Tɔŋ lasálàá 16 - BII BILA

Paale bɛndule malaa lahakilen

¹ Mɛɛ poaa ŋiɔŋaa Aarɔn-nda vi lɔ́ɔ́ nda hin Mɛlɛka o hɔl-lo, mí Mɛlɛka dimul Moise aa:

² «Dimul Aarɔn bɛ nɔm aa o va hiovɔɔ telen oo telen o kola-landaa co o Cɛi-Diandaa nin-ndo kɔɔli le tiiyaa o Fonda Diandaa-Diandaa nin te, o kumbu kesu kpemaa hɔl-ndɔ pɛɛn. Te o va pɛ hiovɔɔ lon telen oo telen, lɔ́ɔ́ o co komal mì fula o kumii bɛndu-bɛnduei nin o kumbu kesu kpemaa coo-o, o co ɲinkon piɔ́mndo sɔla.

³ O va pɛ le luɛyɔɔ o Cɛi-Diandaa nin, ɲɛm o bɛnda mò luɛi o ba-on co mun ni: naw tovaa o pilɛ le sálà co le hakio sɔlaa malɔɔ-o solio a saa kóndóó o pilɛ le sálà loamaa solio.

⁴ O bɛnda vɛlɛ mo cuɛinun doma lebɛngu toosian a kola keesoo-o, mò vownun lɛmbɛla lebɛngula toosian a kola keesoo lan, mò yiinun yáwle toosian a kola keesoo len, mò vownun mɔsil toosian a kola keesoo-o. Mɛɛ volɔɔla lan la co ladiandaalan Mɛlɛka o hɔl-lɛ, o bɛnda fɔlɔn mò pulun malan o vownun ndan.

⁵ Israɛlla bɛnda mà yɔngu ndu cuinaa toovia nda ŋiɔn le sálà co le hakio sɔlaa malɔɔ-o solio, a saa kóndóó o pilɛ le sálà loamaa solio.

⁶ O kon, Aarɔn soli sálàá a naw tova co le hakio sɔlaa malɔɔ-o le haki ndɔ ndu pila-o, o tosa faleŋii baŋannde le hakio sɔlaa malɔɔ le ndu pila a le yungule ndɔlen.

⁷ O cii pɛ, o cua cuinaa toovia ŋiɔŋaa Israɛlla hin-nda, o hin a nda Mɛlɛka o hɔl o cɛi-kola-toandaa-labɔɔŋianndo sondoo,

⁸ o mal siondei le sinaa cuin toovi co le Mɛlɛka-o a o co le Asasɛl-lo.

⁹ O mal pɛ siondei lende, o cɔm cuin toovi siondoolen le bii le Mɛlɛka-o, o kon o soli ndu sálà co le hakio sɔlaa malɔɔ-o.

¹⁰ Cuin toovi siondoolen le bii le Asasɛl-lo yɛ, a bɛnda ma simi ndu o kiyɛiyo Mɛlɛka o hɔl, le ndu faleŋii baŋannde tosaa coo a le ndu tovɔɔ nɛɛ levil polon-polon o lɛŋnde veselɛilen nin le Asasɛl.

¹¹ O kon, Aarɔn kandu a naw tova co le sálàá le haki ndɔ ndu pilaa-o, o tosa faleŋii baŋannde le hakio sɔlaa malɔɔ le ndu pila a le yungule ndɔlen. O kelu pɛ naw tova kon bololan,

¹² o cua bonyii fuusɛi co ipiaa a dɛngultan-nde, lá nda cua o yin o fonda-loamaa-lasálàá coo Mɛlɛka o hɔl-tan, o ɲɔla ansan funguɲaa bala tiɔn sakpo, o kɔɛ a ɲɛm mun o Fonda Diandaa-Diandaa nin, o kola-landaa co o Cɛi-Diandaa nin-ndo kɔɔli.

