Tɔŋ lasálàá 18 - BII BILA

Kpelemɔɔsaa bɛnda mò sɔla bɛɛlen

¹ Mí Mɛlɛka soaa o Moise lo, mó dimul ndu aa:

² «Soo o Israɛlla lo ma dimul nda aa: ‹Ya co Mɛlɛka ni, Hala niaa pɛɛn.

³ La vial vanaa niaa va tɛɛn Esipte-a a káà, mì la tosa sɔɔn nda co tosaa-on te, la vial vɛlɛ vanaa ya co niaa yɔɔ tɛɛn o lɛŋnde Kanaan-nden nin-nda a káà, mì la tosa sɔɔn nda vanin tosaa-on te. La kela maa vanaa kan te.

⁴ La bii silala fula ya Mɛlɛka o sondo lan, mì la bii tɔŋnda nilan. Kani ya co Mɛlɛka ni, Hala niaa pɛɛn.

⁵ La bii tɔŋnda nilan a silala nilan. Vana bii lan pɛ mò kela lecoo, ndu sɔla yoomoo lenin. Kani ya co Mɛlɛka ni.

⁶ O niaa tɛɛn, vana-vana bɛnda mò tosa kpelemɔɔsaa a vana co vanayɛi ndɔɛi-yo le. Ya co Mɛlɛka ni.

⁷ A bɛnda ma tosa kpelemɔɔsaa a kala nɔm te, yɔŋii n cii fuɲa nɔm labɛɛ. A tosa pɛ kpelemɔɔsaa a kala nɔm, mɛɛ a tɛɛmbuu ndu labɛɛ, kani kala velu nɔm-ndo o co ni.

⁸ A bɛnda ma tosa kpelemɔɔsaa a lanɔɔ fuɲa nɔm te. A tosa pɛ kon, mɛɛ a cii fuɲa nɔm labɛɛ.

⁹ A bɛnda ma tosa kpelemɔɔsaa a yema nɔm te, o va yema nɔm fuɲa pilɔɔ o va yema nɔm kala pilɔɔ. Hali o va bɛɛ maa la vilun o yungule pilɛ nin niaa ndu le, te kon te la mandan o yungule pilɛ nin niaa ndu le, a bɛnda ma tosa kpelemɔɔsaa a ndu le.

¹⁰ A bɛnda ma tosa kpelemɔɔsaa a cua nɔm imamaa le, o va cua po nɔmndo, o va cua cua nɔmndo. Kani a tosa pɛ kon, mɛɛ nɔm pila ciinun labɛɛ.

¹¹ A bɛnda ma tosa kpelemɔɔsaa a cua lanɔɔ fuɲa nɔm velu nda fuɲa nɔm-ndo le. Kani yema nɔm o co ni.

¹² A bɛnda ma tosa kpelemɔɔsaa a yemaa fuɲa nɔm te, kani kooma pilɛan kpeekpei nda co nda fuɲa nɔm ni.

¹³ A bɛnda ma tosa kpelemɔɔsaa a pɔmbɔɔ kala nɔm, te kon te bɛndoo kala nɔm te, kani kooma pilɛan kpeekpei nda co nda kala nɔm ni.

¹⁴ A bɛnda ma cii pɔmbɔɔ fuɲa nɔm, te kon te bɛndoo fuɲa nɔm labɛɛ ma tosa kpelemɔɔsaa a laa ndɔ le, kani kala nɔm laa ndɔ kon bɛɛ co ni.

¹⁵ A bɛnda ma tosa kpelemɔɔsaa a lanɔɔ po nɔmndo le. A bɛnda ma timbi ndu kolaa le.

¹⁶ A bɛnda ma tosa kpelemɔɔsaa a lanɔɔ bɛ nɔm, te kon te lanɔɔ pɔmbɔ nɔm te, yɔŋii n cii bɛ nɔm kon, te kon te pɔmbɔ nɔm kon labɛɛ.

