Tɔŋ lasálàá 17 - BII BILA

SILALAN LE DIONDƆƆ ISRAƐLLA Silalan le kooma cɔlua

¹ Mí Mɛlɛka soaa o Moise lo, mó dimul ndu aa:

² «Soo o Aarɔn ndo, o poaa ndɔa lo a o Israɛlla kpow lo, mà dimul nda aa nuaa Mɛlɛka soo ni mó dimi aa:

³ ‹O Israɛlla kpow tɛɛn, te vanndo pum yeema pɛ le nawvo, saa, te kon te cuinndo bololan kiolɔɔ o dɔ́ɔ́ngɔ́ɔ̀ nin, te kon te o dɔ́ɔ́ngɔ́ɔ̀ kɔɔli,

⁴ o bɛnda mò hin-ndɔ fɔlɔn a cɔlu kon o cɛi-kola-toandaa-labɔɔŋianndo sondoo, mò cɔm ya Mɛlɛka ndu o Calta nilan hɔl-ndɔ maa sálà. Te o hin a ndu le, o dii ndu pɛ a ba ndɔ lende, mɛɛ o del kasi le kooma o soli man ɲɛ yoomaa-an. Kani o co mɛɛ tɔŋndo dimi yɛ le o dii cɔlu kon te. Lelan, a bɛnda ma faŋa vana kon Israɛlla tɛɛn few-few.

⁵ Tɔŋndo ho tosanin ni, Israɛlla ve lɛnin cɔlua diwvo yondoo nin te, kɛ ma va hunɔɔ a nda o vana-solia-lasálàá lo o cɛi-kola-toandaa-labɔɔŋianndo sondoo, mà solul Mɛlɛka sálà kɔlɲuloo a cɔlua kan.

⁶ Mì vana-solia-lasálàá vesul koovan o fonda-loamaa-lasálà co o cɛi-kola-toandaa-labɔɔŋianndo sondoo-o. O kon, mò lom cuɛima ndan o fonda-loamaa-lasálà kon coo, ɲɛ ya Mɛlɛka tuɛi cun mì ɲɔɔ hɛnan ya-o co kon ni.

⁷ Hee tosan pɛ, Israɛlla pɛngi halaa fondoa nɔ hɔlla maa cuinaa toovi-a sálàlan solullo, à nda co laasianndo kɔɔli ma va nda sooloo-a pɛɛn. La bɛnda mì la bii silaa ho, kandɔɔ a niaa pila kɔ bii a cuavaa niaa imamaa.›

⁸ Mà dimul vɛlɛ nda aa: ‹Te cua pilacieo Israɛl, te kon te mial co niaa o bɛngu coo-o yeema pɛ le sálà loamaa, te kon te sálà súú celen solio,

⁹ o bɛnda mò hin a cɔlu ndɔ sálà kon o cɛi-kola-toandaa-labɔɔŋianndo sondoo, mò soli ndu sálà o Mɛlɛka lo. Te o hin a ndu le, mɛɛ o del kasi, a bɛnda mà faŋa ndu Israɛlla tɛɛn few-few.

¹⁰ Te cua pilacieo Israɛl, te kon te mial co niaa o bɛngu coo-o de pɛ kooma cɔlu súú-súù, i co ndu mululɔn, mì faŋa ndu Israɛlla tɛɛn few-few.

¹¹ Kani o koovan nin yoomu ɲaa yoomaa co ni. I yɔngu niaa man le kpekoo solinndo a man o fonda-loamaa-lasálàá coo, haliko mi ma baŋa yoomu niaa. Le tùú yoomoo co o koovan nin-ndo, lelan ma báŋà yoomoo ni.

¹² Mɛɛ le kɔlɔɔ ho ya dimul Israɛlla ni aa: kandɔɔ a niaa pila kɔ bii a mialaa co icali niaa o bɛngu coo-a, vana-vana dia koovan te.

¹³ Te cua pilacieo Israɛl, te kon te mial co niaa o bɛngu coo-o bii pɛ visi vana dia-o, te kon te yow vana dia-o o doosulen, o bɛnda mò soli visi kon, te kon te yow kon koovan, mò tala man lɛŋ, mò kumbu man a puuloo.

¹⁴ Kani yoomu ɲɛ yoomaa, o kooma ndɔan nin o co ni. Mɛɛ le kɔlɔɔ ho ya dimul niaa Israɛlla ni maa la dia kooma ɲɛ yoomaa le, kani koovan ma co yoomu ɲaa yoomaa kpow ni. Vana-vana de pɛ man, a faŋa ndu Israɛlla tɛɛn few-few.

¹⁵ Te cua pilacieo Israɛl, te kon te mial co icali niaa o bɛngu coo-o de pɛ visi vi a ba ndɔ-o, te kon te visi visi biyaa dii-o, vana kon bɛnda mò tɔɔ volɔɔla ndɔla cuɛinanndan, mì ndu pila pulun cɛ́kɛ́lɛ́, mò lo o nɔɔlɛiyo Mɛlɛka o hɔl háá icɔllo. O kon kɔɔli, o dendu.

¹⁶ Te o too volɔɔla ndɔla cuɛinanndan mò pulun te, mɛɛ o del kasi.›»