¹³ O tiiya pɛ lon a ɲɛm mun, o cucu ansan funguɲa kon o yin Mɛlɛka o hɔl. O kon, kumnde kumbu kúmbú co o kesu kpemaa coo-o kpow. O tosan pɛ lende, Aarɔn sɔla piɔ́mndo le.

¹⁴ O kon kɔɔli, o cua kooma naw tova kon, o vow suei lenin, o vesul man o kumbu kesu kpema kon a ba paalen le can-ndo, o vesul vɛlɛ man bɛmbɛ leŋɔmmɛw o kesu kpemaa laci.

¹⁵ Kon cuu pɛ, o kelu vɛlɛ cuin toovi yɔngun le sálàá le haki Israɛlla-o bololan, o hiow a kooma cuin kon o kola-landaa co o Cɛi-Diandaa nin-ndo kɔɔli, o tosa mɛɛ o tosa a kooma naw tovaa yɛ, o suu man o kumbu kesu kpemaa coo a laci.

¹⁶ Mɛɛ lende o tosanin faleŋii dindiannde o Cɛi-Diandaa coo le tùú Israɛlla nɔɔlian-ndo a le nila kalula ndalan ni, kon co dimio ni maa le hakila ndalan kpow. O cii pɛ, o tosa vɛlɛ faleŋii pilɛi ken le cɛi-kola-toandaa-labɔɔŋianndo dindio, kani vanaa cɛi-kola-toandaa-labɔɔŋian kon co tɛɛn-nda co a nɔɔlɛiya.

¹⁷ Kandɔɔ telen Aarɔn luɛinin o Fonda Diandaa-Diandaa nin le faleŋii baŋannde tosaa-o, háá telen o fulanin lon-ndo, vana-vana bɛnda mò va o cɛi-kola-toandaa-labɔɔŋianndo nin te. O cii pɛ faleŋii baŋannde tosa le ndu pila, le yungule ndɔlen a le Israɛlla kpow,

¹⁸ o fula o cɛi-kola-toandaa-labɔɔŋianndo nin, o kɔɛ o fonda-loamaa-lasálà co o cɛi-kola-toandaa-labɔɔŋian kon laci-o ikɛi. O tiiya pɛ, o tosa faleŋii dindiannde o fonda-loamaa-lasálà kon coo. O kon, o kɔndu kooma naw tovaa ɲɛ-pɔmbɔ a kooma cuin toovio ɲɛ-pɔmbɔ, o suu man o kpɛ̀ɛ́n fonda-loamaa-lasálà kon.

¹⁹ O kon kɔɔli, o vow suei ndɔɛi lenin, o vesul man bɛmbɛ leŋɔmmɛw o fonda-loamaa-lasálàá, o mingi ndu dindi Mɛlɛka o hɔl haliko mo sɛyan vɛlɛ a yɔŋnda vɔɔnnda Israɛlla.

²⁰ Te Aarɔn cii pɛ faleŋii baŋannde tosa le Cɛi-Diandaa, le cɛi-kola-toandaa-labɔɔŋianndo a le fonda-loamaa-lasálàá, o hin vɛlɛ a cuin toovi lo yoomu-o.

²¹ O kon, o handu bala ndɔlan cuin toovi kon o lebol, o sɔlɔlan hakila Israɛlla, nila kalula ndalan a tɛɛmbuula ndalan kpow, o vow lan cuin kon coo. O kon kɔɔli, vana hɛlin lelan-ndo kɔɛ a cuin kon, o tow ndu o lɛŋnde veselɛilen nin polon.

²² Te o tosan pɛ lende, mɛɛ cuin toovi kon kɔɛ a hakila Israɛlla kpow o lɛŋnde veselɛilen nin. Taa tow pɛ cuin kon o lɛŋnde veselɛile len nin,

²³ Aarɔn muungu o cɛi-kola-toandaa-labɔɔŋianndo nin, o soli volɔɔla kola keesela va ndu lekɔɔlan, o luɛi o Fonda Diandaa-Diandaa nin, o kɛsi lan ndon.