¹⁷ A bɛnda ma tosa kpelemɔɔsaa a vanalanɔɔ, ma tosa vɛlɛ kpelemɔɔsaa a cua ndɔɔ le. A bɛnda vɛlɛ ma va a cua cua ndɔɔ, te kon te cua po ndɔɔ le, kani vanayɛi nda co ni. A tosa pɛ kon, mɛɛ mààla bɛndu-bɛndulan n tosa lende ni.

¹⁸ Te laa nɔm co vɔ pɛ yoomu, a bɛnda ma yil pɔmbɔ ndɔ, te kon te bɛ ndɔ o nɔ̀u nin te. Yɔŋii n va a ndu ma luei tanda bɛndu idiɛɛmuyaa nda tɛɛn.

¹⁹ A bɛnda ma tosa kpelemɔɔsaa a vanalanɔɔ telen o co paangii ndɔɛi cɔu-vo le, kani o nɔɔlɛiyo vanalanɔ kon co Mɛlɛka o hɔl o telen kon nin ni.

²⁰ A bɛnda ma tosa kpelemɔɔsaa a lanɔ pilaa le, yɔŋii n siŋnun vana nɔlɛiyo Mɛlɛka o hɔl.

²¹ A bɛnda ma soli hɔ́ɔ́ nɔmndo sálà o piɔmndo Molɛk lo le. Kani a tosa pɛ lende mɛɛ a del kasi a diola nilan, a tɛɛmbuu lan labɛɛ. Nduyɛ, ya co Mɛlɛka ni, Hala niaa pɛɛn.

²² Nɔm vanapɔnɔɔ, a bɛnda ma tosa kpelemɔɔsaa a vanapɔnɔɔ mɛɛ vana tosa kpelemɔɔsaa a vanalanɔɔ nuaa yɛ le. Taa tosa lende pɛ, mɛɛ mààla vɔɔnndan pila n tosa lan ni.

²³ A bɛnda ma hini a cɔloo le, yɔŋii n nɔɔlian Mɛlɛka o hɔl. Vanalanɔɔ bɛɛ bɛnda mò hini a cɔloo le, kani dɛnɛ lamàà bɛndu-bɛndoo pila co kon ni.

²⁴ Niaa pila nɔɔlian a dɛnnda vaa lende tosaa le. Sɔɔn nɔɔlɛin mun koni vanaa ya co tovɔɔ niaa laci-a va tosaa ni, má nɔɔlian ya Mɛlɛka o hɔl.

²⁵ Le kelala ndalan, mí lɛŋnde ndalen le siŋnun lɛŋnde nɔɔlɛilen, mí soaŋ lɛŋnde kalalen háá mí vanaa va lenin-nda sɛŋin.

²⁶ Niaa Israɛlla yɛ, a mialaa co niaa o bɛngu coo-a kpow, la bii tɔŋnda nilan mì la yaŋ nilan o silala nilan. La kpakpala sɔɔn nɔɔlɛin vɔɔnndon mun.

²⁷ Kani sɔɔn lamààn nɔɔlɛin mun vanaa va icali niaa laci o lɛŋnde len nin-nda va tosaa ni. A lo yɔŋ vɔɔn kon tosaa háá mí lɛŋnde len le nɔɔla ya Mɛlɛka o hɔl.

²⁸ Mɛɛ lelan, niaa, la nɔɔliaa lɛ len nɔɔliaa celen te, yɔŋii niaa bɛɛ sɛŋin mɛɛ vanaa va icali niaa laci lon-nda sɛŋin yɛ.

²⁹ Kani vanaa delnin yɔŋ vɔɔn vaa lende kɔɔli, mà kela kela nɔɔlɛi kon-nda, a toawnunnin polon mà faŋan Israɛlla tɛɛn few-few.

³⁰ Le hee, la bii tɔŋndo ho mì la lo lecoo sakpo. La tosa dɛnnda vɔɔnnda va tosanndo niaa laci o lɛŋnde len nin-ndan te few, yɔŋii niaa siŋnun vanaa nɔɔlɛiya. Ya co Mɛlɛka ni, Hala niaa pɛɛn.›»