲɛm vana tuu a yoolen-ndon nin, o va o ɲɛm vana tuu a panio-on nin, o va vɛlɛ bɛɛ le ɲɛm pelepeleon tuuvo.

³⁶ La cua ɲɛla tuvaala n'ɲɛla bɛnda lan, la cua panila bɛnda lan a ndeveila bɛnda lan le ɲɔɔn tuuvo. Ya co Mɛlɛka ni, Hala niaa pɛɛn, ya soli niaa o lɛŋnde Esipte len nin ni.

³⁷ La bíí tɔŋnda nilan a silala nilan kpow, mì la tosa mɛɛ ya co niaa pɛɛkoo yɛ. Ya co Mɛlɛka ni.›»