²⁴ O kon kɔɔli, o kɔ pulun cɛ́kɛ́lɛ́ o nɛɛ diandaa pum, o mingin volɔɔla ndɔlan lekɔɔ. O kon, o kɔ soli sálàla loamaala tiɔnndan le ndu pila a le Israɛlla kpow. O cii pɛ, o tosa faleŋii baŋannde le hakio sɔlaa malɔɔ le ndu pila a le Israɛlla kpow.

²⁵ Kon hiow pɛ, o lom visin macuɛin cɔlua nda yɔngu kan le sálàá solio le hakio sɔlaa malɔɔ-a o fonda-loamaa-lasálàá coo.

²⁶ Vana kɔɛ a cuin toovi co le Asasɛl-lo o lɛŋnde veselɛilen nin-ndo bɛnda fɔlɔn mo tɔɔ volɔɔla ndɔla cuɛinanndan, mì ndu pila pulun fó-fó malan o muungu niko o dɔ́ɔ́ngɔ́ɔ̀ nin.

²⁷ Naw tovaa a cuin toovi nda yɔngu le sálàá solio le hakio sɔlaa malɔɔ-o-a, à Aarɔn kɔɛ a kooma ndan o Cɛi-Diandaa nin le faleŋii baŋannde tosaa-a, a bɛnda ma soli nda o dɔ́ɔ́ngɔ́ɔ̀ kɔɔli, mà lom yáwla ndalan, visin ndan a ɲɛm co nda o ladembe-on kpow o yinnden nin.

²⁸ Vana loamnin nda-o bɛnda mò tɔɔ volɔɔla ndɔla cuɛinanndan, mì ndu pila pulun cɛ́kɛ́lɛ́ malan o muungu o dɔ́ɔ́ngɔ́ɔ̀ nin.

²⁹ Tɔŋ niaa bɛnda mì la bii le fɛɛn a fɛɛn-ndo co hoo ni: o paale tɔ́ndɔlen coo o paangii ŋɔmmɛwndɔɛi nin, kandɔɔ a cuavaa pilacieea Israɛl, kɔ bii a mialaa co niaa o bɛngu coo-a, la bɛnda mì la mal valtan kpow, mì la bii sumndo.

³⁰ Kani paale len nda co niaa faleŋii baŋannde le hakio sɔlaa malɔɔ a faleŋii dindiannde tosa coo Mɛlɛka o hɔl ni. O kon, la sɔla hakio malɔɔ a dindio le yɔŋnda niaala vɔɔnndan kpow.

³¹ La bɛnda mì la niinu pɛngio ɲinkon kpɛŋ, mì la bii sumndo. Tɔŋ niaa bɛnda le biyɔɔ le fɛɛn a fɛɛn-ndo co kon ni.

³² Vana bɛnda mò tosa faleŋii baŋannde-o, ndu co vana-solia-lasálà sɔla pɔlaa mo siŋnun teengen le vali solia lasálàá tosaa-o ni. Ó sɔla pɔlaa le lou o fonda fuɲa ndɔ-o, le siŋnɔnndo bolle vanaa-solia-lasálàá-o pɛɛn. Le faleŋun mun tosaa, o bɛnda mò cuɛinun volɔɔla toosian a kola keesoo lan, lan la co ladiandaa Mɛlɛka o hɔl ni.

³³ O cuɛinun pɛ volɔɔla lan, o tosa faleŋii dindiannde le Fonda Diandaa-Diandaa, le cɛi-kola-toandaa-labɔɔŋianndo, le fonda-loamaa-lasálàá, le vanaa-solia-lasálàá a le Israɛlla kpow.

³⁴ Tɔŋ niaa bɛnda le biyɔɔ le fɛɛn a fɛɛn-ndo co kon ni. La bɛnda mì la bii ndu haliko mi la sɔla hakio malɔɔ le hakila niaalan kpow bɛmbɛ lepilɛ o vɔsio nin, niaa Israɛlla pɛɛn.» Má tosa ɲɛ-ɲɛ Mɛlɛka dimul nda a sondo Moise-o.