Tɔŋ lasálàá 12 - BII BILA

Mɛɛ vanalanɔ velu sɛnɛi-yo bɛnda le dindinndo yɛ

¹ Mí Mɛlɛka soaa o Moise lo, mó dimul ndu aa:

² «Soo o Israɛlla lo, má dimul nda aa: ‹Te vanalanɔɔ cua pɛ folio mò velu hɔ́ɔ́ piaandoo, o lonin o nɔɔlɛiyo Mɛlɛka o hɔl háá o palɛi ndii ŋɔmmɛw bɛngu, o lonin o nɔɔlɛiyo maa telen o ca paangii ndɔɛi-yo.

³ O paale ŋɔmaandɔlen, a dii cɛlɛkpɛ kon tooma.

⁴ O kon kɔɔli, komsa kon lo vɛlɛ dindinndo o palɛi beleyaa a iyaa bɛngu le kooma fula ndu lekɔɔ o violɔɔ-an. O palɛi ken bɛngu, o bɛnda mò pilan ɲɛ-ɲɛ kɛsin teengen le vali Mɛlɛka-o le, o bɛnda vɛlɛ mo kɔɛ o Cɛi-Diandaa nin te, háá mì palɛi kelun le dindin ndɔɔ-e cuu.

⁵ Te hɔ́ɔ́ laandoo o velu ni, komsa kalaa lonin o nɔɔlɛiyo Mɛlɛka o hɔl háá palɛi tɔ́ a ihiɔɔlu maa telen o ca paangii ndɔɛi-yo. O kon, o lo vɛlɛ dindinndo o palɛi belaŋɔmpum a iŋɔmpum bɛngu le kooma fula ndu lekɔɔ o violɔɔ-an.

⁶ Te palɛi ndɔɛi dindiannde cuu pɛ le hɔ́ɔ́ piaandu, te kon te le hɔ́ɔ́ laandu o velu-o, komsa kon yoo vana-solia-lasálàá saa téndé nɔ vɔsio pilɛ-o le sálà loamaa solio, a kangboo pilɛ, a piindo pilɛ le sálà co le hakio sɔlaa malɔɔ-o solio o cɛi-kola-toandaa-labɔɔŋianndo sondoo.

⁷ O yɔngu pɛ lende, vana-solia-lasálàá soli sálà kon o Mɛlɛka lo, o tosa faleŋii dindiannde le komsa kon. O kon, komsa kalaa sɔla diondɔɔ le kooma fula ndu lekɔɔ-an. Tɔŋndo co hoo le vanalanɔ velu hɔ́ɔ́ piaandoo, te kon te hɔ́ɔ́ laandoo-o ni.

⁸ Te vanalanɔ kon nɔ se le saa téndóó sɔlaa le, o yɔngu piinda nda ŋiɔn, te kon te kangboa nda ŋiɔn, o pilɛ le sálà loamaa solio, o pilɔɔ le sálà co le hakio sɔlaa malɔɔ-o. O kon, vana-solia-lasálàá tosa faleŋii dindiannde le ndu, kon tosa ni mì komsa kon dendu Mɛlɛka o hɔl.›»