Cɛɛŋɔnnda Yeremi lan 4 - BII BILA

Mɔnɛi luɛi Yerusalɛm

¹ «Kpòkóó! Vɛ̀ɛ̀ sianin sɔvɛɔn mun n looku yɛ sɔvaa, sianin diandan mun pɛɛn? Powta diandaalan la cuu saŋnɔn o sɔngila nɛila pɔmbɔlan kpow.

² Cuawva Siɔn a vannun a sɔvɛ maa sianin diandaa, kɛ a muungunin maa kpɛɛnɛi puulu, i vana cɔavaa n'kpɛɛnɔɔ cɔw a laba-e pɛɛn!

³ Hali tivolla, mà soli mɛɛyan le cuavaa ndaa vɔɛsio. Kɛ vanaa nia siŋnun vanaa kɔlvesɛiya maa soninkɔnɔa co o lɛŋnde veselɛilen nin-nda.

⁴ Kolɔɔ biyɔɔ cɛlɛkpɛa tei, mí diɛɛmuei biilan nda o sondolan lenin. Cuaambɔa co ɲɛdiaa piɛiyo, kɛ vana co le nda ndu keo le.

⁵ Vanaa va ɲɛdiaa sɔvɛɔ dioo-a co delio a yɔkpɛiya o nɛilan coo. Vanaa ndáà manda o yelela bɛndoo nin-nda muungu sáltan yaasiaa a laba.

⁶ Tɛɛmbuula vanaa nia la hiow levɔw a dɛnnda vɔɔnnda vannda Sodɔm tosa lan. Vana-vana hol nda ba le, má tambu o biɔŋɔɔ lepilɔɔ.

⁷ Vanaa ndaa bɛndua ndáà hiow fengbɔɔ diondɔɔ, ndáà hiow nɔnɔɔ diondɔɔ. Kɔɔle ndalen léè hiow ningilaa a pow kpɔlɔkaa. Hɔlaa ndaa va tengaa maa pow safir.

⁸ Kɛ nda hiow nin piimiaa kpilo. Vana bɔŋan nin bɛɛ a nda, a nɔla nda sinaa le. Yáwvo daama lo nin nda o holnan o paalan ni, yáw kon bɛɛ co o vesɛiyo maa yɔm vesɛi.

⁹ Vanaa co vuo o mɔɛi cɔwve bɛngu-a co fisa a vanaa co vuo a yiaan-nda. Vanaa co ɲawvo le pɛŋnde baloo-a, balo fula ɲɛm vaan nin-ndo pɛɛn.

¹⁰ Hali a kaola vialaa vanlaandua nɔ-o kpow, nda pila co cuavaa ndaa yawvo le dioo, le dɛnɛ palaa bɛndu tol nda coo-o.

¹¹ Mɛlɛka cii kɔltuw ndɔɔ kpow soli, o cii kɔlfulaa ndɔ bɛndoo cuiŋi. O mɛndul yinnde kɔltuwle ndɔlen Siɔn, mì le va tumnda Siɔn kilan coo lan lomɔɔ.

¹² Masaa co o lɛŋnden coo-a a vanaa co o ceendo coo-a kpow a laalan te maa yaamɔɔa ndáà keinin o diola kpakio, mì ndáà luɛi Yerusalɛm.

¹³ Dɛnɛ palaa kon yɔŋnun le hakila vanaa-tɛɛngaa-diom Hala-a a dɛnnda vɔɔnnda vanaa-solia-lasálàá tosa lan. Nda diw vanaa sandaa o kobi kon nin ni.

¹⁴ A co kelaa iyiindo-yiindoei o nɛilan coo maa vanaa sumɛi. Volɔɔla ndalan láà hiw bɔɔ lɔngɔlianndo a koovan, vanáà nɔla lan pilan te.

¹⁵ Mí vannda deŋul nda aa: ‹La faŋan naa ikɛi! La nɔɔla bɔɔ. La faŋan naa ikɛi! La pilan naa le dɛ!› Telen nda co kon ɲaanɔn, mà va kɔlan ba-ba fee-o, vanaa-mangalaa-isɔɔa diminin aa: ‹Haa cel-lɛnin o naa lo le lɔ́ɔ́ levil te.›

¹⁶ Mɛlɛka pila cii nda saŋɔɔ, o nɔ lɛ nda lehɔl coo le. Vannda ke vanaa-solia-lasálàá lebɛɛ le, a tosa iɲíí a bɛndua yuuvɛiya le.

¹⁷ Hɔlta naalan la co sangaa tofaa le mala sɔlannin too cumndo. Cumndo tuŋ naa n va o fondala naala cumulaa lan ni. N sanga vanaa-mangalaa-isɔɔa pum cumndo le naa baŋaa, kɛ a hin te few.

¹⁸ Vannda va foofola pelun nan fɛfɛlaa, a ve naa cɛlɔɔ le kɔlan o fondala naalan te. Mɛɛlula naalan la sɔɔnguu, palɛi nɛi cuu. Daama ni!

¹⁹ Vanaa co naa tovɔɔ-a hiow keleŋaa a kovɛa kela coocoo-a. À co naa kiltan kɔɔli o pembon coo, à co naa cumullo o lɛŋnde veselɛilen nin.

²⁰ Vana yoomu naa co o ba-o, ndu del o soon yaamɔaa ndɔa nin. Vana Mɛlɛka hɛli kon-ndo pɛɛn, ò naa n co dimio-o aa: ‹N calnin mì n va yoomu vanaa-mangalaa-isɔɔa tɛɛn o vundule ndɔlen bɛngu›.

²¹ Niaa Edɔmnda, la dɔwnun ɲaale alɛ. Niaa vanaa co icali o lɛŋnde Ut len nin-nda, niaa bɛɛ, taala kólaa iyamaa co niaa komal mì la kol lenin, mò bii niaa maa mamɔi, mì la fulan tum fondo kpedekele.

²² Niaa vannda Siɔn, bɛpɛla niaa cuu le hakila niaalan. A kue lɛnin a niaa o cɛle celen nin te. Kɛ nia Edɔmnda, Mɛlɛka co hunɔɔ niaa lɔɔ le hakila niaalan, mò soli dɛnnda niaala vɔɔnndan ceen vakpa.»