Cɛɛŋɔnnda Yeremi lan 3 - BII BILA

Kɔlkɛsiaa co le vanaa co o sanga bɛndoo nin-nda

¹ «Vanapɔnɔ mɔnɛi bii o sionnde kɔltuwle Mɛlɛka len bɛngu-o ya co ni.

² O sim ya laci, mó kɔa a ya o ɲumndan nin, o ve o ɲɛ-tengaa nin te.

³ Lepalaa-lepala o va ya baa holɔɔ. Ya pilɛ kpé o va lɔɔ ni.

⁴ O siɔŋi ya kɔɔlen yukulu, mó yimiyimi ya paalan.

⁵ O tiila ya mó kunga ya a dɛnnda imɔnɔlan a á sangaa.

⁶ O kɛsi ya o ɲumndan nin maa vanaa vi nin sindɛ pa-a.

⁷ O luei ya o píŋndo nin yɔŋii ya fula, mó baa ya kpɛ́ɛ́ n'yɔlɔɔ.

⁸ I sanga yondaa haa le malaa sɔlaa, o cɛl mì piɛile nilen le tiiya le.

⁹ O hɛɛnduu powta bɛndulan ya o nɛi, mó mal-la kɔlan o nɛi vɔɔndo coo.

¹⁰ O yɔŋnun le ya maa kɔ́lɔ́vúlu cal mɛngɛla-o, maa yàlá co o kungulanndo o bungɛi nin-ndo.

¹¹ O tosa mí pɔw nɛi nuu, mó sɛɛsiaa ya, mó dɔaw ya yɛɛvɛ.

¹² O kindu kpaasiaa ndɔɔ, mó yulu ya le ya viɔw a kɔɛi ndɔɛi.

¹³ O buuluu ya kɔlkelon a kɔɔn ndɔn kpow.

¹⁴ I siŋnun ɲɛ mamaa vanaa nia kpow o ba, lepalaa-lepala, i co nda o sondo maa icondu.

¹⁵ O pimi ya ɲɛ loloo, mó koesi ya mɔnɛi, mí bii ya maa mamɔi.

¹⁶ O tosa mí yimi ciŋndon o tɛnɔ̀ɔ́ coo, mó nɛw ya o pultan nin.

¹⁷ O faŋa kɔlɲuloo ya ikɛi few-few, mí pɔɛɛnun ɲɛ co dɛnɛ kɛndɔɔ-o.

¹⁸ O kon mí dimi aa: ‹Mbɔ̀ tiindan nuu tambu, i nɔ lɛ kɔlkɛsiaa kɛ́-kɛ̀ Mɛlɛka coo le.

¹⁹ I yiyan pɛ siɛmbula bii ya lan a kelan fondo ya kei-yo, ɲɔɔ lol-la o kɔl maa ɲɛ lolo.

²⁰ I keela pɛ kɔl nuu lecoo kpede, mɔnɛi luɛi ya o kɔl taw-taw.

²¹ Ɲɛ ya co mandanndo o kɔl kínɛí-yo co ho ni: I nɔ tiindanndo maa.

²² Vanakɛndɛyɛi Mɛlɛka-e cuu le, ɲíí ndɔɛi nɔ lamɛɛlu le.

²³ Idii oo idii, vanakɛndɛyɛi ndɔɛi a ɲíí ndɔɛi muungu n'sɛnɛi. Mɛlɛka, Vana lo o diomden coo-o kpeekpeiyo n co ni.

²⁴ Kɔl nuu dimi aa: Mɛlɛka co kɛ́ nuu ni, lelan ya co ndu cumndo ni.

²⁵ Mɛlɛka naŋ le vana kɛsi ndu kɔllo coo-o, le vana co ndu nuwviaa-o.

²⁶ O naŋ le cinda Mɛlɛka-o cumndo o meiyo nin.

²⁷ O naŋ le vanacieo sangaa biuvɔnndo o felengiyɛi ndɔɛi nin.

²⁸ O bɛnda mò cal ndu pilɛ kpé o meiyo nin, kani sanga kon tol ndu coo ni.

²⁹ O bɛnda mò tuisin háá mò mal sondo o cundoo nin. Bɔɔle mò sɔla kɔlkɛsiaa le ken.

³⁰ O bɛnda mò tɛilu vana co ndu lɔɔ-o kpannde, mò pim siɛmbula nda co ndu tuisio lan.

³¹ Kani Mɛlɛka kɛɛ vana le lɔ́ɔ́-lɔ́ɔ̀ le.

³² O tuisi bɛɛ vana dɛnɛ palaa coo, o tuinun vana iɲíí lekɛ́ndɛi le tùú o co Mɛlɛka lo o lediom coo-o kpeekpeiyo yɛ.

³³ Kani o co a kɔlkɛndɛ le o tuisia vana siɛmbulan te, o co o hɛnan ndɔ nin te o saangiaa vanndacieea le.

³⁴ Te vana nɛw pɛ vanaa kaasoa co o lɛŋnden nin-nda kpow a labɛngu,

³⁵ te vana kɛɛ pɛ di vanndacieea sinaa Ó-Hiow-Ɲɔɔn-Kpow-vo o hɔl,

³⁶ te vana tosal pɛ vanndo kafalan o yamɛi kiolɔɔ, vɛ̀ɛ̀ Mɛlɛka ci sɔɛi ken te?

³⁷ Nɛ̀ɛ́-nɛ̀ dimi yɛ isɔɔ mì i tosan? O co Mɛlɛka le kialu sɔɔn kpow le?

³⁸ Vɛ̀ɛ̀ o co Ó-Hiow-Ɲɔɔn-Kpow-vo o sondo le dɛnɛ vɔɔndo a dɛnɛ kɛndɔɔ fula le?

³⁹ Vanacieo, a hakila ndɔlan, o co yoomu, le yɛɛ nɛ o cɛɛŋun yɛ vɛlɛ?

⁴⁰ N mɛɛndian ndɔ kelala naalan, n dɔwnun-ndɔ lan taasi, o kon, mì n muungun Mɛlɛka o ibuŋ.

⁴¹ N piɛinun a kɔlta naalan kpow, mì n heelun balan o Hala co o halataala-o lo.

⁴² N tosa dɛnnda hakilan mí n yɔŋnun vanaa nila kalua. Nɔm Hala, a mel naa haki le.

⁴³ Má simbulun o kɔl nɔm tuwvo nin, má tisa naa kɔɔli cili. A tosa iɲíí a naa le, má diw naa.

⁴⁴ Má viannun o yumbuyumboo nin, yɔŋii piɛile naalen le tiiyaa o nɔm ndo.

⁴⁵ Má siinguu naa maa bil basaa, mí n va maa bil sállo caanda tɛɛn.

⁴⁶ Yaamɔa naa kpow a co sondolan kumbio le naa tiŋɔɔ.

⁴⁷ Dɛnɛ komal naa o laan-ndo co hoo ni: siòònde, kɔl yulan-yulanndo, tambei a kpundɔɔ.

⁴⁸ Mɛmɛan ma co ya tolɔɔ maa mɛmma pee pɔmbɔ, le kpundɛ tol vanaa nia coo-o.

⁴⁹ Hɔlta nilan la co mɛmɛan tuisio tuŋ, kani pɛngi oo pɛngi co le,

⁵⁰ háá mì Mɛlɛka lo nɛɛ o co o halataala-a, mò muli hɔlla mò tofa.

⁵¹ Hɔlta nilan la luei ya o sangaa nin, le tùú ya co cuavaa laandua kobi nuu cɔu o sangaa nin-ndo.

⁵² Vanaa co ya yɛlen tollo o fondo fúúo coo-a va ya tovɔɔ mɛɛ vana toaw yowvo nuaa yɛ.

⁵³ À mal-la o kiyɛiyo o soondo nin, má va ya viiyo a powtan haliko mi vi.

⁵⁴ Mí mɛnndan ma hel, mí mɛɛyaa lenin, mí dimi aa: ‹Mbɔ̀ ya yoomu nuu cuu fɔ́!›

⁵⁵ I lo o soondo nin ndon, mí veelu nɔm Mɛlɛka.

⁵⁶ Má tuɛi ya koŋullo aa: ‹Kíndàl-la nilan mà kɛɛ veelu ya co nɔm a mɔnɛi le ya malaa-o tueyɔɔ le.›

⁵⁷ Paale ya veelu nɔm le ya malaa len, má sɔɔnguu, má dimul-la aa: ‹Yɔŋ isiòòn te.›

⁵⁸ Maalii, má soaa le ya, má baŋa yoomu nuu.

⁵⁹ Mɛlɛka, má lɔaanun ibuŋ le ya. Lelan ke ya dí co le ya-o.

⁶⁰ Nɔm pila ce mɛɛ ndáà soli mɔnɛ a ya yɛ, má ca dúmbú ndáà yii ya-o kpow.

⁶¹ Mɛlɛka, a tuei ɲɛ va nda fulaa o sondo-o, a sina dúmbúla ndáà tuu le ya lan kpow.

⁶² Paalen a ɲumndan, yaamɔaa nia co tuula vɔɔnndan a ya, a co sɔɔn vɔɔnndon dimio a ya o sondo.

⁶³ A cal pɛ, a cal a ya o lasondo, a cɛn pɛ, a cɛn a ya o lasondo.

⁶⁴ Éé Mɛlɛka! Mingul nda mɛɛ dɛnnda nda tosa lan la co yɛ.

⁶⁵ Suumiaa nda kɔltan, mì kon siŋnun dangaa le nda.

⁶⁶ Tol nda kɔɔli a kɔltuwvo, mà cii nda o lɛŋnden coo kpow.»